Bagong istayl ng fly by night company, kalat na sa Bicol

ni Atty. Rodge Gutierrez @Mr. 1-Rider | April 15, 2023

Inalerto ng Securities and Exchange Commission (SEC) sa Bicol ang publiko na mag-doble-ingat laban sa mga kumpanya o indibidwal na nag-aalok ng financing at mababang down payment at monthly amortization sa pagkuha ng bagong sasakyan.

Inihayag ng SEC-Bicol na nakakatanggap sila ng report na pormal na isinumite sa kanilang tanggapan hinggil sa vehicle financing scheme na sobrang baba ng down payment at kaduda-duda ang sobrang baba ng monthly amortization.

Bagong-bago umano ang naturang operasyon na inaalok sa mga kababayan natin sa Bicol area ng mga hindi rehistradong kumpanya, entities, o indibidwal na tahasang nag-aalok ng mabilis na proseso at mababa ang cash out sa pagkuha ng sasakyan.

Kaya ngayon, nagkukumahog ang SEC-Bicol na mapalakas ang public awareness hinggil sa bagong modus ng mga bogus na kumpanya na nagsasagawa ng unauthorized financing schemes na huwag tangkilikin.

Ang naturang modus kasi ay isinasagawa sa pamamagitan ng paghingi agad ng inisyal na downpayment sa mga prospective client para sa pag-purchase ng bagong motorsiklo o kotse.

Ang mga fly by night na kumpanya ay siyang tumatayo na agad umanong aasikasuhin ang pagkuha ng sasakyan mula sa sa local dealership at wala namang problema dahil tuwang-tuwa ang kliyente dahil nakukuha naman talaga ang sasakyan ng purchasing client.

Minsan, hindi naman ganu’n kababa ang down payment depende sa usapan, pero mas madalas umano ay mas mababa para makumbinsi ang kliyente na magbigay agad.

Nakakaengganyo talaga ang istayl ng modus na ito dahil sa inaalok na insentibo na paghahatian umano ng kliyente at kumpanya ang responsibilidad sa pagbabayad ng monthly amortization at ang hatian umano ay aabot sa 50% sa kabuuan, bagay na napakaimposibleng mangyari.

Lumalabas na ang kliyente ay nagbabayad ng monthly amortization sa hindi naman niya alam na fly by night na kumpanya at hindi sa mismong car dealers, kaya ngayon ay may mga naloko at pinaiimbestigahan na ng SEC.

May banat pa ang mga fly by night na kumpanya na ang matatanggap umano nilang payment mula sa kliyente ay gagamitin para makabuo ng halaga sa kanilang investment portfolio na gagamitin naman sa ibang investment na puwedeng tumubo ng malaki.

Ang tutubuin umano rito ay may malaking bahagi ang kliyente at ito ay awtomatikong idadagdag sa monthly amortization ng kliyente, na sa kabuuan ay mas bababa pa ang presyo ng sasakyang kinuha nito.

Matapos maniwala sa naturang modus at nakuha na ang lahat ng pakay na halaga sa kliyente, maglalaho na ang mga nagpakilalang kumpanya at imposible na silang makontak pa.

Madidiskubre na lamang ng kliyente na ang kanilang monthly payment ay hindi naman nakakarating sa talagang car dealer at ang masaklap pa, makakatanggap na sila ng notice of foreclosure sa kinuhang sasakyan.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Malalaswang palabas sa PUVs, tanggal prangkisa at 1 taong kulong

ni Atty. Rodge Gutierrez @Mr. 1-Rider | April 13, 2023

Ilan sa mga dahilan kaya tinatangkilik ng ating mga pasahero ang mga bumabiyaheng bus ay dahil sa iba’t ibang pakulo na kanilang ginagawa, lalo na ‘yung mga nanggagaling sa probinsya na bumabiyahe ng 12 oras at higit pa.

Pinakamabilis mapuno ay ang mga bus na maganda ang aircon, maayos ang telebisyon, ang iba ay may upuan pa na kung tawagin ay lazyboy na puwedeng ihiga tulad ng business class na eroplano at ang iba ay mayroon namang comfort room.

