Ruta ng PUV ibinalik na, motorcycle taxi problema pa rin

ni Atty. Rodge Gutierrez @Mr. 1-Rider | Enero 5, 2023

Masaya ang marami nating kababayan dahil naging mapayapa sa kabuuan ang ginawa nating pagdiriwang ng Pasko at pagsalubong sa pagpasok ng 2023.

Ngunit marami rin sa ating mga kababayan ang nakaramdam ng kalungkutan, partikular ang mga mananakay ng bus dahil nagwakas na noong nakaraang Disyembre 31 ang libreng sakay sa EDSA carousel, kaya ang unang araw ng bagong taon ay nagsimula nang magbayad ang mga mananakay sa EDSA busway.

Mahaba-haba rin ang panahon na sinagot ng pamahalaan ang pamasahe ng mga manggagawa, estudyante at iba pang pasahero na bumibiyahe ng EDSA, kaya malaking dagok ang hakbanging ito sa marami nating kababayan.

Batay sa fare matrix na inilabas ng Land Transportation and Franchising Regulatory Board (LTFRB) P15 ang minimum na pamasahe sa bus, P12 sa mga estudyante, senior citizens at persons with disability (PWD).

Aabot naman sa P76 ang kabuuang pamasahe mula Parañaque Integrated Terminal Exchange (PITX) hanggang EDSA Monumento at may 20 percent discount naman para sa mga senior citizen, estudyante at PWDs.

Nitong nagdaang Disyembre 28, binuksan ng Department of Transportation (DOTr) ang panibagong istasyon ng bus sa Tramo, Pasay City, kaya’t sa kabuuan ay mayroong 21 istasyon ang kahabaan ng EDSA busway.

Ayon sa inilabas na datos ng DOTr, umabot sa 400,000 ang average ng pasahero sa busway ngayong holiday season at nagpahayag din ang LTFRB na mahigit naman sa 80 milyong mananakay ang napagsilbihan ng kanilang libreng sakay sa carousel.

Bagama’t malaking kawalan sa marami nating kababayan ang libreng sakay ay malaking kasiyahan naman sa sektor ng mga pampasaherong jeep ang hakbanging ito dahil labis na naapektuhan ang kanilang hanapbuhay na matagal na hindi kumita dahil mas pinipili ng pasahero ang libreng sakay.

Ngayon ay mismong ang LTFRB ang nag-apruba sa muling pagbabalik ng public utility vehicles (PUVs) sa Metro Manila sa kanilang pre-pandemic routes, kung saan tuwang-tuwa ang mga pampasaherong tsuper na nawalan ng hanapbuhay sa mahabang panahon.

Sa ilalim ng Memorandum Circular No. 2022-084, ipinag-utos ng LTFRB ang pagbabalik ng operasyon ng traditional at modernized public utility jeepney services sa kanilang orihinal na ruta bago pa magkaroon ng pandemya.

Kabilang ang utility vehicle express services sa Metro Manila Urban Transportation Integration Study Update at Capacity Enhancement Program area na epektibo na ang pagbabalik ng nalalabing PUV routes noong nagdaang Disyembre 26 lamang.

Kaya inaasahang magbabalik na normal ang operasyon ng public transport at unti-unti ay babalik na rin sa dati ang sigla ng riding public na malaki ang ipinagbago dahil sa pagtugon ng pamahalaan sa pandemya.

Ayon naman sa LTFRB, ang hakbanging ibalik na sa dating sitwasyon ang pamamasada ng ating mga jeepney driver ay dulot ng tumataas na demand sa public transportation sa pagluluwag ng mobility restrictions.

Medyo naantala nga ang hakbanging ito dahil lahat ng sektor at ahensya ay nakabase lamang sa umiiral na public health protocols at dahil sa unti-unting pagluluwag ay nagbalik na rin sa dating sitwasyon ang kalagayan ng pampasaherong sasakyan.

Inaasahang magbabalik na rin sa orihinal na sitwasyon ang lahat at nakatakda na ring magbukas ang karagdagang 28 pang ruta sa Metro Manila, tulad ng Manila, Parañaque, Makati, Pasay, Marikina, Pasig, Makati at Quezon City.

Kasabay nito ay tiyak na maaapektuhan naman ang pamamasada ng ating mga ‘kagulong’ dahil hanggang sa kasalukuyan hindi pa plantsado sa Committee on Public Transportation ng House of Representatives ang tungkol sa pag-regulate ng motorcycle taxis.

