LTFRB muling lumambot vs. Traditional jeepney

ni Atty. Rodge Gutierrez @Mr. 1-Rider | january 6, 2024

Mistulang “mamon” na lumambot sa kanilang paninindigan ang Land Transportation Franchising and Regulatory Board (LTFRB) makaraang palawigin pa nila ang deadline para sa konsolidasyon ng traditional jeepney sa ilalim ng Public Utility Vehicle Modernization Program (PUVMP) na nauna nang itinakda noong nakaraang buwan.

Walang nagawa ang LTFRB sa patuloy na pakikipagmatigasan ng ilang transport group na hindi lalahok ang mga ito sa itinakdang konsolidasyon na may deadline noong Disyembre 31, 2023, sa kabila ng mga banta ng ahensya na aalisan ang mga ito ng prangkisa at hindi na makababalik sa kalye para mamasada.

Matatandaan na maging si Pangulong Ferdinand “Bongbong” Marcos Jr., ay nagbigay ng pahayag na kailangang ipatupad ang itinakdang deadline para sa konsolidasyon ng traditional jeepney na madiing tinutulan ng ilang transport group dahil sa paniniwalang ito na ang simula ng pag-phaseout ng traditional jeepney sa bansa.

Nabuhayan ang transport group nang palawigin ng LTFRB ang deadline sa Enero 31, 2024 para sa consolidated PUV operators kung saan una nang itinakda noong Disyembre 31, 2023.

Maituturing na tagumpay sa panig ng transport group ang pagpapalawig na ito ng LTFRB. Kumbaga sa boksing, nakaungos ng bahagya ang ipinaglalaban ng transport group.

Kaugnay nito, lumakas naman ang panawagan ng transport group sa Korte Suprema na maglabas na ng pinal na desisyon hinggil sa kanilang apela upang maiwasan na ang krisis sa transportasyon.

Samantala, ang LTFRB ay nag-isyu ng panibagong guidelines makaraang mabigo ang itinakdang pagpapatupad ng panuntunan hinggil sa konsolidasyon.

Nag-isyu ang LTFRB ng Memorandum Circular, kung saan dinetalye na ang PUVMP ay matutuloy ngayong taon partikular na para makasiguro na mayroong sapat na PUV services para sa mga commuter at upang maiwasan din ang transportation crisis lalo pa at nagsimula na uli ang pagbubukas ng klase.

Sa ngayon ay inuumpisahan na ng LTFRB na walisin ang lahat ng mga unconsolidated traditional jeepney sa kalsada at hindi na sila pinayagan pang mamasada simula ng araw ng taong ito.

Maliwanag na hindi pa rin tapos ang usaping ito sa pagpasok ng Bagong Taon sa dahilang matigas pa sa bato ang transport group at nanindigang hindi sila pahahawak sa leeg at tuluyan nang makapasok sa pain ng kagawaran.

Inihayag ng transport group na 20 porsyento lamang sa mga jeepney operator ang lumahok sa alok ng LTFRB na konsolidasyon samantalang 80 porsyento naman sa kanila ang nananatiling kontra sa ahensya.

Sinabi naman ng transport group na MANIBELA na ang 20 porsyentong lumahok sa konsolidasyon ay tinakot umano lamang at hinarass ng LTFRB na hindi sila bibigyan ng prangkisa kung hindi aayon dito.

Ayon pa sa MANIBELA, hindi sila naniniwala sa matamis na pananalita at kapahamakan lamang ang naghihintay sa kanila sa dulo ng lahat ng ito kung paniniwalaan nila ang alok ng ahensya.

Sa kabilang panig, nanindigan naman ang LTFRB na maglalabas pa sila ng karagdagang guidelines sa mga susunod na araw sa isasagawang press conference sa tuluy-tuloy na implementasyon ng transport modernization program.

Iginiit ng ahensya na halos 60 porsyento na ng transport operators, ang naitalang lumahok sa kanilang programa na taliwas naman ito sa inihayag ng MANIBELA na 20 porsyento lamang.

Hindi pa rin matiyak kung saan hahantong ang problemang ito sa pagitan ng LTFRB at ng traditional transport group na sana ay parehong magwakas nang mahinahon at paborable para hindi naman magsakripisyo ang mga pasahero at hindi lubusang makaapekto sa ating ekonomiya.

Sana sa pagkakataong ito, maglabas na nga ng desisyon ang Korte Suprema para tuluyan nang matapos ang usaping ito.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Tricycle phaseout, next??!

ni Atty. Rodge Gutierrez @Mr. 1-Rider | December 30, 2023

Kung susundan natin ang tinatahak na direksyon ng pamahalaan ay parang sa pagkaubos na ng tradisyunal na jeepney tayo hahantong lalo pa at tila wala nang patutunguhan ang mga protestang isinasagawa ng ilan sa ating transport group.