Lahat ay ginagawa ng mga may-ari ng bus company upang mahikayat ang mga pasahero na tangkilikin ang kanilang serbisyo, ngunit kapag nasa gitna na ng biyahe ay may ilang pasaway na driver o kundoktor ang gumagawa ng kalokohan.

Matagal na kasi tayong nakakatanggap ng reklamo hinggil sa mga provincial buses na nasa gitna ng biyahe ay nagsisingit ng malalaswang palabas, lalo na kung sa kalagitnaan ng hating gabi at mangilan-ngilan na lamang ang gising na pasahero.

Sabagay, hindi naman talaga pornographic materials ang isinasalang sa kanilang telebisyon, ngunit karaniwan ay Rated R na hindi talaga pinapayagang mapanood ng mga menor-de-edad at hindi malayong may mga batang pasahero na makapanood nito.

Hindi naman lahat ng provincial buses ay gumagawa nito, lalo na ‘yung mga kilalang bus company na maayos talaga ang pamamalakad, ngunit may ilang fly-by-night na pumapasada na para lamang makuha ang atensyon ng mga pasahero ay nagsisingit ng malalaswang panoorin.

Marahil ay nakarating na rin ang sumbong na ito sa pamunuan ng Movie Television Review and Classification Board (MTRCB) dahil naglabas na sila anunsyo na pinaaalalahanan ang mga driver, kundoktor at operator na bawal magsalang ng malalaswang palabas.

Tanging television shows at mga pelikula lamang na may ‘G’ at ‘PG’ ratings ang puwedeng ipalabas sa public utility vehicles (PUVs), kabilang d’yan ang mga provincial buses na karaniwang gumagamit ng telebisyon sa kanilang sasakyan.

Naglabas ng Memorandum Circular No. 09-2011 ang MTRCB kung saan nakapaloob ang limitasyon at mga alituntunin sa public exhibition ng mga pelikula, lalo na sa common carriers at ba pang klase ng pampublikong lugar.

Ang sinumang mahuhuli na lalabag ay maaari umanong makulong ng tatlong buwan hanggang isang taon at pagmumultahin ng P2,000 hanggang P5,000 at higit sa lahat ay babawiin umano ang kanilang prangkisa ayon mismo sa MTRCB.

Nakasaad sa ilalim ng naturang circular na, “All common carriers and other public places that openly and publicly exhibit motion pictures shall be treated as movie theaters for the purposes of regulation by the Board”.

Nilinaw pa na, “Owing to their service character and accessibility to the public regardless of age, common carriers and other public places can only publicly exhibit such motion pictures classified by the Board as for General Patronage (G) or Parental Guidance (PG).”

Detalyado na ang mga palabas na may G ratings ay akma para sa mga bata habang ang PG-rated contents ay maaaring may nilalamang adult materials na pinapayagang mapanood ng mga bata basta’t may kasama o gabay ng nakatatanda tulad ng kanilang mga magulang.

Matatandaang, noong 2011 ay pumasok ang MTRCB sa Memoranda of Agreement sa Land Transport Franchising Regulatory Board (LTFRB), at sa Maritime Industry Authority na magtulungan upang protektahan ang publiko mula sa anumang public exhibition ng TV programs at mga sine.

Problema rin ng MTRCB ang ginagawang palusot ng ilang drive-in hotel at mga motel sa bansa dahil may ilang nagpapalabas ng malalaswang panoorin sa kani-kanilang silid para lang makaengganyo ng mga customer na ginagaya ng ilang provincial buses—nadadamay tuloy ‘yung mga disenteng hotel/motel.

Kaya sa anunsyong ito ng MTRCB na dapat ang panuntunan ay batay sa umiiral na cultural values ng mga Pilipino ay isang malaking hakbangin at umaasa tayo magbubunga ng mabuti ang pagsisikap ng MTRCB.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Iwas-aksidente ngayong tag-init

ni Atty. Rodge Gutierrez @Mr. 1-Rider | April 11, 2023

Isa sa malaking bagay na dapat ay nasa kondisyon sa pagmamaneho ang sasakyan, siguraduhing perpekto ang kondisyon mula gulong, preno, langis, tubig at higit sa lahat ay ang kondisyon ng magmamaneho.

