Mga sakit na nakukuha sa pagmomotorsiklo

ni Atty. Rodge Gutierrez @Mr. 1-Rider | May 27, 2023

Kahit saan tayo tumingin, naglipana na ang motorsiklo sa mga lansangan, pribado, motorcycle taxi, delivery services at marami pang iba na lahat ay naghahabol ng oras para gampanan ang kanilang pang-araw-araw na trabaho.

Madalas ay kinaiinisan na ng mga motorista ang ating mga ‘kagulong’ dahil wala nang pinipiling linya sa kalsada ang mga ito, basta may pagkakataon ay lulusot at lulusot, madalas ay nagka-counter flow pa sa panahon ng heavy traffic.

Pinupulaan dahil palagi umanong nagmamadali, kaya singit nang singit at hindi alintana kung kaliwa o kanan na madalas ay nagreresulta naman sa aksidente sa pagitan ng kapwa motorsiklo o laban sa four wheeler vehicle.

Palaging nakikita ang mga negatibong aspeto ng ating mga ‘kagulong’ kumpara sa mabuting dulot nito sa bansa, ngunit kung iisipin, hindi tayo makakasabay sa bilis ng ikot ng mundo kasabay ng makabagong teknolohiya kung wala ang motorsiklo.

Sila ang kaakibat natin sa paglago ng ekonomiya dahil nakakasabay sila sa mabilis na galawan ng lahat at marami ang dating nagmamaneho ng kotse na ngayon ay bumili na rin ng motorsiklo dahil bukod sa matipid sa gasolina ay mabilis pa.

Pero lingid sa kaalaman ng marami, sa lahat ng trabaho ay ang pagsakay ng motorsiklo ang isa sa pinakamahirap at itinuturing itong mas mahirap pa kumpara sa mga boksingero na nakataya rin ang buhay sa kanilang hanapbuhay.

Mas marami kasi ang binabawian ng buhay sa pagmamaneho ng motorsiklo kumpara sa mga lumalaban sa boksing, dahil sa boksing ay araw-araw naghahanda ang boksingero bago lumaban samantalang ang ating mga ‘kagulong’ ay sabak lang nang sabak.

Ngunit sana ay huwag masanay ang ating mga ‘kagulong’ na basta na lamang nagmamaneho ng wala sa tamang kondisyon, dahil bukod sa motorsiklo na dapat ay nasa kondisyon, higit na dapat nasa kondisyon ang mismong driver bago magmaneho.

Marami kasi sa ating mga motorcycle driver o nasa delivery services ang pagkatapos ng trabaho ay nagkakayayaang uminom, na hindi naman masama dahil kailangan din naman ang relaxation sa pang-araw-araw na pagod.

Pero ang hindi tama ay ‘yung lasing na lasing na at magmamaneho pa pauwi. Kaya dapat kung iinom ng alak, tiyaking hindi na magmamaneho at karamihan pa ay magdamag uminom tapos kinabukasan ay hindi inaalintana ang hangover at sasabak pa rin sa maghapong pagmamaneho.

Mataas ang bilang ng aksidente dahil sa mga hindi tamang paghahanda ng ating mga ‘kagulong’ bago sumabak sa hanapbuhay, kaya palaging tandaan na bukod sa motorsiklo, dapat nasa kondisyon din ang pangangatawan.

Bukod kasi sa environmental hazard at aksidente na kinakaharap ng mga delivery riders habang nagtatrabaho, lantad din sila na makabuo ng work-related health issues tulad ng Musculoskeletal Disorders (MSDs).

Ayon sa National Library of Medicine, ang MSDs ay binubuo ng iba’t ibang kondisyon na nakakaapekto sa buto, joints, muscles at mga connective tissues ng katawan na puwedeng magresulta sa pananakit at function loss.

Hindi ito dapat binabalewala dahil ang ibang kategorya ng MSDs ay back disorders, osteoarthritis, at iba pang klase ng arthropathies o joint diseases na marahil marami na sa ating mga ‘kagulong’ ang nakakaranas nito.

May mga pag-aaral hinggil sa development nitong work-related MSDs na 53% ng 91% ng mga motorcycle riders sa iba’t ibang bahagi ng mundo ang dumaranas na ng MSDs.

Lumalabas na 92% ng 122 commercial rider na nagtatrabaho ng mahigit sa anim na oras kada araw ay napaulat na may MSDs at ang karaniwang nararanasan ay ang pananakit ng lower back, at ang edad ng ating mga ‘kagulong’ na meron nito ay edad 41 pababa.

