Disenyo ng tradisyunal na jeep, mananatili sa PUVMP

ni Atty. Rodge Gutierrez @Mr. 1-Rider | March 9, 2023

Sa dinami-dami ng argumento kung bakit hindi dapat i-phaseout ang traditional jeepney, isa sa pinanghihinayangan ang disenyo bilang traditional jeepney kung saang bahagi ito ng pagkakakilanlan ng Maynila.

Marami sa ating kababayan ang hindi interesado sa modernisasyon dahil mas mahalaga sa kanila ang kinakalakihang disenyo ng jeepney kung saan tila nanghihinayang ang marami sa ating mga kababayan na hindi na muling makita sa lansangan ang tradisyunal na jeepney.

Halos ang tradisyunal na jeepney ang sumisimbolo sa maingay na lansangan ng Maynila dahil sa kakaiba nitong disensyo na bukod sa kargado ng iba’t ibang kulay ay santambak ang disenyo, kabilang na ang paglalagay ng mga drawing sa kabuuan ng jeepney.

Saglit nating isantabi ang pinagtatalunan at mga argumento kung bakit dapat nang palitan ang tradisyunal na jeepney upang kahit saglit ay bigyang-daan natin ang pagbabagong nais ipatupad ng pamahalaan.

Marami kasi ang nagagalit sa Public Utility Vehicles Modernization Program (PUVMP) ng pamahalaan dahil sa pag-aakalang ang modernong jeepney ay papalitan ng tila mini-bus na disenyo na nakikita natin sa mga lansangan.

Tila nagkulang sa pagpapakalat ng impormasyon ang Land Transportation Franchising and Regulatory Board (LTFRB) hinggil sa mga disenyong pagpipilian dahil bukod sa mukhang mini-bus na disenyo ay pinapayagan din ang iconic look ng jeepney.

Ibig sabihin, hindi balakid ang inaalok na modernisasyon ng pamahalaan para mawala ang dating disenyo ng tradisyunal na jeep dahil may mga bagong jeepney na pareho ang disenyo, ngunit binago lamang nang bahagya ang taas.

Ang mga ginanap na pagbabago sa disenyo ay hindi nagbago sa kabuuan, maliban sa tumaas ang bubong upang makatayo ang pasahero sa loob, may karagdagang handrail, aircon, pintuan sa magkabilang gilid at CCTV cameras para sa seguridad ng pasahero.

Katunayan ay naglabas na ng sample ang LTFRB para may pamarisan at ito ay hindi rin halos nabago ang disenyo ng tradisyunal na jeepney, ngunit ito ay pasado sa Philippine National Standards na itinakda ng Department of Trade and Industry (DTI).

Ayon sa LTFRB, hindi naman nila layuning alisin ang tradisyunal na jeepney sa lansangan, maliban sa nais nilang i-upgrade ang kalidad ng tradisyunal na jeepney na hindi na akma sa kasalukuyang istilo ng pamumuhay ng ating mga kababayan.

Bukas naman umano ang LTFRB sa anumang suhestiyon, lalo na kung manggagaling kay Pangulong Ferdinand ‘Bongbong’ Marcos Jr. na payagan pa sa lansangan ang mga tradisyunal na jeep na nasa maayos pang kondisyon para bumiyahe.

Ang iniaalok na modernong jeepney ay hindi naman imported dahil ito ay ginawa lamang sa ating bansa na kayang magsakay ng mas maraming pasahero kumpara sa tradisyunal na jeepney.

Sabagay, kung susuriin natin ang tradisyunal na jeepney, napakarami na rin naman ng dapat baguhin dahil walang sarado ang bintana ng tradisyunal na jeepney, nakasanayan na ng mga driver na gumamit ng hand signal o basta na lamang ikakaway ang kamay tapos bigla na lamang liliko.

Hindi man lahat, ngunit mataas na porsyento ng tradisyunal na jeep ay walang signal light, apat na bomba ang pag-apak sa preno bago huminto at ngayon ay sinadya pang medyo nakatuwad o pasubsob ang kaha para kapag nag-preno ay madaling magsiksikan papasok ang pasahero.

Marami pa sa mga tradisyunal na jeepney ay lumalagabog kung magpatugtog ng music na kung tawagin ay ‘patok’ at walang magawa ang mga pasahero, lalo na ‘yung mga senior citizen kung hindi ang magdusa sa ingay habang bumibiyahe.

Hindi natin pinag-uusapan ang kabuhayan dito ng mga operator at tsuper at ang kanilang ipinaglalaban dahil naiintindihan natin ang kanilang ipinaglalaban hinggil sa kanilang hanapbuhay na napipintong mawala dahil hindi umano nila kaya ang presyo ng iniaalok na modernisasyon.

