Lolong namaril ng taxi driver, pinuri pa sa social media

ni Atty. Rodge Gutierrez @Mr. 1-Rider | June 27, 2023

Bagama’t hindi tamang pamarisan ang ginawa ng isang senior citizen na bigla na lamang binaril ang isang taxi driver ay tila umani pa ito ng papuri sa mga netizen na karaniwang biktima rin umano nang pagtanggi ng mga taxi driver.

Tila nagkakaroon na ng taliwas na pangangatwiran ang marami sa ating mga kababayan dahil sa ramdam na ang bigat na dinadala sa kanilang mga dibdib laban sa mga abusadong taxi driver wala namang magawa ang ating commuters kung hindi ang magpasensya.

Napakatagal na kasi ng mga reklamo laban sa mga abusadong taxi driver ngunit wala namang permanenteng solusyon ang Land Transportation Franchising and Regulatory Board (LTFRB) at iba pang ahensya ng pamahalaan hinggil dito.

Hindi lang kasi mga commuters ang apektado rito kundi maging ang mga matitinong taxi driver na ang hangad lang ay maghanapbuhay nang tama at sumusunod sa batas dahil nadadamay sila sa napakapangit na imahe ng taxi driver sa bansa.

Pangkaraniwan sa mga taxi driver na tatanungin muna ang pasahero kung saan pupunta habang nakababa lamang ng bahagya ang bintana ng sasakyan at kapag ayaw nila ang pupuntahan ay bigla na lang papaharurutin ang kanilang taxi ng walang sabi-sabi.

Madalas ay sira ang metro ng mga tiwaling taxi driver, kasunod nito ay mag-aalok na ng kontrata at walang magawa ang pasaherong nagmamadali kundi ang pumayag at madalas ay hindi pa nasusuklian binayad.

“Pasensiya na po kakain muna ako o kaya ay pagarahe na po ako,” ito ang ilan sa karaniwang dahilan ng mga taxi driver na namimili ng pasahero at naghihintay lang ng malaking alok mula sa pasahero lalo na sa panahon ng rush hour o kaya ay umuulan.

May mga taxi driver pa na kapag sumakay ang isang pasahero ay panay ang palatak at pag-iling-iling dahil bumper to bumper ang daloy ng trapiko at tila sinisisi pa ang pasahero kung bakit sumakay-sakay ito.

Ang mga problemang ito ng mga taxi driver ay araw-araw na nangyayari habang maraming mga kababayan nating senior citizen o persons with disability (PWD) na bago makasakay ay kailangang magbayad muna sa mga ‘barker’ na tumatayong ‘middleman’ na siyang nakikipag-usap sa mga taxi driver.

Marahil, ito ang lumukob sa katauhan ng isang 64-anyos na lalaki na bigla na lang nagdilim ang paningin at agad na binaril ang isang taxi driver na tumanggi siyang ihatid sa Cubao, Quezon City noong nakaraang Miyerkules ng hapon.

Mabuti na lamang at hindi napuruhan ang naturang tsuper ng taxi at kasalukuyang ginagamot dahil sa tinamo niyang tama ng baril ngunit sa halip na makakuha ng simpatya ay tila siya pa ang sinisisi kung bakit nangyari ang naturang pamamaril.

Heto ngayon at nanawagan ang Philippine National Police (PNP) na maging mahinahon ang mga may-ari ng baril. Subalit, sa rami ng kasalanan ng mga taxi driver na nagsama-sama na at tulad n’yan na merong isang sumabog sa galit, posibleng mangyari ito sa mga susunod na pagkakataon na huwag naman sana.

Santambak naman ang operatiba ng Highway Patrol Group (PNP-HPG), Land Transportation Office (LTO) at iba pa, dapat ay araw-araw na seryosong hinuhuli ang mga tiwaling tsuper na kundi man kayang ubusin dahil sa sobrang dami ay mabawasan man lang.

Sa bansang Taiwan, may isang tourist guide ang nagsasabi sa mikropono na mababait umano ang mga Pilipino maliban lang sa mga taxi driver na puro manloloko — damay lahat pati matitino.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Neuro-Psychiatric Exam sa mga drayber para safe sa biyahe, pati pasahero

ni Atty. Rodge Gutierrez @Mr. 1-Rider | June 24, 2023

Ang pagsasagawa ng Neuro-Psychiatric Examination test ay upang matiyak ang mental stability, adaptability at psychological functioning ng isang aplikante na nais pumasok sa uniformed services ng gobyerno.

