QR code system para sa reklamo sa mga abusadong taxi at PUV driver

ni Atty. Rodge Gutierrez @Mr. 1-Rider | Enero 12, 2023

Maganda ang sinimulan ng The Land Transportation Franchising and Regulatory Board (LTFRB) na QR code system sa pagtanggap at pagtugon hinggil sa reklamo ng mga pasahero laban sa mga isnaberong driver at hindi maayos na tsuper ng Public Utility Vehicle (PUV).

Sinimulan nila ang sistemang ito nito lamang nagdaang Christmas season dahil ito ang panahong umaatake ang mga abusadong tsuper na kung hindi namimili ng isasakay na pasahero ay nangongontrata na matagal ng problema sa ating bansa.

Noon pa man ay naririnig na natin ang problemang ito at ngayon ay isa na tayong Representante ng 1-Rider Partylist at isa ng ganap na abogado, ngunit nananatiling problema pa rin ang lahat at ngayon ay mabuting ipinapatupad ng LTFRB ang QR code.

Gamit ang smart phone ay kailangang i-scan lamang ang QR code at lalabas na ang ‘Oplan Isnabero Complaint Form’ at may mga katanungang dapat sagutin kabilang na ang pangalan ng nagrereklamo, araw at oras ng insidente at ang plate number ng taxi o iba pang PUV na inirereklamo.

May iba pang detalye na kailangang tugunin ng mga nagrereklamo, partikular ang mga larawan o video na puwedeng i-upload bilang ebidensya na talagang may pang-aabusong naganap.

Kung seserysohin lamang ng LTFRB ang QR code system ay tiyak na mababawasan ang mga mapagsamantalang taxi driver at abusadong PUV driver na binabalewala ang umiiral na batas.

Kailangang mapanagot sa batas ang mga abusadong driver dahil hindi lahat ay mapagsamantala, pinoproteksyunan lang natin ang mga matitinong driver na pareho at maayos na naghahapbuhay.

Ang kailangan lamang sa QR code system ay palawakin pa ang kaalaman ng publiko hinggil dito at tiyaking naglipana ang mga QR code ng LTFRB sa mga lugar na kakailanganin ito ng pasahero.

Hindi lahat ng pasahero ay marunong sa social media, marami tayong kababayan na text at tawag lamang ang alam kaya makabubuting palakasin ang kampanya ng LTFRB hinggil sa paggamit ng QR code.

Nitong nagdaang mga araw ay inulan ng reklamo ang social media dahil sa iba’t ibang karanasan nila sa abusadong taxi driver, ngunit kahit isa ay wala man lamang natugunan ang kahit na anong ahensya ng pamahalaan.

Kunsabagay, hindi tumitigil ang operatiba ng LTFRB, Inter-Agency Council on Traffic (I-ACT), Metro Manila Development Authority (MMDA), Land Transportation Office (LTO), Philippine National Police – Highway Patrol Group (PNP-HPG) at enforcers ng local government units.

Ang problema lamang ay nakaliligtas ang mga abusadong taxi driver dahil walang seryosong nagrereklamo dahil sa haba ng proseso at ayaw maabala ng mga pasahero.

Nitong nakaraang linggo ay nagpresenta ng huli ang LTO- National Capital Region West (LTO-NCR-West), kung saan nakaaresto sila ng limang taxi driver na tumangging magsakay ng pasahero na kagagaling lamang magbakasyon sa probinsya.

Ang operasyon ng LTO ay bahagi rin ng kanilang ‘Oplan Isnabero’ at nagtalaga sila ng kanilang operatiba sa Parañaque Integrated Terminal Exchange (PITX) at sa ilang lugar sa Pasay City.

Base sa Joint Administrative Order No. 2014-01, the penalty for “refusal to render service to the public or convey passenger to destination” ranges from P5,000 up to P15,000 and cancellation of the Certificate of Public Conveyance (CPC).

Kung tutuusin, kung talagang manghuhuli lamang ang santambak nating operatiba ay marami talaga ang masasakote at titino ang serbisyo ng pampublikong sasakyan, ang problema ay mas inuuna ang ‘papogi’ at tuwing Kapaskuhan lamang nanghuhuli tapos sa susunod na Pasko na ulit.

Ngayon heto ang LTFRB, nakikitaan ng publiko ng potensyal ang kanilang QR code system, sana lang ang huwag itong gawing ningas-kugon lamang dahil malaking bagay ito kung seseryosohin at tutugunan ang matatanggap nilang reklamo.

Ipaalam din sana ng LTFRB sa publiko kung ilan na ang kanilang natulungang pasahero at kung ilang abusadong driver na ang napatawan ng kaukulang parusa na naaayon sa batas.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Hirit ng LTO: Tigilan na ang panunuhol sa mga enforcer!

ni Atty. Rodge Gutierrez @Mr. 1-Rider | Enero 10, 2023

Grabe na talaga ang problema sa korupsiyon sa bansa kahit saanman ipaling ang tingin ay nangyayari ito, hindi lang mayayaman kung hindi maging sa kaliit-liitang bahagi ng lipunan ay biktima nito.

