LTFRB at transport group, walang maayos na kasunduan, sa Media lang naglalaban

ni Atty. Rodge Gutierrez @Mr. 1-Rider | November 23, 2023

Nagwakas na kahapon ang tatlong araw na tigil-pasada na pinangunahan ng Pinagkaisang Samahan ng mga Tsuper at Operator Nationwide (PISTON) ngunit bukod sa press release ay wala namang dokumentadong napagkasunduan hinggil dito.

Nananatiling pangako ang mga binitawang pagtugon ng Land Transportation and Franchising Regulatory Board (LTFRB) sa mga kahilingan ng PISTON na inaasahang hindi sa tatlong araw na tigil-pasada magwawakas ang lahat ng mga pagkilos hinggil sa Public Utility Vehicle Modernization Program (PUVMP) ng gobyerno.

Bago pa man ikinasa ng PISTON ang tigil-pasada noong nakaraang Nobyembre 20 ay sinikap na ng LTFRB na makipagdayalogo sa kanila upang kumbinsihin na huwag nang ituloy ang nakatakdang three-day nationwide transport strike.

Sabi nga ni LTFRB Spokesperson Celine Pialago na ‘one call away’ lamang umano ang kanilang ahensya at may oras pa para kanselahin ng grupo ang transport strike.

Ngunit hindi nakumbinsi ang grupong PISTON dahil sa wala namang malinaw na napagkakasunduan sa pagitan ng PISTON at ng LTFRB pero nakahanda naman umano anumang oras ang PISTON sa anumang klase ng pag-uusap.

Sa madaling salita, natuloy din ang tatlong araw na tigil-pasada upang tutulan ang nalalapit na deadline para sa konsolidasyon ng traditional public utility jeepneys sa Disyembre 31 at siyempre naninindigan ang LTFRB sa itinakda nitong deadline sa konsolidasyon ng tradisyunal na jeepneys.

Kasabay ng nagaganap na tigil-pasada, humirit naman ang isa pang transport group na ipa-rehab na lamang umano ang mga lumang jeepney sa halip na palitan ito ng mga bagong modelo sa ilalim ng PUVMP.

Ayon sa grupong Stop and Go Coalition, hindi sila sasama sa tigil-pasada ng PISTON subalit pareho ang kanilang panawagan sa pamahalaan tungkol sa isyu ng modernization program.

Pakiusap ng Stop and Go Coalition na sa halip na magpalit ng buong sasakyan ay baka puwedeng magpalit na lamang ng makina dahil maitim na usok lang naman ang isyu upang hindi umano mahirapan ang maraming operator.

Tulad din ng isinisigaw ng PISTON, umaaray din ang Stop and Go Coalition hinggil sa napakamahal na presyo ng modern jeepney na hindi umano nila kakayanin at tanging mga supplier lamang umano mula sa China ang makikinabang dito.

Matatandaang sinabi ng PISTON na hindi sila kontra sa franchise consolidation subalit kailangang siguruhin umano ng pamahalaan na magiging pag-aari pa rin ng mga operator ang prangkisa sa ilalim ng PUVMP.

Aabot na nga naman kasi sa P40 milyon ang kailangan para sa consolidation o pagsasama-sama ng 15 unit ng jeepney na hindi kakayanin ng mga maliliit na operator.

Samantala, nag-anunsyo rin ang Federation of Jeepney Operators and Drivers Association of the Philippines (FEJODAP) na hindi umano sila sasali sa nationwide transport strike dahil inaalala nila ang kalagayan ng mga pasaherong walang masasakyan.

Kahapon, umeksena naman ang Malayang Alyansa ng Bus Employees at Laborers transport group (MANIBELA) dahil sa huling araw ng tatlong araw na tigil-pasada ng grupong PISTON ay sila naman ang agad na nagdeklara ng panibagong tatlong araw na tigil-pasada.

Sinimulan nila kahapon Nobyembre 22 hanggang 23 ang panibagong tigil-pasada at lahat ng kahilingan na sinimulan ng PISTON ay kanilang ipagpapatuloy dahil naniniwala ang MANIBELA na hindi lang para sa kanilang grupo ang kanilang ipinaglalaban kundi sa kapakanan ng lahat ng transport group sa bansa na tutol sa PUVMP.

Heto na ang ating sinasabi, naghahalinhinan na ang mga transport group sa pagsasagawa ng kilos-protesta dahil papalapit na ang Disyembre 31 at kailangang may mangyari na kaya hindi malayong isang araw ay magkasundo na ang lahat ng transport group para ipakita ang tunay nilang lakas.

Wala pa rin kasing dokumentadong napagkakasunduan ang LTFRB at mga transport group – pareho silang sa media naglalaban kaya tingnan natin kung ano ang kahihinatnan ng lahat.

