Kapakanan ng komyuter, 'wag balewalain sa taas-pasahe

ni Atty. Rodge Gutierrez @Mr. 1-Rider | August 24, 2023

Mabigat ang kinakaharap na problema ng pamahalaan dahil sa kabi-kabilang hinaing ng iba’t ibang sektor na ang lahat ng pinag-uugatan ay walang humpay na pagtaas ng presyo ng produktong petrolyo.

Kung sa kasalukuyang pagtataas ng produktong petrolyo ang pag-uusapan ay maayos itong naipaliwanag ng mga kinauukulan at malabo man o malinaw ang paliwanag ay wala namang magagawa ang ating mga Kababayan kung hindi ang sumunod.

Ngunit ngayon heto ang Department of Energy (DOE) at tahasang inaanunsiyo na magpapatuloy umano ang pagtaas ng presyo ng produktong petrolyo hanggang matapos ang 2023 at inaasahang sisirit pa ito sa pagpasok ng ‘ber’ months.

Mismong si Director Rino Abad ng Oil Industry Management Bureau ng DOE ang nagpaliwanag na ang tanging tsansa na lamang umano para magbago ang takbo ng presyo ng langis ay kung bumaba ang demand nito sa merkado.

Ngunit kung pagbabasehan natin ang kasaysayan ay tila napakalaking imposible na bumaba ang demands sa panahon ng ‘ber’ months dahil harvest time ito sa lahat ng negosyo at kalakalan na lahat ay kailangan ng produktong petrolyo para umusad.

May ulat pa na sa kasalukuyan umano ay hindi balanse ang produksyon ng langis at global demand dahil sa pagbabawas ng produksyon ng Saudi Arabia at Russia.

Ang medyo masaklap sa ngayon ay walang grupo ng mga bansa ang pursigidong nag-oorganisa para tuluyang maibaba ang demand ng langis habang ang OPEC Plus naman umano ay nagbababa ng produksyon ng langis o kanilang supply.

Ngayong buwan ng Agosto ay nasa 2.8 milyong bariles ng langis ang dapat punuan na hindi kinakaya sa araw-araw na produksyon, pero kung inyong mapapansin — mula Hunyo hanggang Agosto ay pitong ulit nang nagtaas ng presyo ng gasoline, diesel at kerosene.

Ayon naman sa DOE, para bumaba umano ang presyo ng langis sa bansa ay makabubuting hindi na muna tayo mag-angkat dahil ang pinakamabuting dapat gawin ay bawasan ang pagiging import dependent ng bansa sa mga darating na taon.

Ngayon heto ang epekto, kabi-kabila ang pagtataas ng mga bilihin, walang hindi nagrereklamo dahil sa ramdam nang pagtaas ng lahat mula bigas, karne, isda at iba pa na sana ay hindi naman magtuluy-tuloy ngunit dahil ‘ber’ months na ay marami ang nawawalan ng pag-asa.

Noong nakaraang Agosto 2, nagtaas ng pasahe ang Light Rail Transit 1 at LRT 2, at ngayon ay nais na rin ng MRT na magtaas, maging ang taxi ay humihirit na rin ng dagdag-singil sa flag down at napakarami pa ng nais magtaas.

Ngayon, ang pinakahuli ay pormal nang naghain ng petisyon ang ilang transport group sa Land Transportation Franchising and Regulatory Board (LTFRB) upang hilingin ang P5 dagdag-pasahe sa mga pampasaherong jeep.

Binubuo ito ng Pasang Masda, Alliance of Concerned Transport Organizations (ACTO) at Alliance of Transport Operators and Drivers Association of the Philippines (ALTODAP) na nanguna sa pagsusumite at nakapaloob din sa petisyon ang dagdag na piso para sa susunod na kilometrong biyahe ng jeep.

Subalit, mas nais ng nabanggit na transport group na agarang aprubahan ng ahensya ang P1 provisional increase habang hinihintay na maaprubahan ang kanilang hirit na P5 na dagdag.

Tulad ng dapat asahan, ang sunud-sunod na pagtaas din ng presyo ng produktong petrolyo ang ginamit nilang batayan para maihain ang kanilang kahilingan dahil nahihirapan na umano silang kumita.

Nauna rito ay umapela na sa LTFRB ng dagdag P2 pasahe para sa pampasaherong jeepney ang mga transport group na Liga ng Transportasyon at Operators sa Pilipinas, (LTOP), Pagkakaisa ng mga Samahan mga Tsuper at Opereytor Nationwide (PISTON), Federation of Jeepney Operators and Drivers Association of the Philippines (FEJODAP) at Stop & Go Transport Coalition Incorporated.