Huwag natin masyadong abusuhin ang ating pangangatawan dahil kahit nasa kondisyon ang ating motorsiklo, nasa delikado pa ring sitwasyon kung mismong driver ang wala sa kondisyon.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Tugade, suko sa bulok na sistema ng DOTr kaya bumitaw sa LTO

ni Atty. Rodge Gutierrez @Mr. 1-Rider | May 25, 2023

Hindi maintindihan ng marami nating kababayan kung bakit bigla na lamang iniwan ni Jay Art Tugade ang puwesto niya bilang Land Transportation Office (LTO) Chief Assistant Secretary, ngunit malinaw ang mensahe nito para sa Department of Transportation (DOTr) kung bakit siya bumitaw.

Sinabi ni Tugade na kaya niya nagawang mag-resign ay dahil hindi umano siya magiging epektibo sa trabaho kung magkaiba sila ng diskarte ni DOTr Sec. Jaime Bautista.

Parang humihila ng barko sa lupa si Tugade sa pamumuno niya sa LTO dahil simula nang maluklok siya sa puwesto noong Nobyembre 17, 2022, agad niyang sinimulang linisin ang naturang ahensya, ngunit tila hindi nauubos ang problema.

Ilang linggo pa lamang sa puwesto si Tugade, ilang ‘fixer’ na ang nasakote at ipinakulong nito, ngunit dahil sa tila kalawang na unti-unti nang kinakain ang buong ahensya, hindi na talaga maresolba ang problema.

Marami ang humanga sa sipag na ipinamalas ni Tugade, ngunit hindi niya kaya mag-isa ang talamak na sabwatan ng mga empleyado ng LTO at ng mga ‘fixer’ dahil inugat na ng panahon ang nabuong sindikato na hindi basta-basta matukoy ng ordinaryong nag-iimbestiga.

Base sa resignation letter na isinumite ni Tugade na ang effectivity date ay sa darating na Hunyo 1, 2023, inisa-isa niya ang kanyang accomplishments bilang namumuno sa LTO—ang single ticketing system, price ceiling sa mga nagsisiyamang driving school, pag-alis sa periodic medical exam sa mga may hawak na 5-year at 10-year driver’s license.

Ipinatupad din ni Tugade ang pagbabawal sa mga traffic enforcer na baklasin ang plaka ng mga hinuhuling driver, at ang pinakahuli ay ibinaba pa sa P300 ang maximum fee para sa medical examinations na required sa pagkuha ng student permit at driver’s license.

Kahit hindi perpekto ang naging trabaho ni Tugade sa LTO, nakita ng sambayanan ang kanyang pagsisikap para linisin ang napakapangit na imahe ng ahensyang pinamumugaran ng mga korup.

Hindi naman lihim ang umiiral na korupsyon sa iba’t ibang tanggapan ng LTO, at katunayan d’yan, napakaraming ‘fixer’ na ang ipinakulong ni Tugade na sadyang hindi maubus-ubos dahil napakatatag na ng kanilang relasyon sa ilang empleyado nito.

Palagi nating sinasabi na hindi lahat ng nagtatrabaho sa LTO ay gumagawa ng anomalya, ngunit naniniwala rin tayo na lahat ng empleyado ay alam ang talamak na operasyon ng mga ‘fixer’, ngunit nagsasawalang kibo at ayaw madamay.

Sa dinami-rami ng mga achievement ni Tugade, nakaladkad ang kanyang pangalan sa shortage ng plastic card ng mga driver’s license, ngunit alam ng publiko na wala siyang kasalanan dahil nanghimasok ang DOTr sa procurement kaya nagkaloko-loko.

Dahil dito, uminit nang uminit ang sitwasyon sa pagitan ng LTO at DOTr at marami sa ating mga kababayan ang nakikiramdam kung sino ang unang masisibak sa puwesto dahil mismong si Pangulong Ferdinand ‘Bongbong’ Marcos Jr. ay naiirita na sa pangyayari.

Marami ang umasa na sa panig ng DOTr magkakaroon ng sibakan dahil kabi-kabila ang insultong kanilang dinaranas, kabilang na ang makailang ulit na problema sa NAIA Terminal na humantong na naman sa pagkakakansela ng mga flight dahil sa biglaang pakasira ng uninterruptible power supply (UPS).

Alam ni Tugade na lubhang napakatibay ng pamunuan ng DOTr sa pamahalaan at hindi ito basta-basta matitibag, kaya minabuti niyang umalis kaysa pare-pareho silang lumubog sa kahihiyan.

Sampu ng aking mga ‘kagulong’ ay nagpapasalamat kay Tugade dahil kahit sa maikling panahon ng kanyang panunungkulan ay may mga pagbabago siyang naipatupad sa lugmok na imahe ng LTO.

Ang ginawang pagbibitiw ni Tugade ay maliwanag na mensahe na hindi na nito kaya ang hindi maayos na sistema ng DOTr.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Mahigit 2 milyong trabaho para sa riders

ni Atty. Rodge Gutierrez @Mr. 1-Rider | May 23, 2023

Regular na nakikipagpulong ang Private Sector Advisory Council (PSAC) kay Pangulong Ferdinand “Bongbong” Marcos Jr. (P-BBM) para sa partnership ng pribadong sektor sa pamahalaan sa aspeto ng pagpapalakas sa ekonomiya. 

