Pagsuspinde kay LTFRB Sec. Guadiz, panalo ng transport group

ni Atty. Rodge Gutierrez @Mr. 1-Rider | October 12, 2023

Bago pa man pumutok ang balita hinggil sa panibagong pagkilos ng grupong Samahang Manibela Mananakay at Nagkaisang Terminal ng Transportasyon (SMMITT) o mas kilala sa tawag na MANIBELA ay una natin itong isinulat noong nakaraang Sabado.

Kasunod nito ay humarap na nga sa media ang MANIBELA at buong tapang na isinawalat ang umano’y talamak na korupsiyon sa loob ng Land Transportation Franchising and Regulatory Board (LTFRB) para makakuha ng permit, prangkisa at iba pa.

Iniharap mismo ni MANIBELA chairperson Mar Valbuena sa isinagawang press conference noong nakaraang Lunes ang whistleblower na si Jeffrey Tumbado na dating executive assistant ni LTFRB Secretary Chairman Teofilo Guadiz III na siyang nagpasabog ng talamak na anomalya.

Ibinulgar ni Tumbado kung gaano kahirap kumuha ng special permit, route permit, franchise at iba pa, ngunit bumibilis naman kung maglalagay ang mismong aplikante at umaabot umano sa P5 milyon ang lagayan dahil hindi lang umano ang mga taga-LTFRB ang nakikinabang.

Mariing sinabi ni Tumbado na hindi lang si Chairman Guadiz ang nakikinabang dahil may iba pang matataas na opisyal mula sa Department of Transportation (DOTr) at Malacañang nag-utos na kolektahin ang pera galing sa ilegal na transaksyon.

Dahil kapani-paniwala ang pagbubunyag ni Tumbado ay agad na sinuspinde ni Pangulong Ferdinand ‘Bongbong’ Marcos Jr. (P-BBM) si LTFRB Chairman Guadiz, matapos matumbok ang pagkakasangkot nito sa umano’y korupsiyon sa ahensya.

Nakatutuwa ang naging hakbang na ito ni P-BBM dahil ipinakita niyang hindi niya kinukonsinti ang mga katiwalian sa kanyang administrasyon na pinatotohanan mismo ng kanyang Presidential Communications Office (PCO) ilang oras lang matapos ang press conference.

Sabagay hindi naman talaga lihim ang napakatagal ng anomalya sa LTFRB dahil sa wala namang gustong lumantad para magsalita ngunit ngayon ay parang bombang sumabog ang mga opisyal ng LTFRB na nagsasagawa ng ‘ruta for sale’ scheme.

Tahasang ipinagtapat ni Tumbado na sa ilalim ng ‘ruta for sale’ ay kailangang magbayad ang mga operator sa transport officials ng hanggang P5 milyon para makakuha ng mga ruta, prangkisa, at mga espesyal na permit, bukod sa iba pang transaksyon.

Kahit hindi umano puwede, lalo na ‘yung mga nasa probinsiya na gustong magkaroon ng prangkisa — basta may pang ‘lagay’ ay walang problema ngunit ang mga walang panggastos kahit puwede at kumpleto ang papeles ay hindi mabibigyan.

Buong tapang ding sinabi ni Tumbado na handa niyang patunayan ang lahat dahil napakarami niyang hawak na ebidensya na marahil ay isa rin sa pumukaw sa atensyon ni P-BBM para suspendihin si Guadiz.

Ayon pa kay Tumbado ay may hawak siyang mga ebidensya kabilang ang mga screenshot ng mga text message at audio recording ng mga pag-uusap na may kaugnayan sa umano’y tiwaling gawain.

Inamin ni Tumbado na dati siyang tumatayo ‘middleman’ sa mga ilegal na transaksyon at maging ang mga regional officials ng LTFRB ay may quota umanong P2 milyon na ibibigay sa central office.