Sa kabila ng pagsasanib-puwersa ng MANIBELA at PISTON at hindi pa rin nila natinag ang pamahalaan ay posibleng humina ang laban ng tradisyunal na jeepney sa bansa maliban na lang kung lahat ng transport group ay magsasama-sama.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Mga pasaherong galing probinsiya sa bus terminal lang dapat sumasakay

ni Atty. Rodge Gutierrez @Mr. 1-Rider | November 21, 2023

Hanggang sa kasalukuyan ay hindi pa rin nareresolba ng Philippine National Police (PNP) ang naganap na pamamaril noong nakaraang linggo sa loob ng isang bus na nag-viral sa social media at kitang-kita kung paano pinaslang ang dalawang natutulog na pasahero.

Bagama’t may mga person of interest nang sinasabi ang mga pulis, nananatiling hindi pa rin tukoy ang mga salarin na mismong bumaril sa magka-live-in na natutulog sa loob ng Victory Liner sa Nueva Ecija.

Hindi natin pakikialaman ang takbo ng imbestigasyon, ang nais nating busisiin ay ang anim na ulit na pinagbabaril ang 60-anyos na babae at ang 55-anyos na ka-live-in nito na nahagip lamang ng dashcam na nakakabit sa loob mismo ng bus na naganap sa bahagi ng Barangay Minuli sa bayan ng Carranglan.

Lumalabas sa imbestigasyon na sumakay ang mga biktima sa bus sa isang terminal sa Cauayan, Isabela habang ang mga salarin ay sumakay naman sa isang lugar sa Bayombong, Nueva Vizcaya.

Dahil sa pangyayaring ito ay plano na ng PNP na muling magtalaga ng bus marshals na dati nang ipinatutupad ng pamahalaan ngunit dahil sa pagbabago ng mga namumuno ay nawala na ito kaya balik-trabaho na naman ang mga masasamang loob na sa bus gumagawa ng krimen.

Ang nakalulungkot sa pangyayaring ito, pati ang pamunuan ng Victory Liner ay labis na naapektuhan samantalang ang tanging nais lamang nila ay makapagbigay ng maayos na serbisyo ngunit paanong napahintulutang sumakay ang mga salarin na may bitbit na baril gayung umiiral pa ang gun ban hanggang Nobyembre 29, 2023.

Natural na maglabas pa ng show cause order ang Land Transportation Franchising and Regulatory Board (LTFRB) laban sa Victory Liner upang bigyang daan nga ang isinasagawang imbestigasyon dahil kailangan talaga ng magkabukod na pagsisiyasat ang LTFRB at PNP.

Bagama’t hindi humaharap sa media ang pamunuan ng naturang bus company ay nagbigay naman sila ng pahayag na bukas ang kanilang tanggapan sa pakikipag-ugnayan sa PNP at LTFRB upang mabigyang linaw ang tunay na pangyayari, lalo pa at itinuturing na pangunahing testigo ang driver ng nasabing bus.

May umiiral kasing LTFRB Memorandum Circular na bukod sa pinapayagan lamang ang public utility bus companies na bumiyahe sa mga rutang saklaw ng kanilang prangkisa at kabilang dito ang magpatupad ng security plan para sa bus terminals at sa kanilang sasakyan habang bumibiyahe.

Kung makikita umano sa imbestigasyon na may mga paglabag o pagkukulang ang Victory Liner sa pagbibigay nila ng kanilang serbisyo, ayon sa umiiral na circular ay maaari silang managot tulad ng suspensyon, kanselasyon ng prangkisa at iba pa.

Sa inisyal na imbestigasyon, lumalabas na ang mga salarin ay hindi sumakay sa bus terminal kaya inaalam pa kung pinapayagan ang Victory Liner na magsakay ng pasahero sa mga dinaraanan nito.

Marahil, panahon na para higpitan ang patakaran sa mga provincial buses pagdating sa paglulan ng mga pasahero na dapat ay tiyaking sa mismong terminal sumakay upang may pagkakakilanlan sakaling mangyari ang mga sakuna o krimen sa loob ng bus.

Marami kasing provincial bus company ang nagpapatupad na bago makabili ng tiket ang isang pasahero ay kailangang magpakita ng ID tulad ng ginagawa sa mga airport at pier, at iniinspeksyon ang mga bagahe para matiyak kung may armas o bawal na epektos.

Sa ganitong paraan maiiwasan nating magkaroon ng krimen sa loob ng bus dahil tukoy ang mga sumasakay na pasahero at dapat ay ipagbawal na ang pagdampot ng pasahero sa madidilim na bahagi ng dinaraang kalsada dahil mas madalas ay mga holdaper o iba pang masasamang elemento ang sumasakay galing sa mga liblib na lugar.

Marami nang provincial buses ang hindi na pumi-pick-up ng pasahero sa daan dahil umiiwas sa banta ng kapahamakan at kung lahat ng provincial buses ay paiiralin ang ganitong sistema, malaking tulong ang kanilang maiaambag upang matiyak ang kaligtasan ng kanilang pasahero.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Malawakan at sunud-sunod na tigil-pasada, nagbabadya

ni Atty. Rodge Gutierrez @Mr. 1-Rider | November 18, 2023

Tila kahit anong gawin ng Land Transportation Franchising and Regulatory Board (LTFRB) sa inaakala nilang mabuti sa kapakanan ng transport group ay sa mga protesta din mauuwi ang lahat tulad ng panibagong tigil-pasada na naman sa darating na Lunes.

