QC, “most bike-friendly city”, sana all

ni Atty. Rodge Gutierrez @Mr. 1-Rider | November 30, 2023

Hindi lamang kapakanan ng ating mga ‘kagulong’ na gumagamit ng motorsiklo ang ating inaalala dahil maging ang sitwasyon ng mga siklista ay tinitingnan din natin ang kalagayan.

Bukod sa inyong lingkod ay marami na ring lokal na pamahalaan sa iba’t ibang bahagi ng Metro Manila ang tinututukan ang kalagayan ng mga nagbibisikleta dahil sa tumataas na rin ang bilang ng mga gumagamit nito.

Kamakailan lamang ay pinangalanan ang Quezon City bilang most ‘bike-friendly city’ sa buong Pilipinas ng 2023 Mobility Awards. Ibig sabihin, nagbunga rin ang seryoso nilang pagsisikap na mapabuti ang kalagayan ng mga nagbibisikleta.

Ito ang unang pagkakataon na napasama ang Quezon City sa nominasyon sa Mobility Awards at tuwang-tuwa ang pamunuan ng Quezon City Department of Public Order and Safety, dahil kahit paano ay nabigyang pansin ang kanilang napakagandang adhikain.

Hindi kasi ligtas ang QC na dumaranas ng matinding pagsisikip ng trapiko na pang-araw-araw na nararanasan sa buong Metro Manila at sa dinami-rami ng plano patungkol sa mga nagbibisikleta ay tila napakabagal nang pag-usad.

Mahigit kasi 16,000 siklista ang pumepedal sa 200 kilometrong bike lanes ng Quezon City araw-araw kaya napakalaking bagay na pinagbuti nila ito para sa kaligtasan ng mga biker.

Matindi ang ginawang pagtutok ng pamahalaan ng QC upang maisaayos ang eksklusibong linya para sa mga siklista upang maiwasan umano ang gitgitan sa pagitan ng nagbibisikleta at nagmomotorsiklo sa pamamagitan ng paglalagay ng permanentang concrete dividers.

Maraming klase kasi ang gumagamit ng bisikleta — una ay ang mga naghahanapbuhay tulad ng mga messenger, food delivery biker, mga nakabisikleta papunta ng trabaho, mga professional na siklista at ‘yung mga nais lamang mag-exercise.

Dahil sa magkakaiba sila ng gustong gawin ay magkakaiba sila ng bilis at istilo ng pagmamaneho at ang pagkakaroon ng eksklusibong linya sa ating mga lansangan ay isang malaking tulong para mailayo sila sa aksidente at iba pang disgrasya.

Isa pa sa napakagandang ipinangako ng pamahalaan ng QC ay ang pagdaragdag umano ng end-of-trip at middle-of-trip facilities para sa bikers, kabilang ang shower areas at comfort room.

Ito ang matagal na nating hinihiling na magkaroon ng mga shower area ang mga opisina upang mas dumami pa ang mga nag-oopisina na gumamit ng bisikleta na walang panahon para mag-ehersisyo.

Nakakatuwa na ang gobyerno ng naturang lungsod ay unang nakita ang ganda at mabuting dulot ng bike lane sa komunidad lalo’t ang lawak ng Quezon City ay mahigit pa sa ikaapat na bahagi ng buong Metro Manila.

Kung buong Metro Manila ay magkakaisa na pagdugtung-dugtungin ang lahat ng bike lane at tiyaking ligtas at maayos ang pagkakagawa ay siguradong darami pa ang maeengganyong magbisikleta.

Sa ginawang pagkilala ng 2023 Mobility Awards sa Quezon City bilang most ‘bike-friendly city’ sa buong Pilipinas ay pumangalawa ang Iloilo sa nasabing pagkilala na nakatanggap ng gold rating, habang itinanghal naman ang Baguio na 3rd best city para sa bicycling na mayroong silver rating.

Isinagawa sa Novotel sa Cubao kamakailan at kinilala ng 3rd edition ng Mobility Awards ang mga lungsod, malalaki at standalone businesses, workplaces maging mga indibidwal na gumagamit ng bisikleta bilang uri ng transportasyon.

Inorganisa ng Institute for Climate and Sustainable Cities (ICSC), MNL Moves, Climate Reality Project-Philippines, 350 .Org Pilipinas, at Pinay Bike Commuter, inilunsad ang Mobility Awards noong 2020, na naantala noong 2022.

Ang progreso hinggil sa programa at bicycle infrastructure sa mga siyudad, mga opisina at mga establisimyento ay ramdam na ramdam na at narito ang kumpletong listahan ng mga nanalo bilang bicycle-friendly cities — Quezon City – Gold, Iloilo City – Gold, Baguio City – Silver.

Ang mga bicycle-friendly workplaces naman ay — ang Medical City Ortigas (Pasig) – Gold, GSIS Main Office (Pasay) – Gold at Cebu IT Park na nakakuha ng Silver.

