P3B fuel subsidy, dapat ipaliwanag ng LTFRB kung paano ginastos

ni Atty. Rodge Gutierrez @Mr. 1-Rider | October 05, 2023

Marami ang natutuwa sa fuel subsidy na pinakawalan ng gobyerno ngunit marami rin ang nagagalit na tsuper at operator dahil sa hanggang sa kasalukuyan ay hindi umano sila inaabot ng naturang subsidiya at hindi nila alam kung aabutin pa sila.

Dahil dito ay hinihiling ng ilang commuter advocacy group sa Land Transportation Franchising and Regulatory Board (LTFRB) na isapubliko ang liquidation report tungkol sa P3 bilyong fuel subsidy na dapat ipinamahagi sa mga tsuper at operator ng public utility vehicle (PUV).

Matatandaan na inaprubahan ng Department of Budget and Management (DBM) ang release ng P3 bilyon para sa implementasyon ng fuel subsidy sa transport sector na apektado ng pagtaas ng presyo ng gasolina, diesel at kerosene.

Tinawag din itong Fuel Subsidy Program (FSP) na ang layunin ay makapagbigay ng tulong sa tinatayang 1.36 milyong driver at operators na labis na naapektuhan ng sunud-sunod na pagtaas ng produktong petrolyo.

Kabilin-bilinan kasi ni Pangulong Bongbong Marcos Jr. (P-BBM) na tulungan at huwag pabayaan ang ating mga manggagawa sa sektor ng transportasyon kaya dapat ay masigurong mabibigyan lahat at walang itatangi.

Ang release ng P3 bilyong pondo ay ginawa dahil sa kahilingan ng Department of Transportation (DOTr), ayon sa Special Provision (SP) No. 7 ng DOTr-OSEC agency- na specific budget na awtorisado sa ilalim ng Republic Act (RA) No. 11936, o mas kilala sa tawag na Fiscal Year (FY) 2023 General Appropriations Act (GAA).

Matapos matukoy ng LTFRB sa tulong ng Department of the Interior and Local Government (DILG), Department of Information and Communications Technology (DICT), at ng Department of Trade and Industry (DTI), ang 1.36 milyong target na benepisyaryo ng FSP ay bibigyan na ang mga ito ng one-time fuel subsidy.

Ang mga driver at operator ng modernized version ng public utility jeepneys (PUJs) at public utility vehicle express (UVEs) ay makakatanggap ng subsidiya na P10,000.

Ang mga driver at operators ng traditional PUJs, UVEs, public utility buses, minibusses, taxis, shuttle service taxis, transport network vehicles, tourist transport vehicles, school transport vehicles, at filcabs ay tatanggap ng P6,500.

Ang tricycle drivers naman ay makakatanggap ng P1,000 at ang mga nasa delivery services naman ay makakakuha ng P1,200.

Nakapaloob sa Memorandum of Agreement (MOA) na isinumite ng DOTr, na ang subsidiya na iri- release sa DOTr-OSEC, ay buong-buong ibibigay sa LTFRB bilang implementing agency.

Kumbaga, ayos na ayos ang sistema kaya nakapagtataka na maraming mga driver ang nagrereklamo na hindi umano sila inabot ng subsidiya o sadyang reklamador lang ang maraming tsuper. Pero bakit naman sila magrereklamo kung nakatanggap sila?

Sa isang banda ay hindi kasi tama na magkaroon pa ng problema ang subsidiya na dapat ipamahagi sa mga driver at operator dahil napakaliit lang naman nito kumpara sa P10.14 bilyong confidential fund na hinihingi ng administrasyon para sa 2024.

Kaya labis ang hinanakit ng mga driver at operator na hindi inabot ng subsidiya dahil ang layunin nga lang naman nito ay maibsan ang epekto ng patuloy na taas-presyo ng petrolyo sa sektor ng transportasyon para maawat ang pagtaas ng pasahe sa mga pampublikong sasakyan.

Kamakailan ay ipinaubaya na ng LTFRB sa National Economic and Development Authority (NEDA) ang pag-aaral kung magkano ang dapat aprubahan na dagdag-pasahe upang maiwasan umanong maging sanhi ito ng pagsipa ng inflation rate.

Sa puntong ito, tila nagkaroon ng komplikasyon dahil kung talagang naipamahagi nang maayos ang subsidiya na sasalag dapat sa taas-pasahe — bakit noong Martes ay inaprubahan na ng LTFRB ang petisyong P1 provisional fare increase para sa modern at traditional jeepney sa buong bansa na epektibo na sa Oktubre 8.

Kung tutusin, 71% ng ating mananakay ang tutol sa dagdag-pasahe dahil sa malaki umano ang epekto nito sa pang-araw-araw nilang gastusin kaya nga naglabas ng subsidiya upang pigilan ito.

Hindi tayo tutol sa dagdag-pasahe, ang nais lang natin ay pakinggan ang hiling na ipaliwanag ng LTFRB kung paano nila ginastos ang P3 bilyon dahil naguguluhan ang ilang transport group —lalo na ang mga hindi nabigyan dahil tiyak na itsapuwera na sila ngayong aprubado na ang P1 fare increase. Ano ba talaga?

