Motorcycle Taxi, 4 yrs. nang pinag-aaralan wala pa ring desisyon kung stop o go, grabe!!

ni Atty. Rodge Gutierrez @Mr. 1-Rider | June 20, 2023

Noong 2019 Congress ay pinayagan ang Department of Transportation (DOTr) na magsagawa ng motorcycle taxi pilot study upang matiyak kung ang motorcycle taxi ay magiging kapaki-pakinabang at ligtas sakaling gagawin itong legal.

Ngunit hanggang sa kasalukuyan ay nananatili na walang tiyak na patutunguhan ang isinasagawang pag-aaral kung dapat na bang gawing legal ang motorcycle taxi o hindi na payagan, matapos ang apat na taong pilot study.

Bago umano gawing legal ay kailangang makita ang aktuwal na katotohanan kung paano ang operasyon ng mga motorcycle taxi ngunit kailangan din na ipatupad ang pinakamataas na safety standards upang makatiyak na ligtas itong alternatibong transportasyon.

Noong Mayo 2019, tanging ang serbisyo lamang ng Angkas ang pinayagan na mag-operate sa ilalim ng six-month pilot program upang masubukan kung ligtas ang serbisyong kanilang ibinibigay para sa mga pasahero.

Marami ang naghintay at umasa ngunit ang programang ito ay pinalawig nang ilang ulit sa loob ng apat na taon at maging ang mga panukalang batas upang maging ganap na itong legal ay nananatiling nakabinbin at wala man lamang kahit pahapyaw na balita.

Ayon sa Land Transportation Franchising and Regulatory Board (LTFRB), ang Inter-Agency Technical Working Group on Motorcycle Taxi ay nagbigay ng pahayag na tumaas na umano ang demand mula sa mga pasahero ang humihiling na taasan na umano ang riding cap allocation sa motorcycle taxi.

Sa gitna ng isinasagawang pilot study, nasa 45,000 riders ang binigyan ng provisional authority na mag-operate bilang motorcycle taxi ngunit dahil sa iba’t ibang kadahilanan ay halos nasa 30% lamang umano ang sumasabak sa peak hours.

Mas lalong nag-init ang balita matapos na ang Philippine Competition Commission ay nagpalabas ng pahayag na suportado nila ang pagdadagdag ng rider cap kasabay ng paghiling na nais nilang payagan ang mas maraming kumpanya na lumahok at makipagsapalaran sa industriya.

Mas maraming player ay mas mabuti umano para sa pasahero at hayaan na lamang ang merkado ang magdikta kung saan hahantong ang serbisyo at dami ng motorsiklo na nais pumalaot sa paghahanapbuhay sa kalsada.

Ang hindi ko maintindihan kung bakit tila may ‘pressure’ na nakapaloob sa isinasagawang pilot study na ito para sa motorcycle taxi na hanggang ngayon ay hindi pa natatapos ngunit marami na ang kumikita rito.

Nagsisilbing anesthesia lamang ang pilot study na ito para sa ilang riders na nabigyan ng pabor ng sitwasyon para huwag mahuli at malayang makapaghanapbuhay ng legal kumpara sa napakaraming kolorum.

Kamakailan lamang ay naglabas ng anunsiyo ang LTFRB na wala umano silang inaaprubahang increase para madagdagan ang mga kalahok sa Motorcycle Taxi Pilot study.

Base sa datos ng MC Taxi TWG, noong Pebrero 14, 2020 ay pinal na ang listahan ng mga riders na pinapayagang mag-operate sa Metro Manila sa ilalim ng pilot study at sila ang Angkas na may 23,164 kalahok, JoyRide na may 15,000 at Move It na may 6,836.

Noong nakaraang linggo, iba na naman ang panawagan ng LTFRB, nais nilang ang mga habal-habal operators ay makilahok na rin sa pilot study para sa motorcycle taxi, partikular ang mga nasa lalawigan.

Ang Grab Philippines na nais palawakin ng 15,000 ang mga riders sa Metro Manila ay hindi makasingit sa isinasagawang pilot study at tila nasasangkot sa kung anu-anong kontrobersiya.

Hindi malayong may nagmamaneobra sa likod ng lahat ng ito upang lumawig pa ang pilot study, marahil ay sobra-sobra na ang apat na taon para magdesisyon dahil sa seguridad at kalagayan ng ating mga ‘kagulong’ ang nakapaloob dito.

Lalo ngayong sunud-sunod ang aksidente at higit na kaawa-awa sa huli ay ang mga pasahero na dapat nating bigyang prayoridad upang magkaroon sila ng sapat na proteksyon na naaantala dahil sa sobrang haba ng pilot study na ito.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

HPG, sabit sa nagkalat na mga kolorum na van at ilegal na terminal

ni Atty. Rodge Gutierrez @Mr. 1-Rider | June 17, 2023

Nagpakitang gilas ang mga elemento ng Police Regional Office (PRO) 13 (Caraga) nang magsagawa sila ng matinding operasyon hinggil sa ‘No Plate, No Travel’ policy sa buong rehiyon na nagresulta sa pagkakasakote sa 7,393.

