ni Janiz Navida @Showbiz Special | October 26, 2025
Photo: FB Justin Dizon
MARAMI ang natuwa sa nag-viral kahapon sa socmed na photo nina Kris Aquino at First Lady Liza Araneta-Marcos habang magkatabing nakaupo sa dining table.
Akala ng marami ay edited o AI (artificial intelligence) lang ang naturang photo, pero kinumpirma mismo ng good friend ni Kris na si Tito Dindo Balares (dating entertainment editor ng Balita) na totoo ‘yun, base na rin sa sagot sa kanya ni Krissy.
Kuha pala ang naturang larawan sa birthday lunch ng fashion designer na si Michael Leyva last Friday, Oct. 24.
Best friend ni Kris si Leyva samantalang kung ‘di kami nagkakamali, fave designer naman ito ng First Lady.
Walang ibang detalyeng ibinigay si Kris tungkol sa naging pagkikita nila ni FL Liza, but for sure, knowing kung gaano kadaldal ang dating Presidential Daughter, siya ang nag-handle ng conversation para hindi maging awkward ang lahat sa pagitan nilang dalawa ng misis ni President Bongbong Marcos, Jr..
Samantala, marami naman ang natuwang makita si Kris ngayon na malaman na ang pisngi at pati mga braso, ‘di katulad noon na sobrang payat at talagang bumagsak ang timbang at halos hindi na makatayo kaya binubuhat na lang ni Bimby.
Obviously, Kris is getting better and looks healthier now. Sana nga ay magtuluy-tuloy na ang paggaling niya.
Nakipagbiritan kay Frenchie…
SHERYN, OBYUS NA NAGPARETOKE NG ILONG
HINDI binigo si Frenchie Dy ng kanyang mga BFF sa showbiz dahil dumating talaga sila para sumuporta at mag-perform sa first major concert ng Power Diva titled Here To Stay na ginanap sa Music Museum last Friday night, Oct. 24.
Sayang, hindi namin naumpisahan ang show at ‘yung part na ng magician na si Ala Kim ang inabutan namin. Pero bukod sa kanya, dumating at nakipag-duet kay Frenchie ang mga good friends niyang sina OJ Mariano, Ice Seguerra, Sheryn Regis, Ima Castro, mga komedyanteng sina Atak at Fifi, at ang magkapatid na sina Direk Cathy Garcia at Rocky Garcia.
Isa si Frenchie sa mga talents ni Direk Cathy sa CLNjK Talent Management, kaya naman all-out support ang Box Office Director at first time naming narinig kumanta sa concert, all for the love of Frenchie.
‘Kaaliw naman ang bukingan nina Frenchie at Ice sa kanilang friendship, na sabi nga ng mister ni dating FDCP Chair Liza Diño, lagi raw silang hindi sinisipot ni Frenchie kapag may lakad silang magkakaibigan. Ang katwiran naman ni Frenchie, ang layo ng place niyang Novaliches sa Makati na venue ng bonding ng magkakaibigan.
Umani rin ng malakas na palakpakan ang duet ni Frenchie with Ima and Sheryn respectively. Jusko, parang sumakit ang lalamunan at batok namin sa sobrang taas ng mga boses nila. Aba’y kahit gusto naming sumabay sa birit nila, parang mapuputol ang ugat namin sa sobrang taas. Hahaha!
Pero bibilib ka rin talaga kay Sheryn, kahit medyo nagkaedad na, hindi nagbago ang tining ng boses ng Crystal Voice of Asia. Napansin lang namin na medyo naging pointed ang ilong niya kaya hindi namin maiwasang mag-isip na nagparetoke na rin siguro ng nose si Sheryn.
Why not, mas gumanda naman siya ngayon at in fairness, hindi naapektuhan ang boses niya if true nga na nagpa-enhance siya.
Aliw na aliw din kami kay Frenchie at umani siya ng malakas na palakpakan mula sa audience sa panggagaya sa boses nina Jessa Zaragoza, Jaya, Sharon Cuneta, Pilita Corrales at Vina Morales. Ang husay ng Power Diva, pati pagliyad ni Tita Pilita (SLN), nagaya! Hahaha!
Marami namang nalamang trivia about Frenchie dahil sa interview sa kanya ng una niyang manager na si Tito Boy Abunda, na malaking part din ng concert.
Oh, well, congrats to Frenchie, to Direk Alco Guerrero and to Grand Glorious Productions (of course, sa malaking effort ni Ate Julie Bonifacio) for a successful show, na BTW, some of the proceeds will go to Bell’s Palsy’s patients bilang tulong ni Frenchie sa mga tulad niyang nakaranas din nito, pero good thing ay naka-recover at survivor siya.
NAGPAHAYAG ng suporta si Pokwang sa posisyon ni Senador Bam Aquino na dapat gawing bukas sa publiko ang Statements of Assets, Liabilities, and Net Worth (SALN) ng mga opisyal ng gobyerno.
Sa isang pahayag, sinabi ni Sen. Bam na ang desisyon ng Ombudsman na gawing accessible sa publiko ang mga SALN ay isang mahalagang hakbang tungo sa pagpapatibay ng pananagutan at pagsusulong ng mabuting pamamahala.
“Magandang hakbang ito para masimulan na ang paglilinis ng ating gobyerno. Itong pagiging normal ng transparency, mahalaga ito. At sana nga, isa ito sa mga unang hakbang patungo sa hinahanap ng taumbayan na mas malinis na gobyerno sa ating bansa,” sabi ni Sen. Bam.
Sumang-ayon si Pokwang sa paninindigan ng senador. Gayunman, binigyang-diin din ng komedyana na dapat munang isapubliko ng Independent Commission for Infrastructure (ICI) ang mga pagdinig nito kaugnay ng mga anomalya sa flood control.
“Tama po sen. @bamaquino dapat talaga isapubliko ang SALN ng mga opisyal ng gobyerno, pero unahin muna na isapubliko ang pagdinig sa ICI para makuha ang tiwala ng tao na bugbog na,” ani Pokwang sa kanyang Instagram Stories.
Kilala ang komedyana sa pagiging matapang sa pagpapahayag ng kanyang saloobin sa mga isyung may kinalaman sa pamahalaan at pampublikong serbisyo na may direktang epekto sa pang-araw-araw na buhay ng mga Pilipino.
Itinutulak din ni Sen. Bam ang pagpasa ng kanyang Senate Bill No. 1330, o ang Philippine National Budget Blockchain Act, na kanyang tinawag bilang makapangyarihang sandata sa paglaban sa korupsiyon sa pamahalaan at sa paggamit ng pambansang badyet.
Layunin ng panukalang batas ni Sen. Bam na ilagay sa blockchain ang pambansang budget upang mapahusay ang transparency at accountability, at mabigyang-daan ang mga mamamayan na makita kung saan napupunta at paano ginagamit ang kanilang pinaghirapang buwis.
Nais din niyang isama sa bill ang mga panukala ni Naga City Mayor Leni Robredo hinggil sa full disclosure upang higit pang mapalakas ang transparency bilang bahagi ng kanyang pagsisikap na magkaroon ng reporma sa sistema ng pamahalaan.