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Oil price hike non-stop, hirit na taas-pasahe, nakatengga pa rin

ni Atty. Rodge Gutierrez @Mr. 1-Rider | October 03, 2023

Nakatakdang magpatawag ang Land Transportation Franchising and Regulatory Board (LTFRB) ngayong araw, Oktubre 3, ng isa pang pagdinig hinggil sa nakabinbing fare hike petition na inihain ng mga transport group.

Ito ay makaraang hindi pa rin madesisyunan kung aaprubahan ba ang hirit na dagdag-pasahe sa pampasaherong jeepney makaraang magsagawa rin ng pagdinig noong nakaraang Agosto 28 na pinangunahan din ng LTFRB.

Ayon sa LTFRB, kailangan pang magsumite ng mga transport group ng supplemental petition, upang mapalawig sa buong bansa ang hinihiling na fare hike bago pa muling magpatawag ng panibagong hearing na itinakda ngayong araw.

Malaki naman umano ang tsansa na maaprubahan ang hinihinging P1 provisional fare, o pansamantalang dagdag-pasahe habang mataas pa ang presyo ng diesel, ayon mismo sa LTFRB.

Kung sakaling maaprubahan ay magiging P13 na ang minimum na pamasahe sa mga tradisyunal na jeep mula sa kasalukuyang P12, habang magiging P15 naman ang minimum sa modern jeep, mula sa kasalukuyang P14.

Ayon sa mga transport group, inip na inip na sila sa napakabagal na proseso hinggil sa hirit nilang dagdag-pasahe lalo pa’t umabot na sa P17 ang itinaas ng presyo sa kada litro ng diesel.

Sa tuwing magkakaroon umano ng pagdinig ay palagi silang umaasa na mapagbibigyan na ang kanilang kahilingan hinggil sa P1 provisional fare increase ngunit palaging naaantala.

Sa isang banda ay nakabuti na rin ang pagkakaantala dahil nagkaroon ng pagkakataon ang mga transport group na makapagsumite ng supplemental petition upang maipatupad sa buong bansa ang dagdag-pasahe para lahat ay makinabang.

Sana, ngayong araw ay magkaroon na ng resulta ang isasagawang pagdinig dahil panahon na para unahin naman natin ang kapakanan ng mga tsuper ng tradisyunal na jeepney na mas mataas pa rin ang porsyento na nasa mahirap na kalagayan.

Hilong talilong na ang sektor ng pampublikong transportasyon sa sunud-sunod na pagtaas sa presyo ng gasolina at krudo — na kung umaaray na ang mga may-ari ng mga pribadong sasakyan na mas may kakayahang gumasta ay mas lalo na ang mga tsuper na sa pamamasada lamang umaasa.

Matatandaan na unang inanunsyo ng transport group na Pasang Masda ang hirit na P1 provisional increase sa LTFRB noon pang nakaraang Agosto 19 ngunit hanggang ngayon ay wala pa ring nangyayari pero sunud-sunod pa rin ang pagtaas ng produktong petrolyo.

Noong nakaraang Agosto 11 ay nagpadala rin ng liham ang Liga ng Transportasyon at Operators sa Pilipinas, Pagkakaisa ng mga Tsuper at Operators Nationwide, Stop and Go Transport Coalition, at Federation of Jeepney Operators and Drivers Association of the Philippines sa LTFRB at humihingi naman ng P2 dagdag-pasahe para sa unang apat na kilometro.

Iisa ang hinaing ng mga transport group bagama’t hindi sila magkakasabay ng apela ngunit nagkakaisa silang dapat na talagang itaas ang pamasahe sa buong bansa dahil sa hindi na mapigilang oil price hike.

Samantala, nanawagan ang Manibela at PISTON sa pamahalaan na ibasura na ang fuel excise tax at ang Downstream Oil Industry Deregulation Act.

Lumalabas kasi na halos P250 kada araw ang nawawalang kita ng mga namamasadang tsuper dahil mataas ang presyo ng petrolyo, kung kumukonsumo ng 30 litro kada araw sa loob ng 25 araw ay halos 7,000 pesos umano ang nawawala sa kanilang kita sa loob ng 25 araw.

Noong unang pagdinig ay hindi inaprubahan ng LTFRB ang kahilingang P1 ‘surge fee’ ng ilang transport group dahil sa masyado umanong malaki at masakit sa bulsa ng mga mananakay at sa halip ay isinulong ang fuel subsidy.

Marami naman ang nakinabang sa hakbanging ito ng pamahalaan ngunit hindi maiiwasan na may mga hindi inaabot ng fuel subsidy, lalo pa ang grupo ng mga tricycle driver sa iba’t ibang bahagi ng bansa na biktima rin ng walang habas na pagtaas ng gasolina.

