‘Pinas, pasok sa World’s worst traffic

ni Atty. Rodge Gutierrez @Mr. 1-Rider | September 21, 2023

Sa kauna-unahang pagkakataon ay may isang tumayo at nanindigang tatapusin umano ang problema sa trapiko sa bansa -- ito ang ating Pangulong Ferdinand ‘Bongbong’ Marcos Jr. (P-BBM) na tiniyak na mabibigyan na ng solusyon ang napakatagal ng problemang ito.

Nag-ugat ang pangako ni P-BBM dahil sa kahilingan umano ng batang estudyanteng si Frachesco N. Cristiano na nag-iwan ng sulat nang minsan itong bumisita sa Bahay Ugnayan Museum sa Palasyo ng Malacañang kamakailan.

Sa lingguhang vlog na isinasagawa ni P-BBM ay binasa nito ang lahat ng mensahe ng iba’t ibang klase ng pagbati sa social media at kasunod nito ay pumili ito ng ilang sulat ng mga estudyante na dumalaw sa nabanggit na museum.

Mapalad na isa sa napili ni P-BBM ang iniwang liham ni Cristiano na kanyang binasa na may nakasaad na “Dear BBM, please remove traffic in the Philippines”.

Agad namang nagbigay ng tugon si P-BBM na ginagawa na umano ng kanyang pamahalaan ang lahat ng makakaya upang maibsan ang problema sa matinding sitwasyon ng trapiko na napakahabang panahon ng problema.

Ipinaliwanag ni P-BBM na wala umanong Pilipino ang may gusto sa matinding sitwasyon ng trapiko, kaya ipinangako nito na gagawin umano ang lahat kaya naglalagay na ng mga bagong kalsada para mabawasan ang trapik at hindi na mahirapan ang lahat.

Ang pangakong ito ni P-BBM ay umani ng magkahiwalay na pananaw sa social media -- merong natuwa at meron ding hindi naniniwala na maisasakatuparan ni P-BBM ang naturang pangako lalo na ang matinding sitwasyon sa kahabaan ng EDSA.

Dalawang taon na ang nakararaan nang magsagawa ng masusing pag-aaral ang may 84 bansa sa iba’t ibang bahagi ng mundo at hindi naman nabigla ang ating mga kababayan nang maisama ang Pilipinas sa mga bansang may pinakamalalang sitwasyon sa daloy ng trapiko sa buong mundo.

Sa inilabas na ulat ng Numbeo na isang crowd-sourced global statistic database ay inilagay nito ang Pilipinas sa pang-siyam sa overall list para sa taong 2020 at hindi pa ito nasusundan hanggang sa taong kasalukuyan.

Sa kasamaang palad ay walang bansa na mula sa ASEAN region ang nakasama sa top 10 kaya lumabas na ang Pilipinas ang may pinakamalalang sitwasyon kung problema sa daloy ng trapiko ang pag-uusapan sa Southeast Asia.

Narito ang top 10 na may malalang sitwasyon at ang corresponding traffic index scores: Nigeria (308.03); Sri Lanka (293.36); Kenya (274.71); Bangladesh (255.21); Egypt (240.72); Iran (220.43); Peru (214.86); India (207.52); Philippines (198.84) at Colombia (198.41).

Ang susunod na sampu pang bansa na malala rin ang sitwasyon ay binubuo naman ng Turkey, Indonesia, Jordan, South Africa, Lebanon, Russia, Brazil, Mexico, Argentina, at Thailand.

Ang pinakahuling sampung bansa sa kabuuang ulat o may maayos na sitwasyon sa daloy ng trapiko ay ang Switzerland, North Macedonia, Czech Republic, Iceland, Finland, Norway, Bosnia and Herzegovina, Denmark, Estonia, at Austria.

Ang Pilipinas simula pa noon ay nananatili na sa hanay ng world’s worst traffic, dahil noong 2019 -- partikular sa Metro Manila na noon ay naitala sa ikalawang puwesto sa overall ayon sa TomTom Traffic Index 2019 habang ang Bengaluru sa India ang nanguna.

Noong 2018, inihanay din ng Asian Development Bank ang Metro Manila bilang ‘most congested city in developing Asia’ habang ang Boston Consulting Group ay itinala naman ang Metro Manila sa ikatlong puwesto bilang worst traffic in Southeast Asia para sa taong 2017.

Ngayon heto at nangangako si P-BBM -- bigyan sana natin ng pagkakataon at huwag sana nating itulad sa kandidatong si Eddie Gil na nangakong babayaran lahat ng utang ng Pilipinas ngunit hindi natin pinaniwalaan kaya hindi natin ibinoto.

Wala tuloy makapagpatunay kung kaya talagang bayaran ni Eddie Gil ang ating utang o hindi sakaling mahalal siyang pangulo ng bansa dahil hindi natin siya binigyan ng pagkakataon.

