Libreng sakay pa more

ni Atty. Rodge Gutierrez @Mr. 1-Rider | Enero 19, 2023

Palagi nating tinatanong kung nasa tamang direksyon ba ang ‘Libreng Sakay’ dahil ilang ulit na itong itinigil, ngunit palaging ibinabalik ng pamahalaan dahil sa palakas nang palakas na panawagan ng publiko na huwag itigil.

Ang programa ng pamahalaan na ‘Libreng Sakay’ ay nagsimula noong 2020 bilang inisyatibo na ang gobyerno ay tahasang tumutugon sa pangangailangan ng publiko na nakararanas ng paghihirap sa biyahe.

Ngunit nitong nakaraang Disyembre 31, 2022 ay inanunsyo ng pamahalaan na tapos na ang ‘Libreng Sakay’ at hindi na muling ibabalik pa ang programa kahit kailan na labis na ikinalungkot ng maraming mananakay.

Base sa ulat ng Land Transportation Franchising and Regulatory Board (LTFRB) umabot sa kabuuang 164,966,373 pasahero ang nakinabang sa programang ‘Libreng Sakay’ sa kahabaan ng EDSA hanggang sa Disyembre 27, 2022, ilang araw bago ito itigil.

Ang ‘Libreng Sakay’ sa kahabaan ng EDSA gamit ang Bus Carousel ay nagsimula noong Hulyo 2020 na bumibiyahe mula PITX (Paranaque Integrated Terminal Exchange) patungo sa Monumento, Caloocan City sa ilalim ng panunungkulan ni Pangulong Rodrigo Duterte.

Ipinatupad ang Libreng Sakay sa kasagsagan ng pandemya dahil biglang nagkahirapan ang biyahe sa Kamaynilaan hanggang sa magtuluy-tuloy na at ipinagpatuloy na rin ni Pangulong Ferdinand Bongbong Marcos, Jr..

Bale joint program ito ng Department of Transportation (DOTr) at ng LTFRB upang maalalayan ang mga pasahero na makasabay sa gastusin dahil sa mabilis na pagtaas ng mga bilihin—ang programang ito ay inilunsad noong 2020 sa ilalim ng Republic Act 11494 o ang Bayanihan to Recover as One Act.

Ang naturang programa ay naka-tie-up din sa tanggapan ng Vice-President na ‘Peak Hours Augmentation Bus Service (PHABS)-Libreng Sakay’ na inilunsad naman ni Vice President at Education Secretary Sara Duterte noong Agosto 3, 2020 sa mga pangunahing lugar sa Luzon, Visayas at Mindanao.

Ang ‘Libreng Sakay’ program ay nag-alok din ng libreng sakay sa MRT, LRT 1 at 2 para sa mga estudyante sa panahon ng Agosto 2021 na ilang ulit ding pinalawig hanggang Mayo 2022 at sa huling pagkakataon ay pinalawig pang muli ni P-BBM hanggang Hulyo 2022 dahil sa pagbubukas ng face-to-face classes.

Sa nakaraang administrasyon, may libreng Shuttle Service rin para sa mga Health Workers na programa naman ni dating vice-president Leni Robredo dahil din sa kasagsagan ng pandemya na noon ay may kabi-kabilang lockdown.

Ang punto lamang natin dito ay tila nahihirati na sa libreng sakay ang ating mga kababayan at hindi natin maintindihan kung sadya bang nais ng pamahalaan na ituloy pa ang programang ‘Libreng Sakay’ o sadyang hindi natin alam kung paano ito ititigil ng tuluyan para maging normal na ang lahat.

Pondo ang naging problema, kaya natigil ang ‘Libreng Sakay’, pero tiniyak ng Department of Budget and Management (DBM) nitong nakaraang Huwebes na tuloy na muli ang ‘Libreng Sakay’ matapos maaprubahan ang PHP5.268-trillion national budget para sa taong ito.

May pondo ang Service Contracting Program sa ating Fiscal Year (FY) 2023 General Appropriations Act at tumataginting na PHP1.285 bilyon ang inilaan para lamang maituloy ang programa ng ‘Libreng Sakay’.

Ilang araw bago ang anunsyo ay sinabi rin ng LTFRB na ang ‘Libreng Sakay’ ay agad ibabalik sa oras na ilabas na ng DBM ang budget para rito na sa kasalukuyan ay hinihintay naman ang pagproseso ng proper documentation, kabilang na ang contract signing sa mga bus consortium.

May balita na ngayong darating na Pebrero ay tuloy na naman ang ‘Libreng Sakay’ at sabik na sabik na ang ating mga kababayan kung kailan talaga ang pagbabalik pero ang mahalaga ay maibabalik na ang programang ito.

