Multa sa lalabag sa motorcycle lane, start next week

ni Atty. Rodge Gutierrez @Mr. 1-Rider | March 16, 2023

Babala sa ating mga ‘kagulong’, simula sa darating na Lunes, Marso 20, tuluyan nang iisyuhan ng violation ticket ang lahat ng nagmamaneho ng motorsiklo na hindi babaybay sa motorcycle lane sa kahabaan ng Commonwealth Avenue sa Quezon City.

Ganundin ang mga motorista na walang pakialam at sasakupin naman ang linya para sa motorsiklo ay tiyak na hindi patatawarin at tumataginting na P500 ang multa sa napakasimpleng pagkakamali, kaya dapat na sumunod.

Matagal na kasing ipinapatupad ang motorcycle lane sa ilang bahagi ng Metro Manila, ngunit tila ningas-kugon itong sa simula ay maayos, ngunit sa paglipas ng mga araw ay unti-unti na itong nababalewala dahil napapabayaan ang pagpapatupad.

Sa simula ng motorcycle lane, palaging punumpuno ng anunsyo dahil bago pa ang kulay na asul na linya at kitang-kita rin kung gaano kaagresibo ang mga operatiba para sitahin o hulihin ang mga lumalabag dito.

Pero sa ilang ulit na pagtatangka para pag-ibayuhin ang motorcycle lane, palagi itong bigo at ang layunin nito na maisaayos ang mga nagmamaneho ng motorsiklo na ibukod sa mga motorista ay palaging napupunta sa wala.

Ngayon, heto ang pamunuan ng Metro Manila Development Authority (MMDA), punumpuno ng pag-asa na muling buhayin ang motorcycle lane dahil kinakakitaan nila na posibleng sa pagkakataong ito ay maisakatuparan na ang matagal nang layunin ng naturang linya.

Sana ay suportahan natin ang planong ito ng MMDA dahil naniniwala ako na kahit ilang ulit nang nabigo ang pagpapatupad ng motorcycle lane ay may maganda itong maidudulot kung maisasagawa nang tuluy-tuloy at maayos.

Sa ngayon, medyo ramdam ang paghahandang isinasagawa ng MMDA dahil tuluy-tuloy ang kanilang information dissemination at sa tingin ko ay magiging matagumpay na ito sa bagong pamunuan ng MMDA, na seryosong sinisimulan na ang motorcycle lane.

Ilang araw na ring sinimulan ang isinasagawang dry run nito upang ma-familiarize ang mga motorcycle riders na bumabaybay sa kahabaan ng Commonwealth Avenue hinggil sa nalalapit na pagpapatupad na nito.

Kasalukuyang nakakalat na ang napakaraming traffic enforcer ng MMDA sa naturang lugar at inaasistihan ang mga enforcer ng local government ng Quezon City hanggang sa tuluyan nang maimpormahan ang ating mga ‘kagulong’ na dumadaan sa naturang lugar.

Katunayan, umabot sa halos 276 riders ang nasita ng MMDA sa unang araw ng dry run ng exclusive motorcycle lane sa Commonwealth Avenue at lahat ay pinagsisikapan nilang kausapin upang ipaalam na gumagana na ang motorcycle lane.

Umabot naman sa 61 motorista na kinabibilangan ng SUV at trucks ang nasita sa pagdaan sa exclusive motorcycle lane nang hindi naman liliko at karaniwan ay binabalewala lamang talaga ang linya para sa motorsiklo.

Hindi naman nakakalito sa panig ng ating mga ‘kagulong’ ang nabanggit na motorcycle lane dahil may marka itong kulay asul na guhit sa kalsada na idinisenyo para daanan ng nagmomotorsiklo at wala itong pinagkaiba sa dating motorcycle lane sa kahabaan ng EDSA.

Ito ay nasa ikatlong linya mula sa sidewalk ng Commonwealth Avenue mula Elliptical Road hanggang Doña Carmen at vice-versa na bagama’t naglipana na ang mga traffic enforcer ay itinalaga lamang sila para gumabay sa ating mga ‘kagulong’.

Kumbaga, hanggang Marso 19 ay wala pang papatawan ng multa sa ating mga ‘kagulong’ na makagagawa ng paglabag at sana naman ay huwag sadyain ng ating mga ‘kagulong’ na lumabag porke wala pang multa upang ngayon pa lamang ay masanay na tayo sa paggamit ng motorcycle lane.

Layunin kasi ng motorcycle lane na mabawasan ang grabeng aksidente na kinasasangkutan ng motorsiklo at mapaganda pa ang daloy ng trapiko sa naturang lugar.

