Drayber, tiis muna sa lisensyang papel

ni Atty. Rodge Gutierrez @Mr. 1-Rider | October 26, 2023

Posibleng tumagal pa ang paggamit ng paper-base official receipt (OR) bilang temporary driver’s license matapos maglabas ang Quezon City Regional Trial Court (QCRTC) ng Writ of Preliminary Injunction hinggil sa pag-imprenta ng lisensya ng mga tsuper sa bansa.

Inilabas ng QCRTC Branch 215 ang order nitong Oktubre 13 na naglalayong itigil pansamantala ng pamahalaan ang pagbili ng plastic card na ginagamit sa pag-imprenta ng driver’s license.

Nabulabog ang mapayapang takbo ng Land Transportation Office (LTO) nang magsampa ng kaso ang Allcards Inc. laban sa kanilang ahensya, sa Department of Transportation (DOTr) at sa nanalong bidder na Banner Plasticard Inc.

Kaugnay ito sa 5.2 milyong piraso ng plastic cards, na ginawa upang tugunan ang kakulangan ng supply ng plastic cards para sa driver’s license na nag-umpisa nitong Abril ng taong kasalukuyan.

Base sa inilabas na writ of preliminary injunction, nakapaloob na pinaboran ng korte ang Allcards sa argumento nitong hindi nabigyan ang kanilang kumpanya ng due process nang idiskuwalipika ito sa bidding process.

Nabatid na nitong nagdaang Agosto ay naglabas ang parehong korte ng 20-day temporary restraining order (TRO) sa paggawad sa kontrata, na nagresulta sa suspensyon ng delivery ng plastic cards.

Ang masaklap ay nag-lapse ang TRO nitong Setyembre pero mahigit sa isang milyong piraso ng plastic cards ang nai-deliver na kaya ang LTO ay agad na nagpalabas ng petsa kung kailan puwedeng makuha ang plastic-printed driver’s license.

Natuwa ang marami nating kababayan hinggil dito partikular ang mga dating tsuper at mga bagong driver na excited na magkaroon ng driver’s license dahil sa wakas ay matatapos na ang matagal nang problema sa LTO.

Kaso, biglang naglabas nga ng writ of preliminary injunction kaya nahaharap na naman sa malaking problema ang LTO dahil tiyak na maaantala na maisaayos ang mahigit sa 2.4 milyong backlog sa plastic-printed driver’s license.

Ang nakakalungkot pa, hindi na matiyak sa ngayon kung gaano tatagal ang sitwasyong ito dahil epektibo ang utos na nagpapatigil sa procurement process habang pending ang kaso, o hangga’t hindi naglalabas ng panibagong utos ang korte.

Sayang dahil kitang-kita ang pagsisikap ni LTO chief Vigor Mendoza II na maisaayos ang problema sa lisensya ngunit matapos makumpirma ang naturang court order ay aminado itong wala siyang magagawa kundi baguhin ang target time base sa desisyon ng korte.

Kaya ang ending ay posibleng tumagal pa ang paggamit ng temporary driver’s license dahil sa ngayon ay mayroon na lamang 1.8 milyong natitirang plastic cards at mapalad ang aabutin ng mga ito.

Lumalabas pa na 600,000 sa mga natitirang plastic cards ay nakatakdang ipamahagi ngayong buwan ng Oktubre at ang matitira pang 1.3 milyon ay paghahatian para sa buwan ng Nobyembre at Disyembre na ayon sa pamunuan ng LTO ay sapat lang para matugunan ‘yung mga lisensyang nag-expire noong nakaraang Mayo at Hunyo.

Maganda kasi ang sistema ng LTO na nag-iisyu ng 30,000 lisensya kada araw na binibigyang prayoridad pa ang mga overseas Filipino workers (OFWs) at iba pa nating kababayan na kailangang-kailangan ang plastic cards sa kanilang paghahanapbuhay o inaaplayang trabaho.

Kung tuluyan nang maipatutupad ang writ of preliminary injunction, bawat mag-aaplay para sa renewal ay official receipt (OR) pa rin ang ibibigay na may naka-stamp lamang umanong automatic extended until 2024.

Sabagay, hindi pa naman huli ang lahat dahil hindi pa naman epektibo ang writ of injunction dahil ayon kay LTO chief Mendoza ay aapela umano ang kanilang tanggapan at sana ay maging matagumpay ang isasagawang ito. Good luck!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Isyu sa DOTr at LTFRB, mahaba-haba pang usapan

ni Atty. Rodge Gutierrez @Mr. 1-Rider | October 24, 2023

Serbisyo sa taumbayan ang higit na naapektuhan sa naganap na iskandalo sa pamunuan ng Department of Transportation (DOTr) at ng Land Transportation and Franchising Regulatory Board (LTFRB) dahil nasadlak sila sa kuwestiyonableng kredibilidad hinggil sa korupsiyon.

