Ika-109 anibersaryo ng Iglesia Ni Cristo

ni Atty. Rodge Gutierrez @Mr. 1-Rider | July 27, 2023

Ngayong araw ay ipinagdiriwang natin ang ika-109 anibersaryo ng Iglesia Ni Cristo at ang lahat ng kaanib nito sa buong mundo ay ginugunita ang ipinangaral ng Huling Sugo sa huling araw na si Ka Felix Y. Manalo simula nang ito ay maitala sa Pilipinas noong Hulyo 27, 1914.

Ang anibersaryong ito ng INC ay ginugunita rin bilang isang working holiday at halos lahat ng kaanib sa buong mundo ay ipinagdiriwang ang araw ng pagkakatatag ng INC na ngayon ay pinamamahalaan ni Kapatid na Eduardo V. Manalo.

Tahimik, walang publisidad ngunit libu-libong kababayan natin ang nadalhan nila ng tulong sa iba’t ibang bayan sa mga lalawigan sa bansa partikular ang mga nawalan ng kabuhayan sa bagyo, pagbaha at kahit noong kasagsagan ng pandemya.

Noong mga nagdaang anibersaryo ay nagsagawa sila ng ‘Aid To Humanity’ na inilunsad worldwide at napakaraming mahihirap na bansa ang kanilang natulungan sa kasagsagan ng pandemya at tuluy-tuloy pa rin hanggang sa kasalukuyan.

Sa ngayon ay wala umanong malaking selebrasyon na isasagawa dahil ang pondo na dapat dito ay ilalaan umano sa nakatakda pang mga lingap sa mamamayan sa mga darating na panahon.

Noong nagsisimula ang INC ay napakaraming pagsubok ang sinuong ni Ka Felix partikular ang maraming relihiyon na tumutuligsa sa kanyang pinangangaral ngunit dahil sa nakagabay palagi ang Panginoon ay hindi ito pinabayaan hanggang sa magtuluy-tuloy nang lumaganap ang INC.

Ang INC ay nagsimula sa pinaka-una nitong lokal sa kapisanan ng Punta, Sta. Ana, Manila na mula roon ay hindi na napigilan ang pagdami sa iba’t ibang bahagi ng Kamaynilaan na lumaganap pa sa mga karatig-bayan hanggang tumawid na sa Visayas at Mindanao.

Pumanaw si Ka Felix noong Abril 1963 ngunit matagumpay na nitong naitatag ang ecclesiastical districts sa mahigit kalahati ng mga probinsya sa buong bansa at naisaayos na ang kalagayang pananampalataya ng lahat ng kaanib.

Dahil dito, pinangunahan ni Ka Eraño G. Manalo ang INC noong 1968 na siyang tumayong Executive Minister, at matagumpay nitong naitatag ang unang dalawang kongregasyon sa labas ng Pilipinas — ito ang Honolulu, Hawaii at San Francisco, California sa Estados Unidos.

Mula noon hanggang bago matapos ang dekada ‘70, ay lalo pang lumaganap ang INC patungo sa kontinente ng North America hanggang sa ibang estado at teritoryo tulad ng New York at Guam noong 1969, at Canada noong 1971.

Bago matapos ang dekada ‘ 80 ay narating na ng INC ang Europe, Battersea, Australia, buong Asia hanggang sa mga bansa ng Scandinavian at mga karatig bansa hanggang sa halos buong mundo na, bago pa man sumakabilang-buhay si Ka Eraño noong Agosto 31, 2009.

Dito nagsimula ang pagkakatalaga kay Executive Minister, Ka Eduardo na siya namang nagpatuloy sa mga mabubuting gawain ng INC na mapalaganap ang salita ng Diyos at patuloy din ang pagdami ng mga kaanib hanggang sa kasalukuyan.

Napakalayo na nang narating ng INC at hindi na natin basta-basta maisasantabi ang kanilang tagumpay na umukit na ng labis sa ating kasaysayan lalo pa at ipinagmamalaki ito ng maraming Pilipino sa ibang bansa kahit hindi kaanib ng INC dahil sa Pilipinas ito nagmula.

Sa buong mundo ay napakarami na rin ng mga ibang lahi na kaanib na ng INC sa kasalukuyan at maging ang mga ministro sa ibang bansa ay nagmula na sa iba’t ibang lahi na patunay na patuloy pa rin ang paglaganap ng INC sa maraming bahagi ng mundo.

Napakaganda ng hangarin ng INC dahil nais nilang mailigtas ang kaluluwa ng maraming tao na masadlak sa dagat-dagatang apoy at tanging ang salita lamang ng Panginoon ang daan para sa kaligtasan ng buong sanlibutan.