Umabot sa kabuuang bilang ng citation tickets ang inisyu sa mga motorsiklo at 25 lamang ang naisyuhan ng ticket na driver ng four-wheeled vehicles na isinagawa lamang sa napakaikling panahon mula Mayo 31 hanggang Hunyo 9.

Ang layunin lamang ng operatiba ng PRO 13 ay upang maibsan ang insidente ng carnapping ng motorsiklo at mga krimeng kinasasangkutan ng masasamang elemento na gumagamit ng motorsiklo.

Tumataas din umano ang kaso ng nakawan ng motorsiklo sa naturang rehiyon, na karaniwang biktima ay ang mga nakaparadang motorsiklo sa tapat ng kanilang mga bahay na sa loob lamang ng ilang minuto ay naisasagawa na ang pagnanakaw.

Madalas na ginagawa ng mga kawatan at iba pang nais na magpalusot sa batas ang pagtanggal ng mismong plate number upang mahirapan ang mga operatiba sa pagtunton sa pagkakakilanlan ng tunay na nagmamay-ari sa motorsiklo.

Sa napakaikling panahong isinagawang operasyon ng PRO 13 ay umabot sa 102 motorsiklo ang nakumpiska ng mga tauhan ng Philippine National Police (PNP) at kasalukuyang naka-impound sa police station ng naturang rehiyon.

Dahil sa pangyayaring ito ay nabahala si PNP Chief Gen. Benjamin Acorda, Jr. at agad na nagbigay ng babala na kahit mga kaanib ng PNP ay hindi umano ligtas sa ipinatutupad na ‘No Plate, No Travel’ policy.

Alam kasi ng PNP chief na kalakaran noong mga nagdaang pamunuan ng PNP na maraming pulis ang gumagamit ng walang plakang sasakyan dahil karamihan ay recovered vehicle, ebidensya o sangkot sa krimen.

Katuwiran dati ng mga pulis na gumagamit ng mga sasakyang ebidensya ay mabubulok lamang umano sa impounding area ang mga ito kaya mas mabuti na umanong pakinabangan para hindi masira.

Ngunit ngayon ay matigas si Acorda, dahil nais niyang kahit pulis ay hindi ligtas sa paghihigpit at maigting na pagpapatupad ng ‘No Plate, No Travel’ policy na ipinatutupad ng Land Transportation Office (LTO) sa buong bansa.

Hindi nga naman exempted sa batas ang pagiging kaanib ng PNP para makaiwas sa parusa at ang hakbanging ito ni Acorda ay isang indikasyon na seryoso itong baguhin ang imahe ng PNP na sana lang ay magtuluy-tuloy para hindi puro iskandalo ang kanilang kinasasangkutan.

Sa ngayon ay pinagkakatiwalaan ni Acorda ang Highway Patrol Group (HPG), na sana ay magpakitang gilas din at seryosong makipagtulungan sa bagong pamunuan ng PNP na linisin ang buong kapulisan.

Bagama’t hindi naman lahat pero marami rin ang taga-HPG ang sangkot sa mga bumibiyaheng kolorum na van mula probinsya patungong Maynila at sila rin ang dahilan kung bakit santambak ang ilegal na terminal ng mga kolorum van na ito.

Ayon kay Acorda, sinumang kaanib ng PNP na mahuhuli sa mga paglabag sa batas ay mahaharap sa kasong administratibo at kriminal upang hindi na pamarisan — kaya sana unang linisin ang HPG dahil sila pala ang pinagkakatiwalaan.

Sa ilalim ng ‘No-registration, No-Travel’ policy na nakapaloob sa Joint Administrative Order na inisyu ng Department of Transportation (DOTr) at LTO noong 2015, pagmumultahin ng P10,000 ang mga may-ari ng sasakyang hindi rehistrado habang P1,000 naman para sa mga driver nito.

Kailangan namang magprisinta ng official receipt and certificate of registration (OR-CR) ang mga sasakyan na wala pang plaka at pagmumultahin ng P5,000 ang driver ng bagong sasakyan na walang maipakikitang OR-CR.

Dahil kasi sa madalas na kakulangan ng plaka at plastic ng driver’s license ay natutunan ng mga driver na puwede palang magpalusot at ang nasakoteng 7,393 ay isang rehiyon pa lamang, paano kung mag-o-operate rin ang PNP sa lahat ng rehiyon -- tiyak na katakut-takot ang madidiskubreng walang rehistro.

Ito ang katunayan sa ating hinihiling sa pamunuan ng LTO na isama na ang mga lumang motorsiklo sa three-year validity ng registration para maengganyo ang napakaraming walang rehistro sa mga probinsya na magparehistro.