Ito ay matapos na iharap sa media ni Mar Valbuena, Chairman ng Malayang Alyansa ng Bus Employees at Laborers (MANIBELA) ang whistleblower na si dating Executive Assistant Jeff Tumbado ng suspendidong LTFRB Chairman Teofilo Guadiz III.

Si Tumbado ang nagsiwalat ng lahat ng anomalya sa loob ng LTFRB na idinamay pa ang pamunuan ng DOTr at Malacañang sa dinadalhan niya ng pera umano bilang ‘middleman’ ngunit agad niya itong binawi kinabukasan at inulan siya ng batikos.

Kahit umatras si Tumbado ay nasuspinde pa rin si Guadiz at naiwan sa pakikipaglaban si Valbuena na nais umano ng total revamp kaya sinampahan siya ng kasong libelo ni DOTr Secretary Jaime Bautista upang protektahan ang kanyang pangalan na iningatan niya umano ng 45 taon.

Humarap noong nakaraang linggo sa National Bureau of Investigation (NBI) si Tumbado kasama ang abogado na si Atty. Bernardo Masangkay Jr. kung saan sinabi nitong hindi naman umano umaabot ang ‘lagayan’ sa DOTr at Malacañang gaya ng una niyang ibinulgar.

Ipinagtapat din ni Tumbado na tinawagan siya ni Guadiz at nagmakaawa umanong linisin ang pangalan at reputasyon nito na nauwi pa umano sa iyakan at nagwakas sa patawaran at pangako na gagawin umano ang lahat para linisin ang pangalan ni Guadiz.

Kahapon ay personal nang humarap sa Kongreso ang mga sangkot sa iskandalong ito kabilang na si Valbuena at ang laban-bawi whistleblower na si Tumbado at isa-isang sinagot ang mga akusasyon hinggil sa katiwalian sa LTFRB.

Nauna rito ay nagdaos ng support rally ang ‘Magnificent 7’ na binubuo ng Pasang Masda, Busina, Altodap, Acto, Stop & Go, UV Express para ibalik sa LTFRB ang sinupindeng si Guadiz.

Sa harap ng LTFRB ay nagsagawa ang Magnificent 7 ng rally upang hikayatin si Pangulong Ferdinand Marcos Jr., na ibalik si Guadiz dahil maayos naman umano ang kredibilidad nito at kakayahan bilang pinuno ng ahensya.

Lahat ng papuri para kay Guadiz ay inihayag ng ‘Magnificent 7’ at nagbigay pa ang mga ito ng joint support statement na nagsasabing maayos ang pagkalinga sa kanilang hanay ng dating pamunuan ng LTFRB.

Ngunit, tila napapansin na ng taumbayan ang hidwaan sa pagitan ng Magnificent 7 at ng MANIBELA dahil sa tuwing may mga pagkilos ang magkabilang transport group ay taliwas palagi ang pahayag ng kabilang grupo.

Kapansin-pansin na tuwing may mga pagkilos o transport strike na isinasagawa ang kahit alin sa MANIBELA o Magnificent 7 ay palagi silang magkahiwalay at magkaiba ang opinyon at maraming mga interview na personalan na ang mga pahayag ng magkabilang grupo.

Ngayon heto, sa kabila ng pagpasok na ng NBI at Kongreso para maisaayos na ang nawasak na imahe ng LTFRB at DOTr dahil sa pagbubulgar hinggil sa korupsiyon ay nagpahayag naman ng positibong suporta sa LTFRB ang Magnificent 7.

Inihayag naman ni Guadiz na kaya lamang umano nagawang pasabugin sa media ni Tumbado ang korupsiyon daw sa LTFRB dahil sa nagtampo ito dahil na-demote dahil sa kanyang ‘attitude problem’ ngunit wala namang katotohanan ang lahat.

Hindi natin maiaalis na ang pagkakabulgar ng umano’y korupsiyon sa LTFRB ay malaking accomplishment ng MANIBELA at kung mapapatunayan man ito o hindi ay isang malaking usapin pa — ngunit ang mahalaga ay may ginagawa tayo para kumpunihin ang naturang mga ahensya.

Kung hindi kasi huhupa ang sitwasyon at mananatiling ‘kurakot’ ang tingin ng publiko sa LTFRB ay tiyak na maaapektuhan ang kanilang serbisyo dahil pagdududahan na ang lahat ng transaksyon sa nasabing tanggapan.

Bigyan natin ng pagkakataon ang ating pamahalaan na isaayos ang katahimikan sa pagitan ng mga transport group, DOTr at LTFRB — para maibalik na ang tiwala ng publiko.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Problema ng DOTr at MANIBELA, umabot na sa korte

ni Atty. Rodge Gutierrez @Mr. 1-Rider | October 21, 2023

Hindi natin matiyak sa ngayon kung makakatulong ba sa kinakaharap nating napakaselang problema hinggil sa phaseout ng tradisyunal na jeepney ang demandahang nagaganap sa pagitan ng Department of Transportation (DOTr) at ng Malayang Alyansa ng Bus Employees at Laborers (MANIBELA).

