Lahat ng tsuper, dapat pasok sa Modernization Program, walang maiiwan sa kangkungan

ni Atty. Rodge Gutierrez @Mr. 1-Rider | October 19, 2023

Nitong nakaraang Lunes ay hinimok ni Pangulong Ferdinand ‘Bongbong’ Marcos Jr. (P-BBM) ang pribadong sektor na mag-invest sa electric vehicle (e-vehicle) manufacturing facilities sa Pilipinas.

Sinabi ni Marcos, na panahon na umano upang makilahok sa pagsisikap ng pamahalaan para maging bahagi ang Pilipinas ng ‘global chain of electric vehicle’ sa pamamagitan ng pag-i-invest sa mga manufacturing sa bansa.

Nais ni P-BBM na makamit ng pamahalaan ang mithiin na maitaas ang share ng electric vehicle na maging 10 o 50 porsyento sa taong 2040 dahil ang paglipat umano sa electric vehicle ay bahagi ng panuntunang mapanindigan ang ating pananagutan sa ilalim ng Paris agreement.

Sa ilalim ng treaty, nakipagkasundo tayo na ang greenhouse gas emissions ay mababawasan at maiiwasan ng 75 porsyento mula 2020 hanggang 2030 at kabilang sa binigyang diin ang sektor ng transportasyon sa bansa na siyang may pinakamalaking source ng energy-related greenhouse gas.

Kumbaga, napakalaki ng pananagutan natin sa Paris agreement kaya ganu’n na lamang ang pagpupursige ng Pangulo na maisulong ang electric vehicle sa buong bansa.

Kung pagbabasehan natin ang tinatahak na direksyon ni P-BBM ay tila wala nang puwang kahit katiting ang kinakaharap na problema ng tradisyunal na jeepney sa bansa kung saan kabi-kabila na ang dinaranas nating protesta para tutulan lamang ang papalapit na phaseout sa darating na Disyembre 31.

Kung lilingunin natin ang kasaysayan, ang jeepney ay orihinal na ginawang US military jeep na iniwan sa ating bansa matapos ang World War II, na pinahaba at pinaganda ng ating mga ninuno upang magamit na pampasaherong sasakyan na mas mura ang pamasahe kumpara sa taxi, train o bus.

Taong 2017 ay inanunsyo ng Land Transportation Franchising and Regulatory Board (LTFRB) ang jeepney phaseout sa ilalim ng Public Utility Vehicle Modernization Program (PUVMP) dahil hindi na umano ito ligtas at nakakasira sa kalikasan.

Nais nilang palitan ang mga jeepney na 15 taon pataas ang edad ng bago na aayon sa Philippine National Standards o ng electric power o Euro 4-compliant diesel engine.

At ang phaseout na ito ay nag-atas sa mga jeepney operators na lumahok sa mga cooperatives o corporations bago matapos ang taong 2023 upang matulungan umano sila na makapag-loan para makabili ng ‘modern jeepney’.

Dito nagkakaroon ng matinding usapin sa pagitan ng pamahalaan, mga driver at operator na hindi lahat ay kumbinsido sa nais na mangyari ng gobyerno dahil mahirap paghiwalayin ang kabuhayan at modernisasyon para sa sektor ng transportasyon.

Masyado umanong mahal ang tinatawag nilang ‘modern jeepney’ na minibus ang hitsura at wala nang alaala ng tradisyunal na jeepney na isa pa sa ikinalulungkot ng ilan nating kababayan na masyadong sentimental sa nakaraang kasaysayan.

Ngunit, alam n’yo ba na noong 2019 ay nabuo ang magkahalong luma at bagong disensyo ng jeepney na mayroong modernong makina at iba pang features, at inaprubahan ito mismo ni LTFRB Chair Teofilo Guadiz III, ang prototype para sa modern jeepney na iprinisinta ng Association of Committed Transport Organizations Nationwide Corp.

