'Kuwentong Pasko' ng mga rider

ni Atty. Rodge Gutierrez @Mr. 1-Rider | December 27, 2022

Limang iba’t ibang kuwento ang naganap bago mag-Pasko na kinasangkutan ng ating mga 'kagulong' na kaya natin isinulat ay upang mapagkunan ng aral ng ating mga kababayang ang buhay, araw-araw ay magmaneho ng motorsiklo.

Tatlo sa kanila ang hindi na umabot ng buhay, isang araw bago mag-Pasko dahil sa mga pagkakamaling dapat naiwasan, isa ang hindi na nakapagdiwang ng Pasko dahil pinaghahanap na ng pulisya at isang ‘kagulong’ natin ang dapat namang tularan dahil sa ginawa niyang pagtaas sa hanay ng ating mga ‘kagulong’.

Una ay ang kuwento ng 22-anyos na binata, na ang hanapbuhay ay magmekaniko ng mga motorsiklo sa kanilang lugar sa Bgy. Conconig East, Sta Lucia, Ilocos Sur na hindi na nagawang magpakasal dahil hindi na siya umabot ng Pasko na buhay.

Gabi, bago magbisperas ng Pasko ay binabaybay ng binata ang kahabaan ng national highway sa Bgy. Barangobong, Sta Lucia ng lalawigan na nabanggit, patungong hilagang direksyon lulan ang Suzuki Raider motorcycle.

Kasalubong naman nito ang humahagibis na Toyota Fortuner na minamaneho ng negosyante ng Bgy. Alcantara, Vigan City ng lalawigan ding nabanggit na tinatahak ang direksyon patungong timog nang bigla na lamang silang magsalpukan na ikinasawi ng ating ‘kagulong’.

Sa inisyal na imbestigasyon ay naghahabol na umanong makauwi ang binata at hindi namalayan na sinakop na nito ang linya na sana ay para sa Fortuner kaya sila nagsalpukan at dahil sa dami ng tinamong sugat sa iba’t ibang bahagi ng katawan ay idineklara na itong dean-on-arrival sa Sta. Lucia District Hospital.

Nasawi rin ang isa nating ‘kagulong’ matapos na makipag-away na nauwi sa suntukan sa isa ring tricycle driver dahil lamang sa agawan sa isang batang pasahero Barangay Talaan Pantoc, Sariaya, Quezon noong mismong bisperas ng Pasko ng gabi.

Nasawi ang 53-anyos nating ‘kagulong’ nang mag-collapsed matapos itong gulpihin ng kapwa niya tricycle driver na hinihinalang hindi na kinaya ng kanyang kalusugan ang sinapit na pananakit dahil sa kanyang edad.

Ayon sa imbestigasyon ng Sariaya PNP, nagsimula ang sigalot ng dalawa dahil sa parehong naghahabol ng karagdagang kita para sa bisperas ng Pasko at isinakay umano ng salarin ang batang pasahero na kumaway ng tricycle.

Nauna ang salarin at isinakay ang pasahero, ngunit nagalit umano ang nasawi dahil sa pribado umano ang tricycle ng salarin at siya ang lehitimong namamasada sa naturang lugar na nauwi sa suntukan na ikinapagod ng biktima at naging dahilan ng maaga niyang pagkasawi bago tumakas ang salarin.

Isang kagulong pa natin mula sa Sitio Bascaran, Bgy. Libod, Camalig, Albay ang hindi na umabot sa Pasko dahil nagmaneho ito ng walang lisensya, walang suot na helmet at lasing na lasing pa habang matulin nitong binabaybay bandang alas-4: 00 ng hapon ang kahabaan ng highway ng Camalig, Albay.

Sinalpok nito ang ambulansiya ng Josefina Belmonte Duran Hospital ng Ligao, Albay na naging sanhi ng agad nitong pagkamatay kaya hindi na nagsampa ng reklamo ang mga kaanak ng nasawi nating ‘kagulong’.

Puring-puri naman ng mga netizen ang isang nating ‘kagulong’ na si John Libao, Grab rider dahil sa ginawa nitong pagsauli sa napulot niyang wallet na pag-aari ng isang Mariel Canaoag sa kahabaan ng Victoria highway, Masapang, Laguna.

Trending ang tatlong oras na paghahanap ni Libao sa bahay ng may-ari ng wallet sa nabanggit ding lalawigan basta’t maisauli lamang ang napulot na wallet na kabayanihang maituturing sa hanay ng ating mga ‘kagulong’.

Kung may ilang kaganapan na hindi kaaya-aya na kinasangkutan ng ating mga ‘kagulong’ ay mabuting magsilbi itong babala upang makaiwas na tayo sa ganitong pangyayari lalo pa at paparating ang bagong taon, kung saan kabi-kabila din ang selebrasyon.

