Multa sa rider na sumilong sa flyover, maibaba sana sa P100

ni Atty. Rodge Gutierrez @Mr. 1-Rider | August 10, 2023

“We understand the plight of motorcycle riders when they have to stop in the middle of the road while waiting for the rain to stop, it’s very risky for them because they might get into a road accident. At least with the emergency lay-by, they can take cover during heavy rains”.

Ito ang buong pagmamalasakit na pahayag ni Department of the Interior and Local Government (DILG) Secretary Benhur Abalos Jr. noong siya pa ang chairman ng Metro Manila Development Authority (MMDA) na patuloy pa ring naaalala ng maraming rider.

Hanggang ngayon ay mababasa pa rin ang sinabing ito ni Abalos sa Facebook account ng MMDA kasabay ng napakaraming larawan na nagpapakita ng mga lugar sa ilalim ng mga flyover na sadyang isinaayos upang may matinong sisilungan ang mga nakamotorsiklo.

Ipinaliwanag ni Abalos na labis umano niyang nauunawaan ang kalagayan ng mga motorcycle riders na obligadong huminto sa gitna ng kalsada habang naghihintay sa paghupa ng ulan, dahil masyado umanong delikado na posibleng humantong sa aksidente sa kalye. Sa pamamagitan man lamang ng emergency lay-by ay makasilong ang mga rider sa gitna ng malakas na ulan.

May mga signage pang ipinagawa si Abalos na may nakasulat na ‘EMERGENCY LAY-BY FOR MOTORCYCLES ONLY DURING RAINFALL’ na buong giting pa itong ipinakita sa media ng pamunuan noon ng MMDA na hanggang ngayon ay makikita pa rin sa social media account ng naturang ahensya.

Naglabas din ng malaking signage si Abalos na kinober din ng media na may mga katagang ‘REGULASYON SA MOTORCYCLE LAY-BY’:

1. ANG LUGAR NA ITO AY PARA LANG SA MGA MOTORSIKLO TUWING UMUULAN.

2. BAWAL PUMARADA DITO NG MATAGAL.

3. MAAARI LANG MAGTAGAL DITO NG HINDI HIHIGIT SA 10 MINUTO PAGKATAPOS NG ULAN.

4. IPARADA NG MAAYOS ANG MOTORSIKLO UPANG MAIWASAN ANG SIKSIKAN AT MAGING LIGTAS SA KAPAHAMAKAN.

5. PANATILIHING MALINIS ANG LUGAR NA ITO SA LAHAT NG ORAS.

Sa ibaba ng naturang signage ay nakalagay ang katagang ‘MMDA’ na ang ibig sabihin ay mismong sa naturang ahensya nagmula ang kautusan at napakarami ng mga kahalintulad na paalala bilang pagmamalasakit sa kalagayan ng mga motorcycle rider.

Wala kaming planong ipamukha ang mga mabubuting hakbanging ito ng dating pamunuan ng MMDA sa pamamahala ng kasalukuyang pamunuan dahil magkaibang-magkaiba sila ng istilo at kaya napunta si Abalos bilang DILG secretary ay dahil nakitaan ito ng magandang performance.

Pinakikiusapan ko ang marami nating ‘kagulong’ na panay ang padala ng mga reklamo at hinanakit sa telepono sa ating social media account hinggil sa umano’y kakaibang pamamalakad ng kasalukuyang pamamahala ng MMDA -- na kailangang sumunod pa rin sa batas.

Iba-iba ang istilo ng bawat pamamahala at huwag na ninyong hanapin ang dating sistema ni Sec. Abalos na punung-puno ng malasakit sa kapwa at maliwanag na naiintindihan ang kalagayan ng isang motorcycle rider.

Sinubukan na nating makiusap sa pamunuan ng MMDA ngunit sadyang minamadali nilang ipatupad ang paghuli sa mga rider na sisilong dahil nagdudulot umano nang pagsisikip ng trapiko.

Kung ‘yung kautusan ni dating MMDA Chairman Abalos ay hindi man lamang nilingon ng bagong pamunuan ng MMDA, paano pa natin aasahan na pagbibigyan ang pagmamakaawa ng isang ordinaryong nagmomotorsiklo.

Sabi nga ni Sen. JV Ejercito, kung hindi talaga maiiwasan, sana man lang ay gawing P100 o P200 lang ang multa sa mahuhuling sisilong sa flyover dahil ang P1,000 nga naman ay kabuhayan na para sa mga rider.

Baka naman seryoso talaga ang MMDA hinggil sa mga sasakyang nagdudulot nang pagsisikip ng trapiko sa kalye kaya mabuting suportahan na lamang natin baka pati ang mga naggagandahang sasakyan na pag-aari ng mga mayayaman ay ipagbawal na rin nila sa pagpila sa mga gate ng mga sikat na eskwelahan na sanhi talaga ng pagbibigat ng trapiko.

