Temporary Driver’s License bagsak-presyo sa P500

ni Atty. Rodge Gutierrez - @Mr. 1-Rider | December 13, 2022

Umandar na naman ang utak ng mga sindikato kung paano kikita dahil talamak ngayon ang bentahan ng temporary driving license matapos matiyak na hindi normal ang operasyon ng Land Transportation Office (LTO).

Sa halagang P500 hanggang P1,000 ay agad na magkakaroon ng temporary driving license na kahit ang mga traffic enforcer ay hindi kayang idetermina kung tunay ito o peke.

Wala naman kasing safety features ang iniisyung temporary driving license ng LTO sa kasalukuyan na labis na ikinatuwa ng mga tsuper ng mga pampasaherong sasakyan dahil kahit maya’t maya sila hulihin ay hindi sila maaapektuhan.

Nagpalabas ng pahayag ng LTO na mahigit kasi 11 milyong plate number ng motorsiklo at 92,000 driver’s license ang hindi pa rin mai-release sa kasalukuyan na labis na ikinatuwa ng mga sindikato ng peke sa kahabaan ng Recto, Manila.

Dahil naglipana ang source ng mga pekeng temporary driving license ay nabuhay na naman ang mga online sellers na ang iniaalok ay mga pekeng temporary driver’s license na maaari umanong gamitin hangga’t hindi pa ayos ang problema sa LTO.

Kabilang umano sa mga dahilan kung bakit atrasado ang pag-imprenta ng driver’s license ay ang mga depektibong laser engraving machine na makikita sa ilan sa kanilang mga district at extension office sa mga lalawigan.

Kumalat ang balitang hindi sapat ang stock ng LTO para matugunan ang mga paparating na potential break down ng kanilang equipment at inaasahang sa darating na Pebrero pa sa susunod na taon ito maaayos.

Dahil dito ay naapektuhan ang distribusyon ng driver’s license card, kaya ang pansamantalang solusyon ng pamunuan ng LTO ay mamahagi muna ng temporary driver’s license para sa mga motorista.

Wala namang magawa ang kauupo pa lamang na LTO chief na si Atty. Jose Arturo ‘Jay Art’ Tugade dahil siya ang inabot ng kamalasan na sa halip na makausad na para mas mapaganda ang LTO ay nasa panahon pa siya nang nagkukumpuni.

Lalo na ngayon dahil nagkasundo na ang mga miyembro ng Metro Manila Council, Department of Interior and Local Government (DILG) at LTO na ipatupad na ang single ticketing system sa mga lalabag sa batas-trapiko sa rehiyon.

Nagkaroon ng media briefing noong Sabado at sinabi ng technical working group (TWG) na isasama sa bagong sistema ang pagbabayad ng mga parusa sa lumabag sa batas-trapiko na inaasahang ipatutupad sa unang quarter ng 2023.

Kung masisimulan na ang bagong sistemang ito ay maaaring ayusin ng mga motorista ang kanilang multa sa local government unit (LGU), kung saan sila nakatira kahit nakagawa sila ng traffic violation sa ibang lugar.

Ang bagong sistema ay gagawing pamantayan sa multa na ipapataw ng iba’t ibang LGU at ng MMDA na isang magandang hakbangin dahil matagal na itong hinihiling ng marami nating kababayang nagmamaneho.

Hindi na rin umano kukumpiskahin ang driver’s license dahil ang mga detalye ng lumabag na mga motorista ay ililista na lamang ng traffic enforcer bago ipasa sa tanggapan ng LTO ngunit kung hindi tutubusin ay masususpinde ang naturang lisensya.

Sampung araw lamang ang ibibigay sa mga lumabag na motorista para bayaran ang kanilang penalty sa pamamagitan ng digital wallet o payment centers na nakarehistro sa Land Transportation Management System ng ahensya, bago pa ito magkaroon ng interest.

Samantala, kung sakaling umabot na sa sampung paglabag at hindi pa rin inaayos ng apektadong driver ay tuluyan nang kukumpiskahin ang kanilang lisensya.

Sana lang bago ito ipatupad ay ayos na ang problema ng LTO sa pag-iisyu ng temporary driving license, dahil kung ganitong puro lista na lamang gagawin ng LGUs ay labis na masasamantala ang paggamit ng pekeng temporary driver’s license na kahit abutin pa ng 100 ang lista ay tatawanan lang tayo ng mga pasaway ng tsuper dahil hindi naman tunay ang kanilang detalye dito.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Cop riders vs. riding-in-tandem, epektibo

ni Atty. Rodge Gutierrez - @Mr. 1-Rider | December 10, 2022

Epektibo ang ginawang hakbang ng Philippine National Police (PNP) na magpakalat ng mounted secret marshals at special motorcycle unit sa iba’t ibang bahagi ng bansa upang mabawasan ang krimen na kinasasangkutan ng riding-in-tandem.

