2 lokal na kandidato sa Quezon City, niregaluhan ng live ammo

ni Jeff Tumbado | May 4, 2022

Iniimbestigahan na ng Criminal Investigation and Detection Unit ng Quezon City Police District (QCPD-CIDU) ang insidente ng pagpapadala umano ng mga buhay na bala sa opisina ng isang kongresista sa lungsod.

Batay sa ulat ng QCPD, dakong ala-1:20 ng hapon nang may isang babae na nagpadala ng selyadong kahon sa tanggapan nina Quezon City 5th District Rep. Alfred Vargas at Council PM Vargas sa Novaliches District Center Building, Jordan Plain Subdivision, Barangay Sta. Monica ng nasabing lungsod.

Tinanong umano ng staff ng mga Vargas ang babaeng naghatid ng kahon kung kanino nanggaling ngunit sinabi lamang na hindi nito alam at nagmamadaling lumabas ng gusali at iniwan ang kahon sa mesa. Nang buksan ng mga guwardiya ang kahon ay nakita ang dalawang bala ng 5.56 mm na baril sa loob.

Mabilis namang humingi ng tulong sa pulisya ang mga guwardiya upang maimbestigahan ang insidente at sa kaukulang disposisyon ng mga nadiskubreng live ammunition. Inaalam na rin sa mga kuha ng CCTV ang insidente.

Kapwa kumakandidato sa May 9 elections ang magkapatid sa pagka-kongresista at konsehal ng ika-5 Distrito ng Quezon City.

Isa sa mga mainit na kalaban ni PM Vargas sa pagka-kongresista ay ang kontrobersiyal na negosyanteng si Rose Nono Lim na iniuugnay sa iskandalo ng Pharmally deal at iniimbestigahan na rin ng QCPD dahil sa pagkakaroon umano ng private army.

“Hindi ako magpapatinag maski ang banta ay kasama na ang pamilya, at lalong hindi ako aatras para sa mga taga-Distrito Singko!” diin ng nakababatang Vargas.

Umapela naman si Rep. Vargas sa mga tagasuporta na manatiling mahinahon at tumulong na maprotekahan ang proseso ng eleksyon.

“Marami na pong nag-alok sa amin upang umatras sa eleksyon na ito pero hindi po namin puwedeng gawin ‘yun,” ayon sa kongresista.

Nagbabala naman si QCPD Chief Police Brigadier General Remus Medina sa mga kandidato na sumunod sa patakaran ng COMELEC upang maging peaceful and orderly ang eleksyon sa nasabing siyudad.

Alegasyong pagbitbit ng private army ng isang congressional candidate sa QC, bineberipika na ng QCPD

ni Jeff Tumbado | May 1, 2022

Pinakilos na ni Quezon City Police District (QCPD) Director Brig. General Remus Medina ang kanyang mga tauhan para beripikahin ang impormasyong pagkakaroon ng private army ng isang congressional candidate sa Quezon City.

Ito ang inihayag ni General Medina kaugnay sa napaulat na pagdadala ni Rose Nono-Lin ng kanyang private army sa tuwing nangangampanya.

Si Lin ay kumakandidato bilang kongresista sa ikalimang distrito ng lungsod Quezon.

"We are validating reports regarding the information, we will take action, we will pursue them if it's true," wika ni Medina.

Sinabi pa ni Medina na kanilang aalamin kung sinu-sino ang mga indibidwal na kabilang sa private army ni Nono-Lin.

"As far as the PNP is concerned, possible na may kabilang na pulis sa kanila," pahayag ng opisyal.

Batay sa nakalap na report, hindi bababa sa walong bodyguards na pawang mga armado ng baril ang umano’y kasa-kasama ni Nono-Lin, bukod pa sa mga security personnel na nakatalaga sa mga headquarters nito.

Sa ilalim ng Omnibus Election Code ng Commission on Elections (Comelec), kasabay na rin ng kanilang paghihigpit ay ipinagbabawal ang maraming security escorts sa panahon ng campaign period at pinahihintulutan na dalawa lamang ang nakatokang security details sa bawat local candidate.

Siniguro naman ni General Medina na maipupursige ang kaso laban kay Nono-Lin kung mapatunayan na may private armed group ito.

Binalaan din ni Medina ang lahat ng kandidato sa Quezon City na mahigpit ang utos ni Pangulong Rodrigo Duterte laban sa escorts at private armed groups sa election period at handa aniya ang QCPD na ipatupad ang batas at buwagin ang nasabing mga grupo para sa matiwasay na halalan.

