Sale, promo at live selling… Paano mapaparami ang mga online customer?

ni Justine Daguno - @Life and Style | October 17, 2021

Mula nang magsimula ang pandemya, marami sa atin ang pumasok na sa mundo ng pagnenegosyo, partikular ang online business. Marami man ang nawalan ng trabaho, namulat naman sa ibang paraan para magkaroon ng pagkakakitaan. Ang maganda sa pag-o-online selling, less-hassle, sa pagalingan ng diskarte ay paniguradong kikita talaga.

Sa kabilang banda, dahil halos lahat nga ay nagnenegosyo na, kailangan talagang makipagsabayan para hindi matulog ang business at siyempre, ang bumubuhay dito ay ang mga mamimili. Kaya naman, narito ang ilan sa mga paraaan para dumami ang online customers:

1. MAGBIGAY NG SAMPLE. Epektibo itong paraan upang magkaroon o madagdagan ang mga kustomer. Oks ito lalo na kung nagsisimula pa lamang sa negosyo o may bagong ipakikilalang produkto. Tayong mga Pinoy, mas gustong nasubukan muna ang produkto bago ito tangilikin. Tandaan, ang “pagbibigay ng sample” ay isang chance lang dapat ibigay mo ang best shot!

2. MAG-SALE O MAG-PROMO. Ang ganitong estratehiya ay kailangang gawin kapag hindi na gumagalaw ang sales o kung tila nauumay na ang mga customer. Isa pa sa mga ugali ng mga Pinoy ay madali silang “mabudol” o maengganyo sa mga “sale” o “promo” dahil sa kaisipan mas makakatipid sila kumpara sa pagbili sa regular na presyo ng produkto. Kung gustong mapansin ng mga tao ang iyong negosyo, subukan ang diskarte ‘to.

3. MAG-LIVE SELLING. Dahil halos lahat ng mga tao ngayon ay gumagamit na ng social media — pang-school, trabaho o libangan man ay siguradong puwedeng makakuha ng mga customer. Libre lang ang ganitong feature sa FB kaya samantalahin natin. Well, kung personality mo ang pag-e-entertain, paniguradong sisiw ‘to, sure na makakahakot ng mga magma-“mine” sa iyong produkto!

4. SUMALI SA MGA FB GROUPS. Epektibo ang ganitong strategy para mas ma-target ang market. Halimbawa, kung ang business ay may kinalaman sa “mommy and baby thingy”, puwedeng sumali sa FB groups na ang miyembro ay mommies, dahil bukod sa forum, karamihan sa kanila ay naghahanap din ng mga recommendations kung saan puwede mong ipasok ang iyong negosyo.

5. GAMITIN LAHAT NG SOCIAL MEDIA PLATFORMS. Walang dapat ikahiya kung legal ang iyong negosyo. I-promote ito nang i-promote hanggang sa tangkilikin ito, at mismong customer na ang lalapit sa ‘yo. Hindi lang sa FB puwede makabenta, nar’yan din ang Twitter, Instagram, YouTube at marami pang iba. Pag-aralan ang socmed platform na swak sa iyong online business.

Ngayong pandemya, dapat maging madiskarte dahil walang mangyayari kung aasa lamang sa iisang source of income. Samantalahin ang mga pagkakataong nakukuha sa social media, hindi lamang libangan ang puwede ritong mapala kundi oportunidad din. Walang masama kung susubukan ang isang bagay, lalo na kung sa makakatulong sa sarili, gayundin sa ating kabuhayan.

Bukod sa pagmumog ng tubig at asin… Bawang at peppermint tea bags, oks na home remedy sa

sakit ng ngipin.

ni Justine Daguno - @Life and Style | October 05, 2021

Isa sa napakahirap indahin sa buhay ay ang sumasakit na ngipin. True naman, hindi ito ganu’n kadaling dedmahin, lalo pa’t bukod sa pakikipag-chikahan, isa sa mga paborito nating gawin ay ang kumain.

Madalas, may pagkakataon pa na kahit lumaklak na ng gamot ay tila wa’ epek pa rin, kaya’t imbes na sakit sa ngipin lang ang problema, madadamay pati ang ulo dahil sobrang nakaka-stress talaga ‘to. Feel mo?

Pero, worry no more dahil keri nang i-relieve ang sakit ng ngipin sa mga simpleng paraan. Goods ‘to dahil mura na, natural pa, sundin lamang ang ilang steps nito:

1. TUBIG NA MAY ASIN. Knows n’yo ba na ang tubig na may asin ay natural na disinfectant? Sa pagmumumog nito, madaling naaalis ang mga bakterya mula sa naiwang pagkain at iba pang particles na naipon sa ngipin na dahilan kaya ito sumasakit. Gayundin, makatutulong ito upang maiwasan ang pamamaga sa bahaging ito. Sa paggamit nito, ihalo lamang ang 1/2 teaspoon (tsp) ng asin sa isang baso ng maligamgam na tubig saka ito gamitin bilang mouthwash o imumog ilang minuto pagkatapos magsepilyo.

2. HYDROGEN PEROXIDE. Epektibo rin na pang-remedyo sa sakit at pamamaga ng ngipin ang pagmumumog ng hydrogen peroxide o agua oxigenada. Ito rin ay mabisang nakapapatay ng bakterya at nakapagpapatigil ng pagdurugo ng gilagid. Bago ito gamiting pangmumog, kailangang pantay ang dami nito sa tubig na meron ang iyong baso (hindi kailangang puno) saka ito haluin at siguraduhing na-dilute ito saka imumog sa loob ng isa hanggang dalawang minuto.