Sa puntong ito ay bigyan natin ng pagkakataon si P-BBM na patunayang kaya niyang magmilagro para tuluyang mawala ang problema sa pagsisikip ng trapiko at kung hindi niya matutupad ay doon natin siya kastiguhin at sabihing ‘walang himala’!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Batas-trapiko, kulang sa pangil vs. Pasaway na motorista

ni Atty. Rodge Gutierrez @Mr. 1-Rider | September 19, 2023

Alam nating wala kahit isa sa atin ang may gustong maipit sa gitna ng trapik lalo na sa kahabaan ng EDSA at hindi rin ito dahilan para basta na lamang lapastangin ng mga sasakyan ang ating lansangan na may mga umiiral na panuntunan.

Parang wala na kasing sinasanto ang ilan sa ating mga driver ng kahit anong sasakyan na alam nang bawal mag-counterflow ay ginagawa pa rin at walang pakundangan kung magpalit ng linya kahit namamaos na ang busina ng nakasunod na sasakyan, dahil ang mahalaga ay mauna siya sa kalsada.

Parang karaniwan na ring tanawin na maging ang sidewalk na dapat daanan ng mga tao ay sinasakop pa rin ng mga sasakyan kung kaya rin lang. At ang pinakamatindi ay ang beating the red light lalo na kung bumper to bumper ang sitwasyon ng daloy ng trapiko.

Gitgitan, siksikan, biglang pasok sa linya, walang tigil sa paggamit ng busina ang ilan lamang sa normal na pangitain sa ating lansangan at tila iilan lang ang may pakialam sa kapwa nila sasakyan dahil karamihan ay iniisip nilang mas mahalaga ang kanilang oras kumpara sa iba.

Kalakaran na rin na bawat tsuper na mahuhuli dahil sa paglabag sa batas-trapiko, ay hindi agad inilalabas ang driver’s license at sa halip ay makikipagdiskusyon muna sa traffic enforcer bago tuluyang ibigay ang lisensya.

Kapag hindi nakuha sa sindak ng tsuper ang enforcer ay magtatangka na itong manuhol dahil tila kultura na, nakasanayan o matagal ng kalakaran na ang ilan sa ating mga traffic enforcer ay tumatanggap ng ‘lagay’ para hindi na sila hulihin.

May mga nagsasabi na hindi naman lahat ng enforcer ay tumatanggap ng ‘lagay’ pero hindi rin natin maitatanggi na meron talagang sumisimple pa rin lalo na ‘yung mga enforcer na gabi na ay nakatago sa mga poste at biglang manggugulat ng huhulihin — tiyak pera-pera ‘yun.

Kaya heto at hirap na hirap ang Inter-Agency Council for Traffic (I-ACT) dahil mula noon hanggang ngayon ay nakatutok pa rin sila sa busway sa kahabaan ng EDSA pero walang nangyayari dahil sa rami ng pasaway na driver.

Noon pa ay nagsasagawa na ng ‘roving patrol’ ang I-ACT at binabaybay nila ang daluyan ng EDSA Carousel at dumating pa sa puntong naglagay sila ng marshals na sumasakay sa mga bus at binabantayan kung may private vehicle na inaabuso ang bus lane.

Noon pa man, viral na sa social media ang operasyon ng I-ACT na ito dahil sa sobrang dami ng mga pribadong sasakyan na nasasakote nilang dumadaan sa bus lane at talagang pila ang tumutubos ng violation ticket.

Tila hindi epektibo ang multang P1,000 at ang ipinapataw na 10 demerit points sa driver’s license dahil sa ilang ulit na operasyong isinasagawa ng I-ACT sa mismong busway ay santambak pa rin ang nahuhuli.

Sa ilalim kasi ng Land Transportation Office (LTO) demerit system, bawat driver’s license ay may 40 puntos at nababawasan ng limang puntos ang violator kapag pribado ang kanilang sasakyan.

Pero kung public utility vehicle (PUV) ang kanilang minamaneho, makakaltasan ito ng 10 puntos at sa oras na bumagsak ito sa zero ay hindi na sila makapagre-renew ng kanilang lisensya at papayagan lang silang makakuha ng student permit.

Alam naman ng ating mga kababayan na ang tanging pinapayagan lamang dumaan sa bus lane ay ang mga marked vehicle ng Armed Forces of the Philippines (AFP), Philippine National Police (PNP), mga ambulansya, truck ng bumbero at ilan pang mga emergency vehicle.

Isa sa pinakahuling saglit na operasyon ng I-ACT, ay umabot sa 20 sasakyan ng gobyerno ang hinuli at tinikitan dahil sa pagdaan sa busway sa Malibay, Pasay City ng wala namang emergency.

Kaya hindi mapatino ang mga busway dahil sa madalas na pagdaan d’yan ng mga sasakyan ng mga VIP na may mga convoy pa na sangkatutak ang blinker tapos may mga binihisan lang na mukhang miyembro ng highway patrol na nakamotorsiklo na may wangwang pero peke -- siyempre sunuran din ang mga pribadong sasakyan.

