Mahihirap na jeepney operator, sagot ng LTFRB

ni Atty. Rodge Gutierrez @Mr. 1-Rider | Pebrero 16, 2023

Matapos ang ikaapat na pagkakataon na pagbawi ng Land Transportation Franchising and Regulatory Board (LTFRB) sa kanilang anunsyo na aalisin na ang mga tradisyunal na jeepney, may bago silang inanunsyo.

Ang muntik nang pagpapatigil sa operasyon ng mga tradisyunal jeep ay dahil papasok na ang modernized jeepney at maraming lumang jeep ang hindi makasabay sa plano ng LTFRB, kaya wala silang magawa kundi ang magmakaawa sa tuwing ipatutupad ang phase out.

Pero ngayon, tahasang ipinapangako ng LTFRB na aalalayan nila ang maliliit na operators ng tradisyunal na jeep para sa modernization program ng pamahalaan, na dapat ay noong 2017 pa ipinatupad.

Ayon sa Technical Division ng LTFRB, ang naturang assistance ay isasaayos sa pamamagitan ng cooperatives at corporations upang mas maging madali umano para sa mga naturang operators na mag-shift sa modern jeepneys na tinitingnan ngayon ng national government.

Bale ang Office of the Transport Cooperative (OTC) ng LTFRB ang mamamahala sa pagtulong para mabigyan ng assistance ang ating mga tsuper at operators.

Bukod pa r’yan, mayroon pang Project Management Office ang LTFRB, na ang tanging tututukan ay ang Public Utility Vehicle Modernization Program (PUVMP), na ang layunin ay alalayan at tulungan ang mga stakeholders para sa requirements at proseso ng consolidation.

Ang layunin ng PUVMP ay gawing ligtas ang mga kalsada sa buong bansa at gawing climate friendly ang mga lugar upang sa kalaunan ay mabawasan ang gas emissions at paunlarin ang kalidad ng buhay sa urban areas.

Hanggang sa kasalukuyan kasi ay nasa 60 porsyento pa lang ng jeepney operators ang nag-shift para maging modern jeepney ang kanilang mga unit, kaya alam kong inip na inip na ang LTFRB para tuluyan nang maisaayos ang problemang ito.

Tila dininig na ng pamahalaan ang walang humpay na hinaing ng mga jeepney operators hinggil sa umano’y sobrang taas ng gastos para sa modernisasyon ng kani-kanilang pampasaherong sasakyan.

Sa ngayon, desidido ang LTFRB na mapaabot sa 95 porsyento ang maisasaayos na mga tradisyunal na jeep bago pa maging agresibo ang pamahalaan na kanselahin ang mga prangkisa ng lumang jeep na hindi susunod at tuluyan nang isasama sa phase out.

Sabagay, may impormasyon tayong nakuha na ang mga tradisyunal na jeep ay hindi naman basta-basta isasama sa phase out dahil ang physical features ng tradisyunal na jeepney ay papayagan pa rin, ngunit kailangang sumailalim sa transformation at papasa sa itinakdang standard.

Napakalawak kasi ng hakbanging ito ng PUVMP, kung saan hindi lang modernisasyon ang kanilang isinusulong kundi maging ang sistema ng transport sector, kabilang ang pag-upgrade ng mga units.

Sa ngayon, hindi pa naglalabas ng petsa kung kailan ang final deadline ng franchise cancellation para sa traditional jeep, kaya dapat ay kumilos na ang mga tsuper at operators na may kinalaman dito dahil palugit lang ang ibinigay sa inyo.

Maganda ang hakbang na ito ng LTFRB at sana lang ay maipatupad nang maayos at lahat ay mabigyan ng pare-parehong pagkakataon para walang mapag-iwanang tsuper at maliliit na operator na mawawalan ng hanapbuhay.

Sana naman ay huwag nang magpatumpik-tumpik pa ang mga tsuper at operator sa bagong pagkakataon na ibinibigay ng LTFRB dahil kung hindi kayo kikilos, tiyak na mawawala kayo sa eksena.

Sa ayaw at sa gusto ng mga tsuper at operator, matatapos ang ibinigay na palugit sa kanila ng LTFRB at aalalayan pa sila sa gastos para sa modernisasyon ng kanilang mga jeep at inaasahan nating magiging maayos na ang lahat.

