Mga mabibilis maglakad, ‘di hapi sa buhay

ni Jersy Sanchez - @Gulat| July 8, 2020

Isa ka ba sa mga mabibilis maglakad o mabagal? Alam n’yo ba na ang paraan ng paglalakad ay may kinalaman sa pagiging masaya o hindi? Well, kung hindi pa, ayon sa mga eksperto, ang mga taong mabibilis maglakad o “fast walker” ay hindi masaya. Weh, ‘di nga?

Base sa isang pag-aaral, ang mga taong mabilis maglakad ay “less happy” kumpara sa mga naglalakad sa slower pace.

Ito ay dahil prayoridad umano ng mga fast walker na gawin ang kanilang goal. Dahil dito, wala sa isipan nila ang happiness dahil nagpopokus sila sa kanilang mga layunin.

Gayundin, sila ay mga perfectionist at may kakayahang paghiwalayin ang personal at work issues. Sila rin umano ang mga bihirang magpahinga at mag-unwind dahil mas gusto nilang magtrabaho nang mabilis at efficient, kaya hirap din silang kontrolin ang kanilang emosyon.

Gayunman, sila ay mas optimistic at madaling ma-satisfy, pero kapag hindi nangyayari ang mga bagay-bagay sa paraan na gusto nila, rito sila nagiging malungkot.

Kumpara sa mababagal maglakad, sila rin ay mas introvert at maingat, gayundin, hirap makipagkaibigan.

Hirap din silang mag-maintain at magdevelop ng relationship sa ibang tao.

Samantala, ang positive side ng mga taong mabilis maglakad ay ang pagiging matapang at kumpiyansa nila, na hindi basta-basta kayang tapatan ng kahit na sino.

Saan ka napabibilang, sa mabibilis maglakad o mabagal? Gayunman, ‘wag nating kalimutang magpahinga paminsan-minsan para makapag-unwind.

‘Ika nga, oks lang maging focused sa goal, pero ‘wag pabayaan ang sarili dahil kailangan ay palagi pa rin tayong happy. Okie?

Bad habits na dapat itigil para magkaroon ng inner peace

ni Jersy Sanchez - @Life and Style| July 5, 2020

Nasa point na tayo na gusto nating makilala ang “better version of ourselves,” tipong nagkaroon pa tayo ng New Year’s resolution para ma-achieve ito, pero kumusta naman ang resolution n’yo?

Gayunman, lahat tayo ay may toxic traits o bad habits na hindi natin gusto at dapat nang i-let go para sa ating inner peace. Pero anu-ano ang mga ugaling dapat baguhin para maging mas mabuting tao?

1. PAGIGING PERFECT. Sa lahat ng bagay, kailangan nating maglaan ng “room” para sa failures dahil dito tayo natututo. Kumbaga, ‘pag wala nito, hindi natin alam kung saan tayo dapat mag-improve. Normal lang na magkamali at hindi natin kailangang magpaka-stress na dapat lahat ay organized, tama o nangyayari base sa ating plano. ‘Ika nga, may ups and downs sa buhay at kailangan natin itong tanggapin. May mga bagay na “perfect” natin, pero meron ding hindi at okay lang ‘yun.

2. APPROVAL NG LAHAT. Sa bawat gagawin natin, hindi nawawala ang tanong na “Magugustuhan kaya nila?” “Okay lang kaya sa kanila?” Sila ang palagi nating ikinokonsidera pagdating sa pagdedesisyon kesa sa ating sariling happiness at feelings, at ang masaklap pa, tayo ang nagsasakripisyo para sumaya sila. Mga besh, kung palagi tayong gagawa ng desisyon na labag sa kalooban natin, mabubuhay lang tayo sa regret o pagsisisi. Kung ano ang magpapasaya sa atin, ‘yun ang gawin natin. We don’t need anyone’s approval dahil buhay natin ito at tayo ang dapat may kontrol dito.

3. NEGA SA IBANG TAO. Itigil ang habit na pagpuna sa ibang tao, may ginawa man sila sa atin o wala dahil sa totoo lang, mas mabuting magpokus sa sarili nating buhay kesa sa ibang tao. Tandaan, walang magandang maidudulot ang panghuhusga sa ibang tao dahil nakakasakit lang ito sa kanila, gayundin, wala itong maibibigay na maganda sa atin. Sabi nga, kung walang magandang sasabihin, tumahimik na lang.

4. MAHILIG MANISI. Pansin n’yo ba, madalas tayong manisi ng ibang tao para hindi tayo ma-guilty? Tipong pa-victim ang peg sa mga nangyayari sa buhay para kaawaan ng iba. Well, may ibang tao mang involved, pero tayo pa rin ang responsable sa lahat ng nangyayari sa ating buhay. Tayo ang dapat maging accountable sa lahat ng iisipin, desisyon at ikikilos natin. Kung nagkamali, matutong tanggapin ito sa halip na manisi ng ibang tao.

