LTO, galaw-galaw naman sa plaka at driver’s license

ni Atty. Rodge Gutierrez @Mr. 1-Rider | August 3, 2023

Ilang araw bago ang nagdaang State of the Nation Address (SONA) ni Pangulong Ferdinand Bongbong Marcos Jr. ay inanunsiyo ng Land Transportation Office (LTO) na halos 5,000 kopya ng driver’s license cards ang nakatakdang dumating.

Inaasahang makagagawa umano ang Banner Plasticard, Inc. ng 15,000 hanggang 30,000 cards kada araw sa loob ng 10 araw bilang bahagi ng commitment nito na maipamahagi ang 1 milyong cards sa susunod na 60 araw.

Ang Banner Plasticard, Inc. ang mapalad na ginawaran ng kontrata ng Department of Transportation (DOTr) para gumawa ng 5.2 milyong plastic cards.

Matatandaan na noong nakaraang Abril ay naharap ang LTO sa kakulangan ng plastic card na kinakailangan para sa driver’s license kaya ang ginawa ng ahensiya ay nag-isyu na lamang ng temporary licenses na naka-imprenta sa papel.

Ang lahat ng ito ay inunawa at pinagpasensyahan ng mga motorista, bagama’t may mga nagkakamot sa ulo dahil sa nangyari ay wala magawa ang mga motorista kung hindi ang sumunod at pinagtiyagaan ang temporary driver’s license.

Dalawang linggo na ang nakararaan ay inilahad naman ng Commission on Audit (COA) na sa kanilang 2022 annual audit sa DOTr ay umabot sa 1,797 milyong pares ng license plates na nagkakahalaga ng P808, 702 milyon na binayaran na ng mga car owners mula 2015 ay hindi pa naidedeliber ng LTO.

Lumalabas na ang natitirang 2,561,629 pares ng motor vehicle (MV) replacement plates na binayaran na ng mga car owners sa kanilang pagre-renew ng sasakyan at nasa 764,514 pares lamang ang na-produced ng LTO na attached agency ng DOTr hanggang Disyembre 31, 2022.

Pero umabot lang sa 506,059 pares ng plaka ang naiisyu sa mga regional offices para mai-release na sa mga car owners habang ang natitirang 258,455 pares ay nananatili pa rin sa Plate Making Plant (PMP) ng LTO para sa packaging.

Ayon pa sa COA, sa kabila ng napakalaking backlog, inatasan ng PMP ang Plate Unit (PU) na ihinto muna ang produksiyon ng plaka dahil sa kakulangan ng blank plates para mapunuan ang produksiyon ng replacement plate at ng plaka para sa bagong rehistrong sasakyan para sa 2023.

Nabatid na ang natitirang 20,509,807 bagong plaka ng motorsiklo na binili mula 2014 hanggang 2022 ay nasa 8,650,311 lamang ang na-produced at naisyu ng PMP at PU ng LTO kung saan ay nasa 11,859,496 ang backlog sa plaka hanggang Disyembre 2022.

Kung COA ang tatanungin, ang mga hindi naideliber na replacement MV plates at Motorcycle (MC) backlog ay indikasyon na may pagkukulang ang LTO sa kanilang mandato dahil hindi naibigay ang mga plakang nabayaran na ng mga car owners.

Nakalap natin na ang Department of Budget and Management (DBM) ay naglabas ng pondo para sa 2018 hanggang 2022 na requirement sa MC backlogs, pero ang produksyon ng MC backlogs para sa CY 2017 pababa ay naiwan dahil sa kakulangan ng pondo.

Para sa 2023, ang LTO ay humingi ng budget na P6,828 bilyon upang matugunan ang kasalukuyang backlog ngunit ang DBM ay inaprubahan lamang ang halagang P4,783 bilyon kaya may katuwiran na naman ang LTO na hindi ito makumpleto dahil sa kakulangan na naman sa pondo.

Ngayon heto, kung dati ay naubos na pasensiya ng mga motorista laban sa LTO dahil sa backlog ng license plate, ngayon ay nabaliktad naman ang sitwasyon dahil nagbabala ang ahensya ng parusa laban sa mga hindi pa nagki-claim ng kanilang plaka.

Binigyan ng LTO ng 60 araw na palugit ang mga may-ari ng sasakyan para i-claim ang kanilang mga bagong plaka at kapag nabigo ang mga ito ay maaari silang parusahan.

Tutal matagal na naman tayong nagtitiis sa sistema ng LTO, baka puwedeng dagdagan pa natin ang pasensya dahil sa tingin ko ay malapit nang maging normal ang operasyon ng LTO — bigyan natin ng pagkakataon ang bagong pamunuan ng LTO, baka sakali!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Rider at motorista, buwis-buhay dahil sa mga sira-sirang kalsada

ni Atty. Rodge Gutierrez @Mr. 1-Rider | August 1, 2023

Nakababahala ang ulat na inilabas ng Philippine National Police-Highway Patrol Group (PNP-HPG) na sa unang apat na buwan pa lamang umano ng taong 2023 ay umabot na sa humigit-kumulang 4,000 ang aksidente sa motorsiklo.