Hindi lang riding-in-tandem ang pakay ng mga special operatives dahil maging ang masasamang elemento na gumagamit ng motorsiklo, tulad ng mga nangongotong na traffic enforcer ay hindi nila pinaliligtas.

Ang mga secret marshals ay sumailalim sa pagsasanay ng tactical motorcycle riding units (TMRUs) para sa mas mabilis na pagtugon sa masasamang elemento gamit ang motorsiklo para labanan ang mga motorcycle riding criminals.

Ayon sa huling datos ng PNP, malaki na ang ibinaba ng mga krimeng kinasasangkutan ng riding-in-tandem na mula sa 1,828 ay naging 756 na lamang sa kabuuan o 58.64% at patuloy pang nababawasan.

Halos lahat ng lokal na pamahalaan ay nais masugpo na ang problema sa riding-in-tandem at isa sa may pinakamalaking hakbang hinggil dito ay ang Mandaluyong City government na ipinagbawal na sa kanilang lugar ang magka-angkas sa motorsiklo maliban na lamang kung magkamag-anak.

Ngunit tinutulan ito ng Court of Appeals (CA) na idineklarang unconstitutional sa kabila nang suportado ito ng ipinasang local legislation na Motorcycle Riding-in-Tandem Ordinances, kaya muling naging aktibo na naman ang mga ito.

Sa Pampanga, nasa 50 bagong tactical motorcycle riding units (TMRUs) ang ikinalat din sa iba’t ibang bayan ng nabanggit na lalawigan upang maagapan ang paglaganap ng krimen.

Ayon sa Pampanga Police Provincial Office ang ginawa nilang ito ay upang madagdagan ang presensya ng pulis sa mga lansangan na mas madali at mabilis na rumesponde lalo pa’t ang Pampanga ay napakalapit sa Metro Manila, kung saan mas mataas ang kaso ng riding-in-tandem.

Ang pagpapakalat ng mga bagong TMRUs ay pagtanggap ng pamunuan ng PNP na talagang dapat mas magaling ang kanilang operatiba kumpara sa mga riding-in-tandem kaya sinanay nila itong mabuti.

Kung sakali nga namang magkaroon habulan ay masisiguro ng mga cop riders na aabutan nila ang mga salarin na gumagamit din ng motorsiklo kahit umabot pa sa kabundukan ang habulan.

Sana lahat ng lalawigan ay bigyang-suporta ang mga operatiba ng TMRUs, tulad ng ginawa sa Pampanga para sa oras na umatake ang mga kawatan o iba pang klase ng masasamang loob na lulan ng motorsiklo ay madaling mahabol.

Ang bentahe ng mga operatiba ng TMRUs ay sumailaim sa matinding pagsasanay at lahat ng sistema ng mga motor-riding suspects ay pinaghandaan nilang mabuti, kaya alam nila kung paano ito haharapin.

Sa Metro Manila ay may mga operatiba na rin naman ang TMRUs, ngunit dapat dagdagan pa ang bilang maliban na lamang kung sumasapat na ang kanilang puwersa dahil nga sa malaki na rin ang inihina ng riding-in-tandem.

Dapat bigyan natin nang pagsaludo si PNP chief Gen. Rodolfo Azurin, Jr. dahil ang pagpapakalat ng mga riding cops ay bahagi ng kanyang MKK programa na Malasakit, Kaayusan at Kapayapaan—Tungo sa Kaunlaran.

Base sa talaan ng PNP, umabot na sa 36, 848 ang mga kababayan naging biktima ng criminals riding pillion mula 2010 hanggang 2020 at nasa 8,805 ang namatay sa mga ito.

Kung dati-rati ay nawawalan ang mga kababayan natin ng motorsiklo, bags, cellphones at iba pang mahahalagang bagay dahil sa mga riding-in-tandem—ngayon kahit paano ay mga operatiba ng nasa paligid na nagbabantay.

Sana mapabilis din ang isinasagawang pagbabago sa bagong pamunuan ng Land Transportation Office (LTO) na maisaayos na ang napakalaking backlog sa plaka ng mga motorsiklo upang makabawas din sa paggawa ng krimen ng ilang masasamang loob.

Negatibo ang dating sa ating mga ‘kagulong’ sa katagang riding-in-tandem, kaya mabuti na may riding cops na tatapat dito para maipakita sa mundo na nakamotorsiklo rin ang susugpo sa krimeng kinasasangkutan ng ilan-ilan lang namang nakamotorsiklo.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Dapat gawin kapag biktima o naka-hit-and-run

ni Atty. Rodge Gutierrez - @Mr. 1-Rider | December 8, 2022

Marami sa mga driver ang hindi naiintindihan kung ano ang kanilang sasapitin kung sakaling masangkot sila sa hit-and-run na karaniwang ginagawa ng mga driver na nagmamadali o gustong takasan ang pananagutan, ngunit hindi nila alam na maaari silang matanggalan ng lisensya.

