Pangako ng DOTr na pag-aaralan uli ang PUVMP, napako lang

ni Atty. Rodge Gutierrez @Mr. 1-Rider | December 16, 2023

Nakakuha ng kakampi ang transport group sa katauhan ni Sen. Grace Poe nang muli itong manawagan na rebyuhin ang Public Utility Vehicle Modernization Program (PUVMP) dahil sa wala umano itong ‘safety nets’ para sa mga driver at operator na siyang papasan ng bigat ng consolidation deadline sa Disyembre 31, 2023.

Ayon kay Sen. Poe, chair ng Senate committee on public services, nakakaalarma umano na hindi naaprubahan ang mga isinusulong nilang proteksyon para sa mga pondo ng drivers hinggil sa PUVMP.

Para sa taong 2024, ang programa umano ay may nakalaang P1.6 bilyong pondo, subalit hindi kasama rito ang mga hakbangin para maprotektahan ang kabuhayan ng mahigit 300,000 tsuper.

Sinabi pa ni Sen. Poe na inaasahan umano nila ang pangako ng Department of Transportation (DOTr) na muling pag-aralan ang programa bago pa dumating ang deadline ngunit lumipas ang maraming taon ay napako na ang kanilang ipinangako.

Ngunit, ang mga pahayag na ito ni Sen. Poe ay wala nang saysay makaraang manindigan si Pangulong Ferdinand ‘Bongbong’ Marcos Jr. (P-BBM) na mananatili sa Disyembre 31, 2023 ang deadline sa consolidation ng mga public utility vehicles.

Ito ay sa kabila ng sunud-sunod na tigil-pasadang isinasagawa ng ilang transport group na naniniwalang magreresulta umano ang lahat ng ito sa jeepney phaseout.

Ang naging desisyon ni P-BBM ay bunga ng pakikipagpulong nito sa ilang transport official at lumitaw na 70% ng PUV operators ang tumalima na sa consolidation sa ilalim ng PUVMP at ayaw umano ng Pangulo na maantala ang programa dahil sa pagtutol lamang ng iilan.

Tila sa bahaging ito nagkaroon ng hindi pagkakaisa ang mga transport group dahil sa hati-hati sila sa kanilang desisyon. May pabor sa consolidation na siyang kinonsulta ni P-BBM ngunit hindi naman niya nakaharap ang mga grupong tutol.

Alam naman natin na sa ilalim ng consolidation, inoobliga ang mga jeepney operator na bumuo ng kooperatiba o korporasyon upang dito ibubuhos ang pondo na pambili ng modernized jeepney.

Kaya kahit pikit-mata ay itinuloy pa rin ng grupong Pagkakaisa ng mga Samahan ng Tsuper at Opereytor Nationwide (PISTON) ang dalawang araw na jeepney strike nitong nagdaang Huwebes at Biyernes dahil tinatayang 80% ng mga operator ang tatanggalan ng prangkisa.

Dismayado ang PISTON sa naging desisyon ni P-BBM na hindi na palawigin ang deadline dahil hindi na umano dapat pang maantala ang programa kung saan mayorya naman ng mga operator, bangko, financial institutions, maging ang publiko ay sang-ayon dito.

Para naman sa United Transport Consolidated Entities of the Philippines, pabor sila na hindi na ma-extend ang deadline lalo’t 2017 pa nasimulan ang programa at ilang ulit na rin itong pinalawig at panahon na umano para magkaroon ng pagbabago sa pampublikong transportasyon.

Dahil dito, nagbabala naman si DOTr Secretary Jaime Bautista na babawian ng prangkisa ang mga jeepney operator na nagkasa naman ng panibagong tigil-pasada laban sa PUVMP, na ang ibig sabihin ay hindi na maaaring bumiyahe kung walang prangkisa ang isang sasakyan.

Malakas ang loob ng DOTr dahil sa sobra-sobra umano ang mga jeepney na bumibiyahe sa National Capital Region (NCR) at kakayaning punan ng mga PUV operator na lumahok sa consolidation ang mga ruta para sa pangangailangan ng publiko.

Kaugnay nito, magbubukas ng mga priority lane ang DOTr para sa natitirang mga driver at operator na hindi pa naisasama sa isang korporasyon o kooperatiba habang nanindigan ang departamento na hindi palalawigin ang deadline sa Disyembre 31, na kinatigan pa ni P-BBM.

Kabilang sa requirements para sa konsolidasyon ay ang pinakabagong LTO Official Receipt at Certificate of Registration (OR at CR), SEC Certificate of Registration/Certification (para sa corporation) o CDA Registration/OTC Certification (para sa cooperative) at affidavit of conformity ng indibidwal na operator na handang sumali sa isang kooperatiba o korporasyon. 

Patunay ito na ang pagkakahati-hati ng mga transport group, ang nagpagaan sa pamahalaan upang ituloy na itong PUVMP dahil hindi naman solido ang tumututol.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Tsuper at operator, never-say-die vs. phaseout

ni Atty. Rodge Gutierrez @Mr. 1-Rider | December 14, 2023

Ilang araw na lamang ay Pasko na, habang abala ang ating mga kababayan sa pagdalo sa mga party at pamimili para sa mga ihahanda, nagkukumahog pa rin ang isang transport group na maglunsad ng dalawang araw na tigil-pasada.

