Bagong modus, nagpapanggap na pasahero motornapper pala

ni Atty. Rodge Gutierrez @Mr. 1-Rider | April 30, 2024

Dobleng pag-iingat ang anunsiyo ng Philippine National Police (PNP) para sa ating mga ‘kagulong’ matapos maalarma hinggil sa bagong modus operandi na mga nagpapanggap na pasahero saka tatangayin ang motorsiklo ng mga rider na nagresulta sa pagtaas ng motornapping sa bansa.

Personal na dumulog sa tanggapan ng Dasmariñas Component City Police Station ang biktima na si alyas Adrianne matapos tangayin ng isang nagpanggap na pasahero ang kanyang asul na motorsiklong Honda Click.

Ayon sa imbestigasyon, nagkasundo ang biktima at pasahero na sunduin ito harap ng Robinson’s Pala Pala na matatagpuan sa Sampaloc 1, Dasmariñas City, Cavite, dakong alas-5:30 kamakalawa ng hapon.

Tulad ng ordinaryong pasahero ay nagsuot pa ng helmet ang salarin ngunit habang bumibiyahe na ay biglang sinabi ng pasahero na ihinto sandali ang motorsiklo at nang iparada ang motorsiklo ay agad na tinutukan ng baril at tinangay ang sinakyang motorsiklo.

Sa ngayon ay patuloy ang isinasagawang backtracking sa Closed Circuit Television (CCTV) ng pulisya para sa pagkakakilanlan ng suspek.

Matatandaan na noong Miyerkules ng madaling-araw, isang Angkas rider ang tinangayan din ng kanyang motorsiklo na isang Suzuki Gixxer 150, ng isang nagpakilalang pasahero sa Barangay Salitran 2, Dasmariñas City, Cavite.

Alarmado na sa kasalukuyan ang PNP hinggil sa bagong modus operandi na ito ng mga magnanakaw ng motorsiklo at inaasahang isa sa mga araw na ito ay masasakote ang sindikatong nasa likod nito.

Kaya sa mga rider, makabubuting maging mapanuri sa klase ng pasaherong isasakay upang hindi maging biktima ng motornapping na patuloy ang pagtaas ng bilang ayon sa datos.

Magdala ng kahit na anong puwedeng ipanlaban sa mga masasamang loob na hindi bawal – tulad ng tubo o kahit anong puwedeng pamalo para makalaban sa mga salarin.

O kaya ay huwag nang lumaban kung hindi naman kaya upang hindi na mapahamak at hindi na ito maging mitsa ng kapahamakan.

Sa panahong ito kailangang-kailangan ang check point na isinasagawa ng PNP sa mga motorsiklo pero sa pagkakataong ito ay ang mga pasahero naman ang inspeksiyunin nang mahigpit para masakote ang mga may baril o patalim.

Tumataas ang motornapping sa bansa dahil sa may mga kababayan tayong bumibili ng motorsiklo kahit walang papeles sa halagang P5K lamang bawat isa.

Ito rin ang dahilan kaya marami na rin ang motorsiklong bumibiyahe sa mga lalawigan ang walang papeles dahil galing nga sa nakaw.

May mga sindikato namang nakikipag-ugnayan sa kahabaan ng Recto, Manila na silang gumagawa ng mga pekeng dokumento ng mga nakaw na motorsiklo bago ipagbili kaya dapat talagang mag-ingat.

Marami sa ating mga rider ang kaya lamang nagkaroon ng motorsiklo dahil hulugan at kaya nila nahuhulugan dahil sa tiyaga nila bilang rider tapos ay sila pa ang pupuntiryahing nakawan ng motorsiklo.

Lahat ng bagay sa Pilipinas ay gaya-gaya lang, kung ano ang uso ay ginagaya kaya dapat mag-ingat dahil baka gayahin ng mga masasamang loob ang bagong modus na ito — kawawa naman ang ating mga rider.

Pero huwag tayong mag-alala dahil sa nagbigay na ng babala ang PNP — ibig sabihin ay tinatrabaho na nila ang mga masasamang loob na ito.

Sikapin na lamang nating huwag maging biktima at kapag mga liblib na lugar ang pupuntahan ay makabubuting huwag na munang tanggapin o kaya ay dumaan muna sa mga police sub-station para magpa-blotter kung duda sa pasahero.