Dalawa ang klase ng hit-and-run—una ay ‘yung bumangga ang sasakyan sa kapwa sasakyan ay ikinukonsiderang misdemeanor o mas kaunti ang pananagutan, ngunit kung ang aksidente ay may nasaktang tao ay ikinukonsidera itong felony hit-and-run.

Isa itong krimen na karaniwang may sangkot na karahasan na karaniwang pinapatawan nang pagkakakulong na mas mahigit pa sa isang taon at inaakala ng mga driver na ang pagtakas ay mabuting desisyon lalo pa kung hindi naman grabe ang aksidente.

Tulad na lamang ng ginawang pagtakas ng isang truck driver na may plakang NAW 4930 na may nakasulat NIJARO Agri-Trading nang masagi niya ang isang Toyota Vios sa panulukan ng Almond St. at Gil. Fernando St. sa Brgy san Roque, Calumpang, Marikina City noong Nobyembre 22 bandang alas-10:30 ng umaga.

Bumaba ang pa truck driver, ngunit nang makumpirmang niyang babae ang kanyang nakabanggaan ay mabilis itong tumakas, ngunit ang biktima ay nagtungo sa Marikina PNP upang magsampa ng reklamo.

Hindi alam ng tumakas na driver na sobrang mali ang kanyang ginawa dahil natukoy na ng Land Transportation Office (LTO) na ang naturang wing van truck ay pagmamay-ari ng isang Loreto Galingana ng 13 Arkansas Vista Verde, North Caloocan City.

Bukod sa ipinahamak niya ang may-ari ng sasakyan ay posible pa siyang mawalan ng lisensya dahil sa ginawa niyang pagtakas na sana ay hindi na lumaki kung nakipag-usap na lamang siya sa tanggapan ng Marikina PNP.

Sa ngayon ay nakaalarma na ito sa LTO, siyempre sa ngayon ay wala pang problema pero kapag nagparehistro ng sasakyan at mag-renew ng lisensya ay dito na papasok ang problema—kapag naglabas pa ng warrant of arrest ang korte ay tiyak na tutugisin pa ang tumakas na driver na hindi sana nangyari kung hindi siya nang-hit-and-run.

Kahit ano'ng ingat ng tsuper ay hindi maiiwasan ang aksidente dahil bahagi ‘yan ng pamamaneho, ngunit dapat lang na alam ng isang tsuper kung ano ang kaniyang gagawin sa oras na masangkot sa isang aksidente.

Ano ba ang dapat gawin kung masasangkot sa vehicular accident? Una ay huwag tumakas, harapin ang sitwasyon, makipag-usap sa nakabanggaan upang hindi na humantong sa demandahan.

Ikalawa ay tingnan kung ligtas bumaba ng sasakyan, dahil may pagkakataong galit ang nakabanggaan na posibleng humantong sa kaguluhan, kung walang problema i-handbrake ang sasakyan, i-on ang hazard lights at maglagay ng warning triangle upang mabigyang-babala ang mga paparating na sasakyan.

Ikatlo ay alamin kung may nasaktan, unang tingnan ang sarili kung naigagalaw lahat ng bahagi ng katawan o kung may dugo, ikalawa ay tingnan ang lagay ng kasama kung mayroon, matapos ito ay tingnan din ang kalagayan ng nakabanggan upang mabigyan kaagad ng karampatang lunas.

Ikaapat, kunan ng larawan ang lahat ng anggulo ng aksidente, partikular ang plate number upang may magamit na ebidensya bago itabi ang sasakyan o kung walang kaalaman sa pagkuha ng larawan ay huwag aalisin ang mga sasakyan hangga’t hindi dumarating ang pulisya.

Ikalima ay makipagpalitan ng impormasyon at siguruhing makuha ang Pangalan, Address, Contact information, Vehicle description, year, make at model, Driver's license number, Vehicle registration information, License plate number, Car insurance provider ay Insurance policy number.

Higit sa lahat ay tumawag ng pulis upang may mamagitan na magsasagawa ng imbestigasyon dahil kakailanganin din ng police report kung sakop ng car insurance ang gastusin sa naturang aksidente.

Kung sakaling grabe ang aksidente o may nasaktan sa magkabilang panig na kailangan ng medical assistance ay tumawag agad sa national emergency hotline 911 o MMDA hotline 136 para sa iba pang katanungan o mas mabuting naka-install sa inyong cellphone ang mga numerong nabanggit.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.