Hindi natin alam kung saan hahantong ang mga usaping ito ngunit kailangang balanse ang magiging desisyon para sa mga usaping ito, dahil dapat ding tingnan ang kapakanan ng mga Kababayan nating mananakay na isa rin sa tinatamaan sa kabi-kabilang pagtaas. Subaybayan natin!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Toll Booth, aalisin na sa Expressway

ni Atty. Rodge Gutierrez @Mr. 1-Rider | August 23, 2023

Noong taong 2020 nagpalabas ng Department Order No. 2020-012 ang Department of Transportation (DOTr) na kailangan nang ipatupad ang cashless payment systems sa mga expressway ngunit nakiusap ang mga motorista na saglit iantala at humingi ng karagdagang panahon.

Ang nais lang naman ng DOTr noong taong 2020 ay maiwasan na magkaroon ng physical contact sa pagitan ng motorista at teller dahil sa kasagsagan ito ng pandemya at matiyak din na maging mas mabilis ang daloy ng trapiko.

Ngunit, napakarami ng kumontra dahil nang mga panahong iyon ay kani-kanya pa ang operasyon ng radio-frequency identification (RFID) ng dalawang toll operators at kailangang magkaisa muna umano upang isang RFID na lamang ang gamit.

Kailangan nga namang maging compatible pansamantala ang operasyon ng Easytrip at Autosweep sa isa’t isa kung pagdating sa tollway system ang pag-uusapan at tila may pagkakasundo na panahon na upang pag-isahin ang kanilang sistema.

Ngayon heto na, ipatutupad na ang dalawang buwan na dry run para sa cashless toll collections sa mga piling toll plaza na magsisimula umano sa Setyembre 1 ng taong kasalukuyan, ayon sa Toll Regulatory Board (TRB).

Ang TRB na attached agency ng DOTr ay nagpahayag na ang dry run ay isang ‘necessary procedure’ upang matiyak ang kahandaan ng mga tollway concessionaires at operators ng expressways para sa maayos at pulidong pagpapatupad ng naturang programa.

Base sa plano ng TRB, ang unang batch ng mga kuwalipikadong toll plaza ang unang sasalang sa dry run, at iba pang kuwalipikadong toll plaza ay unti-unting isasali habang nagsisimula na ang dry run hanggang sa lahat ay sabay-sabay nang gumagana.

Kaya makabubuting bago pa man magsimula ang naturang dry run ay dapat na lahat ng nagbabayad ng cash sa tollway ay magpakabit na ng RFID, tutal libre naman ito at kailangan lamang ay lagyan ng load para gumana at hindi na maabala sa tollgate.

Sa mga kasalukuyan nang mayroong RFID sticker sa kani-kanilang sasakyan ay kailangang ipa-check kung kailangan nang palitan at makipag-ugnayan kung puwede na bang gamitin ang Autosweep sa Easytrip o kabilaan.

Naalala ko pa noong unang ipinatupad ang RFID, dumagsa ang reklamo hinggil sa napakaraming palpak sa sistema ng electronic toll collection (ETC) kaya naobliga ang DOTr na maglabas ng addendum noong Enero 2021 na payagang dumaan sa toll gate ang mga sasakyang walang RFID at maglagay na lamang ng cash lanes.

Pero sa pagpasok ng susunod na buwan, kailangang maghanda na ng mga motorista, partikular ang mga dumaraan sa mga expressway dahil tuluyan nang tatanggalin ang cash lanes at tanging ang mga may RFID na lamang ang padaraanin ng tagapamahala ng Metro Pacific Tollways Corp. (MPTC).

Aalisin na rin umano ang mga toll booths at aalisin na ang mga barrier o harang na pumipigil sa mga dumaraang sasakyan. Magiging tuluy-tuloy na lamang ang mga sasakyan tulad sa ibang bansa na awtomatiko na nababawasan ang load.

Pamamahalaan ng MPTC ang ilang vital expressway tulad ng North Luzon Expressway, ang Subic-Clark Tarlac Expressway, NLEX Connector Road, Manila-Cavite Expressway, Cavite-Laguna Expressway at ang Cebu-Cordova Link Expressway sa Cebu.

Sa ngayon, tinatayang nasa 75% ng motorista ang gumagamit na ng RFID para makatawid sa toll gate at inaasahan ng MPTC na ang isasagawang transition upang maging ganap na cashless na ang lahat ng tollway sa bansa ay bago matapos ang taong 2024.

Bawat sasakyang mauubusan o hindi na sasapat ang kanilang balanse sa kanilang RFID ay maayos din namang makakaraan ng walang abala ngunit naka-monitor at awtomatikong babasahin ang bawat plate number at sa oras na magparehistro sila ng sasakyan ay idadagdag ito sa kanilang bayarin.

Samantala, ang San Miguel Corp. ay mag-aalis na rin ng cash lanes kung maaprubahan na ng mga regulators at pamamahalaan naman nila ang South Luzon Expressway, Skyway, NAIA Expressway, Star Tollway, Tarlac-Pangasinan-La Union Expressway at ang Muntinlupa-Cavite Expressway.