Si Tumbado ay nagsilbi bilang executive assistant noong Pebrero ngunit sinabi niyang nagbitiw siya noong Setyembre matapos ma-demote at ilipat sa isang opisina para sa Public Utility Vehicle Modernization Program.

Hindi naman natinag si Chairman Guadiz dahil nagkasa rin ito ng sariling press conference upang pabulaanan ang mga isinawalat ni Tumbado ngunit hindi na nito napigil ang ipinataw na suspensyon ni P-BBM.

Nagpalabas din ng pahayag si DOTr Secretary Jaime Bautista na magsasagawa umano sila ng imbestigasyon hinggil sa ibinunyag ni Tumbado upang mabigyang linaw ang lahat.

Pumalag ang MANIBELA sa pahayag si Sec. Bautista na magsasagawa ng imbestigasyon dahil maging ang DOTr ay kasama umano sa kanilang inirereklamo na sangkot sa katiwalian na nagpapahirap sa transport group.

Dahil d’yan ay magkakasa tuloy ang MANIBELA ng transport strike simula Oktubre 16 na bukod sa katiwalian ay hiling nilang sibakin ang mga tiwaling opisyal at kasama mismo si DOTr Sec. Bautista.

Nauunawaan natin ang kagustuhan ng MANIBELA na buong pagbabago sa sistema ang kailangan ngunit sana ay maisip nilang malaking panalo na sa kanilang laban ang pagsuspinde kay Sec. Guadiz — patunay na kinakalinga sila ng pamahalaan.

Sana ay magwakas na ang usaping ito at humantong sa mapayapa at positibong resulta.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Bagong kotse at motor, 10 days lang may plaka na

ni Atty. Rodge Gutierrez @Mr. 1-Rider | October 11, 2023

Mula nang maupo ang bagong pamunuan ng Land Transportation Office (LTO) ay tila nakakakita na tayo ng unti-unting pagbabago mula sa sandamakmak na anomalya at napakabagal na serbisyo ay medyo nararamdaman na ang pagbilis ng tugon.

Hindi naman talaga biro ang kinakaharap na problema ni LTO chief Vigor Mendoza II na bukod sa rami ng anomalya, sindikato at napakabagal na serbisyo ay inuulan ang naturang tanggapan ng mga reklamo dahil sa dami ng ‘fixer’.

Ngunit, sa rami nang tinatanggap na sumbong at reklamo laban sa LTO ay hindi kinakitaan ng pagdadalawang-isip itong si Mendoza at sa halip ay hindi ito natinag sa kanyang kinauupuan upang tuluyang ayusin ang napakatagal nang problema sa LTO.

Sa rami ng pumupuna dahil sa santambak na problemang inabutan ni Mendoza sa LTO, kailan man ay hindi nagbalat-sibuyas itong si Mendoza at sa halip ay lalo niyang pinagbuti ang kanyang trabaho upang isa-isang matugunan ang mga sumbong at reklamo.

Tulad na lamang ng ibinulgar natin kamakailan na may kapahamakang naghihintay sa ating mga kababayang bumibili sa mga nagpapanggap na mga empleyado ng LTO na nag-aalok online gamit ang Facebook na puwedeng magkaroon ng driver’s license ng hindi na kukuha ng eksaminasyon at actual testing kapalit ng kaukulang bayad.

Iba-iba ang presyo ng iniaalok na lisensya online at kapansin-pansin na sinusunod din nila ang proseso sa LTO na dapat ay mayroong student permit at sila na ang bahala sa lahat kapalit ng P5,000 hanggang P7,000 na bayad para sa non-professional driver’s license.

May special package pang inaalok ang mga ‘fixer’ online na puwedeng kumuha ng driver’s license na hindi na kukuha ng eksaminasyon sa LTO, hindi na isasailalim sa medical examination, wala ng actual driving at ipadala na lamang online ang kanilang 1x1 picture at magkakaroon na sila ng tunay na driver’s license ngunit mas mahal ang ganitong serbisyo.

