Top 9 dahilan ng pagkamatay ang pagmomotorsiklo, ingat!

ni Atty. Rodge Gutierrez - @Mr. 1-Rider | October 11, 2022

May tumatakbong biro sa hanay ng mga gumagamit ng motorsiklo na kaya dapat umanong magsuot ng helmet ay upang manatiling guwapo pa rin ang mukha ng nasawi dahil sa aksidente sa pagmomotorsiklo.

Biro man, ngunit kung ating bibigyang-pansin ay mahalaga ang ibig sabihin dahil pinatutunayan lamang nito na kahit nakasuot ng helmet ay hindi ito sapat para makaligtas sa kamatayan ang rider.

Kung ang nakasuot ng helmet ay binabawian ng buhay — mas lalo pa ang walang suot kaya dapat mas doble ang pag-iingat sa tuwing sasakay ng motorsiklo at maging responsable tayo na alamin ang tama at ligtas na pagmamaneho ng motorsiklo.

Hindi natin dapat binabalewala ang ‘helmet law’ dahil kung may nasasawi pa rin kahit nakasuot nito ay mas marami ang nasasawi dahil sa hindi pagsunod sa batas na dapat nakasuot ng helmet ang nagmamaneho ng motorsiklo.

Bilang rider, hindi ko tinatalakay ang paksang ito para takutin ang ating mga ‘kagulong’ kung hindi para mas itaas pa ang kaalaman kung paano makapag-iingat sa tuwing sasakay ng motorsiklo at palagi ninyong iisipin na may mga mahal kayo sa buhay na naghihintay sa inyong pag-uwi.

Huwag maging mayabang kapag nagmamaneho at huwag sumubok ng mga kakaibang estilo na hindi n’yo napag-aaralan kung paano talaga gawin, lalo na kung sama-sama o grupu-grupo kayong nagmamaneho at hindi maiwasan ang kantiyawan at habulan.

Marami sa ating mga ‘kagulong’ ang hindi alam na ang pagmamaneho ng motorsiklo ang pang-siyam sa sampung dahilan ng nagiging kamatayan ng ating mga kababayan ayon mismo sa ulat ng Land Transportation Office (LTO).

Mahigit na sa sampung milyong rehistradong motorsiklo ang meron tayo sa buong kapuluan na patuloy pang dumarami at mahigit na sa tatlong milyong mas marami ang ating mga ‘kagulong’ kumpara sa lahat ng klase ng umaandar na sasakyan sa kalye sa buong bansa.

Ibinase ng pamunuan ng LTO ang kanilang ulat sa datos na inilabas ng Philippine Statistics Authority (PSA) na kasama nga sa sampung nakamamatay ang pagmumotorsiklo at ito lang ang tanging hindi natural na kamatayan.

Kasama sa talaan ng sampung nakamamatay ang Ischemia o ang kakulangan ng suplay ng dugo sa internal organ ng ating katawan, partikular sa heart muscles kaya ito ang top killer sa ating bansa na pinatotohanan naman ng Department of Health (DOH).

Kasunod sa listahan ang cancer, pneumonia, cerebrovascular diseases, hypertension, diabetes, iba pang heart ailments, respiratory tuberculosis, chronic lower respiratory infections at diseases of the genitourinary system.

Wala pang bagong ulat na inilalabas ang Metro Manila Development Authority (MMDA) ngunit sa pinakahuling ulat na ating nakalap ay umabot na sa 31, 279 ang naitala nilang aksidente na kinasasangkutan ng motorsiklo o baka mas mataas pa.

Lumalabas na ang ulat na ito ay sa loob lamang ng isang taon nangyari na kung susumahin ay nasa 86 kaso ng aksidente kada araw kaya kailangan talaga ng ibayong pag-iingat.

Hindi ko isinama ang ulat sa mga nasirang property pero ang ‘kagulong’ nating namatay ay 154, angkas na namatay 36, pedestrian na namatay 22, driver na sugatan 9,655, angkas na sugatan 2,546 at pedestrian na sugatan ay 2,140.

Mahal ko ang ating mga ‘kagulong’ at nasasaktan ako kapag may tinatawag na ‘camote riders’, na ayon sa depinisyon ng awtoridad ay unfit, dangerous, ignorant, stupid at suicidal, kaya sana hindi tayo makasama rito.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Mas mabilis na rehistro at renewal ng lisensya, wala pang pila

ni Atty. Rodge Gutierrez - @Mr. 1-Rider | October 8, 2022

Tila nakatsamba ang pamunuan ng Land Transportation Office (LTO) sa proyekto nilang LTO-On-Wheels na nagsimula lamang sa dalawa, ngunit dahil sa napakagandang feedback ay plano na itong gawing lima sa lalong madaling panahon.