Ilan lang ito sa grupong regular na kinakaharap ni P-BBM, ngunit ang PSAC ang isa sa pinakaproduktibo pagdating sa pagbuo ng mga trabaho at iba pang programa na nakakatulong sa pag-unlad ng bansa.

Ngayon, tila nagkaroon ng kakampi ang ating mga ‘kagulong’ dahil biglang nagkaroon ng pag-asang maging lehitimo ang trabaho ng mga ‘habal-habal’ driver sa bansa upang makadagdag sa serbisyo ng transportasyon.

Ito ay matapos imungkahi ng PSAC ang paglikha ng Motorcycle Micro Business Program sa pamamagitan ng presidential order para i-empower ang ‘nanopreneurs’ sa motorcycle industry.

Layunin ng programa na makabuo ng mahigit dalawang milyong trabaho para sa riders at magkaroon umano ng pagbabago sa kanilang kabuhayan na maging platform self-entrepreneurs.

Maganda ang layunin ng PSAC dahil nais nilang itaas ang antas ng pagiging ‘habal-habal’ driver sa pamamagitan ng pagbibigay ng masusing pagsasanay alinsunod sa pinakamataas na safety standards, hindi lang para sa kanilang kaligtasan kundi maging sa kaligtasan ng mga pasahero.

Sa ngayon, ang Angkas at Joyride umano ang ilan sa mga aktibong nagbibigay ng serbisyo sa maraming pasahero, hindi lang sa Metro Manila kundi maging sa ilang maunlad na lalawigan sa buong bansa.

Patunay lamang ito na hindi na mapipigilan ang paglakas ng puwersa ng ating mga ‘kagulong’ dahil may mga grupo na tulad ng PSAC na dapat nating pasalamatan sa ipinapakita nilang pagmamalasakit sa ating mga ‘kagulong’.

Samantala, inaprubahan naman ni P-BBM ang panukalang five-year extension ng isang automotive incentive program kung saan dalawang car manufacturers lamang ang lumahok.

Ang naturang anim na taong extension sa Automotive Resurgence Strategy (CARS) program ay tuluy-tuloy na magbibigay ng insentibo at suporta para sa manufacturers na tutugon sa specific requirements na may kaugnayan sa investment, production at technology development.

Actually, nakuha lang natin ang mga detalyeng ito matapos mag-anunsyo at makipagpulong kay P-BBM ng PSAC at iba pang grupo na binubuo ng mga lider ng pribadong kumpanya noong nakaraang Huwebes.

Nakakatuwa dahil ang CARS ay patuloy sa pagbibigay ng mga makabuluhang oportunidad, hindi lang sa trabaho kundi maging sa ibang pagkakakitaan at ikauunlad ng isang indibidwal na magpapatibay sa pundasyon ng ekonomiya ng bansa.

Ang 27 bilyong CARS program ay nakilala sa pamamagitan ng 2015 executive order (EO), na binibigyan ang mga manufacturers ng anim na taon para makagawa ng 200,000 units para sa kada-enrolled car types upang makakuha ng insentibo.

Sa dinami-rami ng kumpanya, tanging ang Toyota at Mitsubishi lamang ang lumahok sa programa dahil ang Toyota ang gumawa ng Vios compact car at ang Mitsubishi naman ang gumawa ng Mirage model.

Inaabangan ito ng maraming kumpanya dahil ang Toyota ay mayroon na lamang hanggang 2024 para matugunan ang commitments nito. Samantalang, ang binubuno namang deadline ng Mitsubishi ay hanggang ngayong taon na lamang.

Ginagawa ang ganitong programa upang ang bansa ay makasabay sa mga kakumpitensya dahil lubhang bumagsak ang ating car output at pinakamababa sa Southeast Asia ilang buwan bago nailabas ang EO.

Ipinamalas ng CARS kung gaano kaepektibo ang kahalagahan ng operasyon ng high-end manufacturing na talagang malaking tulong sa pagbuo ng mga trabaho, transfer technology at isinusulong ang global competitiveness at suportado ang domestic ang auto manufacturing.

Sa ngayon, kitang-kita na habang tumataas ang benta ng mga bagong sasakyan na umabot ng 21.8% nitong nagdaang buwan ng Abril, umabot naman ang month-on-month decline na 16.9% na naitala rin ng kaparehong buwan.

Kaya muli, salamat sa PSAC dahil sa suporta ninyo sa ating mga kababayang kailangan pang bumalanse araw-araw para mabuhay—'yan ang mga kapatid nating rider.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.