Walang medalya sa manibela: Ligtas na Semana Santa

ni Atty. Rodge Gutierrez @Mr. 1-Rider | April 6, 2023

Mula kahapon ng tanghali, idineklara na ng Palasyo na suspendido na ang trabaho sa mga tanggapan ng pamahalaan bilang pagbibigay-daan sa Semana Santa, kaya napakahabang bakasyon ang ating mararanasan hanggang Lunes.

Hindi lang naman ang mga empleyado sa pamahalaan ang nangingilin dahil maging ang mga eskuwela ay suspendido ang klase at kaya umabot nang hanggang Abril 10 ang bakasyon ay dahil ginugunita natin ang Araw ng Kagitingan na isang regular holiday.

Dahil sa haba ng bakasyon, napakarami nating kababayan ang nag-uwian ng probinsya, may mga magpipinetensya, may mga magsasagawa ng Stations of the Cross at iba-iba pang aktibidades na magpapatibay sa pananampalataya ng isang Katoliko.

Sa mga hindi naman kaanib ng Katoliko, ito rin ang panahon na nagsasama-sama sila upang magsagawa naman ng bakasyon grande—tulad ng swimming at ito ang dahilan kung bakit puno ang lahat ng beach resort sa bansa tuwing Semana Santa.

At hindi exempted d’yan ang ating mga ‘kagulong’ dahil sa panahon ng napakahabang bakasyon ay kabi-kabila rin ang mga motorcycle event, biker rallies at kung anu-anong samahan ng mga nakamotorsiklo para lamang bumiyahe patungong mga probinsya.

Kaya sa ating pagbiyahe, normal na tanawin ang mga nakasuot ng uniporme at sabay-sabay na naglalakbay lulan ng kani-kanilang mga motorsiklo na para sa ating mga ‘kagulong’ ay isa sa pinakamasayang gawain ng mga mahihilig sa motorsiklo.

Hindi lang motorsiklo dahil maging ang mga siklista o kahit ordinaryong samahan ng mga nagbibisikleta ay may sama-samang paglalakbay at dumadayo ng mga bayan-bayan sa iba’t ibang lalawigan.

Ganyan pinaghahandaan ng ating mga kagulong ang kahabaan ng Semana Santa na kinakailangan nilang magsama-sama para maglakbay sa pinakamalalayong probinsya at du’n magsisimba o nagsasagawa ng pagtitipun-tipon.

Sa mga ganitong pagkakataon, hindi naman nagpapabaya ang iba’t ibang ahensya ng pamahalaan dahil pinaghahandaan nilang mabuti ang pagdagsa ng mga motorista, bakasyonista at iba pang biyahero.

Kasama sa mga inihahanda ay ang kakayahan ng ating mga kalye, expressway, airport, mga daungan ng barko, bus terminal at mismong mga public transport—kabilang na ang barko at eroplano at tiyak na naglipana na naman ang mga K-9 snipping dogs.

Maging ang Department of the Interior and Local Government (DILG) ay inatasan ang Philippine National Police (PNP) at Local Government Units (LGUs) hinggil sa kaligtasan ng lahat ng biyahero kabilang na ang ating mga ‘kagulong’.

Naka-full alert din ang Bureau of Fire Protection (BFP) at maging ang Department of Transportation (DOTr) ay naglunsad ng ‘Oplan Biyaheng Ayos’ para tiyakin din ang kaligtasan ng mga biyahero sa iba’t ibang bahagi ng bansa.

Nasa heightened alert din ang Land Transportation Office (LTO), kung saan sa pagpasok pa lamang ng Holy Week ay nagsimula nang magsagawa ng inspeksiyon sa mga terminal ng provincial bus at sinusuri ang worthiness ng mga sasakyan—kasabay na rin ng random drug testing sa mga tsuper at konduktor.

Hindi rin nagpahuli ang Metro Manila Development Authority (MMDA) na nakipagtulungan sa LTO at Land Transportation Franchising and Regulatory Board (LTFRB) para siguraduhing may sapat na bilang ang mga sasakyang babiyahe para sa may 1.2 milyong pasahero ngayong Semana Santa.

Huwag naman nating iasa lahat sa pamahalaan, dapat maging ang mga biyahero ay magplano, maghanda at maging maingat din, dapat ay umalis nang mas maaga kaysa sa oras ng itinakdang biyahe para hindi nagkukumahog na madalas ay sanhi ng aksidente.

Sa ating mga ‘kagulong’, alam naman nating mataas ang bilang ng aksidente tuwing Semana Santa, kaya dapat ay doble-ingat, huwag magyayabang na posibleng humantong sa disgrasya at palaging tandaan na walang medalya sa manibela.

