5 benepisyo ng ‘di pagsusuot ng panty

ni Justine Daguno - @Life and Style | August 28, 2021

Maraming puwedeng makalimutan sa araw-araw, pero isang bagay ang hindi puwedeng mangyari — ang hindi pagsusuot ng underwear. Hindi tulad sa Western countries, kilalang konserbatibo ang tayong mga Pinoy kaya big deal ang hindi pagsusuot nito.

Ayon sa pag-aaral, ito ay dahil sa social norm kung saan ang mga taong hindi nag-a-underwear ay malaswa o liberated agad. Pero knows n’yo ba na may magandang epekto sa katawan ang hindi pagsusuot ng underwear? Yup, narito ang ilan sa mga ito:

1. MAAARING MAIWASAN ANG IMPEKSIYON. Sa katagalan na hindi pagsusuot ng underwear, maaaring maiwasan ang pagkakaroon ng urinary tract o yeast infection. Bakit? Ayon kay Dr. Nini Mai, DACM, madalas ma-absorb ng underwear ang sobrang pawis at mikrobyo. Kaya’t ang naiipong pawis ang siyang pinagmumulan ng fungus na dahilan kaya nagkakaroon ng yeast infections at iba pang uri ng impeksiyon.

2. MAS MAKAKAHINGA ‘DOWN THERE’. Ayon sa OB-GYN na si Alyse Kelly-Jones, tulad sa katawan, kailangan ding makahinga ‘down there’. Payo nito, mas makabubuti kung walang underwear, lalo na sa pagtulog nang sa gayun ay maging presko at maaliwalas ang pakiramdam sa bahaging ito. Ang ganitong routine ay nakatutulong din upang magkaroon ng maginhawa o magandang mood paggising.

3. MAIIWASAN ANG PANGINGITIM. Paliwanag ng OB-GYN na si Kecia Gaither, may iba’t ibang uri ng tela ang underwear. Ang pagsusuot ng underwear na masyadong mahigpit ang dahilan kung bakit nagkakaroon ng friction na nagdudulot ng iritasyon. Ito ang dahilan kung bakit nangingitim ang bahaging ito.

4. MAI-IMPROVE ANG SIRKULASYON NG DUGO. Bukod sa komportable ang pakiramdam kapag walang suot na underwear, nakatutulong din ito upang mapaganda ang sirkulasyon ng ating dugo. Ani Dr. Donnica Moore, sa pagsusuot ng masikip na panloob ay nakaaapekto sa sirkulasyon ng dugo kung saan mas mahigpit ay mas hirap ang dugo na makadaloy sa ating katawan, na siya namang hindi maganda para sa ating kalusugan.

5. MAIIWASAN ANG DIGESTIVE ISSUES. May pag-aaral din na ang hindi pagsusuot ng underwear ay nakatutulong para maiwasan ang mga digestive issue, tulad ng acid reflux. Ang masikip na underwear ay nakapagdudulot ng pressure, hindi lamang sa bahaging tinatakpan nito kundi maging sa tiyan. Kapag masyadong masikip ang suot ay mas malakas ang pressure na kaya mas naitutulak ang acid sa esophagus na nagdudulot ng mabilis na pag-akyat ng acid o kaya nagkakaroon ng madalas na acid reflux.

Sabi nga nila, walang mawawala kung susubukan ang isang bagay. Pero tandaan, may epekto ang lahat ng ating gagawin, maaaring makabuti o hindi. Walang masama na matututo sa mga bagay na gusto nating subukan, pero dapat maging responsable tayo nang sa gayun ay hindi mapasama ang sarili, gayundin hindi makaapekto sa ibang tao. Okay?

Para iwas-away at more respeto sa sarili… Dapat gawin kung magre-react sa kritisismo

ni Justine Daguno - @Life and Style | August 24, 2021

Personal man o sa social media, palagi tayong may makakasalamuhang kritiko o namumuna. Sila ‘yung tipong may gawin man o wala ang kanilang kapwa, palagi nila itong napapansin o nakikita. Lahat ay maaaring magbigay-kritisismo, pero hindi lahat ay valid.

Ayon sa pag-aaral, tulad ng kritisismo, natural din tayong defensive bilang tugon sa mga ito. Pero upang maiwasan ang walang kuwentang argumento o hindi pagkakaintindihan, narito ang ilang paraan upang mabigyang-tugon ito nang name-maintain ang respeto sa sarili:

1. MAKINIG MUNA BAGO MAGSALITA. Hindi lahat ng salita nang salita ay may laman ang sinasabi. Karamihan sa kanila, bukod sa gusto lang ng atensiyon ay kulang din sa pang-unawa sa iba’t ibang uri ng sitwasyon. Kapag may namuna sa atin, pakinggan muna kung paano niya ito sinabi at ‘wag agad tumugon. Isiping mabuti kung makabuluhan ba pumatol o mas better kung hayaan na lang ito sa kanyang opinyon o paniniwala.

2. MAGTANONG. Maraming pabida sa paligid o ‘yung mga ‘know-it-all’ na tao, upang maiwasan ang “toleration sa maling krisismo” ay magtanong tayo. Tanungin ang basehan nito sa ideyang nasabi o sa napuna. ‘Wag magpadala sa mga sinasabi nito, ang pagtatanong ay maaaring pandagdag-kaalaman o panghuli sa mga nagmamagaling lamang.