Noong nakaraang Martes ay pumayag na ang LTFRB na palawigin ang guidelines para sa jeepney drivers at operators sa paglipat sa modern vehicle matapos ang isinagawang konsultasyon sa stakeholders.

Ayon sa LTFRB Technical Division, pinalawig umano ang timeline sa pagpapalit ng bagong unit, kasama na ang pagbabago ng distance policy ng bawat ruta na isasama sa mismong modernisasyon.

Kasama umano sa natalakay ang mekanismo sa pag-avail ng mga financial assistance mula sa pamahalaan para sa kanilang loans na gagamitin sa kanilang mga sasakyan at ilang pagbabago sa policy guidelines ng consolidation.

Nakatakda pa rin ang deadline para sa industry consolidation sa December 31, 2023 ngunit ang dating subsidiya na P160,000 ay itinaas hanggang P210,000 na kung sisipatin natin ang motibo ay upang mas maraming driver at operator ang makumbinsi.

Nais ng LTFRB na matulungan ang mga transport group o mga transport cooperatives and corporation na mas mapadali kung mag-a-avail ng loans para iyong equity umano nila na kailangang ibigay sa mga bangko ay hindi na manggagaling sa kanilang bulsa.

Kumbaga, kahit tumaas man ng bahagya ang presyo ay mako-cover pa rin noong equity na ibinigay ng ating pamahalaan at maaaring makuha ang naturang subsidiya sa pamamagitan ng Landbank o sa Development Bank of the Philippines.

Kung kuwalipikado umano maging ang kanilang ruta ay walang dahilan para hindi maaprubahan at kapag nabigyan na ng provisional authority o prangkisa ang kanilang mga unit ay ire-release na ang equity subsidy sa mga cooperative o corporation.

Ngayon, kung medyo may kalituhan pa rin ay naglabas ng buong detalye hinggil sa konsolidasyon ang LTFRB na naka-post ang buong guidelines sa kanilang website.

Dahil sa hakbanging ito ng LTFRB ay inakala nating maliwanag at nagkakaintindihan na ang LTFRB at ang mga transport na halinhinan lang sa pagsasagawa ng mga kilos protesta — na lahat tutol pa rin sa modernisasyon ng tradisyunal na jeepney.

Hindi ba’t ilang linggo pa lamang ang nakararaan nang magsagawa din ng tigil-pasada ang grupo ng MANIBELA na bukod sa tinututulan ang talamak na korupsiyon sa LTFRB ay tinututulan din nila ang nalalapit na phaseout ng tradisyunal na jeepney sa Disyembre 31, 2023.

Ngayon heto na naman, magsasagawa ng tatlong araw na transport strike ang Pinagkaisang Samahan ng mga Tsuper at Operators Nationwide (PISTON) simula Nobyembre 20 hanggang 23 at ganoon din ang kanilang isinisigaw -- tutulan ang Public Utility Vehicle Modernization Program (PUVMP).

Ibang grupo, ibang atake, ngunit pareho rin ang reklamo at nais nilang mapansin ang kanilang hinaing tulad din ng ibang transport group na dapat ay umaksyon ang pamahalaan bago sumapit ang katapusan ng taong kasalukuyan na deadline ng PUVMP.

Kung pakikinggan natin ang PISTON, ang PUVMP umano ay masaker sa kanilang kabuhayan at lantarang pang-aagaw sa kanilang prangkisa upang magbigay daan umano sa monopoly at kontrol ng malalaking korporasyon sa transportasyon.

Ang PUV modernization program ay sinimulan noong 2017, sa layunin na palitan ang mga jeepney ng Euro 4-compliant engine para mabawasan ang polusyon na tinutulan ng mga operators dahil aabot umano ang kanilang gastusin ng mahigit P2 milyon.

Nilinaw naman ng Department of Transportation (DOTr) at LTFRB na maaari pang mag-operate ang mga tradisyunal na jeepney kahit na lumampas ang deadline kaya lamang dapat na lumahok sa mga transport cooperative para maiwasan ang ‘on-street competition’ sa panig ng mga driver at operator.

Noong Hunyo 30, 2023 pa ang orihinal na deadline para sa phaseout, dahil sa kabi-kabilang protesta ng mga transport group ay pinalawig pa ito ng pamahalaan hanggang Disyembre 31, 2023.

Kaya ngayong papalapit na ang deadline, tigil-pasada na naman, baka kapag hindi natinag ang pamahalaan sa tatlong araw na tigil-pasada ay magkasundo-sundo na ang magkakagalit na transport group para sa mas malawakan pang protesta. Malamang hindi ba?

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.