Ang locally manufactured prototype ay gayang-gaya ang iconic look ng tradisyunal na jeepney ngunit itinaas ang mga features tulad ng bubong na maaari nang tumayo ang pasahero, may handrails, built-in security cameras, at environment-friendly Euro 5 engine na.

May dalawa itong pinto — ang main sa kanang bahagi at ang exit door sa likod na madaling akyatin kahit ng mga persons with disabilities (PWDs) at higit sa lahat ay nasa P1.3 hanggang P1.5 milyon lamang ang halaga, na kalahating mas mura sa kasalukuyang minibuses o electric jeepney na pawang mga imported.

Ang katotohanan, ininspeksyon ito noon ni Guadiz at nakita nitong hindi nawala ang disenyo ng tradisyunal na jeepney ngunit mas gumanda at naabot nito ang requirements ng Bureau of Philippine Standards at wala na umanong puwang ang phaseout kung masusunod ito ng lahat ng operator na umasa sa pangakong ito.

Pero ano ang nangyari, bakit nangibabaw ang mga imported na minibuses at ngayon ay naiwan sa kangkungan ang ating mga driver at nagmumukha pang kontrabida at masasamang tao dahil ipinaglalaban nila ang kanilang hanapbuhay.

Hindi naman masama ang modernisasyon, ngunit sana lang ay walang maiwan kahit isang tsuper sa lansangan na naghihikahos dahil nawalan ng hanapbuhay.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

‘Lagayan’ sa LTFRB, tatalupan ng NBI at senado

ni Atty. Rodge Gutierrez @Mr. 1-Rider | October 17, 2023

Tuluyan nang naglagablab ang apoy na tila unti-unting tumutupok sa kabuuan ng Land Transportation Franchising and Regulatory Board (LTFRB) matapos ang isinagawang pagbubulgar kamakailan hinggil sa tamalak umanong korupsiyon sa naturang ahensya.

Kasunod ng naturang pagbubulgar ay hiniling ni Sen. Grace Poe, chair ng Senate Committee on Public Services na isuspinde ang papalapit na phase out ng tradisyunal na jeepney sa darating na Disyembre 31 at namumurong muling imbestigahan ng Senado ang LTFRB dahil sa talamak umanong katiwalian.

Maging si Senate Minority Leader Aquilino ‘Koko’ Pimentel III ay nagsabing sisiyasatin ang diumano’y korupsiyon sa LTFRB, kung walang seryosong mag-iimbestiga sa iskandalong ito ay magpa-file umano siya ng resolusyon para siyasatin ito ng Senado.

Ngunit, mabilis namang kumilos ang National Bureau of Investigation (NBI) dahil agad silang naglabas ng subpoena laban sa whistleblower na si Jefferson Gallos Tumbado na dating executive assistant ng suspendidong si LTFRB Chairman Teofilo Guadiz III.

Sa kabila ng pagbaligtad ni Tumbado sa ginawa niyang expose’ laban sa korupsiyon umano sa tanggapan ng LTFRB ay malaki ang paniwala ng NBI na may nagaganap na alingasngas kaya marapat lamang kumpirmahin kung ano ba talaga ang katotohanan sa likod ng pagbubunyag ni Tumbado.

Kaya kinumpirma ng NBI na ipinatawag si Tumbado, kasunod ng pahayag ni Justice Secretary Jesus Crispin Remulla na magsasagawa ng sariling pagsisiyasat ang NBI kaugnay sa mga alegasyon nito laban kay Guadiz.

Matatandaan na noong nakaraang Oktubre 9, iniharap sa media ni Mar Valbuena, chairman ng grupong Malayang Alyansa ng Bus Employees at Laborers Para sa Karapatan sa Paggawa (Manibela) si Tumbado.

Sa isinagawang press conference ay buong giting na ibinulgar ni Tumbado ang ‘lagayan scheme’ sa loob ng LTFRB kasabay ng pag-amin na siya pa ang tumatayong ‘middleman’ sa mga ilegal na transaksyon at maging ang mga regional official ng LTFRB ay may quota umanong P2 milyon na ibibigay sa central office.