Sa pinakahuling pahayag ng mga tutol na transport group sa Public Utility Vehicle Modernization Program (PUVMP) ay tanging awa na lamang ang kanilang inaasahan mula sa tanggapan ni Pangulong Ferdinand Bongbong Marcos Jr. (P-BBM) na mapagbibigyan pa ang kanilang hiling.

Maging ang Department of Transportation (DOTr) ay matigas ang paninindigan na tuloy pa rin ang itinakdang deadline bukas, Disyembre 31, 2023 na sa tingin ng mga tradisyunal na jeepney ay katapusan na ng kanilang hanapbuhay.

Tingnan din natin, baka sa huling sandali ng mga pagkilos ay maglabas ng desisyon ang Korte Suprema kung saan kasalukuyang nagsampa ng petisyon ang mga tutol na transport group na ituloy ang itinakdang deadline.

Ang isa pa sa kinakaharap nating problema sa transportasyon ay ang bantang pagkawala na rin ng mga tricycle sa bansa na malaking sektor ng ating lipunan na sa pamamasada lamang nabubuhay.

Hindi magandang pagsalubong sa Bagong Taon, na hindi pa nareresolba ang problema sa tradisyunal na jeepney ay heto at may banta naman sa kalagayan ng ating mga ‘kagulong’ na ang tanging pinagkakakitaan ay ang pagmamaneho ng tricycle.

Umugong ang balita hinggil sa tuluyan nang pagwalis ng tricycle sa maraming bahagi ng bansa dahil sa plano ng pamahalaan na mas palawigin pa ang paggamit ng motorcycle taxi sa mas maraming lugar sa labas ng Metro Manila.

Ito ay dahil sa nararamdaman na umano ang unti-unting pagkamatay ng hanapbuhay na pagmamaneho ng tricycle sa National Capital Region dahil sa sobrang dami, ayon sa National Confederation of Tricycle Operators and Drivers Association of the Philippines (NACTODAP).

Tila nagtutugma rin ito sa pahayag ni Land Transportation Office (LTO) chief Vigor Mendoza na batay sa ulat ng Department of Transportation Technical Working Group (DOTr-TWG), may mga lugar na umanong tinitingnan upang i-pilot run ang motorcycle taxi.

Ang mga lugar ng Cavite, Rizal, Laguna, Batangas, Iloilo, Bacolod, Pampanga, Davao, Zamboanga, Legazpi, General Santos, Pangasinan, at Baguio, ang pinag-aaralang mga lugar na mas palalakasin ang naturang transportasyon.

Ang pilot run ay kasalukuyang sumasaklaw sa tatlong lugar: Metro Manila, Cebu, at Cagayan de Oro na ino-operate ng Angkas, JoyRide, at Move It.

Samantala, habang umiinit ang usapin sa tricycle ay patuloy ang pagdagsa ng trike mula sa India na halos lahat ng bahagi ng bansa ay may makikita nang bumibiyahe dahil sa ito ang kinagigiliwan ng ating mga kababayan.

Hindi pa kumpirmado kung ano ang opisyal na itatawag sa bagong sasakyan na ito ngunit ang trike ay tinutukoy ding ‘Toktok’ ng ilan. Sa bandang Cavite ay pinangalanan itong ‘Bokyo’ at may ilan naman na itinuturing itong ‘Trike Bajaj’.

Lima hanggang anim na komportableng pasahero ang kayang isakay ng trike na ito na bukod sa balance, kumpara sa tricycle na siksikan na ang apat na tao, ay hirap na hirap pa sa napakakipot na sidecar.

Marami na sa ating mga tricycle driver ang lumipat sa pagmamaneho ng trike na ito dahil maliban sa malakas ang makina at maraming sakay ay pareho lang naman ang konsumo sa gasolina ng tricycle.

Kahit saan ka lumingon sa ngayon ay naglipana na ang trike na ito, kaya hindi malayong sa mga susunod na linggo ay ang mga grupo naman ng tradisyunal na tricycle ang magpoprotesta dahil sa inaalis na rin sila sa paghahanapbuhay.

Sana bago pa man sumapit ang kinatatakutang sitwasyon ng mga tricycle sa bansa ay mapag-aralan na ng pamahalaan kung paano isasalba ang kanilang hanapbuhay dahil mas pinipili na sa ngayon ng mga pasahero ang trike — maging de gasolina man o electric.     

Maliban sa mga lugar na wala pang pagpipilian kundi tricycle lamang!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

P35 minimum pasahe, ‘pag natupad ang PUVMP!

ni Atty. Rodge Gutierrez @Mr. 1-Rider | December 28, 2023

Parang bombang nakatakdang sumabog anumang oras pagsapit ng Disyembre 31, 2023 ang kalagayan ng transport group sa bansa na isa sa pinakaaabangan ng ating mga kababayan kung paano ito ireresolba ng pamahalaan.