Nakakalungkot isipin na kung sakaling sa kabila ng lahat ng pagsisikap ng magkabilang panig ay mauwi na naman sa wala ang palugit na ito. Ang ending, tiyak na may magpoprotesta na naman at sana ay huwag itong mangyari.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Libreng Motorcycle Riding Academy ng MMDA

ni Atty. Rodge Gutierrez @Mr. 1-Rider | Pebrero 14, 2023

Sa dinami-rami ng mga pagsisikap ng Metro Manila Development Authority (MMDA) upang maisaayos ang sitwasyon ng daloy ng trapiko sa buong Metro Manila, tila sa wakas ay nakatumbok sila ng maayos na solusyon para sa kalagayan ng ating mga ‘kagulong’.

Plano kasi ng MMDA na magtayo ng Motorcycle Riding Academy bago matapos ang first quarter ng taong ito dahil naiisip nila na tamang edukasyon ang solusyon para maturuan ng tamang pagmamaneho ang napakaraming rider sa buong Metro Manila.

Marahil ay marami ang magtatanong kung bakit sa Metro Manila lamang magtatayo ng Riding Academy at siyempre, nababahala rin ang ilan kung paano naman ang mga ‘kagulong’ natin sa iba’t ibang bahagi ng bansa na parami na nang parami.

Kahit saan ka magmaneho ngayon, kabi-kabila na ang mga nagmomotorsiklo na bigla na lamang lumulusot sa kaliwa at kanan, na batid nating napakadelikado ngunit hindi na natin mapigilan, kaya kailangang magkaroon ng tamang kaalaman ang mga ito.

At saludo tayo sa hakbangin ng MMDA na magtayo ng libre o para mas maliwanag ay walang bayad na Motorcycle Riding Academy, na ang pangunahing layunin ay mabawasan ang aksidente na kinasasangkutan ng mga nagmamaneho ng motorsiklo at kabilang na rin ang tricycle.

Sa totoo lang, bago pa dumagsa ang ganito karaming motorsiklo sa kalsada, dapat ay noon pa ito naisip ng pamahalaan, ngunit sanay naman tayo na palaging naghahabol na maisaayos ang problema kapag malala na.

Gayunman, dapat tayong magpasalamat sa MMDA kahit plano pa lamang ang lahat ng ito dahil kung sakaling maisakatuparan na magkakaroon ng tamang edukasyon ang ating mga ‘kagulong’, isa na itong wake-up call para masundan ng iba pang Motorcycle Academy sa buong bansa.

Matagal na kasing sabik na sabik ang ating mga kababayan na nais matutong magmotorsiklo at maging ang marurunong nang magmotorsiklo—na magkaroon ng pormal na pagsasanay at tiyak na dadagsain ang napakagandang proyektong ito ng MMDA.

Sabagay, kung sisilipin natin ang datos mula sa Metro Manila Accident Reporting and Analysis System (MMRAS) ng MMDA, ang namamatay at kabuuang bilang ng aksidente na sangkot ang motorsiklo at tricycle ay umabot sa 258 ang nasawi noong isang taon, samantalang 295 noong 2021 at 253 noong taong 2020, dito lamang sa Metro Manila.

Kung tutuusin ay naglipana na ang mga driving school sa buong bansa, pero prayoridad nila ang magkamal ng kita at wala kahit isang driving school ang tumindig para manindigan hinggil sa kapakanan ng ating mga ‘kagulong’ na matuto ng tamang pagmamaneho ng motorsiklo o tricycle.

Ngayon ay nakatakda na umanong bumuo ng technical working group ang MMDA para gumawa ng safety training module na aangkop sa parehong beginners at experienced riders.

Mabuting pati ang mga experienced rider ay sumailalim din sa muling pagsasanay para madagdagan ang kanilang kaalaman dahil karamihan sa kanila ay sa kapitbahay lamang natutong magmotorsiklo, ngunit kulang na kulang sa iba pang teknikal na kaalaman.

Magkakaroon umano ng basic training kasama ang control at operation, laws, rules and regulations, skills training, at risk awareness ang mga nais maging professional rider at sasamahan pa ang lesson ng basic emergency response training.

Ang higit na maganda ay makakatanggap ang mga magtatapos ng kurso ng certificate matapos makumpleto ang lectures, practical application, at Basic Emergency Response Course.

Pangunahin sa ituturo ang Riding Courtesy, Motorcycle Orientation, Road Traffic Rules and Regulations, at Motorcycle Safety Laws. Kasama naman sa hands-on exercises ang Preparing to Ride, Common Riding Situations, Safety Driving Demonstration, at Basic Riding Course.

Plano ng MMDA na itayo ang Riding Academy sa lupa ng Government Service Insurance System (GSIS) sa kanto ng Julia Vargas Avenue corner Meralco Avenue, Pasig City at handa tayong makipagtulungan sa MMDA para maisakatuparan ang proyektong ito.

