Dahil sa lumang truck… UTOL NI SAM, TUMALSIK SA MOTOR, MILAGRONG NAKALIGTAS

ni Julie Bonifacio @Winner | Jan. 13, 2025

Photo: Sam Milby at Ada Milby - IG

Milagro ang bungad ng aktor na si Sam Milby sa kanyang caption sa series of photos and videos pagkatapos makaligtas at mapagaling ang naaksidente niyang sister na si Ada Milby na ipinost niya sa kanyang Instagram (IG) recently.

Sa unang photo na ipinost ni Sam ay inaalalayan niya ang hirap pang maglakad na si Ada sa corridor ng ospital.

Sa dalawang videos na ipinost ni Sam ay makikita na isang himala talaga na nakaligtas si Ada nu’ng tumalsik siya sakay ng kanyang motor pagkatapos mabangga ng likuran ng isang sasakyan na sinagasaan naman ng malaking container truck. 

Caption ni Sam: “Milagro. ‘Yun ang nangyari sa Ate ko last month. Definitely not the way she wanted to spend the holidays but thank you Lord she is safe and healing. She walked away with no broken bones, just badly bruised with some stitches (S’ya ‘yung naka-motor sa video).

“But sadly a young man’s life was taken. Nawalan daw ng preno ‘yung truck at parang madalas nangyayari to: (I hope more can be done to force companies to do regular checkups and maintenance for a lot of these older trucks).

“So glad you’re okay and love you, Sis.”

Sa huli ay binigyan ng credit ni Sam ang mga may-ari ng dashcams ng truck at grab driver na nakakuha ng video sa aksidente. 

Well, nag-post ng comment ang mga celebrity friends/followers ni Sam sa IG gaya nina Judy Ann Santos, KC Concepcion, Angeline Quinto, Vhong Navarro, Enchong Dee, Chie Filomeno, Markki Stroem, Ivana Alawi, Michael de Mesa at Beautederm owner na si Rhea Tan.

Mensahe ni Juday, “Oh my…glad your sister is okay (heart emoji) her guardian angel really took care of her.”

“So glad to hear, Ada is okay, praying for her speedy recovery!!!” ani KC.

Sabi naman ni Michael de Mesa, “Oh, my God. So glad Ada is okay, that was intense. Something should really be done with these trucks that are not maintained.”

Si Ada ay isang Filipino-American rugby player na naglalaro sa Philippine national women’s team. Siya rin ang kauna-unahang female member of the World Rugby Council. At siya ngayon ang presidente ng Philippine Rugby Football Union.

Sumabak din pala si Ada sa Iraq war bilang staff sergeant sa US military. May dalawang anak na babae si Ada na pawang paborito ni Uncle Sam.

---

Naging instant bayani ang dating sexy star na si Klaudia Koronel sa paglikas sa kanyang 75-year old na  pasyente na may sakit na dementia mula sa wildfire sa Los Angeles, California sa Amerika.

Nag-live si Klaudia sa kanyang Facebook (FB) page habang nililikas ang kanyang Amerikanang pasyente dahil umabot na sa likod ng bahay nito sa Palisades ang wildfire.

Si Klaudia ay naninirahan at nagtatrabaho na sa US bilang caregiver.

Caption ni Klaudia sa kanyang video post sa FB, “Actual footage o live ko na experience ko mismo ang wildfire sa Pasadena. Nagpapa-panic ako. Hanggang ngayon, traumatized ako.

Kasi ‘pag nakaka-receive ako ng emergency alert, natataranta ako at nagpa-panic.”

Sa video ay mapapanood ang bahay ng pasyente ni Klaudia na inabot na ng apoy ang likuran.

Lahad ni Klaudia sa video, “Masusunog na po ang bahay namin. God! napakabilis. Relax pa ako kanina kasi sa isip ko malayo naman sa Palisades ang sunog. Tapos biglang natanaw ko may apoy na sa likod bahay at naka-receive ako ng alert na lumikas na kami.”

Sa pagtatapos ng video ay hindi pa malaman ni Klaudia kung saan sila pulunta pagkatapos lisanin ang bahay ng kanyang pasyente.

Sa sunod na FB post ni Klaudia ay ipinakita niya ang mga sandamakmak na mga residente na naapektuhan ng wildfire ang nagpuntahan sa Santa Anita Park bilang pansamantalang evacuation place.

Post ni Klaudia, “Please help them po, masuwerte kami ng pasyente ko kasi nilagay kami ng family sa Pasadena hotel. Karamihan, kawawa po talaga…”

Sa ngayon ay nanawagan ng volunteers and donation ang mga evacuees sa Santa Anita Park at sa iba pang mga lugar sa Los Angeles.

Sana raw siya na lang ang kinuha… DINA, KINUWESTIYON SI LORD SA PAGKAMATAY NG MISTER

ni Julie Bonifacio @Winner | Jan. 12, 2025

Photo: Instagram @dinabonnevie

Dinagsa ng mga celebrities na nakiramay at nagpadala ng mga bulaklak ang wake ng mister ni Dina Bonnevie na si Agriculture Undersecretary Deogracias Victor “DV” Savellano.

