LGUs, tiyaking ligtas ang mga kalye para iwas-aksidente

ni Atty. Rodge Gutierrez @Mr. 1-Rider | March 23, 2023

Maganda ang isinasagawang hakbangin ng Ilocos Norte Police Provincial Office (INPPO) at ng Land Transportation Office (LTO) na bukod sa pinagsama ang dalawang sangay ng pamahalaan ay pinalakas pa ang pagsisikap para mabawasan kung hindi man tahasang mapipigilan na ang road accident.

Base sa datos ng Philippine National Police (PNP) mula Enero hanggang Pebrero ng taong kasalukuyan, lumalabas na nasa 46 road crash accident o tumaas nang 60% kumpara sa kaparehong mga buwan noong nakaraang taon.

Sa paulit-ulit na imbestigasyon ng PNP, napatunayang ‘human error’ pa rin ang pangunahing sanhi ng mga nagdaang aksidente kung saan nakapaloob dito ang nagmamaneho nang lasing, kulang sa karanasan at kaalaman, kayabangan at marami pang iba.

Sa datos na ito ng PNP, mataas ang porsyento na nasasangkot sa aksidente ay ang ating mga ‘kagulong’, na araw-araw hindi na mapigilan ang pagdami dahil sa kaway ng kabuhayan at mabilis na galawan ng mga negosyo sa bansa.

Hindi na natin maikakaila na ang paggamit ng motorsiklo ang pinakamalaking job-generating industry sa bansa na unti-unti nang umuukit sa kasaysayan, na malaking tulong hindi lang sa ekonomiya kundi sa paglago ng bansa sa kabuuan.

Ngayon, heto ang pamunuan ng INPPO dahil nakatakda nilang simulan sa kanilang nasasakupan ang pagpapalakas at pagsasaayos ng pag-uugali at edukasyon ng mga driver, partikular ang mga nagmamaneho ng motorsiklo.

Medyo special mention ng pamunuaan ng INPPO ang ating mga ‘kagulong’ dahil karaniwan umanong biktima o nasasangkot sa aksidente sa kahabaan ng national highway sa kanilang nasasakupan ay ang mga motorcycle rider.

Dito nagsanib-puwersa ang INPPO at LTO dahil isasailalim umano nila ang lahat ng nagmamaneho ng motorsiklo sa kanilang nasasakupan sa mga isasagawang libreng seminar upang mas matuto pa ang mga drivers at riders.

Simpleng panimula ang hakbanging ito ng INPPO at LTO, ngunit napakalaking bagay nito para sa ating mga kababayang tsuper at mga ‘kagulong’ dahil kahit paano ay may nakapansin na magbigay ng solusyon.

Bagama’t hindi buong bansa ang aabutin ng mga isasagawang seminar, magandang simula ito para magising ang iba pang sangay ng pamahalaan na magsagawa rin ng mga ganitong pagkilos para sa kaligtasan, hindi lamang ng mga driver kundi ng buong sambayanan.

Kahit ilang porsyento lamang sa ating mga drivers at riders ang matuto kung paano ang tamang pagmamaneho, napakalaking tulong na para mabawasan ang mga aksidente sa mga darating na panahon.

Malaking tulong din na nakipag-ugnayan sila sa Provincial Engineering Office at sa Department of Public Works and National Highways (DPWH), na agad nagsagawa na ng mga rumble strips sa mga accident-prone areas kabilang na ang paglalagay ng maraming lighting systems at pagsasaayos ng mga kalye.

Isang ordinansa rin ang nakatakdang ipasa ng Ilocos Norte Sangguniang Panlalawigan hinggil sa visibility enhancement para sa kaligtasan ng mga biyahero, kabilang dito ang mga motorcycle riders, tricycles, at kurong-kurong (sidecar gamit sa delivery) para pag-ibayuhin pa ang kanilang visibility sa gabi.

Kung dati ay dobleng pag-iingat lamang kailangan ng ating mga ‘kagulong’ ngayon ay dapat na triple na dahil may kasabihan na kapag bumangga o binangga ang nakamotorsiklo, parehong agrabyado, pero paano kung nag-iingat ka na tapos mula sa langit naman ang aksidenteng naghihintay sa isang ‘kagulong’?

Ganyang-ganyan ang nangyari sa ating ‘kagulong’ na binabaybay ang kahabaan ng Estrella St., Bgy. Tañong, Malabon City, lulan ang kanyang angkas na pasaherong babae noong nakaraang Linggo lamang ng madaling-araw nang biglang bagsakan ng poste ng Meralco.

Isinugod sa Tondo Medical Center ang rider habang sa Chinese General Hospital and Medical Center naman dinala ang kanyang pasahero na kapwa nagtamo ng mga sugat sa iba’t ibang bahagi ng katawan dahil sa poste na matagal nang nakatagilid.

