Segurista ang ex mo, Xian… KIM, NAGPA-FENG SHUI PARA MALAMAN KUNG COMPATIBLE SILA NI PAULO

ni Julie Bonifacio @Winner | Feb. 28, 2025

Photo: Kim Chiu - IG

Ilang linggo na lang ay ipapalabas na ang first movie together nina Kim Chiu at Paulo Avelino, ang My Love Will Make You Disappear (MLWMYD) directed by Chad Vidanes under Star Cinema.

Ngayon pa lang ay excited na ang KimPau fans, na makikita sa mga ginagawa nilang effort para makatulong sa promo ng MLWMYD na ipapalabas na on March 26.

Sabi ni Kim sa interbyu sa kanya ni MJ Felipe sa Star Patrol segment ng TV Patrol, “Ngayon ko lang na-experience itong massive support na parang, wala pa kaming poster reveal, may ginawa na silang poster sa likod ng tricycle, sa sari-sari stores, namimigay ng mga photocards. March 26 manood sila. 

“‘Yung ibinibigay nilang support is something different, we’re very lucky na meron kaming ganu’ng klaseng support.”

Sa interbyu ni MJ kay Kim ay nai-share ng other half ng KimPau na nag-consult pala siya ng isang feng shui expert para alamin ang kanyang kapalaran this year.

Ayon kay Kim, “Okey naman. Napa-feng shui ko na, okey naman daw ‘yung dragon at horse, sana magtuluy-tuloy.”

Ang “dragon” na tinutukoy ni Kim ay si Paulo na ipinanganak under the Year of the Dragon, habang si Kim naman ay Year of the Horse.

Ang resulta, compatible raw ang “dragon” at “horse” this year.

For sure, kinilig ang KimPau fans.

---

Binugbog na si Jellie, ‘di pa raw nagkaso…

JAM, NAKAALIS NA NG ‘PINAS, TODO-ENJOY SA JAPAN

NAGLALAMYERDA mag-isa sa Japan ang controversial ex-boyfriend ni Karla Estrada na si Jam Ignacio.

Nasilip namin ang post ni Jam sa kanyang latest story sa Instagram (IG) few hours bago namin isinulat ang aming kolum na ito.

Nakalagay sa IG Story ni Jam ang tumatakbong train. Kasunod ang piktyur ni Jam sa glass window ng train na nakasuot ng bucket hat habang nakaupo sa loob ng train.

Duda namin ay ilang araw nang nasa Japan si Jam. May mga naglabasan na rin kasing photos niya na kuha sa Japan. 

Maugong ang balita na umalis papuntang Japan si Jam right after ng kanyang sikretong pagbisita sa National Bureau of Investigation (NBI) noong Biyernes, February 21.

Nagpunta si Jam at ang kanyang abogado sa NBI pagkatapos na ‘di siya nagpakita sa araw na pagpapatawag sa kanya na mag-report sa NBI noong Huwebes, February 20.

Libre pa ring makalabas ng bansa si Jam dahil wala pa raw naisasampang kaso sa korte against him ang kampo ng ex-fiancée niya na si Jellie Aw.

Hindi pa raw kasi nakapaghain sa korte ang NBI. Kapag nangyari ‘yan, saka pa lang magpa-file ng counter-affidavit si Jam.

Eh, paano kung ‘di na bumalik ng bansa si Jam Ignacio kapag nasa korte na ang reklamo ni Jellie Aw?

Well…

---

WINNER si Dra. Vicki Belo sa apela ng dati niyang medical operations head sa Belo Medical Group (BMG) na si Reginald Grace Llorin sa Makati Regional Trial Court.

Kumbaga sa manok, na-double dead ang dating medical operations head (MOH) sa mga kasong kinaharap niya. 

Una, ang demanda sa kanya ni Dra. Vicki. At pangalawa, ang apela ng MOH na ibinasura ng Court of Appeals.

Dahil diyan, pinagbabayad pa ang ex-MOH ng korte ng halagang P4.5M damages para sa attorney’s fees.

Nilabag daw kasi nu’ng ex-MOH ang kontrata niya sa BMG kung saan nakapaloob ang dalawang non-compete agreement sa kumpanya ni Dra. Vicki.

Sinubukan naming kunan ng reaksiyon si Dra. Vicki, but as of press time, ‘di pa kami nakakatanggap ng kanyang sagot.

Pero may mga natuwa na nanalo ang BMG sa kaso. Unfair naman daw kasi ‘yung after bigyan ng training ang MOH, kinumpitensiya pa ang Belo.

May pabor din kay Dra. Vicki at sinabing tama ang ginawa nila. Para saan pa nga naman ang nakalagay sa contract nila na “non-compete” if hindi ia-apply sa mga ganyang klaseng empleyado.