Napakarami namang sanhi ng mga aksidenteng kinasasangkutan ng motorsiklo ngunit malaking porsyento ng mga ito ay ang maling disenyo at hindi maayos na kalye dahil lamang sa mabagal na pagtugon sa mga sirang kalsada.

Idagdag pa rito ang kawalan ng standard na disenyo at pagtitiyak sa polisiya na dapat ay ligtas ang mga kalsada hindi lamang sa kapakanan ng mga motorista at rider kung hindi maging sa mga commuters.

Hanggang ngayon kasi ay mangilan-ngilan lang naman ‘yang mga ipinatutupad na bukod na daanan para sa mga naka-motorsiklo, ganoon din sa mga nakabisikleta, kaya mas madalas ay magkakasama ang mga ito at ang mga motorista sa iisang kalsada.

Kumbaga, nagkukusa na lamang ang ating mga kababayang tsuper kung paano sila magbibigayan sa kalye para pare-parehong makarating sa paroroonan. Ngunit sa totoo lang ay marami ang nagrereklamo pero wala naman silang magawa kung hindi ang magtiis sa kalagayan ng mga kalsada.

Mismong ang PNP-HPG ay nagbigay ng pahayag kamakailan na kailangang tutukan ng pamahalaan ang tamang disenyo at polisiya na magbibigay garantiya sa kaligtasan sa kalsada.

Hindi biro ang datos na inilabas ng PNP-HPG na umabot sa 4,029 ang naaksidente sa motorsiklo simula lamang Enero hanggang Abril ng taong kasalukuyan kumpara sa 8,342 aksidente sa loob ng isang taon noong 2022.

Patunay ito na hindi talaga ligtas ang ating mga kalsada para sa mga motorista batay na rin sa datos ng PNP-HPG at hindi pa kabilang ang mga nagbibisikleta, pedestrians at iba pang apektado ng iba’t ibang klase ng aksidente.

Sa isang banda ay dapat din nating saluduhan ang PNP-HPG dahil nagpupursige sila na magsagawa ng seminars para sa mga rider at mabuti na ito kesa mag-isip na kastiguhin pa ang mga ito at patawan ng kung anu-anong paglabag para pagmultahin.

Bukod sa tamang pagmamaneho, ang pangunahing ituturo ay disiplina at kasama na rito ang pasensya na huwag mainit ang ulo sa kalsada. Ngunit nais ko lang iparating sa kinauukulan na matagal nang nagpapasensya ang ating mga motorista at tinitiis na lamang ang napakapangit na sitwasyon.

Kung may maayos na daanan o kaya’y may umiiral na polisiya na dapat sundin ay wala namang magagawa ang ating mga motorista lalo na ang mga rider na naoobligang magpalipat-lipat ng linya dahil sa hindi maayos na kalsada at obstruction.

Isa pa sa dapat kalampagin, ang Department of Public Works and Highways (DPWH) na dapat hindi lamang ang pangangailangan ng private vehicles ang pagtuunan ng pansin dahil hindi na kayang pigilan ang patuloy na pagdami ng motorsiklo sa bansa.

Dapat nang idetermina ng DPWH kung ang safety roads standard na umiiral ay sapat pa rin ba, upang matugunan ito sa susunod na magsasagawa ng mga proyekto patungkol sa lansangan para umakma na sa mga bagong problemang kinakaharap ng mga motorista.

Hindi lang naman pribadong sasakyan ang responsibilidad ng pamahalaan, dapat ay tinitingnan din ang kapakanan ng ibang sektor na gumagamit ng kalsada kabilang na diyan ang tumatawid, nagtutulak ng kariton, nakabisikleta at iba pa.

Hindi rin dapat na pantay ang pagtrato sa private vehicle at sa mga nagmamaneho ng motorsiklo dahil kung ‘yung mga nakasakay sa apat na gulong na may seatbelt at airbag ay namamatay sa aksidente, paano pa kaya ang naka-motorsiklo lang?

Wala naman tayong hinihiling na gawing espesyal ang ating mga ‘kagulong’, ang pakiusap lang naman natin ay huwag makalimutan ang hanay ng mga rider na maisama sa mga pagbabago at kaligtasan sa kalsada na nais tugunan ng pamahalaan.