Isa lang ito sa aksidente na naiwasan sana kung hindi nagpabaya ang lokal na pamahalaan sa pagbibigay ng babala.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Handa ba ang NCR sa pagdagsa ng mga bagong sasakyan?

ni Atty. Rodge Gutierrez @Mr. 1-Rider | March 21, 2023

Habang abala ang iba’t ibang ahensya ng pamahalaan kung paano reresolbahin ang labis na pagsikip ng daloy ng trapiko sa bansa, lalo na sa National Capital Region (NCR), tumaas naman ng hanggang 27.2% ang bentahan ng mga sasakyan sa bansa noong Pebrero.

Naniniwala ang local automotive manufacturers na malalampasan na ngayong taon ang pre-pandemic sales level nang hanggang 15% paglago kasabay ng “favorable” economic indicators.”

Ayon sa joint report ng Chamber of Automotive Manufacturers of the Philippines Inc. (CAMPI) at Truck Manufacturers Association (TMA), tinatayang papalo sa 395,000 ang nakatakdang maibentang sasakyan ngayong 2023.

Buo ang paniniwala ng naturang grupo na makapagtatala ng 10% hanggang 15% paglago ng maibebentang sasakyan mula sa 352,596 na naitala noong nakaraang taon, sa year-to-date sales kung saan nasa 60,464 units na ang kanilang naibenta sa pagtatapos ng Pebrero.

Ang ulat na ito ay higit na mataas nang 34% kumpara sa inilabas na datos sa kaparehong panahon noong 2022, na isang malaking indikasyon na mas pataas patungo sa pag-unlad ang bentahan ng sasakyan.

Pinatotohanan ng CAMPI na patuloy ang paglago ng consumer demand para sa bagong motor vehicles na kung titingnan sa aspeto ng ekonomiya ay ramdam na ramdam ang pagsulong.

Para sa buwan ng Pebrero, nakapagbenta ang industriya ng 30,905 units ng sasakyan o 27.2% na pagtaas mula sa 24,304 units na naibenta sa kaparehong buwan noong nakaraang taon, at 4.8% na mas mataas sa 29,494 units na naibenta noong Enero.

Isa umano itong indikasyon na patuloy ang progreso sa panig ng auto industry mula nang masadlak tayo sa kasagsagan ng pandemya, ayon pa sa pahayag ng CAMPI.

Mula sa nasabing bilang, ang passenger car sales ay mayroong 7,189 units, sa commercial vehicle sales naman ay 23,716 units, Asian utility vehicles (AUVs) sa 4,896 units; light commercial vehicles (LCVs) sa 18,035 units; Light trucks sa 438 units; at trucks at buses sa 347 units.

Dahil d’yan ang Pilipinas ay pumalo sa ranggong third para sa pinakamasiglang automotive market sa ASEAN sa buong taong 2022 kasunod ng Malaysia at Vietnam bilang overall regional car sales na lumago ng 22.7% at 23.9% paglago naman sa region’s motor vehicle production.

Ayon naman sa datos ng ASEAN Automotive Federation (AAF), ang car sales noong 2022 ay umabot sa 3,424,935 units mula 2,791,279 units noong 2021, maging ang ASEAN car production ng kasabay na taon ay tumaas din sa 4,383,744 mula sa 3,538,396 units noong nakaraang taon.

Naglabas din ng ulat ang AAF hinggil sa pagtaas ng benta at produksyon ng motorsiklo at scooter, kung saan Pilipinas ang nakakuha ng ikalawang puwesto.

Ang ASEAN countries ay nakapagbenta ng 4,049,598 units mula sa 3,550,848 units o 14% ng paglago, ang Thailand ang pinakamalaking merkado sa motorsiklo at scooter ay nakapagbenta ng 1,792,016 units mulasa 1,606,481 units noong 2021.

Ang Pilipinas ay naitala namang ikalawa sa may pinakamalaking merkado na may kabuuang benta na umabot sa 1,564,817 units mula sa 1,435,677 units.

Ganyan kalaki ang pinag-uusapang produksyon at bentahan ng iba’t- bang klase ng sasakyan, kabilang na ang motorsiklo— kahanga-hanga at napakabilis, ngunit kaya ba itong sabayan ng mga ahensya ng pamahalaan kung pagsikip ng daloy ng trapiko ang pag-uusapan?

Nakita natin kung gaano kabilis ang pagdami ng sasakyan sa lansangan, ngunit hindi naman lumalapad ang mga kalye at hindi nadaragdagan ang mga lansangan, kaya inaasahang lalong sisikip ang daloy ng trapiko sa darating na mga taon.

Sana lang ay nakahanda ang lahat ng ahensya ng pamahalaan hinggil sa pagdagsa pa ng mga sasakyan, gayundin sa inaasahang paparating na pagsikip pa ng daloy ng trapiko, lalo na sa NCR, na mistulang malaking parking lot tuwing rush hour.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Tricycle sa bansa, posibleng palitan ng ‘Tok-Tok’

ni Atty. Rodge Gutierrez @Mr. 1-Rider | March 18, 2023

Posibleng matulad ang sitwasyon ng mga tricycle sa iba’t ibang bahagi ng bansa na isang araw ay pagbalakan na ring alisin ng pamahalaan dahil sa pagdagsa ng mga reklamo at pagsulpot ng alternatibong sasakyan.