Huwag muna na nating talakayin ang talamak na korupsiyon na kinasasangkutan ng malalaking isda sa lipunan, ang pag-usapan natin ay ang korupsiyon na umiiral na hanggang sa mga eskinita na tila ang lahat ay ayaw nang magpalamang sa isa’t isa.

Hindi lahat nang nagtitinda ng isda o prutas ay mandaraya, ngunit subukan nating magtungo sa Divisoria o Baclaran—tiyak na kung hindi tayo alisto ay mabibiktima ng mga mandaraya sa kilo dahil lahat ng vendor na nasa sidewalk nakapuwesto ay naglalagay sa pulis o barangay.

Kailangan nilang manloko ng mamimili dahil kailangan nilang kumita ng mas malaki dahil sa loob ng isang araw ay kung ilang ‘bantay’ ang umiikot at nanghihingi ng ‘lagay’ para umano sa nakakasakop na istasyon ng pulisya at pamahalaang lokal.

Maraming mabuting Pilipino, may takot sa Panginoon, mabubuting ama, ina at mga anak, ngunit sa paglakad ng panahon ay tila mas lumalakas ang kapangyarihan ng kadiliman at ngayon ay nakalubog na tayo sa korupsiyon.

Hindi ba’t ang New York Times ay idineklarang most corrupt country sa buong Asya ang Pilipinas na bagama’t kahiya-hiya ay wala wala tayong magawa dahil sa hindi naman nakakabigla ang naturang ulat.

Ilang Pangulo na ba ng bansa ang nakulong dahil sa korupsiyon, ilang Senador, Gobernador, Heneral at marami pang matataas na opisyal ang humimas na ng rehas at ang iba ay kasalukuyang may mga nakasampa pang kaso dahil sa korupsiyon?

Hindi ba’t ilang panahon nang nananawagan ang Metropolitan Manila Development Authority (MMDA) sa mga motorista na huwag magbibigay ng suhol sa kanilang mga traffic enforcer dahil ang bribery o panunuhol ay karagdagang kaso pa.

Hindi na nga naman traffic violation ang ‘bribery’ kung hindi isa na itong criminal offense na hindi alam ng karaniwang driver na walang takot kung mag-abot ng suhol sa mga traffic enforcer.

Ngayon heto naman ang pamunuan ng Land Transportation Office (LTO) bagung-bago na umaapela rin sa publiko na huwag magbigay ng suhol sa kanilang traffic enforcer at iba pang law enforcement unit para makaligtas na maisyuhan ng violation ticket.

Mismong si LTO chief Assistance Secretary Jose Arturo ‘Jay Art’ Tugade, ang nagpalabas ng pahayag na nakikiusap na pakikapagtulungan ng mga motorista dahil wala umanong magiging tiwali kung walang mag-uudyok na maging tiwali.

Nag-ugat ang pahayag ni Tugade nang makasakote ng operatiba ng LTO sa Sorsogon City ng sdriver na nagmamaneho ng colorum van sa isinasagawa nilang roadside assistance at inspeksyon bilang bahagi ng kanilang “Oplan Ligtas Biyaheng Pasko 2022.”

Pinara umano ng operatiba ng LTO ang Toyota Hiace van sa kahabaan ng Maharlika Highway sa Barangay Guinlajon ng lugar na nabanggit upang beripikahin ang lisensya at rehistro, ngunit nakumpirmang kolorum dahil may lulan itong 17 pasahero.

Mula Northern Samar ang naturang van na dumadaan sa Bicol Region patungong Cubao at tulad ng nakasanayan ay nag-abot umano ng P3,000 ang driver, ngunit sa halip na ibulsa ng LTO operatives ay inaresto ang nanuhol na tsuper.

Very good ang mga operatiba ng LTO sa pagkakataong iyon dahil hindi tamang manuhol at tumanggap ng suhol, ngunit kapansin-pansing sa kabila ng lahat ay naglabas pa rin ng pakiusap si Tugade na huwag nang suhulan ang kanilang operatiba.

Alam ni Tugade na hindi bababa sa 1,000 van na kolorum ang bumibiyahe patungong Maynila at lahat ‘yan ay naglalagay para makabiyahe araw-araw, pero iilan ang lang ang nasasakote—huwag nga namang manuhol para hindi sila magkasala.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Habal-habal, ang bagong hari ng kalsada

ni Atty. Rodge Gutierrez @Mr. 1-Rider | Enero 7, 2023

Kahit saang sulok ng bansa hanggang Metro Manila ay inabot na ng katagang ‘habal-habal’, isang salita na ginagamit na ng lahat, ngunit marami sa atin ang hindi alam kung paano at kung saan ito nagmula.