Agad-agad ay umaksyon ang LTO at mabilis na nakipag-ugnayan sa Anti-Cybercrime Group ng Philippine National Police (ACG-PNP) upang tugisin ang nasa likod nito kaya sa mas maagang panahon ay natigil ang operasyon ng mga ‘fixer’ online.

Kasunod nito, isinulat din natin na bahagyang nag-lie low ang mga kasabwat ng mga umano’y tiwaling empleyado ng LTO at rumaraket naman sa halagang P200 kapalit ng mabilis na hassle-free release ng plate number ng sasakyan.

Ibig sabihin gumalaw na ang matagal nang sindikato umano sa loob ng LTO para bumagal at humirap ang releasing ng plate number upang magkaroon ng pagkakataon ang mga ‘fixer’ at ilang empleyado mismo para magkaroon na naman ng karagdagang kita.

Nabatid na may mga tiwaling tumatanggap umano ng P200 na ‘padulas’ upang hindi na pumila ang isang car owner sa LTO district offices at iba pang distribution sites habang tila nasasamantala ang paspasang pamamahagi na ng license plates.

Hindi rin nagpatumpik-tumpik si Mendoza at sa halip ay agad na umaksyon kasabay ng panawagan sa publiko na isumbong sa kanilang tanggapan ang sinumang manghihingi ng pera kapalit ng mabilis na pagkuha ng plate number ng sasakyan at nangako itong mapaparusahan ang sinuman kahit matagal ng sindikato sa LTO.

Ang pinakahuli ay ang milyun-milyong problema sa backlog ng plate number dahil kulang-kulang 8,000 bagong kotse at halos 45,000 bagong motorsiklo ang nairerehistro kada linggo at pilit hinahabol ang problemang 16,040,630 plaka ng LTO.

Ngayon heto, buong giting na siniguro ni Mendoza na solve na ang problema sa backlog at pinaninindigan nitong mabilis na ang manufacturing at distribution ng license plate sa mga motorista.

Personal na ininspeksyon ni Mendoza ang plate making plant na umano’y nagsimula sa five equipment na ngayon ay may walong makina na gumagana at kayang gumawa ng 32,000 plaka kada araw na siyang tatapos sa matagal nang problema sa backlog.

Ipinapangako ni Mendoza na kapag bumili umano ng bagong kotse o motorsiklo ay release agad ang plate number sa loob ng 10 araw at hindi na kailangang maghintay ng mahabang panahon.

Wow! Sana ganyan lahat ng itatalagang mamumuno sa ahensya ng pamahalaan, kapag binabatikos lalong pinagbubuti at hindi ‘yung puro palpak na ang trabaho, hindi na maresolba ang trapik, palaging lubog sa baha kahit kaunting ulan lang tapos balat-sibuyas pa kapag pinupuna. Sana, ayusin ang trabaho kesa mapikon!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Mga LTFRB offc’l., sasampahan ng kasong katiwalian sa Ombudsman ng transport group

ni Atty. Rodge Gutierrez @Mr. 1-Rider | October 07, 2023

Hindi na umano hihintayin ng grupong Samahang Manibela Mananakay at Nagkaisang Terminal ng Transportasyon (SMMITT) o mas kilala sa tawag na MANIBELA ang papalapit na deadline na itinakda ng Land Transportation Franchising and Regulatory Board (LTFRB) hinggil sa phaseout ng tradisyunal na jeepney.

Sa halip na maghintay sa itinakdang phaseout sa Disyembre 31 ng taong kasalukuyan ay nakatakdang magsampa ng kasong katiwalian ang grupong MANIBELA sa Office of the Ombudsman laban sa apat na opisyal umano ang LTFRB.

Sadyang hindi muna inilabas ng MANIBELA kung sinu-sino ang mga sinasabing tiwaling opisyal ng LTFRB na kanilang sasampahan ng kaso sa susunod na linggo ngunit tinitiyak nilang papanagutin umano ang mga ito sa labis na pahirap na kanilang dinaranas sa naturang ahensya.

