Phaseout sa lumang jeep, mas lumakas sa pagkamatay ng Gr. 10 student

ni Atty. Rodge Gutierrez @Mr. 1-Rider | July 11, 2023

Nakakuha ng kakampi ang Department of Transportation (DOTr) sa panig ng mga netizen na tuluyan nang ipatupad ang napipintong phaseout sa tradisyunal na jeepney makaraang masawi ang isang Grade 10 student sa Dasmariñas, Cavite.

Dati-rati ay kinakampihan ng publiko na huwag tuluyang ma-phaseout ang tradisyunal na jeepney dahil sa umano’y cultural relevance nito sa Pilipinas bukod pa sa kabuhayan ito ng napakaraming pamilya na sa pamamasada lamang umaasa.

Ngunit dahil sa pagkamatay ng isang estudyante ay nagluksa ang napakarami nitong kaklase, mga kaanak, partikular ang mga magulang ng estudyante na sa isang iglap ay nawala ang mga pangarap sa buhay sanhi ng wala sa oras na pagkasawi nito dahil sa isang tradisyunal na jeepney.

Kung tutuusin, maraming insidente na naman ang naganap na kinasasangkutan ng tradisyunal na jeepney ngunit kakaiba ang pinakahuling ito dahil nakunan ito ng CCTV at buong-buong pangyayari at napanood na social media.

Kitang-kita kung paanong ang isang tradisyunal na jeepney na galing sa ikatlong palapag ng Hypermarket na kargado ng buko ang pababang dumire-diretso at winasak ang barandilya sa center island ng Congressional Road, Dasmariñas, Cavite.

Nagtuluy-tuoy pa rin ang naturang jeepney at sinalpok ang noon ay nakatayo lamang na 16-anyos na estudyante na naging sanhi ng pagkamatay nito at ikinasugat ng isa pa.

Nasakote naman ang driver ng tradisyunal na jeepney at ngayon ay nakadetine sa Dasmariñas PNP detention cell at doon ay ipinagtapat ng driver na ilang ulit niyang inaapakan ang preno ngunit hindi na ito gumana kaya bumilis pa pababa ang takbo ng naturang jeepney.

Tila bombang sumabog sa social media ang pahayag na ito ng driver kasabay nang pagkalat ng video ng buong pangyayari na dumurog sa puso ng maraming mag-aaral at magulang sa iba’t ibang bahagi ng bansa.

Kung tutuusin wala namang kasalanan ang iba pa nating mga driver na nagmamaneho ng tradisyunal na jeepney sa iba’t ibang lugar ngunit, tila nagsilbing mitsa ang kaganapang ito para mapansin na panahon na talagang dapat ipatupad ang phaseout ng mga lumang dyip.

Muling nabuhay ang mga negatibong komento hinggil sa tradisyunal na jeepney tulad ng walang hand break, walang seat belt at ngayon ay dumarami pa ang nakasubsob na disenyo ng jeepney na labis na tinututulan ng mga pasahero.

Nauuso rin ngayon ang mga pampasaherong jeepney na maliliit ang gulong sa harapan at medyo nakaangat ang likurang bahagi upang madaling magsiksikan papasok ang mga nakaupong pasahero na ayaw umusog kapag biglang inapakan ng driver ang preno.

Kasabay nito, muling naglabas ng anunsyo ang DOTr na nananatili umano sa kanilang prayoridad ang pagsulong ng modernisasyon sa hanay ng pampublikong sasakyan, partikular sa tradisyunal na jeepney.

Kamakailan ay nagsagawa ng transport forum, kung saan ipinakita ng DOTr ang iba’t ibang makabagong disenyo ng mga modern Public Utility Vehicle (PUV) kabilang na ang modern jeep, modified jeepney, at modern bus.

Kabilang sa mga makabagong disenyo ang iba’t ibang equipment at safety features ng mga modern PUV gaya ng GPS, CCTV, libreng Wi-Fi, side entrance, air-conditioning, at sapat na espasyo para sa mas maginhawang pagsakay ng mga pasahero.

Batid naman nating hanggang Disyembre 31 pa ang muling bakbakan sa pagpapatupad ng phaseout at marami pa ring may-ari ng tradisyunal na jeepney ang nagmamatigas na ayaw pa ring mawala ang tradisyunal na jeepney sa kabila ng mga dayalogo at kasunduan.

Kung ganoon, ngayon pa lamang ay dapat ayusin na ang mga tumatakbo pang tradisyunal na jeepney, gandahan, tiyaking malakas ang preno at huwag liitan ang gulong sa unahan para hindi magalit ang pasahero, at para maipakitang karapat-dapat pang manatili ang tradisyunal na jeepney.