Sa ‘kagulong’ nating nagsauli ng wallet, ikinararangal ka ng 1-Rider Party List at sana ay dumami pa ang tulad mo.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Ingat sa motornapping

ni Atty. Rodge Gutierrez @Mr. 1-Rider | December 24, 2022

Kung gaano kabilis ang pagdami ngmga ‘kagulong’, gayundin kabilis ang pagtaas ng bilang ng nakawan ng motorsiklo na hindi lamang nangyayari sa National Capital Region (NCR), kung hindi sa iba’t ibang panig ng bansa.

Umabot sa kabuuang 503 iba’t ibang klase ng sasakyan ang nabawi ng Highway Patrol Group (HPG) ng Philippine National Police (PNP) nito lamang buwan ng Disyembre na kinabibilangan ng nakaw na kotse at motorsiklo.

Kabilang sa mga recovered vehicle ay biktima ng carnapping o carjacking mula sa mga may-ari at nasa 17 katao ang naaresto at nakasuhan ng carnapping.

Noong nakaraang taon, lmang carnapper ang nasawi habang lima rin ang nasugatan, kabilang ang tatlong pulis sa naganap na engkwentro Barangay Gukotan, Pikit, North Cotabato.

Matapos ang engkwentro ay tumambad sa pulisya ang mahigit sa 440 iba’t ibang klase ng motorsiklo na hinihinalang puro nakaw at para malaman ninyo kung gaano kalaki ang sindikato ng mga motornapper na ito, hindi lang motorsiklo ang nakuha sa kanila.

Narekober din sa kanilang pag-iingat ang dalawang M60 machine guns, anti-tank rocket B-40 launchers, M14 rifle, M203 rifle na may grenade launcher, tatlong M16 rifles, vintage .30 caliber Carbine rifle, dalawang .38 caliber revolvers at bomb-making components.

Noong Martes ng gabi lamang ay mahigit din sa apatnapu na pawang mga chop-chop motorcycle parts ang narekober sa pag-iingat ng tatlong kaanib ng sindikato ng motornapper sa kanilang hideout sa Bacoor City, Cavite.

Nag-ugat ang pagkakadiskubre sa hideout ng mga suspek nang isa nating ‘kagulong’ ang nagreklamo sa pulisya na tinangay umano ang kanyang motorsiklo sa parking lot ng Mang Inasal, Bgy. Molino 3, Bacoor City, Cavite.

Nagsagawa ng follow up operation ang mga barangay officials at sa pamamagitan ng CCTV backtracking ay ginalugad ang mga suspek na nagresulta sa pagkakabuwag ng naturang sindikato.

Napakarami pa ng malalaking kaso na naitala ang pamunuan ng HPG na malalaking grupo ng mga car/motornapper ang kanilang nabuwag, ngunit hindi talaga maiiwasan na hindi maubus-ubos ang masasamang loob, kaya dapat doble ang pag-iingat.

Hindi naman nagpapahinga ang HPG at iba pang elemento ng PNP sa pagtugis sa masasamang loob, ngunit huwag nating iasa lahat sa pulis ang kaligtasan ng ating sasakyan dahil nakasuot ang pulisya ng uniporme at alam ng mga kawatan kung nariyan sila o wala bago umatake.

Sa ilalim ng Republic Act No.10883 o mas kilala sa tawag na New Anti-Carnapping Act of 2016 ay isang batas na magpaparusa sa mga taong sangkot sa carnapping sa Pilipinas.

Ngunit hindi lahat ng nawalan ng sasakyan ay maaaring magsampa ng kaso dahil ang mga kabilang lamang ay ang mga sasakyang itinutulak ng kahit anong power na gumagamit ng public highways—hindi kabilang ang umuusad dahil sa muscular power.

Narito ang ilang halimbawa ng mga sasakyang hindi puwedeng magreklamo ng carnapping ang may-ari sakaling mawala o puwersahang nakawin o tangayin mula sa kanilang pag-iingat: road rollers, trolley cars, street sweepers, sprinklers, lawn mowers, bulldozers, graders, forklifts, amphibian trucks at cranes kung hindi kung hindi gamit sa public highways.

Hindi rin kabilang ang mga sasakyang dumaraan sa riles o tracks, hindi rin kasali ang tractors, trailers at lahat ng klase ng traction engines na ginagamit lamang sa agricultural purposes.

Ang puwede lamang maparusahan ng RA 10883 para sa krimen ng carnapping ay ang mga taong tumangay ng sasakyan nang walang pahintulot ng tunay na may-ari o kaya’y gumamit ng dahas, pananakot o pisikal na lakas para tangayin ang sasakyan at may intensyong makinabang.