Layon ng eksaminasyon ay upang masala ang mga aplikante kung karapat-dapat silang matanggap bilang kaanib ng Philippine National Police (PNP), Bureau of Fire Protection (BFP), Bureau of Jail Management and Penology (BJMP), Bureau of Corrections (BuCor) at lahat ng sangay ng Armed Forces of the Philippines (AFP) at katunayan nasa 25% lamang ang pumapasa sa naturang eksaminasyon.

Medyo may kahigpitan ang Neuro-Psychiatric Exam sa mga nais pumasok sa government service dahil kailangang dumaan sa written exam at personal interview bago pumasa.

Hindi lang naman sa government service may Neuro-Psychiatric Exam dahil maging ang mga ordinaryong security guard ay kinakailangang dumaan dito bago payagang mag-duty at humawak ng baril.

Marahil ang prosesong ito ay dapat gawing pangunahing requirements na rin sa pagkuha ng professional driver’s license, ngunit mas himaying mabuti ang mga tanong na sasapat lamang sa mga pangangailangan na dapat matiyak sa nais kumuha ng professional driver’s license.

Kumbaga hindi ito gagawing kasing higpit at kasing mahal ng Neuro-Psychiatric Exam para sa pumapasok sa government service dahil ang mahalaga lang ay makatiyak ang pamahalaan na katiwa-tiwala ang mga pagkakalooban ng professional driver’s license.

Hindi natin naisip ang ideyang ito na nais nating pahirapan ang mga gustong magkaroon ng professional driver’s license bagkus nais nating matiyak na karapat-dapat ang mga ito na hindi sila gagawa ng kahit anong kaaliwaswasan sa pagtupad ng kanilang propesyon.

Tulad na lamang ng kinasangkutan ng isang taxi driver na ngayon ay iniimbestigahan ng Land Transportation Office (LTO) dahil sa ginawa nitong kahalayan sa loob mismo ng kanyang minamaneho katabi ang kanyang biktimang pasahero.

Nagsampa kasi ng reklamo ang isang pasaherong transwoman na sumakay ng taxi at pag-upo nito sa passenger side sa tabi ng drayber ay napansin nitong nanonood ng porn ang driver sa kanyang cellphone habang nagmamaneho sa isang lugar sa Iloilo City.

Mabuti na lamang at buo ang loob ng pasahero at nagawa nitong i-record ang nangyayari gamit ang kanyang cellphone na hindi namamalayan ng drayber at nakunan din nang ilabas ng driver ang kanyang ari at harap-harapang nilalaro sa mismong pasahero.

Hindi kumikibo ang pasahero at patuloy lamang sa pagre-record habang nagsasarili ang driver na nanonood ng X-rated film ngunit hindi na nakontrol ng driver ang sarili at bigla na lamang umanong kinuha ang kamay ng pasahero at pilit na pinahahawakan ang nakalabas niyang ari.

Kahanga-hanga ang ipinakitang tapang ng pasahero dahil nagawa niyang tabigin ang driver at nagawa nitong makalabas ng naturang taxi at agad na nagtatakbo palayo.

Ayon sa pasahero, galing lang umano siya sa pag-aasikaso ng ilan sa kanyang dokumento kabilang na ang kanyang passport bago ito sumakay sa naturang taxi sa kahabaan ng Quezon St. ng siyudad na nabanggit.

Kasunod nito ay ini-upload ng biktima (na sadyang hindi pinangalanan) sa social media ang nai-record niyang pangyayari upang kumalat umano ang naganap na kahalayan at hindi na muling makapangbiktima pa ang pinaghahanap na driver.

Samantala, tiniyak ng Iloilo City Public Safety and Transportation Management Office (PSTMO) na natukoy na nila ang address ng driver na nasa edad 22 hanggang 25 pero agad itong tumakas matapos na mag-viral ang nasabing video ngunit, ayon sa mga awtoridad, hindi umano sila titigil hangga’t hindi ito naaaresto.

Ito ang sinasabi kong dapat isailalim sa Neuro-Psychiatric Exam ang isang professional driver dahil may panahong nasa kamay nila ang kaligtasan ng kanilang mga pasahero at kung hindi normal ang takbo ng kanilang pag-iisip ay posibleng sila pa mismo ang magsadlak sa mga ito sa kapahamakan.

Sana lang ay maaresto at managot ang driver sa ginawa niyang kaso. Higit sa lahat ay bawiin ng LTO ang lisensya nito at habang buhay nang huwag bigyan ng professional driver’s license para hindi na maulit pa ang ganitong pangyayari.

Wala kasing ibang basehan sa pagkuha ng professional driver’s license, basta kayang magmaneho kahit hindi matukoy kung sex maniac o mamamatay-tao ay kuwalipikado.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Malalang trapik, sanhi ng mga pasaway na motorista at abusadong negosyante

ni Atty. Rodge Gutierrez @Mr. 1-Rider | June 22, 2023

Napakaraming sinisisi, napakaraming itinuturong dahilan sa pagsisikip ng daloy ng trapiko ngunit kung iisa-isahin nating himayin ang mga dahilan ay hindi magkakasya ang espasyong ito para matukoy ang tunay na sanhi kung bakit nangyayari ang lahat.