Good luck!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Mga detalye at impormasyon sa Single Ticketing System, dapat alam ng lahat ng motorista

ni Atty. Rodge Gutierrez @Mr. 1-Rider | Pebrero 11, 2023

Sinimulan na ang Single Ticketing System sa iba’t ibang bahagi ng Metro Manila gamit ang makabagong sistema at pantay-pantay na pagpataw ng batas at multa para sa mga lalabag sa batas-trapiko.

Base sa fine matrix na ipinatutupad, ang pinakamababang multa na maaaring ipataw ay P500 at ‘yan ay para sa paglabag sa number coding scheme, tricycle ban (nagmamaneho ng tricycle sa highways), dress code for motorcycle (tulad ng pagsusuot ng shorts at tsinelas) at ang pagiging arogante o kawalan ng paggalang sa enforcer.

Medyo may kamahalan ang multa sa paglabag sa truck ban kung saan sa unang pagkakamali pa lamang ay multang P3,000 na at kapag nahuli naman na nag-counterflow sa ikalawang pagkakataon ay P5,000.

Ang pinakamataas na puwedeng multa ng isang violator ay aabot sa P10,000 at ito ay para sa pinal o third offense na hindi pagsusuot ng helmet at ang paglabag sa Children’s Safety on Motorcycle Act na dapat ay tandaan mabuti ng ating mga ‘kagulong’.

Sa guidelines at inilabas na fine matrix ay walang nakikitang problema, ngunit isa sa mga hindi dapat maantala ay ang kailangang makapagpasa ang Metro Manila LGUs ng ordinansa na aayon sa Metro Manila Traffic Code 2023 bago dumating ang Marso 15.

Ito ay upang maiwasan ang pagkalito at maayos na maipatupad ang intensyon sa standardization, kinakailangang iayon ng mga alkalde ang depinisyon at halaga ng multa ng traffic violations sa kanilang mga ordinansa upang tuluyan nang maipatupad ang sistema sa buwan ng Abril.

Kung ang Metro Manila Development Authority (MMDA), Land Transportation Office (LTO) o kahit ang mga mayors ng Metro Manila Council ang tatanungin, ang Single Ticketing System umano ay malaking tulong para mapagaan ang sitwasyon ng mga motorista.

Idagdag pa ang malaking pagbabago na sa halip na ordinaryong violation ticket ay handheld ticketing device na ang gamit ng mga enforcer, bukod pa sa high technology at seryosong implementasyon ay masasabing maganda ang intensyon ng hakbanging ito.

Isipin n’yo na lang na matapos ang 28 taon ay natuloy na rin ang single ticketing system matapos na magkasundo ang mga mayor sa Metro Manila Council meeting at unti-unti ay pinupulido na ang bagong sistemang ito.

Pero ang tanong ng marami nating kababayan, kung maipatutupad ba nang maayos ang single ticketing system, gayundin naging maayos ba ang pagpapakalat ng impormasyon hinggil dito at tiyak ba na maliwanag sa mga motorista ang mga detalye?

May kasabihan tayo na, “Ignorance of the law excuses no one,” na kung basta na lamang natin ipatutupad ang mga bagong kautusan nang walang sapat na impormasyon ay baka magkaroon ng kalituhan sa panig ng ating mga kababayang kulang sa kaalaman.

Base sa MMDA Resolution No.23-02, ang single ticketing system ay pag-iisahin ang national at local laws hinggil sa traffic enforcement at epektibo umano itong transport at traffic management sa Metro Manila.

Bukod sa maiiwasan ang kalituhan, mas mapabibilis din umano nito ang proseso sa pagbabayad ng penalty dahil kung dati ay kinakailangan pang personal na magtungo sa isang munisipyo kung saan nagawa ang traffic violation, ngayon ay puwede na ang online payment.

At para magawa ito, maglalagay umano ang mga Local Government Unit (LGU) ng Information Technology (IT) system upang magkaroon ng interconnectivity sa database ng Land Transportation Office (LTO) at hindi pa natin alam kung ano ang magiging resulta nito.

Ang isa pa sa bentahe ng single ticketing system, ayon sa paliwanag ng MMDA ay maiiwasan na umano na maisyuhan ng dobleng ticket ng magkaibang LGU ang isang motorista sa kaparehong traffic violation.

Sa napakaraming paliwanag hinggil sa single ticketing system, marapat lamang na puliduhin ang sistema at bawat detalye ng hakbanging ito para hindi magaya sa sinapit ng no contact apprehension policy na biglang ipinatupad nang kulang sa pag-aaral at sa huli ay nabasura. Sayang!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.