Kamakailan lamang ay naglunsad din ng tigil-pasada itong Pagkakaisa ng mga Samahan ng Tsuper at Opereytor Nationwide (PISTON) at halos ilang araw lamang nagpahinga at hindi pa natin alam kung ano ang naging resulta ng una nilang protesta, tapos heto na naman.

Hindi ba’t inalalayan pa sila ng grupong MANIBELA upang mas magkaroon umano ng diin ang kanilang ipinaglalaban ngunit, tila hanggang sa kasalukuyan ay pabawas nang pabawas ang kanilang pag-asa na mapagbibigyan pa sila ng pamahalaan sa kanilang kahilingan.

Muling susubukan ng grupong PISTON ang dalawang araw na tigil-pasada ngayong Huwebes at Biyernes pero sa pagkakataong ito ay lalahok na umano sa jeepney strike ang mga kaalyado nilang grupo sa Central Luzon at Southern Tagalog.

Kung paniniwalaan natin ang pahayag ng PISTON, pinangangalandakan nilang posibleng lumawig pa ang kanilang tigil-pasada depende sa magiging tugon umano ng pamahalaan.

Napakarami na nang nadamay sa mga halinhinang protesta na isinasagawa ng PISTON at MANIBELA pero hanggang ngayon ay hindi nila natitinag ang Department of Transportation (DOTr) na patuloy na naninindigan na tuloy ang deadline sa Disyembre 31.

Ganu’n din ang Land Transportation Franchising and Regulatory Board (LTFRB) na hindi na nakakaramdam ng pangamba dahil sa hindi naman umano kaya ng dalawang transport group na paralisahin ang sitwasyon ng pampublikong transportasyon sa bansa.

Maging ang Metro Manila Development Authority (MMDA) ay naglabas ng pahayag hinggil sa kanilang kahandaan sa tuwing may mga tigil-pasada at minaliit lamang nila ang puwersa ng mga nagsasagawa ng tigil-pasada at hindi umano maramdaman ang kanilang kawalan.

Habang lumilipas ang araw ay unti-unti nang lumalapit ang itinakdang deadline sa Disyembre 31, 2023 at bukod sa banta ng tigil-pasada ay walang magawa ang nabanggit na dalawang transport group. 

Dahil dito, nagpasaklolo na ang transport group na MANIBELA sa Malacañang na direkta na itong nagpadala ng liham kay Pangulong Ferdinand ‘Bongbong’ Marcos Jr. (P-BBM) hinggil sa nalalapit na pagpapatupad ng deadline sa consolidation sa Disyembre 31.

Naniniwala kasi ang dalawang transport group na ang itinakdang deadline para sa tradisyunal na jeepney ay simula na rin ng phaseout at hindi sila bilib sa mga paliwanag ng DOTr at LTFRB.

Noong nakaraang Disyembre 3 ay sinulatan mismo ng MANIBELA si P-BBM at binigyan din nila ng kopya ang tanggapan ni Department of Justice (DOJ) Secretary Jesus Crispin Remulla na isa rin sa nais nilang makaharap upang mapakinggan ang kanilang mga hinaing.

Nakapaloob din sa liham na kaya sila lumapit kay P-BBM ay upang maitulad ang programa sa Davao Region na naglaan ang pamahalaan ng P73 bilyon para sa modernisasyon ng pampublikong transportasyon at hangad umano nila na walang driver, operator at iba pang manggagawa sa transportasyon ang makaranas ng gutom sa tulong nga ng Pangulo.

Subalit, sa naging tugon ni P-BBM wala itong balak na palawigin pa at tuloy ang deadline ng consolidation ng public utility vehicles (PUV) sa Disyembre 31.

Ang masaklap, dahil magpa-Pasko na at wala namang pagbabago sa kanilang sitwasyon habang nagbabadya pa rin ang banta ng pamahalaan, kaya pinangangambahan nila ang posibleng pagkawala ng kanilang kabuhayan dahil sa Public Utility Vehicle Modernization Program (PUVMP).

Ilang tigil-pasada pa ba ang kailangan para pansinin sila ng pamahalaan? May pag-asa pa bang inaasahan ang transport group para hindi matuloy ang deadline sa Disyembre 31.

Kaugnay nito, may panuntunang inilabas ang LTFRB na nais nilang sundin ng mga tradisyunal na jeepney para manatili sa pamamasada, ngunit tinututulan ito ng mga transport group at hanggang sa kasalukuyan ay nananatili pa rin ang paninindigan ng magkabilang panig.

Hindi pa rin nawawalan ng pag-asa ang transport group kaya nga hanggang sa huli ay naniniwala silang may bisa pa rin ang isinasagawa nilang tigil-pasada.

Ilang araw na lang naman, sana hindi humantong sa pighati ang hindi pagkakasundo ng pamahalaan at ng ilang transport group.   

