Pagpapalit ng liderato ng DOF, napapanahon

ni Judith Sto. Domingo @Asintado | January 17, 2024

Hindi maikakailang napapanahon at nagbabadya ng pag-asa sa Bagong Taon ang isinagawang pagpapalit ng liderato ng Department of Finance (DOF) at pagtatalaga ng administrasyong Marcos kay Ralph G. Recto bilang bagong kalihim nito. 

Ang dating House Deputy Speaker, Senate President Pro Tempore, tagapanguna ng National Economic and Development Authority, apo ng statesman na si Claro M. Recto, at ating kapwa Batangueñong si Recto ay walang dudang marapat na ika-33 kalihim ng DOF. 

Napakahalaga ng posisyong ito sapagkat sa may hawak nito nakasalalay ang isang matino at mabisang pamamahala sa pinansyal na pinagkukunan ng gobyerno sa pamamagitan ng pagbabalangkas, pagtatatag at pagsasakatuparan ng maayos na patakaran sa pananalapi ng bansa. 

Hindi lahat ay nakakaunawa at bihasa sa larangan ng finance at mabibilang lamang sa hanay ng kasalukuyang mga nasa gobyerno ang may kakayanang humawak ng posisyong ito. Ang pagpili kay Recto, o RGR kung tawagin, ay pinagkakaisahan ng marami bilang isang tamang hakbang ng administrasyong Marcos. 

Malamang na hindi naging madali para kay Recto ang pagtanggap sa naturang posisyon sapagkat ito ay isang hot seat. Napakalaking hamon ang kanyang kinakaharap, kasama na ang paggisa sa kanya ng madla. Ngunit sa huli, nagtagumpay ang pag-alok at pakikipag-usap sa kanya ng Pangulong Ferdinand “Bongbong” Marcos Jr. 

Sinasalamin ng masinsing pamamaraan ng paghahanap ng itatalaga sa mga kritikal na posisyon ng gobyerno ang pagsusumikap ng namumuno na ayusin ang pamamalakad ng pamahalaan.

Patas na kinikilala at sinasaluduhan natin ang ginawang pagpapalit ni Marcos Jr. ng kalihim ng DOF sa panahong ito, habang umaasa ang taumbayang makakaaninag ng liwanag sa hinaharap at mas maayos na maaayudahan ang mga vulnerable at naghihikahos, pati na ang nasa middle class na hindi mapapariwara o malalagay sa balag ng alanganin sa pagtitimon ng bagong Finance secretary. 

Isa sa hindi maitatanggi at hindi matatawarang kapasidad ng kasalukuyang Pangulo ay ang pagpili niya ng mahusay na alter ego para sa kritikal na departamento ng gobyerno tulad ni Secretary Rex Gatchalian ng Department of Social Welfare and Development na personal ko ring batid ang kahusayan at kasipagan sapagkat nakatrabaho ko na siya ilang taon na ang lumipas. Gayundin ang namayapang kalihim ng Department of Migrant Workers na si Susan Ople. 

Samantala, ang kasalukuyang secretary ng Presidential Communications Office na si Cheloy Velicaria-Garafil na isang abogado at dating mamamahayag ay kabilang sa mahuhusay na itinalaga ni Marcos Jr. Si Garafil ang gumagabay sa kanya tungo sa mabisa at lapat na pakikipagkomunikasyon ng pamahalaan sa taumbayan. Si Budget and Management Secretary Amenah Pangandaman ay isang beterano sa kanyang larangan na batid ang pasikut-sikot ng paglilingkod sa pamahalaan.  

Sa ngayon ay umaasa tayong aasintaduhin ni Finance Secretary Recto ang kapakanan ng mga sektor ng lipunang kailangan pang mas maabot ng mas makabuluhang tulong ng pamahalaan. 