Ayon sa paliwanag ng MANIBELA, grabe ang katiwalian at pangungurakot umano na kanilang dinaranas sa kamay ng mga tukoy na opisyal ng LTFRB hinggil sa pagproseso ng iniaalok nilang pagbabago sa ilalim ng modernization program.

Matapos umanong magsampa ng kaso laban sa mga nasabing opisyal ng LTFRB ay agad silang magtutungo sa UP Hotel sa loob mismo ng campus ng naturang unibersidad upang makapagsagawa ng press conference at doon ay isa-isang nilang ibubunyag ng mga opisyal na sangkot sa anomalya.

Tila wala na ring aasahan sa Senado ang transport group na pigilan ang napipintong phaseout ng tradisyunal na jeepney dahil maging si Sen. Grace Poe ay hinimok ang lahat ng tsuper ng public utility vehicles na gamitin ang oportunidad na mahasa ang kanilang kasanayan sa pagmamaneho sa lansangan sa pamamagitan ng paggamit ng ‘Tsuper Iskolar Program’ na puwedeng makuha online.

Maayos ang hakbanging ito dahil mapapalawak nito ang kaalaman ng isang driver hinggil sa pagmimintine at pagkukumpuni ng sasakyan, at mapapalawak ang kaalaman patungkol sa road safety at magagamit sa pag-a-apply kahit sa ibang bansa.

Nitong 2023 budget ay kasamang inilaan ang P100 milyong pondo para sa ‘Tsuper Iskolar Program’ para sa PUV drivers at hiwalay na P100 milyon para sa ‘ExTsuperneur Program’ na sadyang inilaan para sa motorista upang magkaroon ng kasanayan na magagamit nila para sa bagong pagkakabuhayan.

Tulung-tulong ang Department of Transportation (DOTr) sa pamamagitan ng Land Transportation Office (LTO) at Technical Education Skills and Development Authority (TESDA) na hubugin ang mga tsuper na magkaroon ng pormal na edukasyon at sertipikasyon na magagamit nila sa pagpapatuloy sa kanilang hanapbuhay.

Kapaki-pakinabang ang paghahanda na isinagawa ni Sen. Poe dahil nakapailalim naman ang entrepreneurship program sa DOTr sa pakikipagtulungan ng Department of Labor and Employment (DOLE) na lahat ay libre ang isasagawang pag-aaral.

Sinadyang gawing madali ang proseso para makakuha ng scholarship program dahil puwede nang mag-aplay sa online at maaaring magpunta ang aplikante sa regional offices ng ahensya upang makakuha ng slot sa mga isasagawang training.

Isa ito sa matibay na patotoo na wala ng atrasan ang isasagawang phaseout laban sa tradisyunal na jeepney kaya nga may iniaalok na bagong programa si Sen. Poe dahil alam na niya ang kahihinatnan ngunit tila hindi ito sapat sa kagustuhan ng mga tsuper.

Hindi umano matanggap ng transport group sa plano ng LTFRB na patayin ang kanilang hanapbuhay gamit ang Dept. Order 2017-011--ito ang pagpasok sa consolidation at pagkuha ng minibus na harap-harapan umanong nagbaon sa utang sa lahat ng individual operator maging PUJ or UV Express man.

Ngayong baon na umano sa utang sa bangko ang maraming operator at tsuper na nangangamba na baka isang araw ay bigla na lang hatakin ang kanilang mga sasakyan ng walang kalaban-laban.

Kaya habang papalapit ang deadline sa darating na Disyembre 31, ng phaseout ng tradisyunal na jeepney ay painit din nang painit ang nararamdamang galit ng ilang transport group na tutol sa phaseout.

Sa halip na ‘Manigong Bagong Taon’ ay giyera sa pagitan ng LTFRB at transport group ang sasalubong sa pagpasok ng 2024.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.