Ipaliwanag lamang sa pasahero na kailangan na talagang dumaan sa police station dahil sa mataas na kaso ng motornapping.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Bantaan, gantihan ng LTFRB at transport group, nakakaumay na

ni Atty. Rodge Gutierrez @Mr. 1-Rider | April 27, 2024

Tila wala nang humpay ang gantihan sa pagitan ng Land Transportation and Franchising Regulatory Board (LTFRB) at ng mga transport group na mahigit na isang taong hindi pa rin napagkakasunduan kung paano mareresolba ang problema sa tradisyunal na jeepney sa bansa.

Ang nangyayari kasi ay maglalabas ng deadline ang LTFRB hinggil sa phaseout ng tradisyunal na jeepney ngunit hindi naman maipatutupad dahil sa kabi-kabilang tigil-pasada na isinasagawa ng ilang transport group.

Mahigit na isang taon ang ganitong sitwasyon at ang resulta ay wala nang naniniwala sa mga anunsyo ng LTFRB at namimihasa na rin ang ilang transport group na konting kibot ay nagsasagawa ng tigil-pasada.

Sa pinakahuling tigil-pasada na isinagawa ng mga transport group na Manibela at Piston noong nakaraang Lunes, Abril 15 at 16 ay nagbabala na naman ang LTFRB na babawian nila ng prangkisa ang mga lumahok sa naturang protesta.

Ayon kay LTFRB Chairman Atty. Teofilo Guadiz III, babawian ng prangkisa ang ilang mga tradisyunal na jeep na pumasok na sa consolidation ngunit sumasama pa rin sa transport strike. Iginiit nito na ang ibinibigay na prangkisa ng estado ay hindi isang karapatan, kundi isang pribilehiyo at ang estado rin aniya ang nagsasaad ng paraan kung paano ito nararapat gamitin.

Kaya ang resulta, nasa estado tayo na wala pa ring solusyon sa naturang problema at patuloy pa ring nagpapatintero ang transport group at LTFRB na inaasahang aabutin na naman ng panibagong taon na walang mangyayari.

Nakakaumay na rin  kasi ang bantaan at gantihan sa pagitan ng LTFRB at ilang transport group na palagi na lamang nagtatakutan dahil ang talo rito ay ang publiko na naghihintay sa mga anunsyo ng LTFRB ngunit tinatalo ng ‘pakulo’ ng mga transport group.

Kung hindi kayang magpatupad ng LTFRB ng mga programa para maisaayos ang kalagayan ng mga transport group ay makabubuting dapat nilang unahin ang kanilang hanay na maisaayos at kung kaya na nila ang kanilang trabaho ay saka na nila ayusin ang transport group sa bansa.

Maliwanag kasi na sa hinaba-haba ng panahon ay nananatiling problema pa rin ang pagpapatupad ng Public Utility Vehicle Modernization Program (PUVMP) ng pamahalaan na ilang taon nang hinihintay ng publiko.

Kung hindi naman kaya ng LTFRB na ipatupad nang maayos ang PUVMP ay makabubuting itigil na ito upang maiwasan na rin ang mga protesta dahil nagdurusa sa hidwaang ito ay ang mga pasahero at ilang ahensya na sumasaklolo para makauwi ang mga stranded na komyuter.

Ngayon, kung talagang may nakikitang positibo ang LTFRB sa pagpapatupad ng PUVMP ay tatagan sana nila ang kanilang tanggapan para ipatupad ang mga bagay-bagay para hindi tayo paulit-ulit.

Hindi ko sinasabing igiit natin ang PUVMP, ang punto ko lang, kung hindi naman kaya ay mabuting itigil na dahil noong pinakahuling protesta ng Manibela at Piston ay nagdulot lamang ito ng matinding pagsisikip ng trapiko at ang apektado ay ang mga taong walang kinalaman sa problemang ito.

Pero bago pa ang nabanggit na bantang tigil-pasada ay nagbabala ang LTFRB na babawian nila ng prangkisa ang mga lalahok sa transport strike, pero ang resulta ay may mga sumama pa rin sa protesta.

Ngayon balikan natin ang LTFRB — maipatutupad ba ang pag-alis ng prangkisa? Ito ay isang malaking katanungan na naman kung kaya nilang ipatupad, pero ang malinaw, tiyak na darating na naman ang Pasko ngunit hindi pa rin tapos ang problemang ito.

Malapit nang magretiro ang mga nakatalaga sa LTFRB at sana naman bago sila mag-retire ay maayos nila ang problema sa mga jeepney — pasulong o paatras man ay naghihintay ang taumbayan. Ang mahalaga ay maisapinal kung kaya o hindi ang trabaho para hindi umaasa ang lahat.

