Alamin: Tips para maibalik ang passion

ni Jersy L. Sanchez - @Life & Style| March 14, 2022

Maraming nagbago sa mga nakalipas na taon. Bukod sa ating paraan ng pamumuhay dahil sa pandemya, nagbago na rin ang ating pag-unawa sa mga bagay, gayundin ang ating mga nakasanayan.

Marahil, ‘yung iba sa atin ay tila nawalan na ng ‘passion’ sa kanilang mga ginagawa. ‘Yun bang, dati ay sobrang saya mo sa isang bagay tapos ngayon, sobrang mag-e-effort ka para ma-enjoy mo ito, in short, nakararamdam ka na ng burnout.

Kaya naman bukod sa hamon ng pandemya, eh, naging hamon na rin ang paghanap ng motibasyon upang magpatuloy sa buhay. Paano nga ba natin ito gagawin?

1. ALALAHANIN ANG RASON KUNG BAKIT NAGSIMULA. Kapag gustong-gusto mo nang sumuko, mahalagang alalahanin ang inyong progress. Kumbaga, balikan mo kung gaano kalaki ang pinagbago mo. Sa ganitong paraan, babalik ang ‘spark’ o excitement mo sa iyong passion.

2. ‘WAG MATAKOT MAGSIMULA ULIT. Kung may mga bagay na feeling mo ay nakapagpapabagal sa iyong progress, ito ang senyales na kailangan mong pag-aralan o alamin ang mga bagay na importante sa ‘yo. ‘Ika nga, hindi masamang mag-back to zero dahil sa ganitong paraan, magkakaroon ka ng bagong perspective at makatutulong ito upang mag-grow ka.

3. MAGHANAP NG INSIPIRASYON. Hindi kailangang maging bongga ang inspirasyon mo. Dahil sabi nga, ang inspirasyon ay puwedeng makita kahit saan. Kaya ‘pag may chance kang makahanap nito, isulat mo sa journal o gumawa ka ng “inspiration board”. Puwede ring magsimula ka ng bagong hobby at hayaan mo lang itong magtuluy-tuloy.

4. HUMINGI NG TULONG. Tulad ng palagi nating sinasabi, hindi masamang humingi ng tulong sa ating mga kaibigan o kapamilya dahil hindi ito nangangahulugan na mahina ka. Kung hindi n’yo kayang mag-meet up ng mga kaibigan mo, puwedeng gumawa ng online support group at doon kayo mag-usap-usap o magbigayan ng advice.

5. MAGPAHINGA KA. Bagama’t dapat kang maging productive, mahalaga ring magpahinga. Hindi naman ito pagsasayang ng oras, bagkus, makatutulong ito upang mas makapag-isip at makapag-function ka nang sa gayun ay mas madali mong ma-achieve ang iyong goals.

For sure, hindi lang ikaw ang nasa ganitong phase, besh. Kaya sa halip na hayaan nating mawala ang ‘spark’ sa ating passion, make sure na gagawin n’yo rin ang tips na ito.

‘Ika nga, dapat matuto tayong sumabay sa panahon at kahit may problema sa ating paligid, kering-keri nating makipagsabayan para sa ating pangarap. Kalmahan mo lang, besh! Copy?

Iba’t ibang dahilan para makipag-break sa dyowa

ni Jersy L. Sanchez - @Life & Style| March 7, 2022

‘Pag sobrang labs n’yong mag-dyowa ang isa’t isa, ‘di ba, parang ang hirap isipin na maghihiwalay din kayo?

Pero mga besh, sa totoo lang, marami pa ring long-term relationships na nauuwi sa hiwalayan kahit gaano pa nila naipakitang mahal na mahal nila ang isa’t isa.

Awww!

Well, napakahirap talagang i-let go ng taong mahal mo, lalo pa’t naging parte na siya ng buhay mo, pero may mga valid reasons para tapusin na ang relasyon. At kahit pa punumpuno ng pagmamahal ang inyong pagsasama, ‘di ito sapat para ma-sustain ang healthy at happy partnership sa mahabang panahon.

Anu-ano nga ba ang mga rason para tapusin ang isang relasyon?

1. ‘DI SIYA HONEST SA ‘YO. Tila normal na para sa atin ang magsabi ng ‘white lies’, pero ‘pag napansin mong naging habit na ng iyong partner ang pagsisinungaling or worse, mas malalaki at seryosong pagsisinungaling ang ginagawa niya, valid reason ito para tapusin na ang inyong relasyon.

2. ‘DI KASUNDO SA PINANSIYAL NA ASPETO. Isa ang pera sa mga karaniwang isyu para sa mga magkarelasyon. Ayon sa mga eksperto, ang isang tao na mas gumagastos sa luho kaysa sa necessities ay senyales na siya ay hindi magkaroon ng financial stability. Bagama’t hindi lahat ng mag-partner ay gusto ng ‘combined finances’, pero kung gusto mo itong gawin kasama ang iyong partner, kailangang nasa ‘same page’ kayo pagdating sa financial goals. Kumbaga, pareho kayo ng gusto at paniniwala pagdating sa paghawak ng pera.