Hindi inakala ng pamunuan ng LTO na maraming tanggapan ng pamahalaan ang nagre-request na madala na rin sa kanilang lugar ang mobile one-stop-shop ng LTO upang mas madaling makapagparehistro ng sasakyan o makapag-renew ng kani-kanilang lisensya.

Napakaganda ng proyektong ito dahil sa pamamagitan nito ay hindi na kinakailangang bumiyahe pa ng aplikante dahil nasa kanilang mismong lugar na at higit sa lahat ay hindi na sila magdurusa sa haba ng pila sa mismong mga tanggapan ng LTO.

Nitong nakaraang buwan ay umarangkada ang LTO-On-Wheels sa loob ng Camp Karingal upang bigyan ng mabilis na serbisyo ang mga police personnel na lahat ay tuwang-tuwa dahil nakatipid na sila gasolina o pamasahe ay nakatipid pa sila sa oras.

Kasama sa mga ipinoproseso ng LTO-On-Wheels ang aplikasyon sa renewal ng rehistro ng motorsiklo at iba pang sasakyan, student permit, renewal ng driver’s license, renewal without penalty at conversion ng paper license para maging card.

Standard ang ipinatutupad na bayad ng LTO at walang karagdagang kahit anong gastos at higit sa lahat at direkta ang gagawing transaksyon sa kanilang tauhan at walang pasaway na pakalat-kalat para makialam sa mga aplikante.

Malaki ang hakbang ng LTO dahil bukod sa mapapalapit ang serbisyo sa publiko ay mawawalan na rin ng pagkakataon ang mga ‘fixer’ na pakalat-kalat sa ilang tanggapan ng LTO dahil sobrang bumilis ang proseso.

Medyo may kataasan ang bilang ng mga nagmamaneho ng motorsiklo ang walang lisensya, lalo na sa mga probinsya dahil marami ang andap na magtungo sa tanggapan ng LTO dahil sa pag-aakalang mahirap ang proseso.

Pero dahil sa LTO-On-Wheels ay malaking porsyento sa ating mga ka-motorsiklo sa mga probinsya ang hindi na mahihirapang kumuha ng student permit upang magkaroon ng lisensya kung sakaling umabot na ang kanilang operasyon sa mga lalawigan.

Bukas ang tanggapan ng LTO sa mga nais madala ang LTO-On-Wheels sa kani-kanilang lugar dahil maaaring mag-request ang mga barangay captain o kahit anong ahensya ng gobyerno para makapagbigay ng serbisyo.

Ang kailangan lang naman ay tiyaking maayos ang parking space para sa bus ng LTO at makapag-provide ng at least 10mbps na internet connection upang maiproseso ang requirements ng mga aplikante at puwedeng pag-usapan kung ilang araw mananatili ang LTO-On-Wheels sa inyong lugar.

Ganito naman si Mr.1-RIDER, hindi naman tayo puna lang nang puna dahil tinutulungan naman natin ang kahit sino o anumang ahensya ng pamahalaan na gumagawa ng maayos, tulad ng kapuri-puring LTO-On-Wheels.

Pero hindi rin natin sasantuhin ang mga gumagawa o sangkot sa mga anomalya dahil kapag may nagreklamo ay wala tayong magagawa kung hindi ang ibulgar ang katotohanan.

Kaya walang pikunan kung mayroon kaming masasagasaan dahil tiyak na hindi namin ito sinasadya pero kung may inagrabyado kayo sa ating mga kababayan lalo na sa aking mga ka-motorsiklo ay tiyak na may paglalagyan kayo.

Sa LTO, huwag kayong magplano na gawing lima ang inyong LTO-On-Wheels dahil mas maganda kung gawin n’yo na itong sampu para mas marami ang matulungan, lalo na sa probinsya.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Buwagin ang LTMS na pugad ng mga fixer

ni Atty. Rodge Gutierrez - @Mr. 1-Rider | October 6, 2022

Nabigyan tayo ng pagkakataong makapagsulat sa nangungunang tabloid sa bansa, ang BULGAR. Bilang abogado at Representative ng 1-RIDER Party List, nais kong gamitin ang espasyong ito sa pagtugon sa mga suliranin hindi lang ng mga kapwa ko rider at motorista, kung hindi maging sa ordinaryong pasahero.