Tandaan natin na kahit sa larong basketball, ‘pag puro ‘dribble’ at hindi sumu-shoot ay hindi mananalo kahit kailan — kaya dapat shoot-shoot din ‘pag may time, hindi puwedeng pasa lang nang pasa ng bola.   

Kapakanan ng ating mga pasahero ang nakasalalay sa problemang ito na iniatang sa LTFRB para maresolba, kaya sana ay maisaayos na ito sa lalong madaling panahon na lahat ng panig ay masaya.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Dagdag-lane, mas bibilis ang serbisyo ng mga ‘kagulong’

ni Atty. Rodge Gutierrez @Mr. 1-Rider | April 23, 2024

PINAG-IISIPAN na ng Department of Transportation (DOTr) at iba pang ahensya ng gobyerno ang posibilidad na magdagdag ng motorcycle lane para maibsan ang problema sa trapiko sa kahabaan ng EDSA.

Base sa pahayag ni DOTr Secretary Jaime Bautista, nasa 170,000 motorsiklo ang dumaraan sa EDSA kada araw na malaking sanhi din ng pagsisikip ng daloy ng trapiko.

Sinabi ni Bautista na mayroon nang inisyal na talakayan ang DOTr sa Metropolitan Manila Development Authority (MMDA) sa pagkakaroon ng dedicated lane para sa mga motorsiklo sa EDSA.

Nabatid na ang EDSA ay four lanes lamang. Ang isang lane ay inilaan pa sa busway. Sa kanang bahagi naman ay itinalaga sa bicycle lane. Pinaplano na umano ng DOTr na ‘yung katabi ng bicycle lane ang gagawing motorcycle lane.

Upang maiwasan umano na lahat ng lane ay ginagamit ng motorsiklo, kaya nais ng DOTr na magdagdag ng panibagong lane.

Abala ngayon ang DOTr sa pakikipag-ugnayan sa MMDA, kung paano sisimulan ang paglalagay ng panibagong lane na ilalaan para sa motorsiklo.

Layon umano ng DOTr na sa pamamagitan ng motorcycle lane sa EDSA, na tugunan ang economic cost ng traffic.

Inihayag din ng DOTr ang pag-aaral noong 2012 ng Japan International Cooperation Agency (JICA) na nagsasaad na ang economic cost ng traffic ay P2.4 bilyon kada araw sa Metro Manila.

Noong 2017, ang gastos umano sa ekonomiya ay umabot sa P3.5 bilyon sa isang araw habang ang pinakahuling pag-aaral noong 2022 ay nagpapahiwatig na ang pagkalugi sa ekonomiya mula sa sobrang traffic ay P4.9 bilyon sa isang araw lamang at inaasahang tataas pa umano ito ng P9 bilyon kada araw sa 2030.

Sa paliwanag ng DOTr, ang economic cost (of traffic), ito umano ‘yung additional fuel, additional cost, nawawalang opportunity for growth, at pagkawala pa ng panahon sa pamilya.

Kung maisasakatuparan sa lalong madaling panahon ang karagdagang lane sa EDSA para sa motorsiklo ay napakalaking ginhawa nito para sa ating mga ‘kagulong’ at bibilis na ang mga serbisyo na ginagamitan ng motorsiklo.

Higit sa lahat ay malalayo na rin sa aksidente ang mga nagmomotorsiklo sa kahabaan ng EDSA kung magkakaroon ng karagdagang lane at maiiwasan na rin ang pagtawid-tawid sa kahabaan ng busway dahil sa walang ibang madaanan.

Sana ay hindi na magkaroon ng pagbabago ang planong ito ng DOTr dahil ngayon pa lamang ay marami na ang natutuwa sa napakagandang planong ito na matagal nang minimithi ng ating mga ‘kagulong’.

Maging ang mga motorista na matagal nang nagrereklamo na nagsasalimbayan sa kanilang pagmamaneho ang mga rider dahil kasama nila sa iisang lane ay buung-buo ang pasasalamat dahil maaaksyunan na rin sa wakas ang matagal na nilang kahilingan.

Ngayon pa lamang ay inaasahang magiging matagumpay ang karagdagang lane na ito para sa motorsiklo sa EDSA dahil kailangang-kailangan na talaga ito.

Kaya hindi pa man ay binabati na natin ang pamunuan ng DOTr dahil sa magandang hakbangin na ito. Sana ay masimulan na ang proyektong ito.

Sa DOTr, umaasa ang marami nating kababayan na magiging maganda na ang daloy ng trapiko sa EDSA kapag naisaayos ang karagdagang lane para sa motorsiklo.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.