Marami na ang may sariling sasakyan, ang nais nang gumamit ng bisikleta sa pagpasok sa opisina kaya lamang ay pawisan silang darating kaya kailangang magtalaga na ng mga paliguan ang mga opisina upang mas marami na ang magbisikleta, na bukod sa mabuti sa kalusugan, matipid sa gasolina, bawas pagsisikip ng trapiko at bawas polusyon.

Kung kaya ng Kyusi, kaya rin ng iba!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Giyera ng DOTr, LTFRB vs. transport group, non-stop

ni Atty. Rodge Gutierrez @Mr. 1-Rider | November 28, 2023

Matapos ang limang araw na tigil-pasada na inilunsad ng dalawang transport group ay muling nagbabala ang grupong MANIBELA na itutuloy nila ngayong linggo ang nationwide transport strike upang pigilan pa rin ang isinusulong ng Department of Transportation (DOTr) na deadline sa consolidation sa Disyembre 31, 2023.

Ayon kay MANIBELA President Mar Valbuena, hindi sila naniniwala sa pangako ng Land Transportation Franchising and Regulatory Board (LTFRB) na pahihintulutan pa rin nilang mamasada ang mga jeepney basta mangangako na sila ay magko-consolidate.

Sa pananaw pa rin ng ilang transport group, ang alok na consolidation na bahagi ng PUV modernization program (PUVMP), kung saan ang mga tsuper at operator ay hinihikayat na bumuo ng kooperatiba, ay isang patibong lamang.

Kung naniniwala umano ang gobyerno na kaya nilang magbigay ng ‘libreng sakay’ ay mas mabuti na umanong tuluyan na silang huwag bumalik sa kalsada dahil sa ito anila, ang pakay ng pamahalaan, ang ipatupad ang phaseout.

Hanggang sa kasalukuyan ay buo pa rin ang pangamba ng ilang transport group na mapi-phaseout na ang mga tradisyunal na jeepney sa pagpasok ng unang araw ng 2024 dahil mawawalan na ng bisa ang prangkisa ng mga hindi sasali o bubuo ng kooperatiba o korporasyon.

Ang franchise consolidation ang unang hakbang ng PUVMP na naglalayong pag-isahin ang mga operator na may indibidwal na prangkisa ng mga tradisyunal na jeep sa pamamagitan ng pagbuo ng mga kooperatiba o korporasyon.

Ngunit, ipinaliliwanag ng LTFRB na mali umano ang pagkakaintindi ng mga transport group dahil pagkatapos ng deadline sa Disyembre 31 ay makakabiyahe pa rin naman daw ang mga tradisyunal na jeepney at hindi ito agad papalitan ng mga modernong jeepney dahil maaari itong magdulot ng krisis sa transportasyon.

Ang nais lamang ng LTFRB ay magsumite ang mga operator ng tradisyunal na jeepney ng kanilang petition for consolidation bago pa ang deadline sa Disyembre 31.

Kaya maging ang LTFRB ay pinapawi ang pangamba ng ilang transport group dahil ang isinasagawa umano nilang tigil-pasada ay isang napakalaking pagkakamali dahil walang magaganap na phaseout.

Iginiit pa ng LTFRB na walang katotohanan na ang PUVMP ng pamahalaan ay layong tanggalin ang mga tradisyunal na jeepney basta’t ‘road worthy’ pa ito at pasado sa pamantayan ng LTO at LTFRB.

Napakatagal na ng problemang ito ng pamahalaan dahil taong 2017 pa nang magsimula ang programa kung saan ang mga jeepney na mayroong Euro 4-compliant engine ay aalisin na.

Pero para sa mga tsuper at operator, masyadong mabigat ang P2 milyon para sa ipapalit na sasakyan sa kanilang mga jeepney na kahit uugod-ugod na ay mahal umano ng mga mananakay na tumitingin pa rin sa nakagisnang kultura.

Subalit, hindi maitago ng LTFRB na ang mga driver at operator na tatangging lumahok sa PUV modernization program ay bibigyan ng provisional authority na bumiyahe sa kanilang ruta sa ilalim ng kanilang umiiral na prangkisa pero hanggang sa punto lamang na mayroong sapat na bilang ng sasakyan sa consolidated fleet.

Nais ng LTFRB na kung ang isang ruta ay may 50 jeep na bumabiyahe, at iyong 40 sa mga ito ay consolidated na at may 10 na hindi pa, papayagan namang bumiyahe ang 10, pero oras na makumpleto umano ang kailangang bilang ng consolidation na 50 ay tiyak na hindi na papayagang bumiyahe pa ang natitirang 10 jeepney.

Sa isang banda ay tila abot-kamay na ng DOTr at LTFRB ang tagumpay ng plano nilang PUVMP dahil hanggang sa kasalukuyan ay buo ang kanilang paninindigan na ituloy ang deadline sa Disyembre 31, 2023.

Matapos ang ipinakitang pinagsanib na puwersa ng PISTON at MANIBELA ay tila lalong lumakas ang loob ng pamunuan ng DOTr at LTFRB dahil sa hindi umano naramdaman at wala kahit katiting na epekto sa kabuhayan ang ginawa nilang tigil-pasada.