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Sagot ni P-BBM sa apela ng transport group vs. phaseout, ‘wag nang patagalin

ni Atty. Rodge Gutierrez @Mr. 1-Rider | December 12, 2023

Nagpasaklolo na ang transport group na MANIBELA sa Malacañang na direkta na itong nagpadala ng sulat kay Pangulong Ferdinand ‘Bongbong’ Marcos Jr. (P-BBM) hinggil sa nalalapit na pagpapatupad ng deadline sa consolidation sa Disyembre 31, na pinaniniwalaan ng ibang simula na rin ng phaseout ng tradisyunal na jeepney.

Sa kabila ng halinhinang protesta na isinagawa ng transport group na MANIBELA at PISTON ay tila hindi naman nila natinag ang paninindigan ng Department of Transportation (DOTr) sa nalalapit na deadline sa kabila ng mga banta na may mga susunod pang protesta.

Noong nakaraang Disyembre 3, sinulatan mismo ng MANIBELA si P-BBM at binigyan din nila ng kopya ang tanggapan ni Department of Justice (DOJ) Secretary Jesus Crispin Remulla na isa rin sa nais nilang makaharap upang mapakinggan ang kanilang mga hinaing.

Nakapaloob sa dalawa’t kalahating pahinang liham na isinadlak umano sila labis ng kahirapan ng nagdaang pandemya na humantong sa kalagayan nilang ‘isang kahig, isang tuka’ dahil sa pagkawala ng kanilang kabuhayan bilang driver at operator ng tradisyunal na jeepney.

Karamihan umano sa kanilang hanay ay wala namang ipon kaya marami ang pinalayas na sa inuupahan nilang bahay at sa loob na lamang ng pampasaherong jeepney natutulog at ang pinakamasakit pa umano ay umabot na ang karamihang tsuper na namamalimos na lamang sa lansangan para makakain.

Dahil sa haba umano ng panahon ng wala silang hanapbuhay dulot ng pandemya ay hindi lamang dignidad ang nawala sa kanila dahil maging ang buhay ng marami sa kanilang kasamahan ay nawala rin sanhi ng kawalan ng pambili ng gamot.

Nilalaman din ng naturang sulat na hindi pa sila lubusang nakakabangon sa pagkakalugmok mula sa pandemya at may panibago na naman umanong nagbabadyang trahedya at ito ang posibleng mawalan sila ng kabuhayan dahil sa Public Utility Vehicle Modernization Program (PUVMP).

Masyado umanong minamadali ang PUVMP na naging dahilan kaya karamihan sa kanilang hanay ay nabaon na sa utang at iba naman ay nawalan na ng kabuhayan dahil sa malaking porsyento umano ay hinatak na ang mga unit/modern mini-bus at ang iba ay na-bankrupt ang kanilang kooperatiba o korporasyon dahil sa kakulangan ng kaayusan at paghahanda sa pagpapatupad nito.

Hindi naman umano sila tutol sa modernisasyon basta’t ito ay makatuwiran, makatao at nais nilang walang maiiwan kahit isa sa kanilang hanay.

Nakapaloob din sa liham na kaya sila lumapit kay P-BBM ay upang maitulad ang programa sa Davao Region na naglaan ang pamahalaan ng P73 bilyon para sa modernisasyon ng pampublikong transportasyon at hangad umano nila na wala ng driver, operator at iba pang manggagawa sa transportasyon ang makaranas ng gutom sa tulong nga ng Pangulo.

Laman din ng kanilang liham na ibalik ang validity ng kanilang prangkisa sa loob ng limang taon, upang mawala umano ang kanilang pangamba na sa tuwing sasapit ang katapusan o kalagitnaan ng taon ay mawawalan sila ng hanapbuhay habang inaaral pa umano ang pagpapatupad ng PUVMP.

Nais din nila na muling pag-aralan ang Local Public Transport Route Plan (LPTRP) dahil marami umano ang nasagasaang ruta at karamihan ay hindi naman dumaan sa hearing ng mga LGUs. Maiwasan din umano na sa malalaking korporasyon lang ina-award ang mga ruta at nawawalan ng hanapbuhay ang mga maliliit na kasapi.

Nais din nilang matiyak na mananatili ang tradisyunal na jeepney habang wala pang pondo at kakayahang magpalit ng modernong sasakyan at sana ay mga gawang Pinoy na bukod sa mura, magkakaroon pa ng hanapbuhay ang mga mekaniko at latero sa bansa.

Ang liham na ito ay ipinadala ng MANIBELA noong nakaraang Disyembre 3, 2023 at hanggang ngayon ay wala pa ring malinaw na sagot na nakukuha mula kay P-BBM at sa DOJ kaya kasabay ng sambayanan ay mananatili muna tayong nakaabang.

Habang papalapit nang papalapit ang Disyembre 31, 2023 ay hindi na nakakatulog ng normal ang mga pamilya ng transport group na tutol sa PUVMP at habang marami tayong kababayan na nagsasaya dahil sa pagsalubong sa bagong taon, may isang sektor na nagluluksa sakaling hindi sila mapagbibigyan ng pamahalaan.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.