Kung ‘di maiiwasan, doble-ingat na lang... Safety tips kapag pupunta ng mall

ni Jersy Sanchez - @Life and Style| July 14, 2020

Ngayong lockdown, bawal lumabas ng bahay at wala tayong ibang ginawa kundi Balik-operasyon na ang mga mall, kaya mayorya ng publiko ay narito kahit may banta ng COVID-19. Marami nang tindahan at establisimyento ang nagbukas, kaya naman asahan nang dagsa ang mga tao, lalo na kung weekend.

Bagama’t hindi pa inirerekomendang maglakwatsa, hindi natin maiiwasang pumunta sa mall kung may mahalagang pakay tulad ng pamimili ng grocery, gamit sa bahay at kung anu-ano pa.

Pero minsan, tila nakakalimot na sa health protocols ang ilan, kaya naman, narito ang ilang mga bagay na hindi dapat gawin sa pampublikong lugar, partikular sa mall:

1. TAMANG PAGSUSUOT NG FACEMASK. Bagama’t karamihan sa atin ay gumagamit naman nito, may mga kababayan tayong “mema” o mema-gamit lang, oks na. Mga besh, mahalagang gumamit ng angkop na facemask para makasiguradong hindi papasukin ng mikrobyo o virus ang ating bibig at ilong kapag nasa labas tayo.

2. PHYSICAL CONTACT. Layu-layo muna, mga besh! Kung noon, puwedeng makipagsiksikan kahit saan, ngayon hindi na puwede. Madalas, may pila sa labas ng store at mahigpit na ipinatutupad ang social distancing. Gayundin, wala munang handshake, beso-beso at iba pang physical contact.

3. PAG-ISTAMBAY SA STORE. Kung kinakailangang pumasok sa store, ‘wag nang umistambay, sa halip, umalis agad pagkatapos mamili. Ang pananatili nang matagal sa isang enclosed space ay nagpapataas ng tsansang makasagap ng virus, lalo na kung espasyong ito ay halos hindi nawawalan ng tao.

4. PAGPASOK SA BAHAY NG PINAMILI. Nakasanayan nating itabi agad ang mga pinamili pagkauwi sa bahay, pero this time, iba na ang dapat nating gawin. I-disinfect muna ang mga ito dahil hindi natin alam kung na-contaminate na ito ng ibang nakasalamuha natin sa mall.

5. HAWAK DITO, SUKAT DOON. Hindi naman talaga maiiwasang hawakan ang mga items na gusto at kailangan nating bilhin. Pero mga bes, iwasang humawak sa ibang bagay na hindi naman bibilhin. Gayundin, marami nang stores ang nagpapatupad ng cashless payments para maiwasan ang transmission ng virus sa pamamagitan ng paper bills. Bawal din munang magsukat, kaya in short, wala munang magsa-shopping ng mga damit at sapatos. He-he-he!

6. MAGDALA NG SARILING UTENSILS. Dahil puwede na rin ang dine-in sa mga fast food at resto, may matatakbuhan na ang mga nag-mall na inabutan ng gutom. Oks lang naman kumain sa labas hangga’t sinisigurado mong malinis ang iyong mga hinahawakan tulad na lamang ng kutsara at tinidor. Na-reuse man, alam mo pa ring malinis ito at ikaw lang ang gumamit. Kung maaari, magdala rin ng sariling water tumbler para mag-refill na lang kapag naubusan ng inuming tubig.

Alam n’yo na, ha? Keri lang naman lumabas at mag-mall kung importante ang gagawin, pero make sure na wala kayong nakalilimutang safety measures para iwas-sakit.

Kasabay ng tips na ito, panatiling nakahanda ang alcohol, hand sanitizer, wet tissues at extra facemask. Kuha mo?

Iba’t ibang klase ng kapitbahay na nakilala natin habang naka-lockdown

ni Jersy Sanchez - @Life and Style| July 13, 2020

Ngayong lockdown, bawal lumabas ng bahay at wala tayong ibang ginawa kundi magpaikut-ikot sa bahay at sumilip sa bintana para makakita ng mga ganap sa labas, kaya naman ‘di natin maiwasan na makilala ang ating mga kapitbahay.

Anu-ano nga ba ang klase ng mga kapitbahay na mayroon tayo?

1. CHUCKY. Sa iba pang salita, backstabber, ganern! Tipong super-bait kapag kausap o kaharap mo, pero ‘pag nakatalikod ka na at iba ang kaharap niya, alam na! Mga besh, ingat sa mala-Chucky n’yong kapitbahay dahil baka akala mo, kaibigan at mapagkakatiwalaan, pero fake pala.