Income generating na, nakatulong pa sa pagresolba sa krimen ng PNP.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Shower area sa trabaho, aprub sa mga empleyadong nagba-bike

ni Atty. Rodge Gutierrez @Mr. 1-Rider | June 15, 2023

Napakaganda ng ginawang paghikayat ng Department of Health (DOH) sa publiko na gumamit ng bisikleta dahil isa umano itong ‘sustainable, affordable at alternative’ na paraan ng transportasyon alinsunod sa pagdiriwang ng bansa sa World Bicycle Day.

Sa mga hindi nakakaalam, noong Abril 2018 ay idineklara ng United Nations General Assembly ang Hunyo 3 bilang World Bicycle Day bilang pagkilala sa ‘uniqueness, longevity at versatility' ng bisikleta na ginagamit na sa napakahabang panahon.

Mahigit dalawang siglo nang ginagamit ang bisikleta dahil bukod sa napakasimple, mura, maaasahan, malinis at higit sa lahat ay hindi nagbubuga ng usok na nakaaapekto sa kalusugan at kalikasan.

Kung paano natin isinusulong ang mabuting dulot ng motorsiklo sa bansa ay ganito rin natin sinusuportahan ang mga kababayan nating hindi kayang mabuhay nang walang bisikleta sa pang-araw-araw nilang pamumuhay.

Ang bisikleta ay bahagi rin ng ating sinusuportahan at itinuturing din nating ‘kagulong’ dahil kaisa natin sila sa sakripisyo sa gitna ng kalsada na kailangang bumabalanse muna bago umusad at sa isang pagkakamali ay may naghihintay ding kapahamakan.

Suportado natin ang hakbangin ng bagong pamunuan ng DOH na naglalayong itaas at palawakin ang kamalayan hinggil sa mabuting dulot at benepisyo ng pagbibisikleta kasabay ng paglulunsad nila ng kanilang Active Transport Playbook.

Seryoso ang kampanya ng DOH dahil sa naglaan pa ang ahensya ng P1,150,000 para sa promotion ng Active Transport initiative na ang layunin lamang ay isulong ang pagbibisikleta at paglalakad bilang mabisang paraan upang maibsan ang paglaganap ng mga non-communicable disease.

Bilang Unang Representante ng 1-Rider Partylist ay ibang aspeto natin tinitingnan ang bisikleta dahil nakikita rin natin itong solusyon sa pagluluwag ng daloy ng trapiko, bagama’t halos lahat ay marunong magbisikleta ay napipigilan silang gumamit nito dahil

sa hindi tamang pagtrato.

Sa ibang bansa, tulad sa Taiwan, bawat sentro ng kalye ay may mga nakaparadang bisikleta na huhulugan lamang ng coins ay maaari nang gamitin ng kahit sino at maaaring iwanan kung saan lugar pupunta dahil meron ding paradahan ng bisikleta sa bawat destinasyon.

Hindi rin basehan kung ano ang suot ng nais na magbisikleta, dahil kahit nakasuot ng tuxedo o nakasuot ng gown ay nakikitang nagbibisikleta sa Taiwan at normal itong tanawin sa kanilang siyudad na naglalakihan ang mga establisimyento.

Sa Pilipinas, napakarami ang gumagamit ng bisikleta at mga nais pang gumamit ngunit umiiral ang ‘disadvantage’ kung sasakay ng bisikleta dahil sa hindi gaanong napagtutuunan ng pansin ang pagbibisikleta sa bansa.

Una, kung ang isang nag-oopisina ay gagamit ng bisikleta at nakasuot ng barong o long sleeves na may necktie ay tiyak na manggigitata na ito sa pawis at malamang ay marumi na ang suot na damit bago dumating sa opisina.

Marahil, panahon na para magpasa ng panukalang batas na mag-oobliga sa mga opisina, pabrika o kahit saan mang trabaho na maglagay ng mga ilang pinto ng shower area depende sa laki ng kumpanya upang may paliliguan ang mga manggagawa na pawisan sa paggamit ng bisikleta bago magtrabaho.

Napakarami ng benepisyo ng shower area sa isang opisina o pabrika — lahat magbibisikleta na papasok sa opisina at babaunin na lamang ang uniporme dahil bukod sa nakapag-exercise na, nakatipid pa at hindi na kailangang magdala ng kotse.

Kung ligtas, maayos ang paradahan ng bisikleta at malinis ang paliguan ay hindi malayong marami sa ating mga kababayan ang gagamit na ng bisikleta na bukod sa luluwag ang mga kalye ay makatutulong sa kalusugan ng marami nating kababayan.

Malaki ang pakinabang ng bisikleta, kaya lamang ay hindi natin napagtutuunan ng pansin ngunit kung mabibigyan sila ng sapat na pagkalinga, ligtas na daanan at tamang suporta ay mas marami ang pipiliing magbisikleta na lamang kaysa mabuwisit dahil sa

inip sa bigat ng daloy ng trapiko kung kotse ang minamaneho.

Sa bisikleta, healthy na, libre pa!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.