ni Julie Bonifacio @Winner | Mat. 6, 2025
Photo: Direk Brillante Mendoza - FB
Bago umalis ang Cannes Best Director na si Brillante Mendoza patungong Japan para sa Cinema at Sea Okinawa Pan-Pacific International Festival last week, ipinapanood muna niya sa kanyang mga artista ang latest film project niyang Bansa (Motherland).
Dumating sa special screening ng Bansa ang bidang si Rocco Nacino kasama sina Kiko Matos, Richard Quan, Mon Confiado, Jes Mendoza at Joem Bascon.
First time ni Direk Brillante na idirek si Rocco kaya mahaba raw ang naging preparasyon nila bago ginawa ang Bansa.
“Nag-workshop kami. Pinapanood ko sa kanya ‘yung mga films ko, kung bakit ganito ang treatment ko, ganito ako magdirek. I always explain it to them.”
Nag-training pa raw sina Rocco na ang mga nagbabantay ay totoong SAF (Special Action Force) para makuha nila ang tamang kilos at pagsasalita ng grupo.
Balak ni Direk Brillante na ipapanood ang Bansa (Motherland) sa mga kapulisan.
“More than anyone else, para sa kanila ang pelikulang ito, para ma-inspired sila. Sila kasi talaga ang binibigyan ng papuri rito, eh, ‘di ba? Especially ngayon, ang gulu-gulo ng bansa natin, parang wala ka nang makitang maganda.”
Pinasok din daw ni Direk Brillante ang Bansa sa nakaraang Metro Manila Film Festival (MMFF) 2024.
“Hindi s’ya napili,” pag-amin ni Direk Brillante.
“Siyempre, alam naman natin ang requirement ng MMFF, ‘di ba? I mean, hindi naman sa pag-aano, sa palagay mo, kapag ipinasok namin ‘to, dudumugin na kami ng mga tao? I mean, let's be realistic, ‘di ba?
“Unang-una, ang lead ko rito, si Rocco Nacino. Eh, si Rocco, hindi pa s’ya talaga considered na leading box office actor like Piolo Pascual, Alden Richards.
“Actually, ano ‘yun, eh, suntok sa buwan ang ano namin doon. Sabi ko, ‘‘Wag na tayong umasa d’yan.’ And blessing in disguise na rin kasi ang laki ng expenses ‘pag kasama ka sa filmfest. Eh, nakita naman natin ang resulta ng filmfest, wala naman talagang kumitang pelikula.
“No, I mean, in reality, tatlo lang naman ang kumita, ‘di ba? The rest, wala. Kasi, ang mga tao, hindi naman nila alam ang production expenses. Eh, kaming producers, alam namin.
“Itong mga pelikulang ganito kasi, hindi naman naghahangad ng blockbuster kasi I’m just being realistic.
“Unang-una, alam ko ang audience ko. Alam ko ang manonood dito, kaya magpakatotoo ka na lang, ‘wag ka mag-ilusyon,” sabay tawa ni Direk Brillante.
Nag-trending agad sa social media ang mapangahas na karakter ni Andrea Brillantes sa bagong yugto ng FPJ’s Batang Quiapo (BQ).
Ginawan na agad ng iba’t ibang version ang mga behind-the-scenes video na kuha kay Andrea ng mga bystanders sa set ng BQ habang kinukunan ang mga eksena niya.
Sobrang excited si Andrea sa kanyang career this year. Pagpasok pa lang ng 2025, may malaking teleserye agad siya at bonggang manager.
Ang mahusay at inirerespeto sa showbiz na si Shirley Kuan na ang bagong manager ni Andrea, na nu’ng una ay nagha-handle na rin ng product endorsements ng aktres.
For the longest time, si Shirley ang manager ng veteran and award-winning actor na si Albert Martinez. Then, after umalis ni Bea Alonzo sa Star Magic ay personal niyang ipinahanap si Shirley para mag-manage sa kanya. Same thing with the award-winning and comebacking actress na si Hilda Koronel.
Pero kahit wala na sa Star Magic si Andrea, ang importante ay nananatili pa rin siya as one of Kapamilya’s prime artists.
Sa unang entrada pa lang niya sa BQ ay nakakuha ng tatlong milyong views sa loob lamang ng 24 oras ang mapusok na eksenang nakasuot siya ng sexy dress habang nakikipaghalikan sa karakter ni Jake Cuenca.
Singtindi ng aksiyon sa hit Kapamilya teleserye ang tapang ni Andrea sa desisyon niyang sumabak sa palaban na karakter. Malayung-malayo ito sa mga papel na ginampanan niya noon.
Wish ni Andrea ay magtagal siya sa BQ na napapanood gabi-gabi, 8 PM, sa Kapamilya Channel, A2Z, TV5, iWantTFC, at Kapamilya Online Live.