Pinangangambahang mauwi rin sa iba’t ibang protesta ang samahan ng mga tricycle sa bansa tulad ng kinahantungan ng tradisyunal jeepney na ngayon ay binigyan lamang ng palugit hanggang Disyembre 31, 2023 upang makatugon sa Public Utility Vehicle Modernization Program (PUVMP).

Ngunit dahil sa pagsulpot ng modernisasyon, tila napabayaan ang bawat tricycle operator kung paano nila ididisenyo ang sidecar na kanilang ikinakabit sa kanilang motorsiklo at wala namang sinusunod na standard na sukat at disenyo.

Ang nangyayari sa kasalukuyan, basta may isang talyer sa isang barangay na nakagawa ng sa tingin nila ay magandang hitsura ng sidecar, lahat ay gumagaya hanggang sa mauso na ang disenyo.

Kapansin-pansin na bawat lugar o rehiyon ay may namamasada o bumabiyaheng tricycle, ngunit may kani-kanya silang disenyo ng pagkakakilanlan na kinagisnang kalakaran sa industriya ng mga samahan ng tricycle.

Kung magagawi kayo sa bahagi ng Laguna, Batangas hanggang lalawigan ng Quezon, makikita n’yo na ang disensyo ng sidecar ay may kalakihan na maluwag para sa dalawang pasahero at may lalagyan pa ng bagahe sa likod.

Ngunit dahil sa pagpasok ng makabagong uso at kabataang tricycle driver, unti-unti na ring nagiging lowered ang disenyo o mas mababa ang bubong nito kumpara sa nakasanayan, kaya may mga nagrereklamo na ring pasehero dahil medyo nakayuko na sila sa loob ng sidecar.

Mas malala ang sitwasyon kung magtutungo kayo sa bahagi ng Nueva Ecija at mga kalapit-bayan dahil usong-uso ru’n ang paliitan ng sidecar ng tricycle at bahagyang nakasubsob pa ang bubong nito.

Kung sasakay ang dalawang pasahero, halos hindi talaga magkasya at kailangan, ang isang pasahero ay bahagyang umurong para kalahating puwit lamang ang nakaupo at hindi talaga puwedeng sumandal dahil sobrang liit ng sidecar.

Hindi rin puwedeng maupo nang maayos tulad ng ordinaryong bus o jeepney na diretso ang likod at nakasandal sa upuan dahil napakababa rin ng bubong na talagang kailangan pang yumuko para magkasya, kaya ang resulta—hirap na hirap ang mga pasahero.

Higit na kaawa-awa kung ang sasakay sa mga tricycle na tulad nito ang mga senior citizen at kababayan nating Persons With Disabilities (PWD) dahil tiyak na sobrang hirap ang dadanasin bago makarating sa paroroonan.

Sa lahat ng pampasaherong sasakyan sa buong Pilipinas, tanging tricycle ang may opsyon ang pasahero kung special o regular—ibig sabihin, kung regular ay hindi ito aalis hangga’t hindi puno ang likod at sidecar ng tricycle, ngunit ‘pag special kahit solo ang pasahero ay aalis na, pero nakayuko pa rin sa loob.

Ibig sabihin, imbes na gumanda ang sarili nating tricycle, paurong ang disenyo at masyadong makasarili dahil wala silang pakialam sa kalagayan ng pasahero, na kahit kumpleto naman ang ibinabayad ay hirap na hirap sa sitwasyon.

Dahil sa pangyayaring ito, nagkaroon ng pagkakataong makapasok sa merkado ang imported na tricycle na karaniwan ay galing sa India, na kilala ngayon sa ating bansa sa tawag na ‘Bajaj’ o ‘Tok-tok’ na mabilis pa sa kabute ang pagdami.

Hindi rin mahuli-huli kahit tumatawid sa highway ang ‘Bajaj’ o ‘Tok-tok’ dahil hindi nila ikinukonsiderang tricycle ang kanilang tatlong gulong na sasakyan at pinayagan bilang new vehicle, kung saan sila-sila lang ang nag-usap at nagdesisyon.

Sabagay, kung pasahero ang tatanungin, ‘di hamak na mas komportableng sumakay sa ‘Bajaj’ o ‘Tok-tok’ dahil maluwag, relaks, kasya ang pasahero at kahit malayo ang biyahe ay hindi sasakit ang likod sa pareho ring pamasahe.

Dalawang senaryo ang nakikita natin dito— magkukumahog na naman ang pamahalaan para isaayos ang hindi na mapigilang pagdami ng ‘Bajaj’ o ‘Tok-tok’ o magkakaroon ng protesta ang tradsiyunal na tricycle dahil tinatalo na sila ng naturang sasakyan.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.