Kaya mag-ingat mga ‘kagulong’ para hindi na lumungkot ang pagsalubong natin sa paparating na bagong taon — Maligayang Pasko at Manigong Bagong Taon sa inyong lahat!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Pambu-bully ng Grab at colorum na mga Motorcycle taxi

ni Atty. Rodge Gutierrez @Mr. 1-Rider | December 22, 2022

Tila nagdudulot ng malaking kaguluhan ang ginawang pagbili ng Grab Philippines sa Move It nitong nakaraang Agosto dahil lumilikha na umano ito ng kaguluhan sa isinasagawang pilot study para sa Motorcycle taxi o MC Taxi.

Marami ang nanawagan na alisin na umano ang Grab Philippines dahil walang humpay na reklamo at katanungan mula sa mga motorcycle companies na tila nakararamdam ng hindi kaaya-ayang hakbangin mula sa Grab Philippines.

Sangkatutak na kuwestyon at isyu ang naglabasan dahil sa ginawang pagsanib-puwersa ng Grab Philippines sa Move It dahil may mga alegasyon na kaya lamang umano ginawa ang deal ay para magkaroon ng instant accreditation sa MC Taxi.

Kasama ang Move It sa tatlong motorcycle companies na pinayagang makilahok sa isinasagawang pilot study—kabilang ang Angkas at Joyride, ngunit hindi pa tapos ang naturang pilot study ay tila nagkakagulo na dahil sa pagpasok ng Grab Philippines.

Maituturing kasing paglabag ito sa panuntunan ng MC Taxi dahil kahit tahasang sinasabi ng Move It na sila lang naman ang kasama sa pilot study at hindi ang Grab Philippines, walang naniniwala na hindi ang Grab ang nagpapatakbo sa Move It.

Napakaraming isyu at usaping dapat iresolba ngunit isa itong pagpasok ng Grab Philippines ang hindi maayus-ayos, kaya may ilang mambabatas na isinusulong na suspendihin na ang partisipasyon ng Grab Philippines at Move It sa “Motorcycle o MC Taxi pilot study.

Noon pa man ay may mga tutol na sa pagsali ng Grab Philippines at pagbili nito sa Move It dahil masyado pa umanong maaga at hindi pa nga naman tapos ang isinasagawang pag-aaral para sa motorcycle taxis na lubhang kailangan.

Wala namang tumututol na magkaroon ng bagong players sa industriya ng motorcycle taxi, ngunit kailangan umano itong gawin kung mayroon nang panuntunan o batas na gagabay sa lahat upang matiyak ang kaligtasan ng ating mga ‘kagulong’, lalo na ang mga mananakay.

May mga mambabatas din na binibigyang katwiran ang kabutihan kung tuluyan nang aalisin ang pinagsamang Grab at Move It sa pilot testing habang hindi pa napaplantsa ang santambak na reklamo ng mga stakeholders hinggil sa usapin ng acquisition.

Sa isinagawang pagdinig ng House Committee on Metro Manila Development kamakailan ay may mga nagsasabing dapat umanong ikonsidera ng technical working group na patawan ng parusa ang Grab at Move It dahil sa ginawa nilang paglabag na lumikha ng kaguluhan.

Lumalabas na tila nagkaroon ng lamangan nang bigla na lamang makapasok ang Grab na ayon sa ilang stakeholders ay hindi pareho ang diskarte, kaya marami ang nagrereklamo sa ginagawang pambabraso ng Grab Philippines.

Kitang-kita umano ang ginawang pagmonopolyo ng Grab Philippines at ngayon pa lamang ay nag-aalala na ang maliliit na players hinggil sa magiging epekto nito sa industriya ng motorcycle taxi.

Kahit ano'ng paliwanag ang gawin ng Move It hinggil sa kasalukuyang sitwasyon ay alam naman ng lahat na Grab Philippines ang nagpapatakbo sa kanila at kung ano ang sabihin ng Grab ay susunod lamang ang Move It, kaya hindi natin maiaalis na mangamba ang ibang players sa motorcycle taxi industry dahil talagang ramdam ng ating mga ‘kagulong’ na binu-bully sila ng Grab Philippines.

Ang epekto nito, naaantala ang lahat at patuloy na dumarami ang mga colorum na habal-habal na ngayon ay lantaran nang nakatambay sa mga terminal o lugar na maraming pasahero at may mga barker pang sumisigaw para makakuha ng pasahero na mas mura pa ang pamasahe.

Kani-kanya ang sistema, basta may sariling motorsiklo ay puwedeng mamasada dahil napakarami pa ng butas na dapat tapalan hinggil sa panuntunan ng motorcycle taxi at ang talo dito ay ang mga mananakay sakaling magkaroon ng aksidente na sana ay huwag namang mangyari.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.