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Mga manggagawang pa-retiro na, bigyang-pansin at pagmalasakitan

ni Judith Sto. Domingo @Asintado | January 12, 2024

Para sa mga manggagawang tapat, buhos magsilbi at mapagmalasakit sa kapwa, tunay na napakahirap ang maging ordinaryong kawani o lingkod ng pamahalaan. Lalo na ang mga humaharap araw-araw sa taumbayan para tugunan ang kanilang mga idinudulog, ang mga nagpoproseso ng tulong sa mga departamento at ahensyang laging nilalapitan ng mamamayan, ang mga kailangang iukol ang kanilang pahingang araw para tumulong pa rin sa mga nangangailangan. 

Dahil laging pagod sa bawat araw ng trabaho sa gobyerno, may ilan sa kanila na parang nauupos na kandila na dinapuan na ng samu’t saring karamdaman bago pa man umabot sa edad na sisenta o 60. Sinisikap pa ring pumasok sa opisina kahit ramdam na nila ang pisikal at mental na panlulupaypay.

Sila ang nananawagan na ipasa na ng Senado, ang pagpapababa sa optional retirement age na 56 mula sa kasalukuyang 60 para sa mga empleyado ng gobyerno. Hindi dahil sa gusto lamang nilang magliwaliw na lamang, kundi dahil sa kailangan na nilang ipahinga ang kanilang nasagad na sa trabahong pangangatawan at isipan sa paglilingkod ng puspusan sa pamahalaan ng maraming taon. Alam nilang nasa dapit-hapon na sila ng kanilang buhay. 

Hindi dapat mag-alala ang pamahalaan na dadagsa ang mga maagang magreretiro sa sandaling pumasa ang panukalang batas na ito, sapagkat ang karamihan ay gugustuhin pang patuloy na magtrabaho upang patuloy ding makatanggap ng suweldo pati bonus at allowance kaysa pagkasyahin ang hindi pa kalakihan at wala pa sa maximum o pinakamataas na maaaring matanggap na pensyon. 

Gugustuhin pa ng karamihang magtrabaho para mas tumaas ang pensyon na maaari nilang matanggap sa mas mahabang panahon ng pagsisilbi sa pamahalaan. Bihira lamang ang wala namang sakit o kaya pang magtrabaho ang pipiliing magretiro ng maaga at magtiis sa pensyong puwede pa nilang pataasin.

Nag-head count o survey man lamang ba ang mga nag-aalala sa magiging epekto ng panukalang batas na ito sa tinatawag na “actuarial life” ng social insurance fund ng Government Service Insurance System kung ilan nga ba ang magbabalak na magretiro sa edad na 56 hanggang 59 kapag pumasa ang panukalang batas?

Ang pag-aalala na ‘yan ay maaari ring lusawin ng Kongreso sa pamamagitan ng paglalaan ng karampatang pondo kapag kinakailangan para mas tumatag ang social insurance fund ng mga naglilingkod sa pamahalaan sa pagpasa ng naturang panukala. 

Hindi dapat walisin na lamang at itago sa ilalim ng basahan o balewalain ang pagtaghoy at pagmamakaawa ng ilan nating tapat na lingkod ng gobyernong lupaypay na, na bigyan sila ng karapatang maagang makapagretiro at makatanggap ng pensyon sapagkat naibuhos na nila ang kanilang buong lakas at buhay para sa pamahalaan. 

Huwag nang hayaang ikamatay na lamang nila ang paghihintay sa kanilang inaasam na kaunting kagaanan sa dapit-hapon ng kanilang buhay at pag-aaruga ng pamahalaan sa gitna ng kanilang maagang panghihina at pagkakasakit hindi pa man sila nakakatuntong sa edad na 60. 

Ang nauupos na kandila ng kanilang buhay ay hindi dapat iwan na lamang ng gobyernong kanilang lubos na pinaglingkuran, na lusaw at tuluyang wala nang ilaw.