2. MOSANG (CHISMOSA). Sila ‘yung mga kapitbahay na mas alam pa ang life story mo kaysa sa ‘yo. Minsan, pati mga chismis sa kabilang barangay, alam din nila. Halimbawa, kapag may kasama kang kaibigan, iisipin nila na dyowa mo ‘yun. Minsan din, kapag nakita kang nag-uwi ng mga pinamili mo, gagawan pa ng isyu. Ganyan sila katindi, mga bes!

3. DEADMA. As in, deadma sa inyo. ‘Yung tipong kahit dis-oras ng gabi o tanghaling-tapat, ‘di magpapaawat mag-karaoke. Wa’ pakels sila kung gusto mong magpahinga o matulog hangga’t nag-e-enjoy sila. Sila rin ‘yung mga tipo ng kapitbahay na halos lahat ng puwedeng i-celebrate, ise-celebrate para may dahilan sila para mag-ingay.

4. FRIENDLY. Ito ang paborito nating kapitbahay dahil minsan, free for all ang kanilang WiFi. Gayundin, hindi sila nakakalimot mamigay ng pagkain kapag may okasyon at minsan nga, may pa-ulam pa. Bongga! Madalas, sila rin ‘yung takbuhan natin ‘pag may problema tayo at sa sobrang friendly niya at palaging ready mag-advice sa atin, nakakalimutan nating may sarili rin siyang mga problema.

Ano’ng klase ng kapitbahay ka? May naaalala ka ba sa kanila? Ha-ha-ha! Kidding aside, sa panahon ng pandemya, maging mabuti tayo sa isa’t isa— sa pamilya, kaibigan o maging sa mga kapitbahay. Iba’t iba man tayo ng ugali, siguradong maaasahan n’yo ang isa’t isa sa oras ng pangangailangan. Gets mo?

Tips para hindi maging toxic

ni Jersy Sanchez - @Life and Style| July 12, 2020

Sa dami ng problema sa mundo, hindi na natin kailangang dumagdag pa sa pamamagitan ng pagiging toxic. Well, lahat naman tayo ay ayaw maging toxic, pero paano nga ba maiiwasan na umabot sa puntong ito?

1. ‘WAG GAWAN NG ISYU ANG BAWAT BAGAY. Ang problema kasi sa atin bawat kilos, ginagawan ng isyu. Tipong hindi naman tayo apektado, pero todo-gawa ng isyu dahil hindi natin bet ‘yung tao. Agree? Mga bes, 2020 na, kaya ‘wag tayong ma-issue, lalo na sa buhay ng iba.

2. ‘WAG BASTA-BASTANG MAG-REACT. Minsan, mabilis tayong nagre-react sa mga bagay-bagay nang hindi natin iniintindi ang sitwasyon o narinig natin. Ang nangyayari tuloy, nauuwi sa hindi pagkakaintindihan at ang masaklap, nauuwi pa sa away. Sa totoo lang, hindi naman natin kailangang magreact agad dahil mas mahalagang maunawaan muna natin ang sitwasyon para makapag-react nang tama

3. MAGING SUPPORTIVE. Kung gustong magsimula ng business ng kaibigan mo, suportahan mo siya. Kung gustong matuto ni nanay ng mga bagong recipe, sabayan siyang pag-aralan ito. Kung struggling o hirap sa pag-aaral si bunso, magtanong kung paano ka makatutulong. Ang pagiging supportive ay puwedeng ipakita sa iba’t ibang paraan dahil mahalagang malaman nila na nar’yan ka para sa kanila along the way.

4. UMAMIN SA PAGKAKAMALI. For sure, maraming guilty dito. Mahirap talagang aminin ang pagkakamali dahil masakit sa pride natin, pero mas mahirap kapag naghanap ka ng sisisihin mo sa iyong pagkakamali. ‘Yung tipong sinisisi mo ang ibang tao para hindi ka ma-guilty sa kasalanan mo, pero ang totoo, ikaw ang responsable rito.

1. MAGPASALAMAT. May mga pagkakataong inuuna nating mag-complain kesa i-appreciate ang mga bagay na meron tayo. Ang nangyayari kasi, masyado tayong focused sa bagay na gusto nating mangyari o makuha kaya ‘pag may dumating na malayo sa inaasahan natin, nauuna pa tayong magreklamo kesa magpasalamat dito. Hindi naman mahirap magpasalamat, lalo na kung alam mong hindi ito basta-basta nakukuha ng kung sino. Mga besh, matuto tayong magpasalamat sa maliit o malaking bagay na mayroon tayo.

Masyado nang mabigat ang pinagdaraanan ng mundo kaya ‘wag na tayong dumagdag sa problema ng ibang tao.

Iwasang maging toxic at magkalat ng negativity dahil wala itong maidudulot na maganda sa atin at sa ating kapwa. Sa halip, maging mabuti tayo sa isa’t isa para tularan ng iba at dumami pa ang mabubuting tao sa mundo. Gets mo?