ni Atty. Rodge Gutierrez - @Mr. 1-Rider | December 6, 2022
Hindi pa man ako ipinapanganak ay problema na ang korapsyon sa tanggapan ng Land Transportation Office (LTO) at hanggang ngayon ay kabi-kabila pa rin ang reklamo hinggil sa naturang ahensya.
Mula sa mga fixer sa lahat ng tanggapan, kasabwat na empleyado, kaya patuloy ang pamamayagpag ng mga fixer at maging ang mga operatiba ng LTO ay nakatatanggap tayo ng sumbong na sangkot din sa iba’t ibang klase ng pangongotong.
Hindi natin ito isinulat para banatan lang ang tanggapan ng LTO dahil hindi naman lahat ay sangkot sa anomalya, kung hindi nais nating bigyan ng suporta ang bagong pamunuan na kinakitaan natin ng pagpupursige na linisin ang korapsyon sa buong ahensya.
Bagong talaga kasing LTO chief si Atty. Jose Arturo ‘Jay Art’ Tugade, na anak ni dating Department of Transportation Secretary Art Tugade na naramdaman din naman ang pagsisikap sa panahon ng kanyang panunungkulan noong nakaraang administrasyon.
Sa pag-upung-pag-upo ni LTO Chief Jay Art ay inanunsiyo agad niyang nais niyang wakasan ang korapsyon sa LTO gamit ang makabagong teknolohiya, lalo na sa pagpaparehistro ng sasakyan at pagkuha ng lisensya.
Ibig sabihin, siya mismo ay naniniwala na talamak talaga ang korapsyon sa buong ahensya dahil ito agad ang nais niyang baguhin na napakalaking hamon at kahanga-hanga kung mapagtatagumpayan niya ang inuugat ng problemang ito ng korapsyon.
Bagong dugo at bata pa si LTO Chief Jay Art, kaya naniniwala tayong isang araw ay may darating na bagong sibol na seryosong nais ayusin ang tulad ng tanggapan ng LTO na tila hindi na makaahon sa napakapangit na imahe.
Maganda ang planong bawasan o tuluyan nang alisin ang human intervention sa pag-aayos ng rehistro ng sasakyan o pagkuha ng lisensya gamit ang makabagong teknolohiya, dahil bawat taong daraanan sa naturang ahensiya ay hindi maiwasang pahirapan ang sitwasyon para magkaroon ng dahilan na maglagay.
Kaso may kinahaharap na problema si Chief Art Jay dahil hindi maayos ang operasyon simula nang gawing computerized ang sistema ng LTO dahil dalawa ang kanilang IT provider na nagdulot ng kaguluhan.
Hanggang ngayon ay nand’yan pa rin ang dating provider na Stradcom, samantalang hindi pa naisasaayos ng Dermalog bilang bagong provider ang IT system sa mga tauhan ng LTO na ilang araw nang tila may kakaibang sitwasyon sa naturang ahensya.
Kaya nga noong nakaraang linggo lamang ay naglabas ng kautusan si Chief Art Jay na bawal nang pumasok, maging sa labas ng tanggapan ng LTO ang mga umaali-aligid na fixer dahil hinihinalang isa sa mga provider ay nakikipagsabwatan umano sa mga fixer.
Hindi nga naman kasi magtatagal ang mga fixer kung walang kasabwat sa loob ng LTO, kaya’t tama lang ang banta ni LTO Chief Art Jay na sasampahan umano ng kasong paglabag sa RA11032 o “Ease of Doing Business and Efficient Government Service Delivery Act” ang sinumang mahuhuling nakikipagsabwatan sa fixer.
Inatasan din ng bagong LTO Chief ang mga regional directors na linisin ang kanilang hanay at pabilisin ang sistema upang hindi na magkaroon ng pagkakataoon ang mga fixer na makialam. Mahalaga na ang pagkuha ng lisensya at pagpaparehistro ng sasakyan na hindi daraan sa kamay ng mga fixer para hindi makalusot kung sakaling may problema ang sasakyan at matiyak na talagang marunong magmaneho ang kumukuha ng lisensya.
Suportado natin ang LTO sa paglaban sa korapsyon dahil matagal ng pangarap ng marami nating kababayan na malinis na ang ahensyang ito para sa kapakanan na rin ng ating mga ‘kagulong’. Goodluck!
SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.