Last Friday ay personal kaming naghatid ng pakikidalamhati kay Ms. D (nakagawiang tawag namin kay Dina) sa Aeternitas Chapels & Columbarium sa Commonwealth, Quezon City.

Nakasabay pa namin sa pag-akyat si Gladys Reyes na nakasama ni Ms. D sa isang serye sa GMA-7. At inabutan namin sa Chapel of Hera sa 7th floor si Ms. D na kausap si former Makati Mayor Jejomar Binay, Jr.. 

Namataan namin pagpasok ng chapel ang solong anak na babae ni Dina kay Vic Sotto na si Danica Sotto-Pingris. Pero bigla rin siyang nawala sa loob ng chapel after makahanap kami ng upuan. 

Maaaring nag-aalala si Danica na baka matanong namin siya tungkol sa isyu kay Vic. Although, aware naman kami na ‘di ‘yun ang tamang pagkakataon para magtanong sa kanya tungkol sa kanyang ama.

Anyway, ramdam namin ang appreciation at pasasalamat ni Ms. D sa mga nakiramay sa kanilang pamilya that night. Talagang lahat ng dumating, at kahit paisa-isa pa, malugod niyang tinatanggap at kanyang ineestima, kahit na nga paulit-ulit pa siyang nagkukuwento sa nangyari sa kanyang asawa.

Bigla na lang daw narinig ni Ms. D na kumalabog sa sahig ang kanyang asawa dahil sa matinding pain sa kanyang likod. 

Sa Diliman Hospital unang dinala ni Ms. D ang kanyang mister, pero nagawa raw niyang ilipat sa Makati Medical Center at doon naoperahan. 

Pagkatapos ng operasyon, limang beses daw nag-flatline si Usec DV. Nailigtas daw ito pagkatapos ng apat na beses na flatlines pero tuluyan nang bumigay sa ika-lima. 

Abdominal aneurysm ang sinasabing cause of death ni Usec. DV. Pero nanindigan si Ms. D na kung mga espesyalistang doktor ang nandu’n at nag-monitor sa kanyang asawa, maaaring naligtas pa ang buhay nito.

Amazed na amazed si Ms. D sa mga taong nagpunta sa lamay, nalungkot sa pagkawala ng kanyang mister mapa-pulitika man or sa kanyang mga katrabaho sa Department of Agriculture, at nagkuwento kung gaano kabuting tao si Usec. DV.

Dahil d’yan, nasambit pa ni Ms. D na sana, siya na lang ang kinuha ni Lord. Naniniwala kasi siya na marami pang gagawin at magagawa ang kanyang mister na dating representative ng 1st District ng  Ilocos Sur.

Inamin din niya na kinuwestiyon niya ang Diyos sa pagkamatay ng kanyang asawa. Marami naman daw masasamang tao d’yan, ba’t hindi na lang daw ‘yun ang kinuha? 

Sa Linggo ay dadalhin na sa Ilocos Sur ang mga labi ni Usec. DV at ibuburol sa Savellano residence sa Cabugao, Ilocos Sur hanggang sa January 16, Huwebes. Ililibing ito kinabukasan sa Cabugao Cemetery.

After the burial, mananatili si Ms. D sa bahay nila sa Ilocos Sur at doon na rin magse-celebrate ng kanyang kaarawan sa January 27.

Hindi raw sure ni Ms. D kung paano haharapin ang bukas na wala ang kanyang mister.

In fact, sa tuwing natutulog daw siya ay paulit-ulit niyang nakita kung paano namatay ang kanyang asawa. Kaya tiyak niya na mahihirapan siya sa mga susunod na raw, linggo at maaaring mga buwan pa.

Muli, ang aming pakikiramay kay Ms. D at sa mga anak ni Usec. DV.

---

PASABOG ang pagbubukas ng bagong taon para sa FPJ’s Batang Quiapo (BQ) sa pagdiriwang nito ng ika-100 na linggo at sa pagsisimula ng ikalawang taong selebrasyon ng Kapamilya teleserye simula nu’ng Enero 6. 

Kaabang-abang dito ang muling paghaharap nina Tanggol (Coco Martin) at Olga (Irma Adlawan) kung saan isang buhay ang malalagay sa panganib nang biglang sumulpot si Marites (Cherry Pie Picache) sa bakbakan ng dalawa para subukang iligtas ang anak niyang si Tanggol.

Isang malaking rebelasyon din ang yayanig sa buhay ni Tanggol dahil sa wakas ay isisiwalat na ni Olga sa kanya ang katotohanang hindi si Rigor (John Estrada) ang totoo niyang ama. 

Marami pang sorpresa ang dapat abangan ng mga manonood ng BQ sa patuloy na pagdiriwang nito ng ikalawang taong selebrasyon. 