Ngayon heto, may bago namang transport strike, kung walang bagong putaheng ihahain ang transport group ay wala na tayong inaasahang mangyayari at tiyak na magaganap na ang Disyembre 31 deadline.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Transport group kahit maglupasay, jeepney phaseout, tuloy

ni Atty. Rodge Gutierrez @Mr. 1-Rider | November 25, 2023

Tila sa wala rin hahantong ang ilang araw na tigil-pasada na pinagtulungan ng grupong PISTON at MANIBELA makaraang hindi naman nila natinag ang paninindigan ng Department of Transportation (DOTr) hanggang sa huling araw ng protesta kahapon.

Hati ang opinyon ng taumbayan sa pangyayaring ito dahil sa panahon ng Kapaskuhan ay medyo emosyonal ang mahihirap nating kababayan na kumikiling sa panig ng mga tsuper at operator na nakatakdang mawalan ng hanapbuhay kung hindi susunod sa mga bagong patakaran.

Ngunit, marami rin tayong kababayan na tuwang-tuwa sa modernisasyon dahil sa mawawala na ang mga sobrang tandang sasakyan sa lansangan na hindi na takot mabangga kaya walang ingat sa pagmamaneho.

Nitong huling mga araw ng tigil-pasada ay ibinulgar ng MANIBELA na halos kalahati ng mga modernized jeepney sa Metro Manila ay hinatak na ng bangko dahil hindi makapagbayad ng hulog ang mga operator na kanilang kinatatakutan.

Karamihan umano sa mga na-repossess ay nakatambak sa property ng Land Bank of the Philippines (Landbank) sa Marikina City at habang lumilipas ang mga araw ay naluluma hanggang sa hindi na pakinabangan ang mga nahatak na sasakyan.

Kung totoo ang ulat na ito ng MANIBELA imbes nga naman na makatulong ang programa ay nawalan pa ng pagkakakitaan ang mga operator at driver dahil nahatak ang kanilang mga ibinabiyaheng sasakyan.

Ang resultang ito ay dahil sa pamimilit umano ng DOTr sa mga jeepney operator na bumili ng modernized jeepney gayung napakamahal na nito ngayon at halos umaabot na ng P3 milyon.

Kaya nauunawaan din natin kung bakit mariin ang pagtutol ng grupong PISTON at MANIBELA sa Public Utility Modernization Program (PUVMP) kung saan nagtakda ng deadline ang DOTr hanggang Disyembre 31, 2023 para mag-consolidate ang mga operator at driver.

Kaso nagwakas ang protesta ng PISTON at MANIBELA na tila hindi naman nakuha ang kanilang pakay dahil sa rami rin ng pampasaherong jeepney na hindi nakisama sa kanilang ipinaglalaban ngunit umaasang ipapanalo nila ang kapakanan ng mga nabubuhay sa tradisyunal na jeepney.

Hanggang sa huling sandali ng isinagawang tigil-pasada ay naninindigan si DOTr Secretary Jaime Bautista na non-negotiable umano ang programa ng gobyerno sa jeepney modernization.

Handa umano ang pamahalaan na ibigay ang ilan sa mga demand ng mga nagwewelgang tsuper at operator maliban sa PUV modernization program. Kumbaga, kahit maglupasay pa ang mga ito ay wala talagang mangyayari.

Ang tinutukoy na non-negotiable ay ‘yung industry consolidation dahil kailangang-kailangan umano ng players na pagsama-samahin sa kooperatiba o korporasyon kaya nagtakda ng deadline para rito sa Disyembre 31, 2023.

Ito lang naman ang tinututulan ng mga nagpoprotestang mga driver at operator dahil ang paniwala nila ay simula na ng phaseout ng tradisyunal na jeepney sa oras na ipinatupad na ang deadline sa consolidation sa Disyembre 31.

Matatandaan na hinihikayat ng DOTr ang mga tsuper at operator na bumuo ng kooperatiba upang madali umano silang makautang o makapag-apply ng loan sa pagbili ng modernized jeepney kaya nagsimula ang mga protesta.

Bahagi ng demand ng nagwelgang PISTON at MANIBELA ay ang pagtanggal sa Disyembre 31 deadline ng consolidation, ibalik sa limang taon ang prangkisa ng jeepney at ibasura umano ang memo circular para sa paggamit ng Euro 4 makina ng sasakyan.

Kaso, matatag ang paninindigan ni DOTr Sec. Bautista na nagsabing sanay na umano sila sa isinasagawang transport strike kaya nga nito binitawan ang katagang non-negotiable sa programa ng pamahalaan hinggil sa jeepney modernization.

Ito ang ikinatatakot ng transport group, ang hindi na nila matinag ang pamahalaan sa kanilang protesta dahil kayang-kaya nang paghandaan ang mga sitwasyon kung libreng sasakyan din lang ang pag-uusapan.

Kung titingnan natin ang direksyon ng mga pangyayari at mananatiling hindi naman 100% na napaparalisa ng tigil-pasada ang takbo ng kabuhayan ay tila hindi naman sapat ang epekto nito — at dahil dito ay hindi malayong maganap na ang kinatatakutang deadline ng mga operator at driver sa Disyembre 31, 2023. Abangan!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.