Hanggang sa huling sandali ay hindi pa rin nawawalan ng pag-asa ang ilang transport group na tutol sa Public Utility Vehicle Modernization Program (PUVMP) na muling naghain ng petisyon sa Korte Suprema upang hilingin na magpalabas ng temporary restraining order hinggil sa PUVMP consolidation.

Kaugnay nito, nagbigay ng babala ang grupong Pagkakaisa ng mga Samahan ng Tsuper at Opereytor Nationwide (PISTON) na tataas sa P35 ang minimum pasahe kapag nawala na ang mga traditional jeepney at UV Express.

Ito mismo ang naging pahayag ng pamunuan ng PISTON sa nakuha nilang impormasyon kaya pilit umanong iginigiit ng pamahalaan ang PUVMP at gagamitin umano ang mga modernong jeepney sa pagtataas ng pasahe.

Kung totoo ang pahayag na ito ng PISTON national president na si Mody Floranda ay napakasaklap ng balitang ito at siguradong maraming pasahero ang aalma.

Kinumpirma ng PISTON na nakakuha sila ng datos na aabot ng P35 ang minimum na pamasahe ngunit posible ring sadyang inilabas ito ng mga nagpoprotestang transport group upang mas lumakas pa ang kanilang panawagan.

Base naman sa pag-aaral ng isang non-profit organization na IBON Foundation, aabot hanggang 400% ang itataas ng minimum fare kapag natanggal sa kalsada ang mga traditional jeepney.

Ipinagtapat mismo ng IBON Foundation na ang malalang sasapitin ng privatization at corporatization ay ang bantang pagtataas ng pamasahe sa jeepney na aabot sa 300% hanggang 400% sa mga susunod na taon.

Kumbaga, nakakuha ng kakampi ang transport group sa samahan ng IBON Foundation na labis na kinakastigo ang kasalukuyang pamahalaan dahil sa pagsasawalang bahala umano sa mga karaingan ng transport sector.

Sinabi naman ni Department of Transportation (DOTr) na ang pangamba ng IBON Foundation ay maaaring sa Step 2 pa ng PUV modernization program, kung saan ang mga traditional jeepney ay papalitan ng mga modern jeepney.

Ipinaliwanag ng DOTr na ikinasa na ng gobyerno ang mga pagbabago sa plano upang maibsan ang pasanin ng mga jeepney operator na nakahabol sa PUVMP consolidation.

Kabilang na nga rito ang pagtataas ng subsidiya na dati-rati ay nasa P80,000 lamang per unit, tapos dinagdagan at ginawang P160,000 per unit — ngayon ay nasa P200,000 hanggang P300,000 na depende sa klase ng jeepney na nais nila.

Ang presyo ng bagong modernized jeepney ay nagkakahalaga ng P2.3 milyon hanggang P2.8 milyon per unit na labis na tinututulan ng ilang transport group kaya nga hanggang ngayon ay tuloy pa rin ang protesta.

Hanggang sa kasalukuyan ay wala pa ring liwanag na natatanaw ang mga nagpoprotestang transport group sa kabila ng panibagong petisyon na isinumite nila sa Korte Suprema dahil sa matinding paninindigan ng DOTr na ituloy ang nakatakdang deadline.

Dismayado na ang ilang transport group dahil posibleng humantong umano sa kawalan ng hanapbuhay ng 50,000 jeepney driver na tumatangging tumugon sa panawagan ng gobyerno na franchise consolidation hanggang sa Disyembre 31, 2023.

Pinakamalungkot umanong pagsalubong sa Bagong Taon ang sasapitin ng transport group dahil bukod sa 50,000 jeepney units na maaaring huminto sa pagbiyahe sa kanilang mga ruta sa Metro Manila ay maaapektuhan din ang iba pang public utility vehicle gaya ng UV Express dahil sa PUVMP na ito.

Ngunit sa dinami-dami ng paliwanag ng mga nagpoprotestang transport group ay sinabi ni DOTr Secretary Jaime Bautista na ang jeepney na hindi nag-consolidate ay ituturing nang kolorum kapag pumasada simula sa Enero 1, 2024.

Ang tanging pag-asa na lamang sa ngayon ng mga transport group ay ang patulan sila ng Supreme Court at maglabas ng temporary restraining order sa PUVMP consolidation.

Maliban d’yan ay wala na tayong nakikitang malaking paggalaw maliban na lamang sa mga panibagong tigil-pasada na hindi na pinapansin ng DOTr — konti na lang magkakaalam-alam na!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.