Huwag palampasin ang maaaksiyong kaganapan sa BQ, na hango sa orihinal na kuwento ng Regal Films, gabi-gabi ng 8 PM sa Kapamilya Channel, A2Z, TV5, iWantTFC, at Kapamilya Online Live sa YouTube (YT) channel at Facebook (FB) page ng ABS-CBN Entertainment.

Mapapanood din ito sa labas ng Pilipinas sa pamamagitan ng iWantTFC at The Filipino Channel (TFC) sa cable at IPTV.

Demanda ni Vic, sasagutin daw… DIREK DARRYL: LAHAT NG AKING INILABAS, NAKA-DOKUMENTO, ‘DI GAWA-GAWA LANG

ni Julie Bonifacio @Winner | Jan. 11, 2025

Photo: Darryl Yap - The Rapists of Pepsi Paloma - VinCentiments

Agad na naglabas ng reaksiyon ang direktor ng controversial movie na The Rapists of Pepsi Paloma (TROPP) na si Darryl Yap sa isinampang kaso laban sa kanya ni Vic Sotto.

On the day na nagsampa ng kaso si Vic sa Muntinlupa City Regional Trial Court (RTC) ay nag-post sa Facebook (FB) si Direk Darryl ng kanyang reaksiyon.

Inilagay niya sa caption ng ipinost niyang frame ng bida ng Pepsi Paloma biopic na si Rhed Bustamante ang kanyang saloobin sa kasong inihain laban sa kanya.

Caption ni Direk Darryl: “KALAYAAN ng kahit sino ang magsampa ng reklamo. Walang may monopolyo sa katarungan, lalo na sa katotohanan.

“Malaya ang sinuman na magsampa ng reklamo, para mas maging malinaw ang totoo. Dahil sa huli, KATOTOHANAN lang ang depensa sa lahat ng KATANUNGAN. 

“Inurong ba ni Pepsi ang asunto? Ang sagot ay nasa litrato.

“Hindi ba napatunayan ang akusasyon ni Pepsi?” Ang sagot ay nasa litrato.

“Pero NAGSAMPA BA NG KASONG RAPE SI PEPSI LABAN KAY VIC SOTTO? Ang sagot rin ay nasa litrato.

“Nagsinungaling ba ang teaser? Ang sagot ay wala sa litrato… ito ay nasa maraming lathalain, ito ay nasa mga naburang bidyo, ito ay nasa mga lumang dyaryo.

“Alam nang mga nakakaalam noon, at alam na ng mga nagtatanong ngayon.

“Delia, Pepsi— Babalik tayo sa Korte (smile emoji).

“Ang Pilipino sa Sinehan #TROPP #TROPP2025.”

Samantala, nakakuha rin kami ng kopya ng opisyal na pahayag ni Direk Darryl bilang tugon sa demandang isinampa laban sa kanya.

Ayon kay Direk Darryl, “Agad naman po naming sasagutin ang reklamo ‘pag nakarating na po sa ‘min; ang sa ‘kin lamang, lahat po ng materyal na aking inilabas o ilalabas ay nakadokumento - hindi ko po gawa-gawa para makapanira.”

Wala raw personalan ang paggawa ng eksena ni Direk Darryl sa Pepsi Paloma movie kung nabanggit ang pangalan ni Vic.

“Wala pong personalan, naglalahad lamang po ako ng nangyari sa nakaraan na makikita sa mga nailathala noong 1980s. Naisapubliko naman po ‘yun.

“Maluwag po sa aking kaloobang tanggapin ang isinampang kaso ni Vic Sotto. Malaya naman po ang kahit na sino magsampa ng kaso - gaya po ng naisampang rape case noon ni Pepsi Paloma laban sa kanya na siya pong natatanging laman ng teaser.

“Nasa caption din po ng post na inurong ang kaso. Hindi po tayo nagkulang.

“Mahalagang mapanood muna nila ang buong pelikula,” diin ni Direk Darryl.

---

To the rescue kay Vic… 

SEN. TITO: DIREK DARRYL, LAGOT SA PAGGAWA NG GIMIK PARA KUMITA

Join na rin si former Senator Tito Sotto sa kontrobersiyal na kinasasangkutan ng kapatid niya na si Vic Sotto.

Nag-post sa X (dating Twitter) si Tito ng kanyang saloobin sa kontrobersiya nina Vic at Direk Darryl dahil sa biopic ng yumaong si Pepsi Paloma.

Post ni Tito, “When you rely on an old showbiz gimmick to make money and got your facts all wrong, you will falter, for sure!”

Siyempre, may mga reaksiyon ang mga netizens sa post ni Tito.

“It’s time to teach him (DY) a lesson in court.” 

“DY (Darryl Yap) bites more than he can chew on this one.”

“Pero bakit pinapa-delete po?”

“At madami rin sa YouTube (YT) ang gumawa about sa issue pero hindi kinasuhan? Million views din ang nakuha nila?”

Ganoon.