3. ‘WAG MAG-FOCUS SA ISANG OPINYON. Bawat isa ay may kani-kanyang antas ng talino na ibig sabihin, hindi lahat ay alam natin. Bukod sa puna na nasabi sa ‘yo ng isang tao, makabubuti kung hihingi rin ng ibang opinyon sa iba. Puwedeng sa kaibigan, pamilya, malapit na katrabaho o sinuman mas nakakakilala sa ‘yo.

4. MAG-REFLECT. Maaaring ang kapintasan sa atin ng ibang tao ay maaaring makatulong o makasira sa ating pagkatao. Sa bawat pagkakataong mapupuna tayo, bigyan ng oras ang sarili upang mag-reflect sa mga ito. ‘Wag agad itong paniwalaan at isisi sa sarili, tumingin sa mas malaking ideya at baguhin kung kinakailangan para sa ikabubuti ng sarili.

Madalas, ang kritisismo ay salita o kapintasan lamang na bahagi ng hindi perpektong pagkatao. Kung ang kritisismo ay mula sa social media, ‘wag na mag-aksaya ng panahon na patulan ito. Kung ito naman ay mula sa kakilala, maging mahinahon at ‘wag patol nang patol. Tandaan, ang kritisismo ay kritisismo, pero ang salita na hindi pinag-iisipan, madalas nagdudulot ng hindi pagkakaunawaan. Okie?

Tulog sa araw at gising sa gabi? Read mo ‘to!

6 tips para sa healthy lifestyle kahit paiba-iba ang oras ng trabaho.

ni Justine Daguno - @Life and Style | August 10, 2021

Walang pinipiling panahon ang trabaho, anumang oras ay kailangan itong tugunan dahil ito ang ating pinakakakitaan kaya nakaka-survive tayo sa araw-araw.

At dahil in demand na trabaho at maganda ang development ng business process outsourcing (BPO), marami ang tumatangkilik ang industriyang ‘to. Bukod sa malaki na ang suweldo at magandang benepisyo, marami pa itong oportunidad na bukas para sa lahat ng antas at estado. ‘Yun nga lang, madalas ito ay nightshift o kailangang magtrabaho sa mga oras na nakasanayan na ang pagtulog.

Pero worry more, narito ang ilan sa mga dapat gawin para mapanatiling healthy kahit nasa ang trabaho ay panggabi:

1. KUMAIN NG HIGH PROTEIN FOODS. Ang gulay, crackers, prutas at iba pang high protein na pagkain ay malaki ang naitutulong upang mapanatili tayong alerto, partikular sa mga oras na dapat natutulog o nagpapahinga na ang ating sistema.

2. KUMAIN NANG TAMA. Kumain nang tama — kumain nang naaayon sa oras. Ang pagkain ng tama o saktong oras sa loob ng isang linggo ay makatutulong upang ma-maintain ang body clock o magkaroon ng routine. Kapag naka-setup na sa isip ang mga dapat gawin, madaling masasanay o makasusunod ang katawan kaya mabago man ang oras ng tulog o pagiging aktibo, hindi ito magiging problema.

3. BAWASAN ANG PAG-INOM NG ALAK. Hindi magandang ideya ang pag-inom ng alak bago matulog, lalo na kung nightshift worker. Bagama’t dahil dito ay mabilis na inaantok o nakatutulog, isa sa mga “pangmatagalang epekto” nito ay ang pagkakaroon ng paputul-putol na tulog o ‘yung nagigising mula sa dalawa hanggang tatlong oras na pagkakatulog — nakainom man ng alak o hindi.

4. IWASAN ANG CAFFEINATED DRINKS. Bukod sa alak, bawasan ang pagkonsumo sa mga inuming may caffeine, tulad ng tsaa, cola o soda, at kape. Sa regular na pagkonsumo nito, mas nagiging alerto ang katawan pero hindi kontrolado. Ibig sabihin, maaaring maging energetic sa mga panahong dapat nagpapahinga, habang makararamdam naman ng panghihina sa mga pagkakataong dapat gising ang diwa.

5. ‘WAG MATULOG NANG GUTOM. Iwasang matulog nang walang laman ang tiyan. Kung wala sa mood o walang ganang kumain, sikaping magkonsumo man lang kahit isang baso ng gatas o anumang dairy products nang sa gayun ay mas maging maginhawa ang pakiramdam sa paggising.

6. HINDI DAPAT UMASA SA MEDICATION. Karamihan sa mga nightshift workers ay umaasa sa sleeping pills at iba pang sedatives para mag-adjust o madaling makatulog sa umaga, na siya namang hindi magandang ideya dahil ito ay mas makasisira sa ating sleep pattern. Tandaan na kailangan ng prescription o payo ng doktor bago mag-take anumang uri ng medikasyon.

Isa sa mga bagay na mahirap pero ‘required’ nating gawin ay ang ‘adjustments’ o pag-a-adjust — sa mga taong nakakasalamuha, sa pabagu-bagong panahon, sa environment o uri ng trabaho at maging ang lifestyle mismo. Pahalagahan ang trabaho, pero iprayoridad palagi ang sariling kapakanan. Okay?