Sa gitna ng mga alingasngas at iba pang usapin hinggil sa kalagayan ng motorcycle taxi sa bansa ay malaking pagkakataon ito para makabangon naman ang industriya ng pampasaherong jeepney na palagi na lamang laman ng mga interview dahil sa dami ng kanilang hinaing at tiyak na isa sa mga araw ay ang ating mga ‘kagulong’ naman ang hihiling na bilisan nang ayusin ang kanilang kalagayan.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Pulitika at teknolohiya, sanhi ng dating palpak na single ticketing system

ni Atty. Rodge Gutierrez @Mr. 1-Rider | Enero 3, 2023

Kung magiging matagumpay ang pagpapatupad ng single ticketing system na inaasahang planong umpisahan ngayong pagpasok ng unang quarter ng taon ay masasabi nating hulog ito ng langit para sa mga motorista na naninirahan sa labas ng Metro Manila.

Dahil matagal nang dumaranas ng pighati ang mga motoristang naninirahan sa mga karatig-lalawigan na kailangan pang bumalik ng Metro Manila kung saang lugar sila nahuli dahil sa paglabag sa batas-trapiko para tubusin lamang ang kanilang lisensya.

Nitong Nobyembre noong nakaraang taon ay naisip ng bagong pamunuan ng Land Transportation Office (LTO) na pairalin ang single ticketing system, kaya agad silang nagsagawa ng mga consultative meeting sa iba’t ibang stakeholders.

Ang panukala ng LTO ay naglalayong mapag-isa ang ibig sabihin ng traffic violations at karampatang multa dahil sa bagong single ticketing system ang traffic violators ay nakatakdang magbayad ng mapagkakasunduang standard na halaga ng multa kahit saan lugar man naganap ang paglabag.

Pakay pa umano ng LTO na makatulong ang single ticketing system sa pag-unlad ng daloy ng trapiko dahil kaakibat umano ng pagpapatupad nito ay ang pag-monitor at paglalagay ng demerits points sa mga maangas na tsuper at ayaw sumunod sa mga enforcer.

Sa pamamagitan umano nito ay magkakaroon ng ngipin ang pamahalaan na tutukan at bantayan ang performance ng mga tsuper dahil sa ‘common demerit point system’, ngunit hindi umano nito pakay na itaas ang kasalukuyang umiiral na multa.

Sa single ticketing system nga naman, kapag ang motorista na naninirahan sa labas ng Metro Manila ay naisyuhan halimbawa ng traffic violation receipt sa Makati City ay hindi na kailangang bumiyahe pa pabalik ng Makati City dahil magkakaroon na ng access sa pagbabayad sa pamamagitan ng payment centers online.

Mabilis naman tumugon ang Metro Manila mayors sa panukala ng LTO at agad ngang pinasuspinde ang pagkukumpiska sa mga lisensya ng mga masasakoteng tsuper na may paglabag sa batas-trapiko hangga’t hindi naisasa-pinal ang mga panuntunan hinggil ng LTO.

Maging ang Metropolitan Manila Development Authority (MMDA) ay nakiisa sa Metro Manila mayors na magkaroon ng interconnection sa kani-kanilang database para sa panukala ng LTO na single ticketing system.

Maging si Department of Interior ang Local Government (DILG) Secretary Benhur Abalos ay kumbinsidong dapat simulan ngayong unang quarter ng taon ang pagpapatupad ng single ticketing system at itigil na ang pagkumpiska ng lisensya ng mahuhuling tsuper.

Sa ngayon ay pinaplantsa na ng LTO at 17 local governments sa Metro Manila ang kung paano ipatutupad ang sa tingin nila ay napakagandang panukalang ito.

Pero nais lang nating ipaalala na hindi na bago ang hakbangin dahil noong Marso 1, 2012 ay nagsama-sama na rin ang 17 mayors ng Metro Manila at MMDA na ipatupad ang kopyang-kopyang panukala na single ticketing system sa pangunguna ni Francis Tolentino na noon ay MMDA Chairman pa lamang.

Ngayon ay heto na naman tayo, umaasa ang publiko na ang muli ninyong pagbuhay sa patay ay magkakaroon ng magandang resulta, sa tingin ng marami ay problema sa pulitika at usaping teknolohiya ang ilan sa dahilan kaya hindi nagtuluy-tuloy ang single ticketing system.

Maganda ang layunin ng panukalang ito, sana lang ay huwag madaliin kung hindi naman kayang ipatupad ng pulido ang sistemang ito, kayo lang naman ang nagsasabi na dapat itong umpisahan ngayong unang quarter ng taon at wala namang pumupuwersa sa inyo.