Sa isang banda ay maganda ang epekto ng libreng sakay para matulungang makaahon ang marami sa ating kababayan na hanggang ngayon ay bumabawi pa sa pagkakasubsob dulot ng pandemya.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Shoutout sa mga bagitong rider!

ni Atty. Rodge Gutierrez @Mr. 1-Rider | Enero 17, 2023

Napakaraming dahilan para magsimulang gumamit ng motorsiklo ang indibidwal ngunit ang pinakamahalagang dahilan na dapat taglay ng nais maging ‘kagulong’ ay ang katagang ‘riding is fun’.

Mas mabuti kung gustung-gusto talaga ng indibidwal na matutong magmaneho ng motorsiklo at masaya niya itong gagawin kaysa sa mga taong napipilitan lang mag-aral magmotorsiklo kasi kailangan lang sa iba’t ibang kadahilanan.

Una nating talakayin ang mga best beginner motorcycle kabilang na ang bago at segunda-manong motorsiklo na sakto sa budget ng nais matuto at magkaroon ng sariling motorsiklo—kumbaga hinay-hinay lang at huwag pabigla-bigla sa pagpili.

Para kasi maging mahusay na rider, hindi sapat na basta kaya lang paandarin ang motorsiklo na porke marunong gumamit ng bisikleta ay mamaliitin na ang pagbalanse sa motorsiklo na karaniwang nagiging sanhi ng aksidente.

Kabilang din para maging mahusay na rider ay ang makumpleto ang kaalaman sa mga safety tips ng nagmomotorsiklo, palawakin ang kaalaman sa maintenance at higit sa lahat ay ang tamang pag-uugali sa panahon na nakasakay sa motorsiklo.

Kayabangan sa pagmamaneho ang nangungunang sanhi ng aksidente sa bansa at karaniwang nakararanas nito ay ang mga bagito o baguhan pa lamang natututong magmaneho na hindi pa nakararanas ng semplang o aksidente sa pagmomotorsiklo.

Kasabay nang pagdedesisyong magmamaneho na ng motorsiklo ay ang mga kaakibat na legal na obligasyon ng ‘kagulong’, tulad ng pagkakaroon ng driver’s license na dumaan sa tamang proseso at hindi nilakad lamang ng ‘fixer’.

Ibig sabihin, mula sa student permit na iniisyu ng Land Transportation Office (LTO) ay kailangang mag-aral magmaneho kasama ang may professional driver’s license at kapag marunong na ay personal na magtungo sa tanggapan ng LTO upang sumailalim sa eksaminasyon at aktuwal na pagmamaneho.

Huwag matakot sa pagkuha ng lisensya dahil hindi mahirap tulad ng inaakala ng iba at mas buo ang kumpiyansa ng driver na siya mismo ang kumuha ng kanyang lisensya kaysa ipinalakad lamang sa ‘fixer’.

Isa sa pinakamabuting paraan para matutunan ang basic riding ay mag-enroll kahit sa mga Motorcycle Safety Foundation class o regional rider training classes na karaniwang iniaalok sa mga lokal na pamahalaan.

Sa ganitong paraan ay matututunan ng bagong rider ang tamang pagmamaneho, kabilang na ang pagharap sa napakaraming iba’t ibang mga bagong sitwasyon na hindi kayang matutunan sa kapitbahay lamang na ang alam lang ay paandarin ang motorsiklo at bumalanse.

Huwag tayong pumayag na tinatawag tayong ‘kamote rider’ dahil lang sa kawalan o hindi sapat ang kaalaman sa pagmamaneho at kapag kumpleto ang kaalaman ng driver ay hindi siya matatakot kumuha ng driver’s license.

Sa tamang pag-aaral sa pagmomotorsiklo, maging ang paggamit ng motorcycle gear na lubhang napakalahaga ay maiintindihan at higit sa lahat ay iba ang disiplina sa kalye ng nag-aral ng tamang pagmamaneho at kapansin-pansing iba rin kung basta na lamang natuto.

Sa mga nagsisimula, mahalagang magsuot ng dekalidad na motorcycle helmet, gloves, jacket at pares ng boots na magbibigay proteksyon sa bukung-bukong ng mga paa—tingnan ang halaga ng bahagi ng katawan na dapat bigyang-proteksyon bago bumili ng basic equipment para hindi manghinayang sa gastos.

Sa pagpili ng motorsiklo ay mahalaga ang taas, edad, karanasan at bigat ng magmamaneho sa motorsiklo at kung sa kalye nais gamitin ay puwede sa pagpipilian ang cruisers, sportbikes, touring bikes, dual-sport at adventure bike. Sa Off-road naman ay kabilang ang enduro at dirt bikes.

Ilan lang ito sa mga pangunahing dapat matutunan ng mga nais magmaneho o bumili ng sarili nilang motorsiklo at sana ay nakatulong tayo sa mga nagtatanong.