Kasi inaasistihan pa ng mga traffic enforcer ang mga sasakyang naghahatid ng estudyante na hindi lang tuwing tag-ulan nagdudulot ng pagsisikip ng trapiko kung hindi araw-araw pa. Sana all!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Batas kontra pagda-drive nang lasing at nakadroga, ‘wag dedmahin

ni Atty. Rodge Gutierrez @Mr. 1-Rider | August 8, 2023

Isa sa malaking problema ng ating bansa ay sobrang pagkahilig ng ating mga kababayan sa pag-inom ng alak at wala itong pinipiling propesyon maging mayaman o mahirap basta’t nagkaharap-harap ay mas malamang na sa inuman kaagad ang kahahantungan.

Ang masaklap, may mga kababayan tayo na dala ang kanilang kotse o motorsiklo na nakakalimutang magmamaneho pa sila pauwi ng bahay na sa umpisa, ilang boteng alak lamang ngunit kapag napasarap na ay bahala na si Batman.

Dito natin maririnig ang mga katagang karaniwang sinasabi ng mga umiinom na driver na mas maingat umano silang magmaneho kung nakainom ng alak, pero isang maling paniniwala ito dahil labis na tinututulan ito ng mga doktor at ilang eksperto sa bansa.

Sa United States, umabot sa 11,654 ang nasawi sa vehicular accident noong nakaraang taon dahil nasa ilalim ng impluwensya ng alcohol habang lumalabas na 32 katao ang namamatay kada araw o isang tao kada 45 minuto dahil lamang sa nakainom ng alak.

Ang Philippine National Police-Highway Patrol Group (PNP-HPG) ay naglabas ng ulat na last year, bago magtapos ang taon ay pumalo sa 90% ang itinaas ng naaksidente sa pagmamaneho nang lasing.

Ayon sa datos ng PNP-HPG sa pinakahuling buwan ay umabot sa 59 aksidente ang naganap na higit na mas mataas sa sinundang buwan na 31 aksidente lamang, na ang ibig sabihin ay tumaas pa ito sa 90.32%.

Maging ang Land Transportation Office (LTO) ay naglabas din ng ulat na mula Enero hanggang Agosto ng taong kasalukuyan, nakapagresponde umano ang kanilang operatiba sa 402 crash accidents, kung saan 353 sa mga sangkot na driver ang positibong nakainom ng alak.

Ang ulat na ito ng LTO ay humantong sa pagkasawi ng 15 katao at umabot sa 232 nagtamo ng iba’t ibang pinsala sa katawan na lahat ay dinala sa mga pagamutan upang maisalba at mabigyan ng kaukulang lunas.

Ang nakalulungkot, sa kabila ng mga naitalang aksidente ay marami pa rin sa ating mga kababayan ang binabalewala ang napakadelikadong gawain, ang magmaneho ng lasing.

At tila ipinagmamalaki pa nila ito, kahit hindi na alam kung paano sila nakauwi ng bahay.

Marahil, dapat palakasin ng mga ahensyang may kinalaman sa pagsasaayos at kaligtasan ng ating mga motorista, ang pagpapakalat ng mga impormasyon para paalalahanan sila na hindi tamang magmaneho ng lasing, dahil sa marami na ang nakakalimot kung saan wala kasing nagbabantay.

Dapat ipaalalang muli sa mga motorista na umiiral pa rin ang Anti-Drunk and Drugged Driving Act of 2013 na hindi dapat balewalain, na bukod sa posibleng maaksidente ay may parusang ipapataw sa sinumang mahuhuling lumabag dito.

Sa naturang batas, nakapaloob na ang isang driver na mahuhuli ay isasailalim sa Blood Alcohol Content (BAC) test at dapat na magresulta sa 0.0 percent of alcohol para hindi makasuhan. Ngunit, kapag pumalo sa 0.05 percent of alcohol pataas, tiyak na kalaboso ang kahahantungan.

Alalahanin sana ng mga driver na ang pagkakaroon ng lisensya ay hindi karapatan kung hindi isang pribilehiyo lamang na may kaakibat na responsabilidad at posibleng dahil sa wala sa lugar na pag-inom ay mapahamak at makapandamay pa ng iba.

Wala na kasing tatlong linggo at ber months na, tiyak na kabi-kabila ang mga inuman dahil papalapit na ang panahon ng kapaskuhan, kung saan kilala ang ating bansa na may pinakamahabang pagdiriwang kaya siguradong party-party na naman na may lasingan.

Pakiusap natin sa mga elemento ng PNP, LTO at iba pang operatiba na magdagdag ng puwersa at magbantay sa mga lugar na maraming inuman tulad ng mga KTV bar at iba pang kahalintulad nito, para agad na masita ang mga lasing na magtatangka na magmaneho bago pa humantong sa aksidente.