Samantala, may mga nakaamba pang dagdag-bawas sa presyo ng gasolina, krudo at kerosene — magbabawas ng kaunti tapos tataas ng grabe kaya tama lang na unahin naman natin ang kapakanan ng ating mga namamasadang tsuper.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

MMDA may intel fund, paki-explain lang, plis!

ni Atty. Rodge Gutierrez @Mr. 1-Rider | September 30, 2023

Sa tuwing mauungkat ang pagbaha sa Metro Manila ay palagi na lamang tayong naghahanap ng masisisi at ang mga ahensya ng pamahalaan na itinalaga para pangasiwaan ang problema sa baha ay tila hindi naman epektibo.

Sa halip na gawan ng paraan upang hindi na bumaha ay kung anu-anong katuwiran sa interview ang sinasabi kaya grabe ang pagbaha. Pagkatapos ng interview ay huhupa na ang sitwasyon at maghahanda na naman ng bagong ikakatuwiran para sa susunod na pagbaha.

Pero, mas nakakagulat pa kumpara sa hindi masolusyonang pagbaha nang kumalat ang balita na ang Metro Manila Development Authority (MMDA) ay tumatanggap pala ng intelligence fund simula pa noong 2018.

Medyo mainit pa naman ang usapin hinggil sa kung anu-anong fund na hinihingi ng iba’t ibang ahensya ng gobyerno dahil bukod sa intelligence ay may confidential fund pa na hindi maintindihan ng marami nating kababayan na masyadong sensitibo kapag kaban ng bayan ang pinag-uusapan.

Ngayon heto at kinukuwestiyon ng kasama natin sa Kongreso na si Rep. Raoul Manuel noong nakaraang Setyembre 26, ang proposed P21 milyong intelligence funds para sa Metro Manila Development Authority (MMDA) sa taong 2024.

At maging ang inyong lingkod ay inusisa ang intelligence fund na tinatamasa ng MMDA at tahasang kinumpirma ni Caloocan City 2nd District Rep. Mary Mitzi Cajayon-Uy na ang naturang ahensya ay tumatanggap ng intelligence fund simula pa noong 2018.

Tulad ng marami nating kababayan na nabigla sa intelligence fund ng MMDA ay inalam natin ang dahilan kung bakit kailangan ng naturang ahensya ng intelligence fund, at inalam din natin kung nagsasagawa ba ng intelligence at counter intelligence operations ang MMDA.

Bilang budget sponsor ng MMDA, ipinaliwanag ni Rep. Uy na ang MMDA umano ay bahagi ng Metro Manila Network Against Terrorism (MNAT) sa ilalim ng National Task Force to End Local Communist Armed Conflict (NTF-ELCAC) at ang sinusunod na guidelines hinggil dito ay aprubado ng Metro Manila Council.

Kung anggulo ng katuwiran ang pag-uusapan, tila pasok naman ang paliwanag ni Rep. Uy ngunit tila hindi kumbinsido ang ating mga kababayan kung bakit binibigyan ng intelligence fund ang MMDA.

Maliwanag kasi na hindi entitled o karapat-dapat sa intelligence fund ang MMDA, kung may mga nais silang proyekto o makabuluhang gawain na gusto nilang gawin ay wala namang problema basta’t tiyakin lamang na galing ito sa ibang available funds pero hindi galing sa intelligence fund.

Kung pagbabasehan natin ang joint circular no. 2015-01, ang mga gastusin hinggil sa intelligence tulad ng information gatherings activities ay karaniwang ginagawa ng mga military personnel at intelligence practitioners upang mapaghandaan ang anumang banta sa national security.

Sa mismong circular ay nakasaad ang mga eksperto o agents na nakatalaga at awtorisado na magsagawa ng intelligence information gatherings at surveillance activities. Nakadetalye ang mga ahensya ng pamahalaan at hindi kasama sa listahan ang MMDA.

Nangunguna ang Department of National Defense Online Sexual Exploitation of Children and Government Arsenal; Philippine Navy; Philippine Air Force; Philippine Army; Armed Forces of the Philippines-General Headquarters; Philippine National Police; National Intelligence Coordinating Agency; Philippine Drug Enforcement Agency at iba pang national government agencies na may nakalaang pondo sa ilalim ng General Appropriation Act (GAA) o iba pang batas.

May punto rin talaga si Rep. Manuel na hindi kasama ang MMDA sa kategorya ng uniformed at military personnel o kahit anong intelligence practitioner.

Nasa P21 milyong intelligence fund ang pinag-uusapan natin dito at mabuting naungkat ang isyung ito para maitama o kaya ay maipaliwanag nang maayos sa taumbayan kung bakit may intelligence fund ang MMDA.

Hindi tayo tutol na paglaanan ng pondo ang MMDA, ang punto ko lang dapat ay maintindihan ng taumbayan ang papel na ginagampanan ng MMDA kung bakit sila may intelligence fund para maliwanagan kung dapat pa ba silang bigyan o hindi na.

Huwag naman natin agad na kondenahin ang MMDA, dahil posibleng may mga ginagastusan silang impormante para magbantay at magbigay ng impormasyon kung may paparating na baha at kung sino ang naglalagay ng bara sa mga drainage kaya bumabaha.

Tulad nitong isa sa pinakahuling insidente ng pagbaha, may nakuha umano silang isang buong plywood na nakabara sa isang drainage kaya nagbaha ang maraming lugar sa Metro Manila.

Hayyyyyy!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.