Ayon kasi sa datos ng MMDA’s Metro Manila Accident Reporting and Analysis System, nasa 1,686 ang motorcycle-related road crashes sa taong 2022 na lumalabas na nasa limang motorsiklo kada araw ang nasasangkot sa aksidente.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Abot-kayang driving school fees, malaking tulong sa baguhang driver

ni Atty. Rodge Gutierrez @Mr. 1-Rider | March 14, 2023

Sa wakas ay nagbunga na ang ating panawagan na kontrolin ang nagtataasang bayad sa mga driving school na dahilan para hindi makapag-enroll ang marami nating kababayan, na umaasa lamang sa turo ng kapitbahay.

Ang kawalan ng pormal na edukasyon sa pagmamaneho ang isa sa nakikitang dahilan ng madalas na aksidente at labis na pagsikip ng daloy ng trapiko dahil na rin sa kawalan ng disiplina, lalo na at magkasabay na bumabaybay ng kalsada ang kotse at motorsiklo na magkaiba ang sistema.

Sa ilang mga interviews sa radyo at telebisyon na ating pinagdaanan, palagi nating sinasabi na kahit hindi tayo nagmamaneho ng motorsiklo ay dapat din tayong mag-aral kung may pagkakataon upang matutunan natin ang kasalukuyang sistema sa kalye.

Hindi ko sinasabing lahat ay obligadong mag-aral magmaneho ng motorsiklo, ang sinasabi ko ay kung may pagkakataon lamang upang mas maunawaan at maramdaman ng bawat isa ang kalagayan ng mga nagmomotorsiklo sa lansangan.

Wala na kasi tayong magagawa kung hindi ang isaayos ang lahat dahil nand’yan na sa lansangan ang motorsiklo, na alam nating nakadagdag sa pagsikip ng lansangan, ngunit hindi rin natin maitatanggi na may dala itong malaking kabuhayan at malaking tulong sa ekonomiya.

Araw-araw na nadadagdagan ang kotse at iba pang behikulo sa kalye, at hindi maitatanggi na mas malaki ang bilang ng motorsiklo na kumakalat sa iba’t ibang bahagi ng bansa dahil bukod sa napakamura ay kayang-kayang hulugan ng mahihirap nating kababayan.

Sa halip na kondenahin o tawaging ‘kamote driver’ ang ating mga ‘kagulong’ mas makabubuting unawain natin na ang karamihan sa kanila ay wala namang sapat na edukasyon dahil sa kakulangan ng suporta ng pamahalaan.

Ngayon, heto ang pamunuan ng Land Transportation Office (LTO) na nagbigay ng pahayag kamakailan na mag-iisyu umano sila ng order na maglilimita sa presyo ng bayad sa mga driving school na isang napakagandang hakbangin.

Bilang number one Representative ng 1-Rider Partylist, pinupuna natin ang lahat ng ahensya ng pamahalaan na may mga hakbanging makakaapekto sa takbo ng mga motorista, lalo na sa ating mga ‘kagulong’.

Ngunit sa ganitong hakbangin ng LTO, marapat lamang silang bigyan ng papuri at suportahan sa kanilang layunin na limitahan ang bayad sa mga driving school sa bansa para makayanan ng ating mga kababayan.

Kung inyong mapapansin, parang kabuteng nagsulputan ang mga driving school sa bansa at wala man lamang nagre-regulate sa kanila para magkaroon ng standard na singil at kahit magsagawa tayo ng lifestyle check, napakarami nang yumaman sa pagtatayo ng driving school.

Napakaganda kung matutupad ang anunsiyo ng LTO na sa katapusan ng Marso ay maglalabas umano sila ng standard rate fees sa mga driving school at sana ay maglabas sila ng presyong abot-kaya ng mahihirap nating kababayan.

Kaya sinisikap din nating maisama sa curriculum ng high school at senior high school ang driving upang lahat ng magtatapos ay alam ang lahat ng traffic sign, actual driving, disiplina at respeto sa kapwa motorista, ngunit lubhang masikip na umano ang umiiral na curriculum at pinag-aaralan pa kung paano ito maisasama.

Matindi kasi talaga kung maningil ang mga driving school dahil halos umaabot sa P20,000 ang kanilang sinisingil depende sa driving package na pipiliin ng mga nais mag-enroll at lamang na lamang ang anak ng mayayaman.

‘Yung mga may pera ay ilang linggong tinuturuan at may libre pang driving license na kasama sa package, pero kung hindi sapat ang pera ay may iniaalok din silang mas mura, pero ilang oras ka lang tuturuan at bahala ka na sa buhay mo kung huhusay ka o hindi.

Ngayon pa lamang ay sinasaluduhan na natin ang LTO at sana ay hindi na magkaroon ng aberya para maipatupad na limitahan na ang sobrang singil sa mga driving school.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Pramis ni P-BBM na walang mawawalan ng trabaho sa PUVMP, dapat tuparin!

ni Atty. Rodge Gutierrez @Mr. 1-Rider | March 11, 2023

Parang binuhusan ng malamig na tubig ang nagpupuyos na damdamin ng mga kababayan nating operator at tsuper, na naging sanhi ng pagbabalik-pasada nang marinig nila ang pangako ni Pangulong Ferdinand ‘Bongbong’ Marcos Jr. (P-BBM) na walang mawawalan ng trabaho.