Muli, kay Ka Eduardo at sa milyun-milyong kaanib ng INC, buong puso tayong bumabati at ang lahat ng Pilipino ng maligaya at matagumpay na ika-109 anibersaryo sa buong Iglesia Ni Cristo.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Bilyong halaga ng MRT, nabubulok lang

ni Atty. Rodge Gutierrez @Mr. 1-Rider | July 25, 2023

Ngayong nakararanas tayo ng tigil-pasada at inaasahang sa mga darating pang pagbabago hinggil sa transportasyon sa bansa ay tiyak na may mga kilos-protesta pa tayong kakaharapin at dito higit na mabibigyang pansin ang serbisyo ng motorcycle taxi, Metro Rail Transit (MRT) at Light Rail Transit (LRT).

Dahil napag-uusapan ang alternatibong solusyon sa kakulangan ng masasakyan — alam n’yo bang may 48 Dalian trains na binili ang Department of Transportation (DOTr) sa halagang P3.75 bilyon upang madagdagan ang kapasidad ng MRT-3 at makapagbigay sana ng mas maayos na serbisyo.

Ngunit ang napakaraming bagong train ay hindi naman ginagamit at nakatengga lamang sa MRT Corporation (MRTC) compound at unti-unti nang nabubulok simula nang bilhin ito ng DOTr noong 2014 at hindi pa matiyak kung maaari pang mapakinabangan.

Ito mismo ang pahayag ng Commission on Audit (COA), sa inilabas nilang ulat na inilathala pa noong nakaraang Hulyo 13, dahil hindi umano nakumpleto ang panukalang Way-Forward Plan kabilang na ang testing, commissioning at final acceptance ng Light Rail Vehicles (LRVs).

Kaya ang resulta, imbes na ginhawa sana ang mararanasan ng ating mga kababayang araw-araw sumasakay ng tren ay napagkaitan natin sila ng komportableng serbisyo na dapat ay maayos ng transport system.

Matatandaang noong Enero 24, 2014, ang DOTr ay pumasok sa kontrata na nagkakahalaga ng ₱3,759,382,400 sa CRRC Dalian Co. LTD, isang Chinese locomotive company para sa 48 LRVs bilang bahagi ng Capacity Expansion (CAPEX) Project.

Ang layunin ay makapaghatid ng 800,000 pasahero kada araw ang MRT-3 at bahagi sana ito ng sinimulang expansion na dapat ay ipinatupad noon pang Pebrero 26, 2014 hanggang Enero 20, 2017 ngunit unti-unti na itong nakaligtaan ng publiko.

Nakapaloob sa ulat ng COA na noong Hulyo 26, 2019, umabot lamang sa siyam na LRVs na dapat ay may Provisional Acceptance Certificates na may Final Acceptance Certificates (FACs) ngunit maiisyu lamang ito matapos maipakita ang demonstrasyon ng tren kung paano umandar sa disenyo ng MRT-3 na may bilis na 60 kilometers per hour (kph).

Bale ang final certificates ay mailalabas lamang makaraang maalis na ang speed restriction ng MRT-3 na itinakda para sa Rehabilitation and Maintenance Agreement (RMA) sa pagitan ng DOTr at Sumitomo Corporation – ang orihinal na designer at maintenance provider ng MRT-3. Ang RMA na nagsimula noong Disyembre 28, 2018 ay nagtapos nitong Mayo 31, 2023.

Ang masaklap, ang 39 pang bagon ay hindi pa naisasalang para ma-testing at ma-commission dahil hinihigpitan pa ito dahil sa rehabilitation agreement.

Napag-alaman pa nang magsagawa ng asset valuation ang Systra Philippines noong Hulyo 2022, napansin ng auditors na ang siyam na provisionally-accepted trains ay tatlo lamang ang operational o nasa ‘medium’ condition habang ang lima pa ay hindi talaga gumagana at nasa masamang kondisyon at isa pa ay hindi matiyak kung puwede pang maayos.

Ang bagong Dalian vehicles ay napakarami na umanong insidente na apektado ang line service operation para sa bagong bagon at ang nakikitang dahilan umano kaya hindi mapagana ang mga ito ay dahil sa kawalan ng piyesang mabili kaya nananatiling nakatengga ang limang sira.

Sa ngayon, ang DOTr ay naglabas ng ‘Way-Forward Plan’ upang amyendahan ang Sumitomo deal, upang payagan ang operational deployment ng provisionally-accepted trains at ang pagsama na ng 48 pa para sa RMA ngunit hindi pa ito naipatutupad.

Dahil dito, inirekomenda ng COA na dapat ang DOTr ay makipag-ugnayan sa CRRC Dalian at Sumitomo Corporation para sa kailangang pakikipagtulungan upang mapabilis ang pagkumpleto ng Way-Forward Plan at nang magamit na lahat ang LRVs nang sa ganoon ay mapakinabangan na ito ng riding public at hindi masayang ang pagod, panahon at pondo na inilaan sa bagong LRVs.

Hangad natin na magawan pa ng paraan dahil malaking ginhawa ito para sa mga mananakay, sana huwag bitawan ng DOTr. Tutukan natin.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Sigaw ng riders sa MMDA: Serbisyo hindi perwisyo

ni Atty. Rodge Gutierrez @Mr. 1-Rider | July 22, 2023

Noong nakaraang Sabado ay may isinulat tayong artikulo hinggil sa plano ng Metro Manila Development Authority (MMDA) na papatawan ng multa ang mga rider na sisilong lamang sa ilalim ng footbridge at flyover.