Alalahanin nating gaanoman kabilis o kabagal ang pagmamaneho ng motorsiklo ay wala tayong matatangap na medalya, kaya mas mabuting mag-ingat at sundin ang mga panuntunan para ligtas na makarating sa paroroonan.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Patok na ride-hailing apps sa ‘Pinas!

ni Atty. Rodge Gutierrez @Mr. 1-Rider | Enero 14, 2023

Dahil sa napakaraming problemang kinahaharap ng bansa sa ating transport system, kabilang na ang pagbabalik pasada ng mga pampasaherong jeepney, pagtigil ng ‘Libreng Sakay’ ng bus at mga abusadong taxi, kaya nagkaroon ng pagkakataon ang transport network vehicle services (TNVS).

Marami sa ating mga kababayan ang umasa na sa serbisyo ng TNVS app upang makarating sa kanilang patutunguhan at karamihan sa mga pasahero ay ikinokonsidera ang Grab o tanging ang Grab lamang ang inaasahan na malaking pagkakamali.

Lalo na sa mga panahong ito na napakahirap mag-book ng Grab car dahil sa muling pagdagsa at paglaki ng bilang ng mga pasahero na nagbalikan na sa trabaho matapos humupa ang kasagsagan ng pandemya bagama’t hindi pa tuluyang naglalaho.

Nasolo ng Grab ang merkado, kaya karamihan sa ating mga kababayan ay Grab ang palaging naiisip sa tuwing mangangailangan ng masasakyan, ngunit may mga alternartibo naman na dapat pagpilian na kung masusubukan lang ay posibleng maging paborito pa ito ng mga pasahero na ride-hailing app sa bansa.

Bago mag-book ay dapat alam ng pasahero ang standard rates para hindi maloko dahil ang Land Transportation Franchising Regulatory Board (LTFRB) ay may ipinatutupad na flag-down rates para sa transport network companies (TNCs) upang walang mabiktima nang pang-aabuso.

Ayon sa Memorandum Circular No. 2019-036 na inilabas ng LTFRB, ang TNCs, dapat lamang maningil ng ayon sa mga sumusunod: Hatchback Rates-flag-down rate-P30; per kilometer travel fare -P13 at per minute travel fare-P2.

Sa Sedan TNVS rates-flag-down rate-P40; per kilometer travel fare-P15 at per minute travel fare-P2; sa Premium SUV/AUV Rates- flag-down rate-P50; per kilometer travel fare P18 at per minute travel fare ay P2.

Kung hindi kayo makapag-book sa Grab, subukan ninyo ang JoyRide, Angkas, Tok Tok at AVIS Philippines, na kung ano’ng serbisyo ang ibinibigay ng Grab ay mayroon din ang mga kompanyang ito na baka mas maayos pa ang serbisyo.

Hindi natin kinakalaban ang Grab, nagbibigay lang tayo ng iba pang pagpipilian sa panig ng ating mga kababayan na medyo nakararanas ng stress sa tuwing kailangan nila ng masasakyan, lalo na kung rush hour.

Noong nakaraang Abril ng nakaraang taon ay hiniling ng pamunuan ng Grab Philippines sa LTFRB na magdagdag pa ng TNVS slots na pinagbigyan naman nitong nakaraang araw lamang.

Sa katunayan ay tuwang-tuwa ang Grab Philippines sa pagbubukas ng mahigit sa 4,000 bagong TNVS slots at ang ginawa umanong ito ng LTFRB ay mapapabuti ang ride-hailing experience ng mahigit sa isang milyong pasahero sa bansa na tumatangkilik sa TNVS.

Sana lang ay ang karagdagang slots ay mas mapabuti ang sitwasyon ng mga mananakay at masigurong patungo ito sa pag-unlad at mapababa ang pamasahe na abot-kaya ng ating mga kababayan.

Ngayo’y nag-aalok ang Grab ng cash bonus na P6,000 hanggang P10,000 para makapag-recruit ng mga bagong drivers para mapunan ang 4,433 TNVS slots na bubuksan ng LTFRB para mapabilis na mapunan ang kakulangan sa transportasyon.

Kulang na kulang ngayon ang tinatawag nilang drivers-partners dahil sa nagdaang pandemya na marami sa kanila ang nahatak ang hinuhulugang sasakyan at ang iba nama’y nag-iba na ng linya ng hanapbuhay.

Malaki ang naging epekto nito sa Grab, pero umaasa sila na sa pamamagitan ng iniaalok nilang cash bonus ay makahihikayat sila ng mga bagong drivers-partners na makakasama nila para makapagbigay ng serbisyo sa ating mga kababayan.

Makatatanggap ng P6,000 ang bagong driver na makikipag-partner sa Grab kung ang sasakyan niya ay four-seater at P10,000 naman kung ito six-seater, subalit nilinaw nila na ang insentibo ay para lamang sa mga TNVS license holders na rehistrado sa Grab.

Ngayong tuluy-tuloy na ang pagbubukas ng ating ekonomiya ay napapanahon din na makasabay nang maayos ang serbisyo ng transportasyon, na dapat madali, palaging nakahanda at higit sa lahat ay ligtas ang ating mga kababayan.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.