Unang problema ay ang kondisyon ng mga kalsada mismo na hindi maayos ang pagkakagawa o kaya ay ang walang humpay na pagkukumpuni sa mga sirang bahagi na nagdudulot ng pagsisikip at pagbagal sa daloy ng trapiko.

Maraming lansangan din ang nakahambalang ang mga maliliit na negosyo tulad ng tindahan, vulcanizing shop at maliliit na talyer na ginagawang parking area ang ilang bahagi ng kalsada at doon inaayos ang mga sasakyan ng nagpapagawa.

Karamihan sa ating mga kababayan ay mayroong sasakyan na higit pa sa isa, ang wala namang sariling garahe at sinasakop nila ang kalahating linya ng mga kalye sa kanilang lugar at iyon ang ginagawa nilang paradahan.

Hindi tumitigil ang ating pamahalaan kung paano lilinisin ang mga kalye para lumuwag at bumilis ang daloy ng trapiko ngunit marami pa rin ang hirap talagang madaanan dahil pabalik-balik lang ang mga pasaway.

Ilan sa mga hindi maayos na madaanan ay ang bahagi ng Baclaran at Divisoria dahil sa maraming lansangan ang paulit-ulit na nagsasagawa ng clearing operations ngunit sadyang hanggang sa kasalukuyan ay problema pa rin ito dahil sa rami ng nais na maghanapbuhay.

Ang kahabaan ng EDSA na hindi natatapos ang mga naiisip na paraan para magamit ng higit pa kaysa sa ating inaasahan kaya humantong na tayo sa paglalagay ng carousel lane para hindi na nagkakarera ang mga pampasaherong bus.

Ngunit, nakakagulat na mahigit umano sa 300 motorista ang naisyuhan ng traffic violation ticket sa loob lamang ng 10 araw dahil sa ilegal na paggamit sa bus carousel lane sa EDSA, ayon sa Metropolitan Manila Development Authority (MMDA).

Sa pahayag ng ahensya, isa umano sa sakit nila ng ulo ay ang mga pasaway na nagmamaneho ng motorsiklo dahil kahit alam nilang bawal at delikado ay sumisige pa rin, kaya tuloy nadadamay ang ibang matitino nating mga ‘kagulong’.

Sa inilabas na datos ng MMDA, mula Hunyo 5 hanggang Hunyo 15 ng taong kasalukuyan ay mahigit sa 300 motorista na umano ang kanilang nahuhuli na humaharurot sa kahabaan ng carousel lane at naisyuhan ng violation ticket na may multang P1,000.

Ayon sa naturang ahensya, bukod umano sa pampasaherong bus ay nakalaan ang EDSA bus carousel lane para sa mga sasakyan ng gobyerno na tutugon sa mga emergency situation at kumpleto ito ng CCTV camera sa buong kahabaan para ma-monitor ang sitwasyon at madaling masakote ang mga lumalabag.

Isa pa sa nagpapabagal ng pag-arangkada ng mga sasakyan ay patuloy na pagdami ng mga namamalimos at nag-aalok ng kung anu-anong klase ng paglilinis kapalit lang ng barya.

Dito medyo hati ang opinyon ng mga tao kung dapat bang magbigay o hindi sa mga namamalimos lalo pa kung papalapit na ang Pasko dahil ang katuwiran ng iba ay mag-share daw ng blessings.

Subalit, naninindigan ang Department of Social Welfare and Development (DSWD) na dapat ay hindi umano binibigyan ang mga batang nagsisiakyat sa mga jeepney dahil labag ito sa batas.

Pero alam n’yo ba na ang umiiral na batas hinggil dito ay ang Presidential Decree No. 1563 o ang Establishing an integrated system for the control and eradication of mendicancy, providing penalties, appropriating funds therefore, and for other purposes.

Mas kilala ito sa tawag na anti-mendicancy law na may piyansang P20.00 lamang. Tama, beinte pesos lang ang piyansa kapag lumabag ka at naaresto sa kasong panlilimos.

Ako mismo, guilty ako sa problemang ito dahil madalas ay nagbibigay talaga ako sa namamalimos at nawawala sa isip ko na may umiiral na batas dahil nangingibabaw ang aking awa.

Ngayon sabihin n’yo sa akin, kung paano tayo magsisimula na mapasunod ang mga pasaway na hindi takot sa multa at mga namamalimos na hindi takot sa piyansa -- subukan natin!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.