Sa mga terminal ng jeepney, bus at istasyon ng tren kabilang na ang Light Rail Transit (LRT 1 at 2), at Metro Rail Transit ay may mga ‘kagulong’ na tayo na sumisigaw ng “habal!, habal!” at kapalit ng napagkasunduang halaga ay ihahatid ka na gamit ang motorsiklo.

Naglipana na ang iba’t ibang motorcycle taxi sa bansa, iba-iba ang pangalan at kinabibilangang kumpanya ngunit kahit anong tatak ng kanilang suot, lahat sila ay nakikisigaw ng “Habal! Ale, mister, habal!”.

Ang orihinal na habal-habal ay motorsiklo na nilagyan ng katig na kahoy sa magkabilang bahagi upang makapagsakay ng anim hanggang sampu katao kabilang na ang bitbit nilang bagahe at una ring tinawag na Skylab ang habal-habal, ngunit hindi naging popular.

Ang habal-habal ang ginagamit ng mga tao sa maraming lugar sa Mindanao, na nasa katimugang bahagi ng bansa, partikular sa mga bulubunduking bahagi na hindi kayang puntahan ng malalaking sasakyan.

Bagama’t wala naman talagang eksaktong petsa kung kailan nagsimula ang habal-habal ay tinatayang nasa 30 taon na itong ginagamit ng ating mga ‘kagulong’ bilang pribado at pangkabuhayang sasakyan.

Ang salitang ‘habal’ ay nag-ugat sa salitang Bisaya at Cebuano na ang tunay na kahulugan ay ‘ang aktuwal na pagtatalik ng mga hayop'—kung saan ang lalaki ay nakaposisyon sa likod ng babae, ngunit dahil sa nakagawiang paggamit na nito ay nagbago na ang kahulugan.

Literal na sex ang ibig sabihin ng ‘habal’ na aplikable rin sa tao, ngunit ang Habal-Habal ay para sa driver ng motorsiklo at pasahero na nasa ‘habal’ o animal position, kaya nabuo ang katagang ito na ngayon ay popular at ginagamit ng salita sa buong bansa.

Mula kabundukang bahagi ng Mindanao ay napakalayo na nang narating ng habal-habal at binago nito ang tanawin sa mga kanayunan kung saan kinatatakutan ang pagbiyahe dahil ngayon ay karaniwang tanawin na lamang ang umaandar na motorsiklo na may lulang sampu katao patungong kabayanan.

Ang motorsiklo ang pumuno sa malaking pagkukulang ng regular na pampublikong sasakyan na abot-kaya ang pamasahe ng mga low-income residents sa mga villages na ngayon ay nakasasabay na sa pamumuhay ng mga nasa sentro ng kalakalan.

Bago pa man nadiskubre ang habal-habal, ang mga tao ay naglalakad lamang, maging ang mga ordinaryong manggawa kabilang na ang mga guro sa mga kanayunan ay sanay na walang masasakyang transportasyon.

Ngunit dahil sa pagsulpot ng habal-habal ay bumilis ang buhay sa mga kabundukan, hindi na alintana ng mga tao ang layo ng paglalakbay dahil sa pagsisikap ng ating mga ‘kagulong’ sa kabundukan at ngayon hanggang siyudad ay inabot na ng kanilang sipag.

Hindi lang kabagalan ng buhay ang isinalba ng habal-habal dahil maging ang pasakit na dinaranas sa kasalukuyan ng napakaraming pasahero sa Kamaynilaan sa matinding sitwasyon sa trapiko ay kanilang pinagaan.

Mas marami na ang pinipili na lamang ang sumakay sa habal-habal kaysa magbayad ng napakamahal sa regular na taxicab na may ilang hindi pa gumagamit ng metro, nangongontrata at mas madalas ay hindi pa nagsasakay dahil namimili ng pasahero.

Maraming lalawigan na ang motorsiklo ay ginagamit na rin bilang pagtugon sa emergencies at mula sa payak na pinagmulan ng habal-habal ay napakalayo na nang narating nito at wala na itong atrasan hanggang sa mga darating na panahon.

Dahil din sa pagdami ng habal-habal ay nabuo ang Republic Act No. 10054 na mas kilala sa tawag na ‘Motorcycle Helmet Act’ na naisabatas noong Marso 23, 2010 na inaatasang magsuot ng helmet ang lahat ng sasakay sa motorsiklo para sa kani-kanilang kaligtasan.

Ngayon ay itinuturing na ring ‘King of the Road’ ang habal-habal na buong giting na ipinagmamalaki ng ating mga ‘kagulong’ sa tagumpay na kanilang narating.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.