Kasi kung ikukumpara talaga sa mga modernong iniaalok ng DOTr ang tradisyunal na jeepney ay higit na magaganda, maayos at posibleng hindi na sila mahirapan sa phaseout dahil kakampi nila ang pasahero.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Rider, buwis-buhay sa mga aso sa kalsada

ni Atty. Rodge Gutierrez @Mr. 1-Rider | July 8, 2023

Isa sa malaking problema ng ating mga ‘kagulong’ sa gitna ng pagmamaneho ay ang biglaang pagtawid ng aso sa kalye.

Hindi na mabilang ang buhay na nawala dahil lamang sa kapabayaan o kawalan ng opisyal na panuntunan hinggil sa aso na masasangkot sa aksidente.

Mataas din ang insidente na ang aso sa kalye ay nasasagasaan ng rumaragasang kotse o truck na ang resulta, karaniwang namamatay ang nasabing hayop. Ngunit ibang-iba sa kaso lulan ng motorsiklo dahil karaniwan ay ang driver o angkas o pareho ang nasasawi.

Siyempre nakalulungkot na may nasasagasaang aso, lalo na kung namatay dahil sa itinuturing nating pamilya ang hayop na tinaguriang man’s best friend pero napakarami kasi ng mga asong nasa kalye na pinababayaan lamang ng may-ari.

Lalo na sa mga probinsya na hindi masyadong busy ang mga kalsada ay karaniwang makikita ang mga aso na natutulog o naglalakad sa kalsada at kusa namang tumatabi sa tuwing may paparating na sasakyan.

Ang problema, hindi araw-araw ay nakahiga lamang ang aso sa kalye dahil may pagkakataong nakikipaglaro sila sa kapwa aso at dito nagkakaroon ng pagkakataong mataranta ang nagmamaneho ng motorsiklo kapag biglang tumakbo o tumawid ang mga ito.

Hindi natin pinupuntirya ang mga aso dahil hindi naman nakakapag-isip ang mga ito para malaman ang susunod na mangyayari kung magtatatakbo sila sa kalye. Ang lahat nang ito ay responsibilidad ng may-ari ng aso na madalas ay galit pa sa mga nakamotorsiklo na nakabangga sa mahal nilang alaga.

Ang masaklap kapag ang ating mga ‘kagulong’ ang nasawi dahil sa pakalat-kalat na aso, madalas ay hindi na matunton o ayaw nang umamin ng may-ari ng aso. Karaniwan ay nagtatakipan pa ang mga magkakapitbahay at paulit-ulit itong nangyayari sa bansa.

Isa sa nasawi dahil dito ay ang 49-anyos na lalaki, residente ng Bgy. New Agutaya, San Vicente nang binabaybay nito pauwi ng bahay ang kahabaan ng Bgy. San Isidro, lulan ng kanyang motorsiklo mula sa Bgy. Alimanguan ng nasabi ring lugar.

Mula sa kung saan ay biglang tumawid ang isang aso na naging sanhi ng kanyang pagsemplang. Agad itong isinugod sa San Vicente District Hospital ngunit idineklarang dead-on-arrival dahil sa tinamo nitong mga sugat, pagkabali ng buto at pagkabasag ng bungo.

Nasawi naman ang 41-anyos na misis na residente ng P.I. Village, Biliran province at sugatan ang kanyang mister nang bigla rin silang sumemplang sa kahabaan ng Larrazabal Village ng nasabing lugar dahil sa pag-iwas sa aso.

Ganito rin ang nangyari sa Tabuk City, Kalinga, na tumilapon ang isang babaeng angkas ng kanyang mister na sumalpok sa isang aso sa kahabaan ng national road ng Bgy. Lucog na naging sanhi ng pagkamatay ng misis at kritikal naman ang nagmamanehong mister.

Sa kahabaan ng national highway ng Sitio Cabacungan, Bgy. Kalubihan, Mandaue City, isang 23-anyos din ang namatay at sugatan ang boyfriend nito habang lulan ng motorsiklo nang biglang umiwas din sa aso.

Napakarami pa ng mga insidente na kinasasangkutan ng aso na naging sanhi ng kamatayan ng napakaraming rider. Marahil, panahon na para mahinto ang hindi na mabilang ng mga nasawi dahil lamang sa kapabayaan ng ilan nating kababayan.

Hindi rin puwedeng wala man lamang mananagot sa naging kamatayan ng rider na sa simula pa ng pagbiyahe nito ay labis ang pag-iingat, pero dahil sa aso na nakakalat sa kalye aksidente ang kinahahantungan.

Sana, umaksyon ang mga lokal na pamahalaan patungkol dito at maging responsable rin naman ang mga may-ari ng aso upang hindi na ito makadagdag sa nangyayaring aksidente na kumukuha sa buhay ng ating mga ‘kagulong’.