Ang malala pa raw kasi ay ginagawa nilang calling card na “Galing kami sa Belo” sa halip na umalis quietly. ‘Yun pa ‘yung ginagawang pang-attract ng bagong trabaho.

Hala ka!

“Anak” nina Vilma at Claudine, naitaob na… HLA MOVIE NINA KATHRYN AT ALDEN, NAKA-P1.6 BILYON

ni Julie Bonifacio @Winner | Feb. 27, 2025

Photo: KathDen - IG, HLA

Ang pangalawa naman ay good news para sa mga fans nina Kathryn Bernardo at Alden Richards.

Ini-announce ng Star Cinema sa kanilang socmed account ang bagong record-breaking news na ginawa ng mega-blockbuster movie nila na pinagbidahan ng KathDen, ang Hello, Love, Again (HLA).

Caption sa post ng dalawang pictures ng mga bida ng HLA, “Thank you for sharing your joy with us! (yellow heart & airplane emoji).

“The highest-grossing Filipino film of all time, Hello, Love, Again has recorded ₱1.6 Billion Worldwide gross.

“Mahal namin kayo… Palagi! (heart hands emoji).”

Naungusan na ng HLA ang Anak nina Vilma Santos at Claudine Barretto bilang highest-grossing Filipino film of all time.

Ang Anak ay ipinrodyus din ng Star Cinema.

In fairness, ilang dekada rin bago nalaglag ang Anak as the highest-grossing film of all time.

Super happy din kami para sa blockbuster director na si Cathy Garcia. Ang daming record sa box-office ang giniba ng mga pelikula ni Direk Cathy.

Bukod sa balitang ito, magsisimula na rin si Direk Cathy ng bago niyang pelikula na pagbibidahan ni Belle Mariano.

Nape-pressure kaya si Belle na ma-handle ng box-office director and at the same time, ‘di malayong pagkumparahin sila ni Kathryn?

But as we see it, magandang sign ito for Belle Mariano na siya na talaga ang kasunod ni Kathryn na gagawing “reyna” ng Star Cinema.

---

Back-to-back record-breaking and history-making ang naka-post sa X (dating Twitter) kahapon.

Unahin na natin ang news sa international artist na si Rosé ng BLACKPINK na naka-duet ng Fil-Am singer na si Bruno Mars sa hit na hit na kantang APT.

Well, ang ka-member niyang si Lisa Manoban sa BLACKPINK ay nakatakda kasing mag-perform sa nalalapit na Oscar Awards Night sa US.

Ka-level na niya ang multi-award-winning Filipino actress and singer na si Lea Salonga bilang tanging Southeast Asian artist na nakapag-perform nang live sa Oscars noong 1993.

Feeling proud naman ang mga Pinoy netizens kay Lea Salonga.

Ilan sa mga comments ay… “I like the bragging of multi-awarded Filipino actress. That's nice.”

“Well, FILIPINOS DID IT FIRST (manicure emoji).”

“The only Southeast Asian... That’s a record.”

---

SPEAKING of records, nakapagtala ng 12M total views sa YouTube ang naganap na salpukan  nina Coco Martin at Christopher de Leon sa FPJ’s Batang Quiapo (BQ) sa loob lamang ng dalawang araw.

Kung 12M ang nanood ng BQ, for sure, bilyong Pilipino na rin ang nakatutok sa online. Patunay lang ito na nasa streaming/online na talaga ang mga viewers ngayon kesa sa free TV. This is not a good sign, siyempre. 

Ano’ng nangyari sa apat na existing networks sa bansa? Kaya may bahid na katotohanan na sobrang humina at bumaba na talaga ang advertisement sa TV ngayon.

Mabuti na lang talaga at one-step ahead parati ang ABS-CBN. Kaya naman numero uno ang kanilang programa sa streaming platforms gaya na lang ng nangyari sa BQ. 

Just imagine, sa 12M online views na nakuha ng serye, mahigit isang milyong Pilipino ang sabay-sabay na nanood sa Kapamilya Online Live sa YouTube (YT) na may 1,004,554 all-time high peak concurrent viewers.

Sa mga susunod na episodes ng BQ, lalong titindi ang banggaan ng mga magkaaway dahil magsasanib-puwersa na sina Tanggol at Ramon (Christopher) para sa nakatakdang mas malaking bakbakan. 

Huwag palampasin ang maaaksiyong kaganapan sa FPJ’s Batang Quiapo, na hango sa orihinal na kuwento ng Regal Films gabi-gabi, 8 PM, sa Kapamilya Channel, A2Z, TV5, iWantTFC, at Kapamilya Online Live.

Available ang latest episodes nito sa loob ng 21 na araw matapos silang unang ipalabas sa Kapamilya Online Live sa YouTube.