Sana matanggap natin na kasama na sa kalsada ang libu-libong riders na kaakibat natin araw-araw sa paglago ng ekonomiya at tiyak na dadami pa sa mga susunod na panahon.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Pag-aaral sa Motorcycle Taxi, inabot na ng 4 yrs., ‘anyare?!

ni Atty. Rodge Gutierrez @Mr. 1-Rider | July 29, 2023

Panahon pa ni Pangulong Rodrigo Duterte nang magsimulang gumawa ng pilot study ang Land Transportation and Franchising Regulatory Board (LTFRB) hinggil sa paggamit ng motorcycle-for-hire o motorcycle taxi bilang public transport.

Ngayon, apat na taon na ang nakakaraan at may bago na tayong administrasyon ngunit hanggang ngayon ay wala pa ring inilalabas na resulta ng pag-aaral kung makabubuti o makasasama ba ang hindi na mapigilang pagdami ng motorcycle taxi sa bansa upang maging pampublikong sasakyan.

Kung tutuusin, ang mga ganitong pilot study ay karaniwang tumatagal lamang ng ilang buwan o minsan ay mas maiksi pa. Pero itong Motorcycle Taxi Technical Working Group (MC Taxi TWG) na nakatutok para sa naturang pag-aaral ay wala man lamang abiso.

Kung hindi talaga nila kayang agad-agad na maglabas ng resulta o hindi pa sapat ang apat na taon ay maglabas naman sila ng paliwanag kung ano na ang tunay na sitwasyon dahil marami sa ating mga ‘kagulong’ ang inip na inip na sa kinahinatnan.

Imposible naman kasing hanggang sa kasalukuyan ay wala pa ring nabubuong kongklusyon ang itinalagang MC Taxi TWG kahit inisyal man lang, maliban na lamang kung hindi talaga inaasikaso o kaya ay may pumipigil na ilabas ang resulta ng pilot study.

Hindi lang mga ‘kagulong’ natin ang naiinip dahil maging ang mga commuter o mga mananakay sa MC Taxi ay sabik na sabik nang mapagtibay ang batas para maging isang ganap na public transport ang motorsiklo upang maibsan ang kanilang pag-aalala sa tuwing sila ay lulan bilang pasahero.

Sobrang tinatangkilik na kasi ngayon ng ating mga kababayan ang MC Taxi dahil bukod sa mabilis, iwas sa trapik at mura ay ligtas namang nakararating sa paroroonan, kahit na may konting kaakibat na banta ng aksidente.

Dahil sa pagkakaantala ng resulta ng pilot study, nagkani-kanya na ang ating mga ‘kagulong’ na nais maghanapbuhay at nagkaroon ito ng negatibong epekto sa public transport dahil sa dumami ang mga kolorum at hindi na kailangan ang ride-hailing apps dahil may mga pila na ng ‘habal-habal’ sa maraming lugar.

Hanggang ngayon kasi, nakatengga sa 45,000 ang opisyal na kalahok sa isinasagawang pilot study at ang nakikinabang lamang dito ay ang Joyride, Angkas at Move It na hindi rin nakakaramdam ng pagkainip sa hindi matapos-tapos na pag-aaral.

Dahil nga sa ni-hay o ni-hoy ay wala man lamang pahayag ang MC Taxi TWG, hindi natin matiyak kung may plano ba silang dagdagan ang mga kalahok sa kabila ng parami nang parami ang mga mananakay ng motorcycle taxi.

Sa totoo lang, kabi-kabila na ang mga panawagan ng iba’t ibang grupo na kung ayaw pang tapusin ng MC Taxi TWG ang wala pang direksyong pilot study, kung maaari ay dagdagan na lamang sana ang mga slot para sa mga motorcycle taxi.

Sa ganitong paraan, maiibsan ang pagtangkilik ng mga pasahero sa mga kolorum na hindi tiyak ang kaligtasan dahil kulang sa kaalaman ang driver, walang insurance at walang kumpanyang hahabulin sakaling maaksidente.

Sana ngayong second regular session ng 19th Congress ay lumusot na ang motorcycles-for-hire bill upang maging legal nang uri ng public transport ang motorcycle taxi kung saan ay nasa 14 na magkakahalintulad na panukala ang nakasumite sa Kamara de Representante.

Nais ko lamang ipunto rito, ang napabalitang malagim na sinapit ng isang babae na pasahero ng motorcycle taxi na pag-aari ng Maxim Taxi Philippines Inc. na sinalpok ng isang trak sa Cebu City ngunit hindi pa pala aprubado ng LTFRB ang prangkisa nito kaya wala pang karapatang magsakay ng pasahero pero namamasada na.

Napakarami ng kahalintulad na pangyayari araw-araw ang nagaganap sa iba’t ibang lansangan ngunit hanggang ngayon ay wala pa ring batas na magbibigay ng proteksyon hindi lang sa mga driver ng motorcycle taxi kundi ng mismong pasahero.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.