Kahit maya’t maya manghuli ang I-ACT ay hindi mauubos ang pasaway, kasi hindi takot sa umiiral na batas -- kumbaga kayang-kaya!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Neuro exam sa mga drayber na binawian ng lisensya

ni Atty. Rodge Gutierrez @Mr. 1-Rider | September 16, 2023

Matapos maglabas ng show-cause order ang pamunuan ng Land Transportation Office (LTO) ay naobliga nang sumuko ang driver ng Sports Utility Vehicle (SUV) na nasangkot sa pinakahuling road rage sa Valenzuela City na nag-viral sa social media.

Lumutang sa tanggapan ni Valenzuela City Mayor Weslie Gatchalian ang driver ng SUV na si Marlon Malabute dala ang baril na ginamit nito sa panunutok sa taxi driver na si Herminio “Henry” Daez Ong Jr. noong Agosto 19 sa Bgy. Punturin ng siyudad na nabanggit.

Pumutok ang insidenteng ito nang mag-viral noong Setyembre 6 at makaraan ang anim na araw ay sumuko nga itong si Malabute na habang isinusulat ang ulat na ito ay dinala na siya sa Valenzuela City Police Station.

Ang lahat ng detalyeng ito ay galing sa pahayag mismo ni Mayor Gatchalian sa ipinatawag nitong press conference noong nakaraang Martes kung saan iniharap mismo si Malabute kasama ang kanyang abogado.

Nauna rito, sinampahan ng kasong grave threats at alarm and scandal noong Setyembre 11 si Malabute gamit ang kumalat na video, kung saan kitang-kita na tinututukan ng baril ni Malabute ang taxi driver.

Tagumpay ang mga kaanib ng Valenzuela PNP na mahanap ang suspek at biktima makaraang pagsama-samahin ang lahat ng CCTV footage malapit sa lugar na pinangyarihan ng krimen.

Nabatid na kumpleto naman ang papeles ng baril ni Malabute, ngunit agad itong kinansela ng Philippine National Police Firearms and Explosives Office, at inatasan ang suspek na isuko na rin ang naturang baril na nasa pag-iingat na ng pulisya, maliban sa ginamit na Fortuner na hindi pa rin isinusurender.

Mula umpisa hanggang sa matapos ang isinagawang press conference ay minabuti ni Malabute na hindi na magbigay ng kahit anong komento maliban sa pagsasabing sa korte na lamang umano siya magbibigay ng paliwanag.

Maganda ang estratehiya ng suspek na manahimik upang hindi na humaba ang lahat at paglipas ng ilang araw ay unti-unti nang huhupa ang sitwasyon. Lalamig na rin ang ulo ng pobreng taxi driver habang sa huli ay malamang na magpatawad na ito dahil dagdag-abala at gastos pa sa kanya ang pagdalo sa hearing.

Tulad ng unang road rage na kinasangkutan ng dating pulis at ng isang siklista na sa kabila ng napakaraming dumamay sa siklista ay minabuti na lamang nitong patawarin ang pulis at hindi na nagsampa ng reklamo.

Umabot pa sa Senado ang iskandalong kinasangkutan ng ex-cop at cyclist ngunit wala na ring nangyari dahil sa hindi malamang kadahilanan ay tila napakahusay makiusap ng dating pulis at nakumbinsi nitong huwag na magdemanda ang siklista.

Ang ending, balik-ligaya ang ex-cop. Mabuti na lamang at may dati itong mga kaso na nahalukay at dalawang taong suspendido ang kanyang driver’s license bukod pa sa isinampang kaso ng pulisya, kaya kahit paano ay may mga kaparusahan ding kinakaharap ang dating pulis.

Ngayon, heto ang LTO na naglabas ng panibagong pahayag na plano umano nilang mas busisiing mabuti at dagdagan ang mga requirements ng sinumang nasangkot sa road rage sakaling mag-a-apply muli ng driver’s license.

Pinag-aaralan ng pamunuan ng LTO kung paano ito maisasakatuparan sa pakikipagtulungan ng PNP-Highway Patrol Group (HPG) at iba pang ahensya ng pamahalaan dahil sa sunud-sunod na insidente ng road rage.

Nais ng LTO na pagsamahin ang kanilang data sa tanggapan ng HPG upang ma-profile nila ang aplikante ng driver’s license at madetermina kung sinu-sino ang nagmamay-ari ng baril upang ma-incorporate sa aplikasyon sa lisensya.

Maganda ang hakbanging ito ng LTO, ngunit sana ay pairalin ang plano nilang ito kahit ang suspek ay hindi nasampahan ng kaso dahil pinatawad ng complainant ngunit nasuspinde naman ang driver’s license.

Habang wala pang partikular na batas hinggil sa mga de-baril na masasangkot sa road rage ay mabuting bigatan ng LTO ang mga dokumento at isailalim sa neuro examination ang mga tinanggalan ng driver’s license, sakaling kumuha silang muli ng lisensya upang makasiguro na hindi na sila mananakot sa kalye. Sana naman!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.