Nakakita ng kaunting pag-asa ang transport sector sa binitawang kataga ni P-BBM, na walang mawawalan ng kabuhayan sa isinusulong na Public Utility Vehicle Modernization Program (PUVMP) na naging mitsa ng tigil-pasada kamakailan.

Naganap ang pangakong ito sa ikalawang araw ng tigil-pasada na isinagawa ng grupong Piston at Manibela, matapos silang ipatawag sa Palasyo upang pag-usapan ang dahilan ng kanilang ipinag-aalburoto, na humantong naman sa pagbabalik na sa kanilang pamamasada.

Lumalabas sa hinaing ng transport group na labis silang nangangamba na baka hindi umano sila mapautang ng pamahalaan para makabili ng bagong sasakyan, na isa rin sa pangunahing dahilan kaya humantong sila sa tigil-pasada.

Dahil sa pangyayaring ito, tila napukaw ng transport group ang natutulog na kamalayan ng pamahalaan, kaya kabilaan agad ang mga ginanap na dayalogo—kabilang na ang Senado na wala namang kinahinatnan, kaya marahil nanghimasok na ang Palasyo.

Mismong si P-BBM ang nagbigay ng pahayag na ang prayoridad umano ng programa ay ang kaligtasan ng publiko at mga pasahero, kaya pinag-aaralang mabuti ng gobyerno ang mga bagay-bagay hinggil sa pagpapalit ng mga jeepney at bus nang hindi kailangang magdusa ang mga transport worker.

Noong Martes ng gabi, hinarap nina Presidential Communications Operations Office (PCOO) Secretary Cheloy Garafil at Undersecretary Roy Cervantes ng Office of the Executive Secretary ang mga lider ng Piston at Manibela na isang napakagandang hakbangin.

Dahil sa pagpupulong, nakita at narinig ng pamahalaan ang hinaing, hindi lang ng dalawang samahang ito, kundi halos lahat ng transport group sa buong bansa na humantong sa desisyong itigil na ang transport strike.

Isa rin sa nagpahupa ng sitwasyon ang utos ni P-BBM sa Department of Transportation (DOTr) at Land Transportation Franchising and Regulatory Board (LTFRB) na muling pag-aralan ang Department Order No. 2017-011 o ang Omnibus Franchising Guidelines (OFG).

Kahit wala pang direktiba na tuluyan nang ibasura ang nabanggit na Department Order, nagsilbing preno ang kautusan na pag-aralan muna ito upang matiyak na naisaalang-alang ang bawat aspeto ng implementasyon ng programa, kabilang ang pagdinig sa mga hinaing ng mga driver at operator.

Ibig sabihin, para humupa ang sitwasyon, gagamitin ang itinakdang extension na hanggang Disyembre 31, 2023 na consolidation upang mapag-aralan ang mga probisyon ng OFG para maplantsa ang mga hindi pagkakaintindihan sa modernisasyon.

Kumbaga, parang tinuturukan lamang ng anesthesia ang mga operator at tsuper para kumalma, ngunit pagsapit ng itinakdang araw ay walang kasiguraduhan kung ano ang naghihintay sa kanilang kapalaran maliban sa napakagandang pangako.

Sabagay, hindi naman natin tinatawaran ang pangako ni P-BBM dahil alam nating hindi naman ito gagawa ng hakbang na ikasasama ng bansa, ngunit dapat nating maintindihan na iba ang pangako at ibang usapin naman ang pagtupad nito.

Ngayon, heto at ayaw namang magpahuli ng LTFRB na nagpahayag na wala umanong sapilitan o hindi pipilitin ang sinumang jeepney driver na ayaw sumama sa consolidation o kooperatiba na bahagi ng PUVMP.

Sinabi mismo ni LTFRB Chairman Teofilo Guadiz III nang humarap sa pagdinig ng House committee on transportation noong Huwebes, matapos itong kuwestiyunin hinggil sa tila sapilitan o pag-oobliga sa mga jeepney driver na sumali sa kooperatiba o korporasyon kahit ayaw nila.

Maliwanag na inanunsiyo ni Chairman Guadiz na hindi umano pipilitin ang mga tsuper o operator na ayaw sumali sa consolidation o kooperatiba, pero puwede umano silang magtayo ng sariling korporasyon na tila umiikot lang ang paliwanag ngunit iisa rin ang tinutumbok.

Pero tandaan natin na kasabay ng pagdinig, muling nilinaw ng DOTr na walang mangyayaring jeepney phaseout pagdating ng itinakdang deadline para sa consolidation sa Disyembre 31, 2023.

DOTr ang nagsabi niyan at hindi LTFRB.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.