Paalala sa mga kababayan at mga ‘kagulong’, mabuting huwag na magdala ng sasakyan kung makikipag-inuman o kaya ay magsama na lang ng driver na hindi gagawing tumikim ng alak.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Mga illegal driving school na nakalusot at pinalusot, lagot!

ni Atty. Rodge Gutierrez @Mr. 1-Rider | August 5, 2023

Nadiskubre ng Commission on Audit (COA) na ilang tanggapan ng Land Transportation Office (LTO) ang nagbibigay ng permit o certificate of accreditation sa mga driving school noong nakaraang taon kahit hindi umano kumpleto ang mga kinakailangang requirements.

Dahil dito ay inatasan ng COA ang LTO na magsumite ng listahan at mga wastong dokumento ng akreditasyon ng mga aplikante na nais magkaroon ng driving school at ‘yung mga driving school na kasalukuyan nang tumatanggap ng mga estudyante.

Base sa pinakahuling ulat ng Department of Transportation (DOTr), natukoy umano ng COA na 189 o 66.32% ng 285 driving school applicants ang naaprubahan sa kabila ng kakulangan ng mga kinakailangang dokumento.

Kabilang umano sa mga nagpalusot ng driving school ay ang DOTr-Cordillera Administrative Region at sa mga tanggapan ng LTO sa National Capital Region (NCR), Central Luzon, Western Visayas, Central Visayas, Zamboanga Peninsula at Soccsksargen.

Siyempre hindi na natin dapat pang ipaliwanag kung bakit at kung paano nakakalusot ang mga ‘fly-by-night’ driving school o mga driving school na hindi na naman sapat ang dokumento ngunit namamayagpag na ang kanilang operasyon.

Mabuti sana kung papeles ang kulang, ang masaklap sinabi mismo ng COA na ang mga pinalusot na driving school ay wala ring maayos na pasilidad at sapat na kagamitan para tugunan ang pangangailangan ng isang nais matutong magmaneho.

Magpasalamat tayo sa COA at nadiskubre ang isa na namang ilegal na aktibidades na nagaganap na loob ng LTO dahil kung hindi ay patuloy itong iiral at sa huli ay kaawa-awa ang ating mga kababayan na ang tanging hangad lang naman ay matuto ng maayos na pagmamaneho.

Dahil din sa nadiskubreng ito ng COA ay tiyak na kahit paano ay magkakaroon ng paghihigpit hindi lamang sa dokumento kung hindi maging sa pagsasagawa ng inspeksiyon upang masiguro na maayos at kumpleto ang pasilidad ng isang driving school bago bigyan ng permit ng LTO.

Mababalewala kasi ang pagtatakda ng minimum requirements para sa mga nais magbukas ng driving school kung may nagagawa naman palang paraan para lumusot sa isinasagawang evaluation at pag-iinspeksiyon sa mga pasilidad ng nais magtayo ng driving school.

Marahil, isa ito sa dahilan kung bakit noong 2017 nang magsagawa ng public hearing ang Senado hinggil sa road safety ay lumitaw na kalahati umano ng populasyon ng driver sa bansa ay bumabagsak sa driving examination at isinisisi ito sa mga basta na lamang natutong magmaneho at hindi kumpleto ang edukasyon.

Ito ang naging pagkakataon na nagsimulang dumami ang mga driving school na aprubado naman ng Land Transportation Office (LTO) sa iba’t ibang bahagi ng bansa ngunit dahil sa may mga nakakalusot palang driving school na hindi naman nakakasunod sa itinakdang standard ay posibleng malaki pa rin ang populasyon ng mga driver na may problema sa tamang pagmamaneho.

Hindi kasi maiaalis na mag-isip ang publiko na kung ang papeles ng isang driving school ay pinalusot lamang, hindi malayong magpalusot din sila ng mga driver na hindi naman sapat ang kaalaman ay bibigyan na rin ng certification para makakuha ng driver’s license.

Unfair kasi ito sa napakaraming matitino at maayos na driving school sa bansa na sumusunod sa lahat ng requirements tapos ay magiging kakumpetensiya nila ang mga nagpalusot lang ng papeles dahil sa katiwalian ng ilang opisyal sa loob ng LTO.

Kamakailan lamang ay itinalaga mismo ni Pangulong Ferdinand ‘Bongbong’ Marcos Jr si Atty. Vigor Mendoza II bilang assistant secretary ng LTO at malaking hamon sa kanya ang mga sumalubong na problemang ito at umaasa ang taumbayan na maisasaayos ang lahat.

Alam nating ‘mission impossible’ ang problema sa LTO dahil sa hindi mabilang na ‘aliwaswas’ at napakapangit na imahe nito — ngunit manalig tayo na baka ang bagong pamunuan na ang hinihintay ng lahat tungo sa pagbabago. Bantayan natin!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.