Isa ito sa madalas na ipinapaalala sa lahat ng mga infomercial sa radyo at telebisyon, at maging sa mga driving school itinuturo na dapat ay kondisyon ang kalagayan ng isang magmamaneho ng sasakyan—kumpleto sa tulog, walang hangover o hindi nakainom.

Mataas kasi ang bilang ng mga sasakyang nasasangkot sa aksidente ay dahil sa human error, na karaniwang nangyayari dahil antok na antok ang nagmamaneho, lalo na ang mga truck, taxi driver at iba pang kahalintulad nito na halos 24-oras nagmamaneho.

Lalo na sa mga nagmamaneho ng motorsiklo, kung apat hanggang mas maraming gulong na sasakyan ay nangyayari ang human error, lalo sa dalawang gulong at napakataas din ng datos ng pulisya na ang mga motorsiklong nasangkot sa aksidente ay nakainom.

Marami kasi sa ating mga ‘kagulong’ na dahil malapit lang naman sa kanilang lugar ang dadaluhang handaan ay hindi nag-aalala na malasing kahit may dalang motorsiklo—masyadong tiwala sa sarili na mas mahusay silang magmaneho kapag nakainom.

Ngunit ito ay isang malaking ‘akala’ lamang dahil ayon sa paliwanag ng mga eksperto, nagkakaroon umano ng pagbagal ang galaw ng taong nasa impluwensya ng alak at hindi sumasabay ang kanilang desisyon sa galaw ng kanilang katawan.

Maraming naaksidente na kapag nakarekober na sa pagamutan ay palaging sinasabi na akala nila ay kakayanin nilang mag-overtake, pero ang lahat ng pangyayari ay isang malaking akala lamang dahil sa epekto ng alak.

Dapat ding pagtuunan ng pansin ng ating mga ‘kagulong’ ang deklarasyon ng Philippine Atmospheric, Geophysical and Astronomical Services Administration (PAGASA) na opisyal nang nagsimula ang dry season.

Marami sa ating mga ‘kagulong’, lalo na ‘yung mga nasa delivery services, nagmamaneho ng mga motorcycle taxi at mga kahalintulad nila ang masyadong abala sa paghahanapbuhay at hindi na alintana ang init.

Dapat na itaas ng ating mga ‘kagulong’ ang kamalayan hinggil sa pagpasok na ito ng tag-init dahil mismong ang Department of Health (DOH) ay nagbigay ng babala hinggil sa pagtaas ng kaso ng heatstroke sa bansa.

Alalahanin nating walang pinipiling edad ang heatstroke, tulad na lamang ng isang 17-anyos sa Binangonan, Rizal na sa kasagsagan ng init ay patuloy pa rin sa paglalaro ng basketball dahil matagal na niya itong ginagawa at wala namang nangyayaring masama.

Ang resulta, bigla itong bumagsak at walang tigil sa pagdugo ang ilong at kinapos na sa paghinga hanggang sa mawalan ng malay. Mabuti na lamang at agad itong nadala sa pagamutan kaya nailigtas pa ang kanyang buhay.

Higit na dapat na mag-ingat ang ating mga ‘kagulong’ dahil karaniwan ay nakasuot pa ng jacket at helmet, kaya nakakadagdag ito sa pakiramdam na mainit at delikado kung aatakihin ng heatstroke habang nagmamaneho.

Makabubuting sumilong muna kung talagang sobra ang sikat ng araw at huwag tayong manghinayang sa kikitain, kaya babalewalain na lamang ang tindi ng init dahil mas malaki ang mawawala kung maoospital kayo.

Siguraduhin ding may baon na tubig sa pagmamaneho ng motorsiklo at kahit hindi nakakaramdam ng uhaw ay regular na uminom ng tubig upang hindi ma-dehydrate at umiwas sa matatamis na inumin dahil lalo itong nakakadagdag sa nararamdamang uhaw.

Isa pa sa dapat ay mag-ingat ang mga may-ari ng electric bike, dahil nito lamang Martes Santo ay limang miyembro ng pamilya ang nasawi dahil sa overcharging, naglagablab ito at natupok ang buong bahay sa Pozorrubio, Pangasinan.

May nabibiling charging regulator at kusa itong namamatay kung hanggang anong oras lang dapat mag-charge para maiwasang maulit ang aksidenteng ito.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.