Umusok ang ating telepono at ang ating Facebook account at napakarami ng nakikigalit at nakikisimpatya sa ating isinulat ngunit tila may ibang nagkukomento na titulo lamang ang binasa at hindi ang buong artikulo.

Kaya nais ko lamang linawin na mali talaga na harangan ang kalsada, obstruction ‘yan sa mata ng batas at dapat lamang na mapatawan ng multa ang mga nagsagawa ng obstruction.

Ang hindi ko lamang maintindihan kaya tayo nagtatanong ay kung bakit inuna pa ng MMDA ang anunsyo sa pagpapataw ng multa bago ang mga alternatibong solusyon at iba pang paliwang hinggil sa nais nilang mangyari sa mga rider na sumisilong kapag bumubuhos ang ulan.

Sa totoo lang, bago pa naganap ang pagpupulong ng mga stakeholders noong nakaraang Hulyo 20 lamang para pag-usapan ang mga posibleng solusyon ay nakapagbitaw na ng babala ang kagalang-galang na Acting Chairman ng MMDA na magpapataw na ng multa simula Agosto 1 ng taong kasalukuyan.

Kumbaga, sampung araw na lamang ito mula ngayon at kitang-kita na nagkukumahog ang MMDA at ito ngayon ang pinangangambahan ng mga rider dahil tila masyado nang naaalipusta at hindi nabigyan man lamang ng halaga ang kanilang kalagayan.

Kahit saang anggulo natin tingnan ay buo at nauna na ang pasya ng MMDA na kailangang patawan ng multa ang mga rider na ayaw mabasa at nagiging sanhi ng pagsisikip ng trapiko — bago pa nila lubos na maaksyunan ang mga alternatibong solusyon.

May presyo na nga eh — P500 o baka tumaas pa at hindi biro ang ganitong halaga para sa maraming rider na kaya nagtitiis sa init ng araw at usok ng sasakyan ay para kumita ng ipangtatawid nila sa kanilang mga pamilya na kung hindi kakayod ay hindi kakain.

Hindi lang naman ito ang mga batas-trapiko na kanilang pinagdadaanan araw-araw na kailangan ding magmulta ng mga rider na kanila nang iniinda at ngayon ay madadagdagan pa — na kung maaabuso pa ay talagang anti-poor na at sobrang kaawa-awa na ang ating mga rider.

Nagpaliwanag naman ang MMDA na hindi umano ito anti-poor dahil pinagmumulta nila kahit sino, kahit mayaman man o mahirap basta may paglabag, at binigay pa nilang halimbawa na may hinila silang BMW at Big Bike na patas umano ang trato dahil pareho nilang pinagmulta.

Mawalang galang na sa pamunuan ng MMDA, hindi ‘yan ang anti-poor na ibig naming sabihin kundi ang aplikasyon ng multa sa mahirap man o sa mayaman dahil balewala ang ipinapataw na multa sa may-ari ng BMW o kaya ay Ducati.

Ang iniiyak ng mga ordinaryong rider ay ang isyu hinggil sa pagpapataw ng P500 na penalty dahil napakahirap sa kanila na kumita ng P1,000 sa loob ng isang araw at sana lang ay maunawaan ng MMDA ang pakiramdam ng isang pinagkakaitan ng masisilungan — parehas ba ‘yan?

Hindi naman masama na magpatupad ng bagong panuntunan ngunit kung ang enforcer ay magagawang mag-isyu ng ticket sa mga sumilong na rider — bakit hindi nila unahing ituro muna sa mga rider kung saan dapat sumilong kung meron na, sa halip na agad-agad na mag-isyu ng violation ticket.

Tila nagbalat-sibuyas ang MMDA nang ipahayag natin ang hinanakit ng mga rider at sinabi nilang puro komento na lang at wala namang ibinibigay na solusyon, samantalang mandato nila 'yan, at may sapat na kapangyarihan sila para magpatupad ng solusyon.

Marahil din ay ayaw na nilang maghanap ng solusyon mula sa Kongreso dahil baka hindi nila magustuhan ang ihahain, tulad ng privilege speech kamakailan ng isang mambabatas na kailangan na umanong buwagin ang MMDA.

Ang naglalaro ngayon sa aking isip bilang Representante ay hindi ang ‘ano ang nasa batas’ kundi ‘kung ano ang DAPAT na nasa batas’. Batas na ipinatutupad ng may puso at konsiderasyon — equity at hindi equality.

Para sa kapakanan ng mga motorista, inaasahan nating magiging matagumpay ang MMDA na maresolba ang isyung ito — ngunit umasa kayo na kahit kurap ay hindi namin gagawin sa pagsubaybay sa inyo dahil hangad namin ay tamang serbisyo at hindi perwisyo. Abangan!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.