3. COLD COMPRESS. Oks din gumamit ng cold compress upang mapawi ang sakit ng ngipin, lalo na kung trauma o pagkabunggo ang dahilan ng pagsakit nito. Sa pamamagitan nito, maiiwasan ang pamamaga. Ibalot lamang ang ilang cubes o katamtamang laki ng yelo sa towel saka ito idampi sa apektadong bahagi sa loob ng 20-minuto, maaari itong ulitin kada dalawang oras hanggang sa tuluyang humupa ang pamamaga o mawala ang sakit.

4. PEPPERMINT TEA BAGS. Ito naman ay mabisang pampamanhid o pampakalma ng sensitive na gilagid. Kumuha lamang ng peppermint tea bags na bahagya lamang pinalamig (kailangang may katamtaman itong init) saka ito ilagay sa masakit na bahagi. Maaari ring gumamit ng malamig nito, pero kailangan itong ilagay sa freezer ng ilang minuto bago gamitin.

5. BAWANG. Kilala ang bawang dahil sa dami ng medical alternatives nito. Hindi lamang ito pamatay ng mga bakterya sa ngipin o iba pang bahagi ng bunganga, kundi epektibo rin itong pain reliever. Magdurog lamang ng bawang hanggang sa tila maging paste ang consistency nito saka ilagay sa masakit na bahagi. Maaari rin itong lagyan ng kaunting asin upang mas maging epektibo.

Tandaan na ang mga nabanggit natin ay pansamantalang pamawi lamang ng sakit ng ngipin. Magkakaiba ang dahilan kung bakit ito sumasakit kaya mahalagang malunasan ito depende sa sitwasyon. May pagkakataong ang dahilan ay kulang lamang sa good hygiene, pero madalas ay kailangan na talagang bumisita sa dentista. ‘Ika nga ng mga ito, “Ano’ng gusto mo, isang bisita lang o paulit-ulit na pagsakit ng ngipin?” ‘Yan, mamili ka. Okie?

4 Home remedies laban sa UTI

ni Justine Daguno - @Life and Style | September 25, 2021

Milyun-milyon sa buong mundo ang tinatamaan ng Urinary Tract Infections o UTI, ayon sa pag-aaral. Ito ay impeksiyon na nakaaapekto sa urinary tract, kabilang ang kidneys, ureters, bladder o urethra.

Ilan sa mga sintomas nito ay hirap o masakit na pag-ihi, madalas na pag-ihi, ‘cloudy’ o ‘dark’ na ihi, matapang na amoy ng ihi, pakiramdam na naiihi kahit katatapos lamang itong gawin at pagsakit ng pelvic.

Bagama’t karaniwan itong ginagamot sa pamamagitan ng mga antibiotics, knows n’yo ba na maaari itong magamot sa natural na paraan? Narito ang ilan sa mga home remedies para sa UTI:

1. UMINOM NG MARAMING TUBIG. Ang kakulangan ng supply ng tubig sa katawan ang isa sa mga karaniwang dahilan kung bakit nati-trigger ang UTI, kaya’t napakaimportante na sapat ang kinokonsumong tubig ng pasyente. Katambal ng regular na pag-inom ng tubig ang pag-ihi, kung saan ito’y paraan upang ma-washout o mailabas ang bakterya sa urinary tract. Tandaan, ‘wag hintaying mauhaw muna nang husto bago uminom ng tubig.

2. SAPAT NA VITAMIN C. Ayon sa pag-aaral, mahalagang mayroong sapat ang Vitamin C upang hindi tamaan ng UTI o mabilis na maka-recover mula sa sakit na ito. Ang bitaminang ito ay mabisa upang maiwasan ang paglala ng impeksiyon. Ito ay nakapagpapataas ang acidity level sa ihi kung saan madaling napapatay ang bakterya na dahilan ng impeksiyon. Maaaring mag-take ng supplements o magkonsumo ng mga prutas, tulad ng orange, dalandan, lemon at iba pa.

3. MAGKONSUMO NG PROBIOTIC. Malaking bagay din ang pagkonsumo ng probiotics para maiwasan o madaling gumaling ang UTI. Ito ay maaaring makuha sa supplements o sa pagkain tulad ng kimchi, soya at yogurt. Ilan sa mga benepisyo nito ay pambalanse sa digestive system, at pampalakas din ng immune system.

4. HEALTHY HABITS. Isa sa mga dahilan kung bakit nagkakaroon ng UTI ay dahil sa lifestyle. Panatilihin ang hygiene at maayos na paggamit ng banyo. Una, ‘wag pigilan ang pag-ihi dahil dito nagkakaroon ng bakterya sa urinary tract. Gayundin, umihi pagkatapos makipagtalik upang mailabas ang anumang uri ng dumi o bakterya. Ugaliin ding pagkatapos umihi, magpunas o maghugas mula sa ari patungo sa puwit nang sa gayun ay maiwasan mapunta sa ari ang bakterya.

Anumang uri ng sakit ay hindi dapat pinalalampas o dinidedma, lahat ay kailangang agapan bago pa lumala. Ang mga nabanggit na home remedy ay maaaring gawing ‘pag-iwas’ o sa pagsisimula. Makabubuti pa rin na magpakonsulta sa doktor upang mas magabayan sa mga bagay na kailangang gawin upang ito ay magamot sa tamang paraan. Gets mo?