Tinatalakay lang natin ang hitsura ng bagong jeepney na iniaalok ng LTFRB at ng tradisyunal na jeep upang magkaroon tayo ng pagkukumparahan kung bakit iginigiit ng pamahalaan ang modernisasyon.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Motorcycle taxi malaking tulong sa panahon ng transport strike

ni Atty. Rodge Gutierrez @Mr. 1-Rider | March 7, 2023

Hanggang ngayon ay nakatengga pa rin ang batas para maging legal ang motorcycle taxi sa bansa, hindi dahil sa maraming usaping legal ang hindi mapagkasunduan kundi sa tingin ng iba ay may higanteng nasa likuran ng mga pangyayari.

Ilang ulit na kasing dinidinig sa Kongreso para maging legal ang motorcycle taxi at umabot na rin ito sa Senado, ngunit walang kinakahinatnan dahil ayon pa rin sa tingin ng iba, may mas malaking higanteng kumikilos para maantala ang lahat.

Dapat talagang paspasan na para maging legal ang motorcycle taxi sa bansa dahil kailangang-kailangan na ito tulad na lamang ngayong nasa kasagsagan tayo ng krisis dahil sa usaping Public Utility Vehicle Modernization Program (PUVMP).

Kung hindi man nagkakaisa ngayon ang iba’t ibang samahan ng mga tradisyunal na jeepney para magsagawa ng protesta, tiyak na nagkakaisa ang mga ‘yan sa kanilang ipinaglalaban na i-abolish na ang PUVMP.

Kaya inaasahang kani-kanya nang pagpapakita ng puwersa ang iba’t ibang transport group sa mga darating na pagkakataon at ang talo sa sitwasyong ito ay ang ating mga kababayang walang sariling sasakyan at umaasa lamang sa pampasaherong jeepney.

Tulad ngayong nasa kasagsagan tayo ng tigil-pasada, bukod sa mga libreng mula sa iba’t ibang ahensya ay higit na pinakikinabangan ng ating mga naapektuhang manggagawa ang mga motorcycle taxi.

Malaki ang naging papel ng motorcycle taxi para hindi mahirapan ang ating mga kababayang nag-oopisina at sa ganitong paraan ay hindi basta-basta maaapektuhan ang ating ekonomiya habang tuloy ang girian ng pamahalaan at transport group.

Ang labis ko lang na inaalala ay baka masangkot sa aksidente ang ating mga kababayan na sumasakay sa motorcycle taxi na sa kasalukuyan ay naglipana, dahil talagang ginagamit ng ating mga kababayan ngunit mas marami ang kolorum.

Kahit saang sulok ay may makikitang kolorum na motorcycle taxi—ito ang popular na habal-habal na bukod sa hindi na nagbabayad ng tax ay wala pang insurance sakaling maaksidente habang sakay ang kanilang pasahero dahil hanggang ngayon ay wala pang ipinatutupad na batas para maging legal ang mga ito.

Sa totoo lang, ilan lang itong namamayagpag na kumpanya na nagpapatakbo ng motorcycle taxi at sila rin ang nakikitang nasa likuran kung bakit naaantala na maging legal na ang operasyon ng motorcycle taxi sa bansa.

Nais kasi ng mga kumpanyang kasalukyang namamayagpag na masolo ang merkado, samantalang mas marami ang ating mga ‘kagulong’ na nais maghanapbuhay nang legal gamit ang kanilang motorsiklo.

Ngayon, mismong ang Kongreso ay nakatatanggap ng reklamo hinggil sa pang-aabuso ng ilang driver ng motorcycle taxi na diumano’y tumatanggi sa pasahero kapag rush hour at mayroon ding sobra kung maningil na hindi naman mabigyan ng aksyon dahil hindi alam kung sino ang hahabulin dahil kolorum.

Ngayon, heto si Sen. Joseph ‘JV’ Ejercito at itinutulak sa Senado na maging legal na ang motorcycle taxi bilang public utility vehicles (PUVs) dahil sa kasalukuyan ay pinapayagan lang silang mag-operate sa pamamagitan ng provisional authority na inisyu sa kanila ng Department of Transportation (DOTr).

Naghain ng Senate Bill Number 167 o Public Utility Motorcycles Act si Sen. JV na layong amyendahan ang 58 taong Republic Act No. 4136, o Land Transportation and Traffic Code, para payagan ang mga motorsiklo na maging PUVs na legal na makapaghahatid ng mga pasahero na may bayad.