Sinabi ni Tumbado kung gaano kahirap kumuha ng special permit, route permit, franchise at iba pa, ngunit bumibilis naman kung maglalagay ang mismong aplikante at umaabot umano sa P5 milyon ang lagayan na hindi lang daw ang mga taga-LTFRB ang nakikinabang dahil umabot umano ito sa matataas na opisyal ng DOTr at Malacañang kaya nasibak si Guadiz.

Kaso biglang binawi ni Tumbado ang mga ibinulgar niyang anomalya at ayon sa kanyang affidavit of recantation, lahat umano ng kanyang sinabi ay bunga lamang ng pabigla-biglang desisyon, maling pag-iisip, sulsol ng ilang indibidwal at iba pa.

Nakakuha naman ng kakampi sina Guadiz at Department of Transportation (DOTr) Secretary Jaime Bautista na nadawit din sa iskandalo sa hanay ng ilang transport group na naglabas ng pabor na joint manifesto.

Nakasaad sa manifesto na buo umano ang tiwala nila kay Guadiz na nilagdaan ng mga opisyal ng Transportasyon at Operators sa Pilipinas (LTOP), Alliance of Concerned Transport Organization (ACTO), Pasang Masda, Altodap, ng Stop and Go, at Fejodap.

Ang mga grupong ito na matagal nang hindi kaisa ng MANIBELA sa anumang laban sa lansangan ay nagbigay ng pahayag na subok na umano nila ang mahusay na serbisyo ng LTFRB kaya buo ang kanilang suporta lalo na kay Guadiz na agad isinuspinde.

Sa puntong ito ay kitang-kita ang pagkakahati-hati ng mga transport group na maging ang mga opinyon at mga ipinaglalaban ay tila magkakaiba na rin ng istilo at hindi malayong mag-isip ang ating mga kababayan na hindi pantay ang pagtrato ng LTFRB sa kanilang hanay.

Sa ngayon ay wala pa namang opisyal na resulta hinggil sa kahilingan ni Sen. Poe na pagsuspinde ng phase out ng tradisyunal na jeepney sa darating na Disyembre 31, ngunit asahan nating posibleng magbunga ng positibong resulta ang panawagan ng MANIBELA.

Mas magkakaroon siguro ng direksyon kung matitigil na rin ang pagkakawatak-watak ng mga transport group, tutal pare-pareho naman ang kanilang ipinaglalaban — ang kapakanan ng mga operator, driver at higit sa lahat ng ating mga estudyante, manggagawa at iba pa na lahat ay sumasakay sa pampublikong transportasyon araw-araw.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Isyu sa LTFRB, sino ang nagsasabi ng totoo?

ni Atty. Rodge Gutierrez @Mr. 1-Rider | October 14, 2023

Marami ang natuwa, marami rin ang nainis dahil sa magkakahiwalay na eksena na sabay-sabay naganap noong nakaraang Miyerkules na kinasasangkutan ng umatras na whistleblower, ng chairman ng transport group at ng pamunuan ng Department of Transportation (DOTr).

Matatandaan na noong nakaraang Lunes ay iniharap sa media ni Mar Valbuena, chairman ng grupong Samahang Manibela Mananakay at Nagkaisang Terminal ng Transportasyon (SMMITT) o mas kilala sa tawag na MANIBELA ang whistleblower na si Jefferson Gallos Tumbado na dating executive assistant ni Land Transportation Franchising and Regulatory Board (LTFRB) Secretary Chairman Teofilo Guadiz III.

Sa isinagawang press conference ay buong giting na ibinulgar ni Tumbado ang ‘lagayan scheme’ sa loob ng LTFRB kasabay ng pag-amin na siya pa ang tumatayong ‘middleman’ sa mga ilegal na transaksyon at maging ang mga regional officials ng LTFRB ay may quota umanong P2 milyon na ibibigay sa central office.