Ang tanging mapapala natin sa paghawak ng manibela ay ang makarating tayo nang ligtas sa ating paroroonan, makapiling ang ating mga mahal sa buhay at wala nang iba pa.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Sino ba ang ‘kamote riders’ at sino ba ang hindi?

ni Atty. Rodge Gutierrez @Mr. 1-Rider | April 4, 2023

Sa paglipas ng panahon, unti-unti nang natatanggap ang salitang ‘kamote rider’ na madalas ay naririnig natin sa mga radio broadcasters, kapwa natin ‘kagulong’ at iba pang kababayan, partikular ang naiinis sa isang nagmamaneho ng motorsiklo.

Pero ano ba talaga ang ibig sabihin ng ‘kamote rider’, at bakit madalas na natin ito ngayong naririnig at marami sa ating mga ‘kagulong’ ang ayaw na ayaw mabansagang ‘kamote rider’? Sa totoo lang, ako mismo ay tutol na tinatawag na ‘kamote rider’ ang ating mga ‘kagulong’.

Hindi natin alam kung paano nagsimula ang katagang ‘kamote rider’, ngunit lumalabas na kapag binanggit ito ay tumutukoy ito sa mga may hindi sapat na kaalaman sa pagmamaneho ng motorsiklo.

Ngunit katulad ng mga salitang ‘palpak,’ ‘makulit’ at marami pang iba, dahil madalas ginagamit ng ating mga kababayan ay naging isang normal na salita na at mismong ang Tagalog Dictionary ay opisyal na itong ginagamit at may sarili nang kahulugan.

Negatibo ang ibig sabihin ng ‘kamote rider’, ngunit paano maiintindihan ng isang nagmamaneho ng motorsiklo na sila ang pinatutungkulan nito kung wala namang inilalabas na panuntunan kung ano ba talaga ang ibig sabihin nito?

May mga motorcycle magazine at iba pang panulat ang naglabas ng mga paliwanag kung ano ang ibig sabihin ng ‘kamote rider’, Ngunit muli, mananatili lamang itong opinyon o haka-haka dahil wala namang opisyal na panuntunan kung sino ang ‘kamote rider’.

Ayon sa sabi-sabi, may mga sintomas ang isang ‘kamote rider’ at kung sa tingin mo ay kabilang ka sa mga sabi-sabing ito, makabubuting isaayos ang pagmamaneho para hindi tayo mapabilang sa tinatawag na ‘kamote rider’.

Una, sila umano ang mga nagmamaneho ng motorsiklo na ang tingin sa mga kalye ay racetrack, sila ‘yung kung lumiko ay ibinababa pa ang tuhod malapit sa kalye at halos dapang-dapa na kung lumiliko sa kurbada at kapag sumemplang ay agad na sinisisi ang sinumang kasabay sa kalye.

Ikalawa, sila umano ‘yung palaging umaangil ang motorsiklo habang nakahinto sa mga stop light at bago pa man mag-berde ang go signal ay umaarangkada na at halos tumayo na ang unahang gulong ng motorsiklo dahil sa lakas ng arangkada.

Ikatlo, karaniwan umano sa mga ito ay walang protective gear, ayaw nilang gumamit ng kahit ano’ng magbibigay ng proteksyon sa kanilang katawan, lalo na ‘yung mga ayaw magsuot ng helmet dahil wala naman umanong laman ang mga ulo na kailangang protektahan.

Ikaapat, sila umano ‘yung pakiramdam nila’y minu-minuto ay hinahamon sila ng karera ng kapwa nila nakamotorsiklo, kaya wala silang pakialam kung kaliwa o kanan ang kanilang puwesto, basta ang mahalaga ay maka-overtake sila.

Ikalima, dahil kamote umano ang pag-iisip, kapag nakakakita ng mas malalaking motorsiklo ay agad na binibirit ang minamaneho nilang motorsiklo upang maka-overtake at ipakita na wala sa laki ng motorsiklo ang pagmomotorsiklo.

May isang magazine pa na naglabas na ang isang ‘kamote rider’ umano ay ‘yung mga nagkakabit ng kung anu-anong racing stickers sa kabila ng napakabagal ng kanilang gamit na motorsiklo tulad ng Repsol sa Yamaha na ayos lang naman, Akrapovic sa open pipe at Brembo sa drum brakes.

Wala namang malaking problema sa mga racing stickers na ito na nakakaaliwan lang ikabit ng ating mga ‘kagulong’ sa kani-kanilang motorsiklo, ngunit sa iba ay ‘kamote rider’ na ang tingin sa mga gumagawa nito.

Kaya lumalabas na ang katagang ‘kamote rider’ ay depende sa nagsasalita kaya wala itong bisa dahil wala namang aamin sa mga nagmomotorsiklo na sila ay kabilang sa mga ito.

Marahil ay napapanahon na para maglabas ng opisyal na guidelines ang Land Transportation Office (LTO) kung anu-ano ang tamang pagmamaneho ng motorsiklo at ang lalabag dito ay kumpirmadong ‘kamote rider’.