Nauna na ring nahaharap sa mga reklamong vote-buying si Nono-Lin na naipatawag na rin ng Comelec upang ibigay ang panig nito sa mga akusasyon.

"Kabang-yaman ng Maynila, winaldas" — Bagatsing

ni Jeff Tumbado | April 13, 2022

Ibinulgar ni dating Manila Mayor Amado Bagatsing ang umano’y pagwawaldas ng kabang-yaman ng Lungsod ng Maynila mula 2019 hanggang sa kasalukuyan.

Sa isang pulong balitaan kanina, sinabi ni Bagatsing, na sa gitna ng pandemya na dulot ng COVID-19 ay nakuhang umutang ng malaking halaga ang lungsod ngunit hindi naman naramdaman ng mga tao kung saan ito ginamit.

“Nakalulungkot na sa gitna ng pandemya, nakuha pa nila na magsabwatan upang waldasin ang pondo ng bayan nang wala sa ayos,” ani Bagatsing.

“Nakapagtataka na paanong nagyari na bukod-tanging ang lungsod ng Maynila lamang ang walang habas na nangutang para diumano sa pandemya. Pero ang totoo, naubos ang bilyon-bilyong pondo para sa isang serye ng mga palabas at papogi at pampaganda na proyektong hindi naman masyadong naramdaman ng mga pobre ng Maynila,” dagdag pa ng dating mambabatas.

Sa ipinakitang presentasyon ni Bagatsing, inilahad nito na may humigit-kumulang 29-bilyong pisong perang nalikom noong 2019 ang dating administrasyon ni Manila Mayor Joseph Estrada. Mula ito sa napakalaking kinikita ng lungsod sa business taxes at share sa Internal Revenue Allotment (IRA).

Mariing kinuwestiyon ni Bagatsing ang pagkakautang ng 25-bilyon piso at ang pagbebenta ng mga pampublikong pag-aari ng lungsod ng Maynila tulad ng Divisoria Public Market, City College of Manila at iba pang nakatakda ring ibenta.

Sa ipinakita nitong impormasyon na mula sa DBM, may naka-record na 44-bilyong piso na proceeds from sales of assets ngayong 2022.

Ayon pa rin kay Bagatsing, maraming nakuhang tulong o donasyon mula sa international community ang lokal na pamahalaan, isama pa ang ayuda mula sa national government.

Ipinaliwanag pa ni Bagatsing na tinatayang P50,000 ang dapat na matanggap ng bawat pamilyang Manilenyo kung ang inutang na P25 bilyon ay para talaga sa ayuda o pantulong pinansiyal.

“Subalit sa aktwal, ang bawat pamilyang Manilenyo ay nakatanggap lang ng halagang 800-piso na pamaskong handog," giit ni Bagatsing.

"Ang mas masakit, hindi na nga natanggap ang 50,000 kada pamilya, may utang pa ngayon ang bawat pamilyang Manilenyo ng 50,000 plus interes, na pati ang kinita ng mga commissioner, tayo pa rin ang magbabayad!” pagpapalawig pa ng dating local chief executive.

“Tignan ninyo ang simpleng mga halimbawa natin dito. Ibenenta nila ang Divisoria Public Market sa halagang mahigit sa isang bilyong piso, para ipampagawa ng mahigit sa 1bilyong Manila Zoo? Ano ba ang mas importante? Tirahan ng hayop na meron naman? O kabuhayan ng ating mga vendor?” paliwanag ni Bagatsing.

Samantala, isiniwalat ni Bagatsing na gumastos ng milyon-milyong piso ang pamahalaang lungsod sa “Bilis-Kilos” advertisement sa TV at mga ayuda sa ibang bayan “in aid of election ni Isko.”

“Sana bago tayo tumulong sa ibang bayan, unahin muna natin ang ating sariling bayan. Bakit ka mangungutang para lamang magpapogi at magpaganda. 'Yan ang maliwanag na mga pagwawaldas ng ating kabang yaman!” saad ni Bagatsing.

“Sa ating mga kababayang Manilenyo, karapatan nating malaman ano ang tunay na katayuan ng ating kabang yaman at mga pag-aaring pampubliko. Tanungin po natin ang kasalukuyang mayor at vice mayor, ano na po ang mga nabenta o ibebenta pa ninyo bukod sa PNB bldg. at Divisoria market? Alamin natin baka mamaya hindi na tayo ang may-ari ng Boystown, ng Mehan Garden, ng Museong Pambata? Naiisip nila pati City Hall ibebenta nila, alamin natin baka pati ang North at South Cemetery ibinebenta na rin, kasama ang mga narematang pag-aari," pagtatapos nito.