Ipinagtapat ni Tumbado kung gaano kahirap kumuha ng special permit, route permit, franchise at iba pa, ngunit bumibilis naman kung maglalagay ang mismong aplikante at umaabot umano sa P5 milyon ang lagayan dahil hindi lang umano ang mga taga-LTFRB ang nakikinabang dahil umabot raw ito sa matataas na opisyal ng DOTr at Malacañang.

Kinahapunan, agad na sinibak ni Pangulong Ferdinand ‘Bongbong’ Marcos Jr. (P-BBM) si LTFRB Chairman Teofilo Guadiz III dahil sa sinasabing katiwalian at nagdulot ito ng malaking kahihiyan hindi lang kay Guadiz kundi maging sa pamilya nito.

Miyerkules, muling humarap sa media si Tumbado at binabawi na nito ang mga ibinulgar na anomalya na ikinasibak ni Guadiz. Ayon sa kanyang affidavit of recantation, lahat umano ng kanyang sinabi ay bunga lamang ng pabigla-biglang desisyon, maling pag-iisip, sulsol ng ilang indibidwal at iba pa.

Naku po! Sinira ni Tumbado ang career ni Guadiz dahil pinaniwalaan siya ni P-BBM tapos sasabihin niyang wala naman siyang malisyosong intensyong sirain ang reputasyon ng kahit sino, eh paano na si Guadiz?

Kasabay nito, nagtungo naman sa Camp Crame si Valbuena at nagpapasaklolo sa Philippine National Police (PNP) dahil tinatakot umano siya ni DOTr Sec. Jaime Bautista sa pamamagitan ng text messages, bukod pa sa tatambakan umano siya ng asunto dahil sa naganap na pagbubulgar sa anomalya sa LTFRB na isa si Tumbado sa ‘source’.

Magkagayun man, hindi naman natinag itong si Valbuena, kahit biglang bumaligtad si Tumbado dahil naipasa na umano nito sa kanya ang maraming ebidensya hinggil sa mga anomalya sa LTFRB kaya tuloy pa rin ang kanyang transport strike sa Lunes, Oktubre 16.

Isa sa ipinapakitang patunay ni Valbuena ay ang hawak na dokumento ng isang operator na sa loob lamang ng isang araw ay nakakuha ng prangkisa, kapalit umano ng malaking halaga na hindi pa natin matiyak kung paano naman pabubulaanan ni Tumbado.

Kasabay ng dalawang eksena sa pagitan nina Tumbado at Valbuena ay halos sumasabay din sa pagpapaliwanag itong si DOTr Sec. Bautista na wala umanong korupsiyong nagaganap sa kanyang tanggapan.

Sinabi ni Bautista na hindi siya tumanggap ng pera kahit kailan at nang manungkulan umano bilang secretary ng DOTr ay pinagsilbihan niya nang maayos ang mga mamamayan na may integridad na higit na mahalaga kesa material na bagay.

Kasabay nito ay sinabi niyang nakahanda siyang sampahan ng pormal na reklamo ang mga nais sumira ng kanyang pangalan at ng katotohanan laban sa DOTr.

Lumalabas na may tatlong pahayag sa kasalukuyan ang nakalatag sa publiko -- bilang patas at responsableng mamamahayag ay inihatid natin sa ating mga tagasubaybay ang panig ni Tumbado, ni Valbuena at maging si Sec. Bautista.

Bilang Representante ng 1-Rider Partylist ay mahalagang-mahalaga sa akin ang kahihinatnan ng usaping ito dahil nakasalalay dito ang magiging kinabukasan ng transport group sa bansa.

Silang tatlo ay may kani-kanyang punto, ngunit hindi naman puwedeng lahat sila ay nagsasabi ng totoo, tiyak na may nagsisinungaling din, ngunit habang humahaba ang kanilang paliwanagan ay papalapit nang papalapit na ang deadline ng phaseout ng tradisyunal na jeepney sa Disyembre 31.

Sana naman maging maayos na ang lahat.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.