5. OVERTHINKING. Aminin na natin, may mga bagay na hindi natin nako-control. Kahit pinlano ito, kung nakatakdang mangyari, magyayari talaga ito. Kung may mga bagay tayong gustong gawin, go for it. Iwasang mag-assume ng mga bagay na hindi pa nangyayari. Kung gusto mong magnegosyo, go! Kung planong mag-aral ulit, why not? Mga bes, subok lang naman at hindi natin alam kung ano’ng mangyayari kung hindi natin subukan. Mas okay sumubok kesa magsisi paglipas ng panahon.

6. PAGKUKUMPARA SA IBA. Sabi nila, life is a rat race. Kumbaga, patuloy tayong nakikipagkompitensiya sa iba para sa pera, fame at success. Pero sa totoo lang, wala itong katapusan at habang tumatagal, lalo tayong naghahangad ng mas malaki para sa ating sarili. Hindi naman ito masama, pero posibleng umabot sa point na kapag may nauna sa atin ay ikukumpara natin kung ano ang meron sila na wala tayo, na puwedeng magresulta sa urge na labanan sila sa hindi magandang paraan.

Kung talagang gusto nating magbago at mag-let go ng bad habits, kailangan natin itong simulan nang paunti-unti o ‘ika nga, baby steps.

Lahat tayo ay may kani-kanyang paraan para mabago ito. Kaya para sa mga working for better version of themselves, go lang!

Kahit wa’ datung, puwedeng-puwede! dapat gawin para makatulong sa online sellers

ni Jersy Sanchez - @Life and Style| June 29, 2020

Kung patok noon ang online selling dahil convenient ito para sa seller at kostumer, lalong marami ang pumasok dito mula nang isailalim tayo sa lockdown. Ito kasi ang ginamit ng ilan nating kababayan bilang alternatibong paraan para kumita kahit nasa bahay lang.

Kadalasang pagkain ang ibinebenta nila, na maaaring dessert, pastries o ulam at meron ding nagbebenta ng medical supplies tulad ng facemask at face shield.

Minsan nga, nagmumukha nang shopping website ang ating social media feeds dahil sa dami ng kakilala nating nag-o-online selling, kaya masasabi nating ginagawa talaga nila ito para matustusan ang kani-kanilang pangangailangan.

Pero anu-ano nga ba ang magagawa natin para makatulong sa kanila?

1. BUMILI. Siyempre, ito ang No. 1 na dapat gawin. Mga bes, hindi porke kakilala, kaibigan o kamag-anak natin ang nagbebenta, hihirit na tayo ng discount o tawad, ‘wag ganu’n! Baka imbes na ganahan silang magbenta, eh, tamarin sila dahil iniismol natin sila. Sa totoo lang, halos barya lang ang tubo nila sa bawat produktong ibinebenta nila kaya naman, kung afford natin, ‘wag nang humirit ng tawad. Iwasan din ang mga linyang “Bakit sa ganito, mas mura?” “Bakit kay ganito, mas maganda?” dahil nakaka-offend ito para sa kanila.

2. MAG-IWAN NG FEEDBACK. Ito ang isa sa pinakamabisang paraan para dumami ang kostumer. Pagkatapos bumili at subukan ang produkto, ‘wag kalimutang sabihin ang feedback dahil madalas, ito ang tinitingnan ng interesadong buyers bago sila makipag-transaksiyon sa seller. Maging honest sa feedback dahil paraan din ito para malaman ng seller kung saan pa siya puwedeng mag-improve pagdating sa kalidad ng kanyang mga ibinebenta.

3. DELIVER O PICK-UP. May mga seller na nag-o-offer ng “meet-up” para personal na maibigay sa kostumer ang kanilang binili. Pero hindi ba, takaw-oras ito? Tipong ‘yung oras na ilalaan ni seller sa pagpunta sa meet-up place at pag-uwi ay puwede niyang gamitin sa paghahanda ng iba pang ibebenta o pagbe-bake. Kung madaraanan mo naman ang bahay niya, puwede mo itong pick-up-in na lang para bawas-oras, pero kung hindi, may mga mapagkakatiwalaang express delivery services na puwedeng gamitin para hindi n’yo na kailangang lumabas, gayundin, less exposure sa maraming tao.

4. MAG-REACT, COMMENT AT SHARE. Malamang, may hihirit d’yan ng, “Paano kung wala kaming pambili?” Simple lang, magreact, comment o share sa post nila. Bakit? Makatutulong ang engagement sa posts ni seller para makahatak ng possible costumers. Kaya mga bes, kung wala tayong pambili at madalas tayong babad sa socmed, gamitin natin itong paraan para makatulong sa kanila.

5. I-REKOMENDA. Kung nagustuhan ang produktong nabili, ‘wag kalimutang irekomenda ito sa mga kapamilya o kaibigan. Mas pinagkakatiwalaan ng potential costumers ngayon ang “word of mouth” o experience ng kanilang mga kakilala pagdating sa pagsubok ng mga bagong produkto.

For sure, marami sa inyo ang tumatangkilik sa ating mga online sellers at marami na ring socmed groups o community ng sellers kung saan puwedeng i-offer ang kanilang mga produkto.

Sa panahon ng pandemya, maging tulong tayo sa isa’t isa. Hindi kailangang maging bongga ng gagawin natin para sa kanila dahil tulad ng nabanggit, puwede tayong makatulong sa pamamagitan ng pagreact, comment at share sa kanilang posts.

Kuha mo?