Umaasa ang mga karapat-dapat na kawani ng gobyerno na ang pagpupunyagi ng ating kapwa kolumnistang si Sen. Ramon “Bong” Revilla Jr. para ilaban ang pagpasa ng panukalang batas na ito sa Senado ay makatagpo ng maraming kakampi at magtagumpay upang abutan sila ng buhay at makinabang sa nalalabing panahon ng kanilang buhay. 

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Pangakong napako ng Smart

ni Judith Sto. Domingo @Asintado | January 10, 2024

Kamakailan, pinaalalahanan natin ang ating mga masugid na mga mambabasa na pakabusisiing mabuti ang mga ipinadadalang singilin ng mga telecommunications companies o telco para tiyaking tama ang mga ito. 

Ibinahagi ko rin sa inyo ang aking naging karanasan sa Smart Communications Inc. kung saan mayroon akong postpaid subscription sa ilalim ng kanilang tinatawag na “signature plans”. Tatlong magkakasunod na buwan akong pinadalhan ng billing na mali at sobra ng libong piso sa kanilang dapat singilin sa akin. 

Tatlong magkakasunod na buwan rin akong kinailangang maabalang tumawag sa kanila para maghain ng kaukulang dispute. Noong Disyembre, pinangakuan ako ng Smart na hindi ko na makikita pang muli ang panibagong mali at sobrang billing sapagkat titiyakin nilang maaayos na nila ito. 

Noong Biyernes, nakatanggap ako ng panibagong email sa Smart na muling naniningil sa ‘kin ng libong pisong sobra sa dapat kong bayaran sa katapusan ng Enero.

Pangakong napako ng Smart! Ikaapat na buwan na ito ng maling singilin at kinailangan ko uling maghain ng panibagong dispute. 

Noong Sabado ng 2:45 p.m., nagpadala ng text message ang Smart: “Your dispute on usage charges concern with case ID number 0022979403 is in progress. Our support team is working on it. We’ll update you again within 24 hours”. Pero lumipas ang 24 oras, wala namang bagong update ang Smart.

Bakit ba sa loob ng apat na buwan ay hindi maayus-ayos ng Smart ang kanilang billing sa ilalim ng ipinagmamalaki nilang “signature plans” na may hardstop feature, kung saan dapat tigil na ang data browsing charges kapag naabot na ang limit sa ilalim ng piniling plan ng subscriber. 

Aba’y madalas iyan mangyari noon sa ilalim ng luma nilang “legacy plans” pero hindi na dapat ngayon ito nangyayari sa ilalim ng kanilang ipinapangalandakang “signature plans”. 

Anong misteryo ang nasa likod ng aberyang ito sa sistemang teknikal ng Smart? Bakit noong magsimula ako sa ilalim ng bago nilang “signature plan” ay walang overcharging para sa data usage, ngunit matapos ang isang taong mahigit ay bigla na lamang sumulpot ang sunud-sunod na buwang sobra-sobra ang kanilang sinisingil? Paanong tila bumalik sa legacy plan ang signature plan? Ilang subscriber kaya ang apektado rito?

Nananawagan tayo kay National Telecommunications Commission head Ella Bianca Lopez na pasagutin ang Smart Communications Inc. sa paulit-ulit nitong erroneous billing at overcharging na ipinadadala sa subscriber na tulad ko. Magsilbing opisyal na complaint ko ito sa NTC upang hindi na marami pa ang dumanas ng mga ganitong perhuwisyo at abala sa kamay ng mga telco. 

Isang malaking pribilehiyo ang mabigyan ng prangkisa para makapag-operate bilang isang telco sa bansa. Pasan-pasan ng binibigyan ng prangkisang ito gaya ng Smart ang pagsilbihan nang tapat at maaasahan ang mga mamamayan. 

Anlalaki pa naman siguro ng suweldo at bonuses ng mga opisyal at tauhan ng Smart Communications Inc., kaya dapat lamang nilang suklian ng maayos na serbisyo ang mga subscriber sa halip na pagurin nila sa paghahain ng paulit-ulit na reklamo kada buwan dahil sa paulit-ulit na kamalian ng kumpanya.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.