Ibig sabihin nito, kitang-kita na ang kahalagahan ng motorsiklo sa pag-usad ng bansa at ang mahalagang papel na ginagampanan ng ating mga ‘kagulong’, lalo na sa panahon ng krisis tulad ng tigil-pasada.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Tuloy ang tigil-pasada… Sigaw ng operator at tsuper: Abolish, hindi extension!

ni Atty. Rodge Gutierrez @Mr. 1-Rider | March 4, 2023

Kung nakakasugat lamang ang bawat salitang lumalabas sa bibig ng mga operator at tsuper, tiyak na gumagapang na sa hirap ang pamunuan ng Land Transportation Franchising and Regulatory Board (LTFRB) dahil tiyak na mata lang nila ang walang latay.

Ito ay dahil sa wala sa tiyempong hakbang ng LTFRB tungkol sa Public Utility Vehicle Modernization Program (PUVMP) na mariing tinututulan ng mga operator at tsuper na humantong pa sa Senado, ngunit tulad ng dapat asahan ay wala ring kinahinatnan.

Maging si Pangulong Ferdinand ‘Bongbong’ Marcos Jr. ay inaming hindi naging maganda ang implementasyon ng Department of Transportation (DOTr) sa modernisasyon ng public utility vehicles kaya humantong ito sa kaguluhan.

Habang isinusulat ang artikulong ito, buo pa rin ang pasya ng transport group na ituloy ang tigil-pasada sa Lunes, Marso 6 hanggang 12 sa kabila ng pang-apat na extension tungkol sa modernisasyon na ibinigay ng LTFRB sa Disyembre 31, 2023.

Binanggit naman ni Pangulong Marcos na gumagawa naman umano ng hakbang ang gobyerno para hindi matuloy ang tigil-pasada sa Lunes at sisikapin umano nilang maisaayos ang lahat.

Ngunit matigas ang transport group na tanging ang pag-abolish lamang umano sa PUVMP ang makakapigil sa isasagawa nilang tigil-pasada at walang iba pang makakapigil kahit maapektuhan ang 11 milyong pasahero sa buong bansa.

Gayunman, buo pa rin ang pag-asa ni Pangulong Marcos na makukumbinsi ng pamahalaan ang transport group na huwag munang mag-strike dahil kawawa umano ang mahihirap na manggagawa na kung hindi magtatrabaho ay hindi makakakain.

Tiniyak pa ni Pangulong Marcos na hindi hahayaan ng gobyerno na maapektuhan ang publiko, kaya magpapatupad sila ng libreng sakay para makapasok sa trabaho ang mga tao at sana ay maunawaan umano ito ng transport group.

Sa patuloy na bangayan ay mas dumarami ang nagiging kakampi ng transport group kumpara sa LTFRB, lalo na sa panig ng mga pulitiko na bukod sa inaalala ang sitwasyon ng mga magugutom na operator at tsuper ay nag-aalala rin na hindi sila iboto ng mga pamilya ng transport group.

Dahil sa public opinion, maging ang Transportation Secretary na si Jaime Bautista ay inatasan ang LTFRB na humanap na lang umano ng paraan para mapadali ang requirements para sa PUVMP upang maasikaso ang pangangailangan ng lahat ng operator at tsuper.

Sinabi pa ni Sec. Bautista na ang DOTr umano ay nakipag-ugnayan na sa mga operator at tsuper upang mahimay at matalakay ang mga isyu tungkol sa modernisasyon ng jeepney.

Dahil sa paglagablab ng sitwasyon, nagpalabas na ng press release ang DOTr na nagsasabing handa umano silang magbigay at ipakikiusap pa sa LTFRB na mag-relax sa requirements para mapadali ang lahat sa operator at tsuper na makasunod sa programa. Nakasaad pa sa press release na nag-aalok umano sila ng pakikipag-usap sa mga operator at tsuper upang talakayin ang PUVMP para matulungan nila mismo ang mga ito at hindi na humantong sa kaguluhan. Nakapaloob din sa nasabing press release, na sa pamamagitan ng PUVMP, ang road transportation system sa bansa ay magbabago sa pamamagitan nang pagtugon sa vehicle safety and quality, route network efficiency, fleet management habang naglalaan sa mananakay ng modernong sasakyan na ligtas, komportable at maaasahan.

Ngunit tila sarado ang pandinig ng transport group at lalo umano silang nawalan ng pag-asa nang rebisahin ng LTFRB ang Memorandum Circular 2023-013 at ginawang Disyembre 31, 2023 imbes na Hunyo 30, 2023 ang deadline sa pagsanib sa kooperatiba o korporasyon upang hindi mapaso ang kanilang prangkisa.

Ayaw na ng transport group ng extension dahil mas gusto nilang tuluyan nang i-abolish ang PUVMP at ginagawa umano ng DOTr na tila pagkiling sa panig ng mga operator at tsuper ay maliwanag na pang-uuto lamang, ngunit sa huli ay gusto pa rin nilang ituloy ang PUVMP.

Sa madaling salita, bagsak ang negosasyon, tuloy ang tigil-pasada!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.