Mas binigyang prayoridad ni DOTr Secretary Jaime Bautista na linisin ang kanyang pangalan sa pamamagitan ng pagsasampa ng kasong libelo laban kay MANIBELA Chairperson Mar Valbuena at isa pang mamamahayag.

Sa panayam ng Department of Justice (DOJ) ay sinabi ni Bautista na inihain niya ang kaso dahil sa alegasyon na tumanggap siya ng suhol na hindi naman umano totoo kaya nais lamang niyang protektahan ang pangalang inalagaan niya sa loob ng 45 taon.

Patunay ito na naubos na ang pasensya ni Secretary Bautista at mas minabuti nang magsampa ng asunto kesa magsawalang kibo na lamang sa mga ipinupukol sa kanyang akusasyon.

Ang isinampa nitong kasong cyber libel ay may kaugnayan sa sinabi ni Valbuena na base sa rebelasyon ni dating Land Transportation Franchising and Regulatory Board Executive Assistant Jeff Tumbado na si suspended LTFRB Chairman Teofilo Guadiz III umano ang nagde-deliver ng corruption money kay Bautista.

Kinabukasan, binawi ni Tumbado ang kanyang mga ibinulgar at humingi ng paumanhin kina Bautista at Guadiz sa pagsasabing ito ay ‘borne out of impulse, irrational thinking, misjudgment, at poor decision making’ na hindi naman pinaniwalaan ng publiko.

Sa opinyon ng publiko ay dehado ang mga namumuno sa mga ahensya ng pamahalaan kaya’t mas marami ang naniniwala sa ibinulgar ni Tumbado kesa pagbawi niya na walang katotohanan umano ang kanyang mga ipinagtapat.

Ito rin ang nagtulak sa National Bureau of Investigation (NBI) kaya pinipilit nilang maipatawag si Tumbado na noong una ay hindi sumipot ngunit nagbigay din kalaunan ng sinumpaang salaysay pabor na sa DOTr at LTFRB.

Magkasabay na humarap sa media sina Valbuena at Tumbado ngunit dahil sa pag-atras ni Tumbado ay tanging si Valbuena na lamang ang nagpapatuloy sa kanilang sinimulan hinggil sa korupsiyong nagaganap umano sa LTFRB.

Bago pa nagsampa ng asunto si Bautista ay nagtungo na si Valbuena sa Camp Crame at personal na humihingi ng saklolo dahil sa pinagbabantaan umano siya sa kanyang buhay bukod pa sa banta ni Bautista na sasampahan ng kaso.

Ngunit, sa kabila nito ay sinabi ni Valbuena na “purely harassment and abuse of power” ang ginagawa ni Bautista kaya hindi umano siya mananahimik kahit tambakan pa ng kaso ay patuloy nitong ilalantad ang katotohanan.

Hindi rin nabahala ang grupo ng mga mamamahayag sa ginawang pagdawit ni Bautista sa isang mamamahayag sa kaso dahil sa ginagawa lamang umano nito ang tungkulin bilang tagapaghatid ng balita.

Kataka-takang hindi naman nakasama sa kaso si Tumbado gayung siya ang promotor at pinagmulan ng mga sinasabing katiwaliang siya rin ang nagbunyag kasabay pa ng pag-amin na siya ang tumatayong ‘middleman’ sa gitna ng mga ilegal na transaksyon sa LTFRB.

Matagal nang isinisigaw ng ilang transport group ang mga katiwalian umano sa LTFRB ngunit ngayon lamang nagkaroon ng pag-iingay hinggil dito dahil sa may isang dating taga-LTFRB ang nagsiwalat ng nangyayari na lalong nagdagdag sa galit ng mga operator at driver.

Kaugnay nito ay hiniling ni Sen. Grace Poe, chair ng Senate Committee on Public Services na isuspinde ang papalapit na phaseout ng tradisyunal na jeepney sa Disyembre 31 dahil na rin sa ibinunyag na katiwalian.

Nagbanta rin si Senate Minority Leader Aquilino ‘Koko’ Pimentel III na paiimbestigahan ang diumano’y korupsiyon sa LTFRB ngunit tila magkakaroon ng pagbabago dahil nagpatawag na rin ng imbestigasyon ang Kongreso sa darating na Lunes at nangako si Tumbado na darating.

Kung wala kasing mamamagitan o magsasagawa ng imbestigasyon ay tiyak na paninindigan ng DOTr at LTFRB na wala silang kasalanan at busilak ang kanilang damdamin ngunit pangangatawanan din ng MANIBELA na puro sila kawatan — kaya abangan natin kung sino ang nagsasabi ng totoo at nagsisinungaling!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.