Hindi rin masamang manggaya, ang masama ay nanggaya na nga lang pero mas malala pa—nakakahiya na ‘yun!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Paglilinis sa LTO, umarangkada na

ni Atty. Rodge Gutierrez @Mr. 1-Rider | December 29, 2022

Ito ang huling artikulo na isusulat natin sa kasalukuyang taon at ang kasunod nito’y sa pagpasok na ng 2023, na sana ay huwag kayong magsawa sa pagsubaybay at sisikapin nating maiparating ang pinakahuling pangyayari na may kaugnayan sa ating mga ‘kagulong’.

Nakita n’yo na kahit kabi-kabila ang ating dinadaluhang okasyon bilang Unang Representante ng 1-Rider Party List ay ‘kagulong’ pa rin ang prayoridad at hindi tayo papayag na maputol ang ating ugnayan sa pamamagitan ng artikulo nating ito.

Bilang manunulat ay wala tayong bakasyon, kahit nasaan, kahit nasa gitna pa ng malayong biyahe gamit ang motorsiklo ay bitbit natin ang laptop upang makapagsulat tuwing may pagkakataon.

Kahit sa pagdalo sa mga pagdinig sa Kongreso ay sinisiguro nating may pagkakataon tayo kahit sandali upang magsulat dahil pinananabikan natin ang bawat araw na magkadaupang-palad tayo sa tuwing binabasa ang ating panulat.

Mula nang magtapos ang inyong lingkod bilang abogado sa Ateneo De Manila University (ADMU) ay nagsimula na tayo sa serbisyo-publiko.

Marahil ay isa rin ito sa dahilan kung bakit hanggang ngayon ay binata pa rin ang inyong lingkod, ngunit wala tayong planong tumandang binata. Nagkataon lang na nasa gitna tayo ng pagpupursige kung paano makapag-aambag ng tulong sa bayan.

Kaya tulad ng binanggit natin, walang Pasko, walang Bagong Taon, walang kahit anong okasyon ang maaaring maging dahilan upang hindi tayo gumawa ng artikulo dahil pananagutan natin ito sa mga tagasubaybay.

Kasabay nito ay nais nating bigyang-pansin ang pamunuan ng Land Transportation Office (LTO) dahil sinimulan na nila ang paglilinis sa kanilang tanggapan na kilalang isa sa pinakamatindi ang umiiral na korupsiyon.

Kung inyong matatandaan ay naisulat na natin ang unang araw ni LTO Chief Jay Art Tugade na pag-upung-pag-upo ay nagdeklara agad ng giyera laban sa matinding korupsiyon gamit ang bagong teknolohiya, lalo na sa pagrerehistro ng sasakyan at pagkuha ng lisensya.

At isa nga’y pag-ibayuhin ang Land Transportation Management System (LTMS) para mabawasan ang human intervention sa lahat ng transaksyon na pinagmumulan ng korupsiyon.

Sa pamamagitan ng pinulidong LTMS ay madaling maipoproseso ang lahat dahil matapos i-upload ang medical certificate, insurance at/o vehicle inspection report ay mabilis na matatapos ang transaksyon.

Sa ganitong paraan ay mapuputol na umano ang umiiral na sabwatan ng mga fixers sa mga tiwaling empleyado ng LTO na silang gumagawa ng paraan upang bumagal ang proseso at magkaroon ng pagkakataon ang mga fixers na mag-alok ng serbisyo upang bumilis ang lahat.

Alam nating walang magiging fixer kung walang kasabwat na tiwaling empleyado at sa tingin natin ay natumbok na ng bagong LTO Chief ang ugat ng napakatagal nang sistema ng korupsiyon sa loob ng naturang tanggapan.

Mukhang totohanan na, kasi noong nakaraang linggo ay nagpakita sila ng sample—isang empleyado mismo ng LTO ang inaresto dahil huling-huli sa akto na nagsisilbing fixer sa mga transaksyon sa loob ng opisina.

Isang entrapment operation umano ang isinagawa sa loob ng Guimbal Extension Office sa Iloilo ay huli sa akto ang empleyado na tumanggap ng P6,000 mula sa operatiba na nagpanggap na magpaparehistro ng sasakyan.

Napakarami pa ng iba’t ibat klase ng anomalya sa loob ng tanggapan ng LTO, ngunit magandang simula ito para sa pagpasok ng taon para ipakita sa taumbayan na umuusad na ang pagbabago sa LTO.

Sa kabila nang pag-arangkada na ng LTO sa pagsisimula ng kanilang pagbabago ay marami pa rin ang nagkikibit-balikat na marami na umano gumawa nito at posibleng ningas-kugon lang para magpapansin.

Sana ay huwag namang panghinaan ng loob ang LTO na ituloy ang mabuti nilang ginagawa, dahil mas mabuting umasa na may pagbabago kesa wala. Masaganang Bagong Taon sa inyong lahat!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.