3. WALA KANG TIWALA SA KANYA. Alam nating lahat na ang tiwala ay mahalagang parte ng relasyon at ‘pag nasira ito ng partner mo, lalo na kung maraming beses na, posibleng senyales ito na pag-isipan mong mabuti kung itutuloy pa ba o hindi ang iyong relasyon.

4. MAGKAIBA KAYO NG GOALS. Ang hirap ‘pag umabot sa puntong mahal na mahal mo ang partner mo, pero hindi pala kayo pareho ng pinaplanong future. Pero bes, ‘pag malinaw sa ‘yo kung ano ang gusto mo, hindi ka dapat mag-settle sa taong ibang-iba ang goals sa mga bagay na gusto mong ma-achieve.

5. ‘DI KAYO NAGKAKAINTINDIHAN. Tulad ng tiwala, ang healthy communication ay mahalagang sangkap ng magandang relasyon, pero ‘pag ipinapakita ng partner mo na hindi siya willing makipag-communicate at ‘di niya ito kayang baguhin, valid reason ito ng paghihiwalay.

6. FEELING MO, DAPAT KANG MAGPOKUS SA IYONG SARILI. Kahit pa gaano ka-perfect ang inyong relasyon, mayroong posibilidad na kailangan mo ng panahon para mag-grow on your own sa halip na magpokus sa inyong relasyon. At bes, ‘di ka dapat ma-guilty, lalo na kung sa tingin mo ay ito ang makabubuti sa ‘yo.

‘Pag ‘di ka na masaya sa relasyon, ‘di mo na kailangan ng iba pang rason para mag-initiate ng breakup. Tandaan, dapat mong gawin ang bagay na sa tingin mo ay makatutulong para mas sumaya ka pa.

Gets nating mahirap talagang makipag-break, pero kung alam mong hindi na talaga magwo-work ang inyong relasyon, kakapit ka pa ba?

Tips para ‘di mabiktima ng love scam

ni Jersy L. Sanchez - @Life & Style| February 28, 2022

Ayon sa National Bureau of Investigation (NBI), dumarami na ang mga biktima ng “love scam” sa gitna ng pandemya. Gayundin, may mga Pinoy nang sangkot sa modus na ito.

Pero bago ang lahat, pamilyar na ba kayo sa “love scam”? Para sa mga hindi pa nakakaalam, karaniwang target ng mga kawatan ay ang mga aktibong naghahanap ng karelasyon sa social media.

Ang siste, paiibigin ang target hanggang sa makumbinsi itong magpadala ng pera at ‘pag nakuha na ang padala, bigla na lang maglalaho na parang bula. Ganern!

Sey ng experts, walang espesyal na teknolohiyang ginagamit para maisagawa ang modus na ito, kaya anu-ano nga ba ang mga palatandaan para hindi ka mabiktima nito?

1. BAGO ANG ACCOUNT. ‘Pag wala pa masyadong laman ang account, red flag ‘yan. Kung bago lang ang account, posibleng may itinatago o pinagtataguan. Kaya besh, bago mahulog sa matatamis na salita at pangako, i-check mo muna ang account.

2. MASYADONG MABILIS. Marami ba siyang gustong malaman sa ‘yo? Inaalam ba niya agad kung ano’ng source of income mo o kung saan ka nakatira? May mga pagkakataon din bang gusto niyang mag-settle na kayo? Marahil, sa unang tingin ay normal lang ‘yan dahil feeling mo ay parte ‘yun ng pagkilala niya sa ‘yo, pero baka ‘di mo lang naman na pinag-aaralan na niya kung paano ka bibiktimahin.

3. PURO PANGAKO. Nangako ba siya na magkikita kayo o marami siyang ipinangakong plano para sa future n’yo kuno? Naku, bes, hinay-hinay ka muna. Baka kasi masyadong kang madala sa mga pangako niya kaya kahit ano’ng hingin niya, eh, ibibigay mo na agad.

4. NANGHINGI NG PERA. Ito talaga ‘yung “ultimate red flag”, besh. For sure, sasabihin niyang para sa ikabubuti n’yong dalawa ang paghingi niya ng pera, pero sa true lang, ‘pag nakuha na niya ang iyong padala, malamang na mago-ghost ka na.

5. I-DOWNLOAD ANG PICTURE. Payo ng mga eksperto, para matiyak na tunay ang pagkakakilanlan ng iyong kausap, i-download ang picture nito at saka i-reverse image search. Kapag nakumpirma mong hindi siya totoo, alam mo na, ha?

Ang “love scam” ay isang seryosong krimen, kaya hindi natin dapat dedmahin ang mga senyales na ito. May mga pagkakataon pang nawalan ng ari-arian at ipon na pera ang mga biktima dahil sa sobrang tiwala sa kanilang pinaniniwalaang karelasyon. Ang ending, nawalan na ng dyowa, nawalan pa ng pera o ari-arian. Tsk-tsk-tsk!

Kaya para sa mga aktibong naghahanap ng karelasyon online, take note sa mga senyales na ito dahil baka sa halip na dyowa ang mahanap n’yo, eh, sakit sa ulo at bulsa ang makuha n’yo. Gets mo?