Masakit kasi na lahat na lamang ng ating mga ‘kagulong’ ay inaakusahang ‘kamote rider’ na walang basehan at basta-basta na lamang binabanatan kahit wala namang katotohanan.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Mga fixer sa LTO, mangingilin lang ngayong holy week

ni Atty. Rodge Gutierrez @Mr. 1-Rider | April 01, 2023

Simula nang maupo bilang Land Transportation Office (LTO) Assistant Secretary si Jose Arturo Tugade, kabi-kabila ang kanyang pagsisikap para tuluyan nang wakasan ang talamak na operasyon ng fixer sa halos lahat ng kanilang tanggapan.

Katunayan ay sunud-sunod ang ginagawang pagtugis ng pamunuan ng LTO sa iba’t ibang sangay ng naturang ahensya at napakarami ng nasakoteng mga fixer at sinampahan na ng kaukulang kaso.

Pero bilang suporta natin sa ginagawang paglilinis ng LTO sa kanilang tanggapan, palagi nating isinusulat na hanggang sa kasalukuyan ay tuloy pa rin ang operasyon ng mga hindi natitinag na fixer dahil sanay na sa karagdagang kita ang ilang kasabwat na empleyado.

Hindi naman kasi ito parang gripo lang na ‘pag pinatay ay hihinto na agad ang operasyon dahil nakabaon na ang fixer sa sistema, ngunit hindi tayo nawawalan ng pag-asa sa pagsisikap ng LTO na masugpo ito.

Marami ang humanga sa ginawa ni Secretary Tugade at Executive Director Giovanni Lopez na nagpanggap na kukuha ng bagong lisensya suot lamang ang facemask at sumbrero dahil naranasan nila nang personal kung paano sila alukin ng serbisyo ng mga fixer.

Ang resulta, limang hinihinalang fixer ang nasakote sa akto ng pinagsanib-puwersa ng Criminal Investigation and Detection Group (CIDG) at ng LTO noong Miyerkules sa harap mismo ng kanilang tanggapan sa Novaliches District Office sa Quezon City.

Kumbaga, napatunayan mismo na ang ating panulat tungkol sa mga fixer na hindi pa rin tumitigil sa kabila ng kautusan at paghihigpit ng pamunuan ng LTO ay tuluy-tuloy pa rin sa ilegal na gawain.

Inaabangan ngayon ng publiko kung ano ang magiging resulta ng pangyayaring ito dahil ang limang nasakote ay nahaharap sa kasong paglabag sa Republic Act 9885 o Anti-Red Tape Act of 2007.

Higit sa lahat, sinuspinde sa puwesto ang hepe ng Novaliches District Office ng LTO habang iniimbestigahan umano ang naturang pangyayari at dito, malaki ang posibilidad na maabsuwelto ang hepe dahil sa kawalan ng magagamit na ebidensya.

Kung mapapatunayan na ang sinuspindeng hepe ay nakikipagsabwatan sa mga nasakoteng fixer, tiyak na may paglalagyan ito. Pero ang mabigat ay kung paano ito patutunayan dahil tiyak na hindi naman ikakanta ng mga fixer kung sino ang kanilang kasabwat.

Napakalawak na kasi ng sabwatan sa tanggapan ng LTO, tulad na lamang sa main office sa Quezon City, kung saan marami sa compound ng LTO ay may maliliit na opisina ng insurance company para sa mga nagpaparehistro ng sasakyan.

Ngunit ang karamihan sa mga opisinang ‘yan ay nag-aalok din ng serbisyo para mapadali ang pagkuha ng driver’s license mula sa online examination hanggang sa medical examination ay kasabwat sa pagproseso.

Kaya wala talagang empleyado ang mahuhuli sa aktong tumatanggap ng pera dahil ang mga opisina ng insurance company at medical clinic ang tumatanggap ng bayad at nilalagyan lamang ng palatandaan ang mga papel na bayad na at alam na ito ng mga empleyado ng LTO.

Pagkatapos ng office hours, hinahati-hati ang maghapong kinita ng mga fixer at halos lahat ng empleyado ay inaabot ng partihan, kaya medyo mahihirapan talaga ang pamunuan ng LTO kung paano ito masasawata.

Hindi natin tinatawaran ang kakayahan ng bagong pamunuan ng LTO sa kanilang zero tolerance sa korupsyon, ngunit pagdating sa fixer, para silang humihila ng barko sa lupa dahil mas maayos pa ang sistema ng fixer at mga empleyado kumpara sa mismong LTO.

Sa ngayon, dahil mainit ang sitwasyon, tiyak magpapalamig muna ang mga fixer, ang iba ay mangingilin muna dahil tiyempong Mahal na Araw at wala namang pasok, pero paghupa ng sitwasyon ay tiyak na balik-operasyon na naman ang mga ito.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.