Napakaganda ng malaking pagbabagong ito sa ating mga expressway kaya sana ay makipagtulungan ang bawat isa para mapagaan ang inaasahan nating modernong pagbabago dahil maraming bansa na ang gumagamit ng ganitong sistema.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Proteksyon vs. biniling piyesa na ‘di aprub ng lto

ni Atty. Rodge Gutierrez @Mr. 1-Rider | August 19, 2023

Nagbabala ang Land Transportation Office (LTO) sa mga motorista hinggil sa dulot na panganib ng depektibong sasakyan kabilang ang motorsiklo at accessories nito, partikular ang lighting at brake systems, dahil sa mataas na bilang ng aksidente sa mga nakalipas na araw.

Lumabas ang naturang babala matapos ilabas ng LTO-National Capital Region (NCR), ang bilang ng mga nahuhuling motorista na may mga paglabag sa sira, hindi akma at ilegal na accessories na umabot sa kabuuang 837 sa unang kalahati ng taong ito sa buong bansa.

Ayon pa sa LTO, kabilang sa mga nahuli ang gumagamit ng motor vehicles na may sirang accessories, devices, equipment, at parts na labag sa probisyon ng Republic Act 4136, o ang Land Transportation and Traffic Code.

Ang pagmamaneho umano ng motor vehicles na sira o hindi gumagana ang ilang bahagi ng sasakyan ay maaaring magdulot ng aksidente at napakadelikado nga naman na basta na lamang magpapalit ng hindi akmang piyesa.

Nilalaman din ng naturang babala ng LTO-NCR na ang mga sirang headlights, taillights, o turn signals, ay makahahadlang sa visibility, at nakababawas sa abilidad ng drivers na makita ang takbo ng mga sasakyan -- na ang resulta ay tumataas ang posibilidad ng aksidente.

Makahahadlang naman umano ang sirang brake systems o lumang brake pads sa abilidad na agarang huminto ang sasakyan at maaaring magresulta ito sa mas mahabang stopping distances na sa huli ay mas mataas din ang dulot na panganib ng pagkabangga.

Idagdag pa ang depektibong steering mechanisms o suspension components na nakababawas ng kontrol sa sasakyan at nagpapataas ng posibilidad ng aksidente, partikular sa pagmamaniobra o biglaang paglipat ng lane.

Kabilang din sa iba pang safety concerns ang depektibong airbags, seat belts, o child safety restraints; sirang wiring o electrical components at sirang accessories gaya ng busina, wipers, o emergency lights.

Nauna rito, bilang Unang Representante ng 1-Rider Partylist ay nagsumite tayo kamakailan ng panukalang batas o ang House Bill No. 6445 na naglalayong mabigyan ng proteksyon ang ating mga ‘kagulong’ hinggil sa mga piyesang kanilang binibili.

Ito ang, An Act Mandating Retailers of Aftermarket Motorcycle Parts and Accessories to issue Warranties and Reimburse End-User Buyers for Non-compliant Motorcycle Parts and Accessories with Current Land Transportation Office (LTO) Regulations o mas kilala sa tawag na ‘The Aftermarket Motorcycle Parts and Accessories Retail Protection Act’.

Sa pamamagitan ng panukala nating ito ay magkakaroon ng karapatan ang buyer na isauli o palitan ang binili nilang piyesa ng motorsiklo na hindi akma sa umiiral na regulasyon ng LTO hinggil sa motorcycle modification.

Dapat ding tiyakin ng retailers na lahat ng aftermarket motorcycle parts accessories na kanilang ipinagbibili ay pasado sa umiiral na regulasyon ng LTO at tiyaking may kakayahang magkabit ng piyesa ng maayos sakaling hilingin ng buyer na ipakabit na ang biniling piyesa.

Sa bawat piyesa na bibilhin ng buyer ay kinakailangang mag-isyu ng written express warranty na nakasaad ang regulasyon ng LTO kasabay ng resibo at ang retailer ay responsable rin sa pagkakabit ng biniling piyesa.

Sa panahon na masita ng traffic enforcer ang isang rider at makumpirmang ang biniling piyesa ay hindi akma, depektibo o delikado na ikinabit sa isang motorsiklo — ay may karapatan ang buyer na isauli ang naturang piyesa at ang retailer ang sasalo ng pagkalugi kung meron man.

Ang Department of Trade and Industry (DTI) sa pakikipagtulungan ng LTO ang pangunahing ahensya na magbabantay sa pagpapatupad ng naturang batas at ang DTI din ang responsable sa pamamahala sa lahat ng kahilingan hinggil sa reimbursement ng mga buyer.

Sakaling maging isang ganap na batas ang ating panukala ay maiibsan ang mga aksidente na kadalasang dahilan ay ang mga depektibong piyesa at mga aksesoryang delikado na hindi pasado sa panuntunan ng LTO ngunit lantarang ipinagbibili sa merkado bukod pa sa protektado na ang ating mga ‘kagulong’.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.