Nakalubog sa ilog… ROCCO, 1 ARAW ‘DI KUMAIN AT UMINOM DAHIL SA ROLE

ni Julie Bonifacio @Winner | Feb. 26, 2025

Photo: Rocco Nacino - Instagram

Kakaibang experience para kay Rocco Nacino ang paggawa niya ng pelikulang Bansa (Motherland) ng Cannes Best Director na si Brillante Mendoza.

Una, nagkaroon siya ng chance na makatrabaho si Direk Brillante. Pangalawa, naka-attend siya sa isang international film festival. At ang makagawa ng isang pelikula na may malakas na mensahe ay malaking opportunity for him.

Isa ang karakter ni Rocco sa movie sa 44 members ng PNP-SAF na nasawi dahil sa madugong engkuwentro nila kontra mga Muslim na naganap sa Mamasapano, Maguindanao.

Ginampanan ni Rocco ang role ni Dao-ayen na bukod-tanging nakaligtas sa naturang masaker. 

Ayon kay Rocco, “Maraming hindi nakakaalam na may nabuhay pala. Na ‘yun nga, nabuhay dahil lang sa isang ano ‘yun, kawayan ba ‘yun?”

Sa pamamagitan ng isang stick ng kawayan ay nakakahinga si Dao-ayen habang nasa ilalim ng ilog at nagpapatianod sa tubig. 

Hindi na raw nagpapakita o nagpapainterbyu ang karakter sa totoong buhay na ginampanan ni Rocco. Gusto nga raw siyang makausap ni Rocco para sa iba pang detalye at mailapit ang kuwento niya.

“Si Miss Honey (Alipio, scriptwriter), nakausap n’ya. Pero ayaw n’yang maalala. Alam ko, nakausap n’ya si Miss Honey. Pero nu’ng ako na, ayaw n’ya,” pagri-reveal pa ni Rocco nu’ng nakausap namin pagkatapos ng private screening ng Bansa (Motherland) sa The Secret Garden na pag-aari ni Direk Brillante sa Busilak St., Mandaluyong City last Sunday, February 23.

Ang ipinatawag na artist special screening ni Direk Brillante ang ikatlong beses na napanood ni Rocco ang Bansa.

Ang naunang dalawang beses ay during the 29th Busan International Film Festival sa South Korea noong Oktubre 2024.

“Noong inalok sa ‘kin na maka-attend sa Busan, eh, ginrab ko na ‘yung opportunity na makasama. First time kong maka-experience ng film festival outside the country,” lahad ni Rocco.

Tinanong si Rocco ni Gorgy Rula, isa sa limang members ng press na inimbita sa artist special screening, kung ano ang naramdaman niya nu’ng napanood niya ang Bansa (Motherland).

Bulalas ni Rocco, “Iyak ako! First time kong napanood doon sa festival, iyak ako. Kasi medyo ibinuhos ko… nakita n’yo naman, hindi rin biro ang tumakbo nang naka-paa lang, eh. 

“Saka a lot of times, lalo na ‘yung breakdown eksena na halos mamulikat ako kaaano. Kasi deprived na deprived si Dao-ayen. So medyo whole day, halos hindi ako umiinom ng tubig para maramdaman ko ‘yung pagod talaga.

“Uhaw. Walang tumutulong sa ‘kin. May kasama akong P.A. [production assistant] pero tinanggihan ko kahit ano—tubig, kape, pagkain—para doon sa eksenang ‘yun. Kaya ‘yung dulo, medyo nasuka-suka na ako, kasi nagha-hyperventilate na.”

Siyempre, inusisa si Rocco kung ano ang naramdaman niya na muling napanood ang breakdown scene niya.

“Ay! Napanood ko na! OK na, magtetelepono na ako. Pero pinapawisan ako sa eksena. Ha! Ha! Ha!

“Sabi ko naman sa Korean audience na nakakapagod s’yang panoorin and hindi s’ya exaggerated, kasi totoong nangyari.

“So, this is talaga ‘yung tribute natin sa kanila. Pero kung na-stress tayo sa pagnood, ano pa ‘yung nandu’n sila, 'no? ‘Di ba? ‘Yung tatlong oras, akala nila, may ceasefire, pero wala,” sagot ni Rocco.

Ang iba pang artista na gumanap din bilang SAF members sa Bansa (Motherland) ay sina Mon Confiado, Joem Bascon, Vince Rillon, Kiko Matos, Jess Mendoza, Christian Vazquez, Jomari Angeles, JC Tan, Raion Sandoval, Ryan Mindo, Mac Mendoza, at John Paul Duray.

May special appearance rin sina Ricky Davao, Cesar Montano, Gina Alajar, Epy Quizon, Marvin Agustin, Richard Quan, Ruby Ruiz, Cataleya Surio, Richard Manabat, Mai Fanglayan, at Nikko delos Santos bilang Marwan.