May mga umiiral na batas na hinggil sa paghuli sa pagala-galang aso -- ang kailangan na lamang ay ipatupad ito nang maayos.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

‘Pinas, pasok sa may pinakamalalang trapik sa buong mundo

ni Atty. Rodge Gutierrez @Mr. 1-Rider | July 6, 2023

‘Sala sa init, sala sa lamig’, ito ang kinakaharap nating sitwasyon kung pag-unlad ang pag-uusapan dahil sa patuloy na gumaganda ang merkado sa bentahan ng sasakyan sa bansa na hindi natin matukoy kung makabubuti o makasasama.

Kapansin-pansin na araw-araw ay may mga bagong modelo ng sasakyan ang naglalabasan sa lansangan dahil sa napakabilis na prosesong pinaiiral ng mga car distributor na bukod sa mababang down payment ay napakababa pa ng buwanang hulog.

Kaya ang resulta, mas mabilis ang pagdami ng sasakyan kumpara sa naiisip na solusyon ng pamahalaan kung paano palalaparin ang mga kalsada upang hindi magkaroon ng pagsisikip ng daloy ng trapiko, lalo na sa Metro Manila.

Sa mahabang panahon ay hirap na hirap ang mga kababayan natin na nasa bahagi ng South area ng National Capital Region (NCR) bago makatawid sa bahagi ng North ngunit gagaan ang sitwasyon sa mga lugar na ito sa oras na matapos ang North-South Commuter Railway (NSCR).

Kasalukuyan nang sinisimulan ang konstruksyon ng massive railway project sa Luzon na NSCR. Isa itong 147-kilometrong haba ng urban rail transit na magkokonekta sa New Clark City patungong Calamba na planong lagyan ng 37 istasyon.

Ayon sa Department of Transportation (DOTr) tatahakin ng NSCR ang kahabaan ng Central Luzon, NCR at CALABARZON na gagawin na lamang dalawang oras ang biyahe mula sa apat na oras at milyong pasahero umano ang mabibigyan ng serbisyo araw-araw.

Pinondohan ng Japan International Cooperation Agency at Asian Development Bank ang NSCR na tinatayang aabot sa P873 bilyon ang halaga na itinuturing na pinakamahal na railway transportation projects sa kasaysayan ng Pilipinas.

Kung bukas na bubuksan ang NSCR ay malaking tulong ito sa kasalukuyang problema natin sa pagsisikip ng daloy ng trapiko ngunit tinatayang matatapos ang kabuuan ng proyekto sa 2029 kaya malaking problema pa ang ating kakaharapin habang hinihintay natin itong makumpleto sa loob ng anim na taon.

Sa pinakahuling ulat ng DOTr, ang Metro Manila Subway ay kasabay na bubuksan ng NSCR, kaya napakalaking pagbabago ang ating mararanasan ngunit hangga’t hindi pa natatapos ang dalawang mass transport system na ito ay hindi natin matiyak ang ating kakaharapin.

Patuloy kasi ang paglakas ng bentahan ng kotse, trak at motorsiklo na buong giting na ipinagmamalaki ng Chamber of Automotive Manufacturers of the Philippines, Inc. (CAMPI) na umabot na sa 32% ang pagtaas ng kanilang benta kumpara sa 352,596 noong 2022.

Base naman sa datos ng Motorcycle Development Program Participants Association (MDPPA) ay umabot sa 2.3 milyong motorsiklo ang nairehistro sa Land Transportation Office (LTO) at tumaas din ang benta ng 16.7% ngayong 2023.

Kung magpapatuloy ang ganyan karaming sasakyan ang naibebenta ng mga ahente taun-taon ay tiyak na aapaw ang ating mga kalye dahil tiyak na mas tataas pa ang sale nito dahil sa paganda nang paganda at pabago nang pabago ang istilo ng bentahan.

Ang masaklap, sa loob ng hinihintay nating anim na taon bago mag-2029 ay tiyak na mapapalitan na ang kasalukuyang nakatalaga sa ating mga ahensya na siyang namamahala sa trapiko ngunit ang mga kalsada ay hindi naman nadaragdagan.

Alam n’yo bang pinag-aaralan na ng DOTr kung paanong pati ang mga sasakyang tulad ng electric scooter, electric bike, skateboard at iba pang may gulong na puwedeng dumaan sa bike lane ay payagan na rin para makatulong sa mass transport.

Hindi pa ito aprubado ngunit umaabot na tayo sa ganitong kaisipan dahil sa napakalaking problema natin sa daloy ng trapiko na ayon sa ulat ng Serbia-based research firm na Numbeo -- ang Pilipinas ay nananatiling pang-siyam sa buong mundo na may pinakamalalang sitwasyon sa trapiko simula pa noong 2015.

Ngayon, nakakatulong ba sa ekonomiya ang malakas na bentahan ng sasakyan sa bansa o baka sa kangkungan tayo pulutin dahil bilyun-bilyong piso rin ang nalulugi sa atin sanhi ng sobrang traffic. Ano sa tingin n’yo?

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.