Tatalakayin natin ang iba’t ibang kuwento, karanasan, batas, karapatan, reklamo, anomalya at modus-operandi upang hindi tayo maging biktima pa.

Kung wala tayong dinadaluhang sesyon sa Kongreso ay regular tayong naglilibot sa iba’t ibang bahagi ng bansa at lahat ng mga sumbong na ating masasalubong ay ipararating ko sa inyong lahat.

Sa iba pang mahilig sa motorsiklo na nais sumama sa ating grupo ay maaari kayong makipag-ugnayan para sa mga detalye upang madagdagan ang inyong kaalaman kung paano ang tamang pagmamaneho at hindi tayo matawag na ‘camote driver’.

Dahil sa sobrang hilig ko sa motorsiklo ay isa ako sa nasasaktan kapag may mga bumabatikos na maraming gumagamit ng motorsiklo ang wala umanong disiplina dahil sa kakulangan ng kaalaman.

Marami ang nagkaroon lang ng hulugang motorsiklo na dahil marunong lamang magbisikleta ay nagmaneho na agad kahit walang sapat na pagsasanay na isa sa mga puwede nating tugunan kung sakaling makikipag-ugnayan kayo sa amin.

Ngayon ay may kakampi na kayo sa pamamagitan ko bilang si MR. 1-RIDER at maging ang mga nagmamaneho ng motorsiklo at iba pang motorista na biktima ng pang-aabuso mula sa kamay ng mga traffic enforcers ay maaari ilapit sa inyong lingkod.

Sa ngayon ang isa sa una nating tatalakayin ay ang ginagawang pag-aaral ng Land Transportation Office (LTO) hinggil sa pagbuwag sa Land Transportation Management System (LTMS) dahil pinagpasapasahan lamang umano ito ng mga fixer sa pagre-renew ng driver’s license. Sa nakaraang pagdinig ng Senate committee on finance para sa panukalang P167.12 bilyong budget ng Department of Transportation (DOTr) ay ipinagtapat mismo ni LTO chief Teofilo Guadiz III, na 75 hanggang 80% ng mga kumukuha ng eksaminasyon sa ilalim ng LTMS ay hindi naman umano ang mga mismong nagre-renew ng kanilang lisensya.

Ibig sabihin, kung gaano katagal itong LTMS ay ganito na rin nagpapasasa ang mga fixer na karaniwang nakikita sa mga tanggapan ng LTO na kahit naglalakihan ang mga babala na ‘BAWAL ANG FIXER’ ay naglipana pa rin ang mga ito.

Kung susuriin ang kasalukuyang set-up ay walang facial recognition system ang LTMS para matukoy sana ng LTO kung ang aplikante ba talaga ang sumasailalim sa seminar at kumukuha ng eksaminasyon.

Ang nakalulungkot, alam na ng LTO na may mga fixer, alam na nilang walang kuwenta ang LTMS dahil ginagamit lang sa ilegal pero hanggang ngayon ay pinag-aaralan pa rin nila kung kailan aalisin.

Sana ay umaksyon na ang LTO para ayusin at linisin ang kanilang hanay dahil maraming mahihirap na motorista ang biktima at hindi lang sana puro plano o balak.

Habang hindi umaaksyon ang LTO na ayusin o palitan ang LTMS ay patuloy na magsisitaba sa kabusugan ang mga fixer habang maraming motorista ang nahihirapan.

Kunsabagay ay buo ang tiwala natin kay LTO chief Guadiz na dating Regional Director ng National Capital Region (NCR) at Region 1 na nagpamalas naman ng maayos na panunungkulan kaya malaki ang pag-asa na mabago ang bulok na sistema.

Alam nating ang bagong pamunuan ng LTO ay galit sa mga fixer, pero ang ibang empleyado nito (hindi naman lahat) ay ‘friend’ ang mga fixer, kaya nga sabay silang nag-iinuman pagkatapos ng opisina dahil habang nagkukuwentuhan ay nagkukuwentahan din.

---

Kung mayroon kayong nais idulog o ipaabot sa inyong abang lingkod, maaari kayong sumulat sa MR. 1-RIDER ni Atty. Rodge Gutierrez, BULGAR Bldg., 538 Quezon Ave., Quezon City.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.