Dagdag kaalaman sa pagmamaneho para iwas-disgrasya

ni Atty. Rodge Gutierrez @Mr. 1-Rider | Enero 20, 2024

Ang ambulance service ay isa sa pangunahing health service vehicle para sa paghahatid ng mga nagmamadaling pasyente lalo na ‘yung mga galing sa aksidente, atake o kalamidad.

Kabilang sa mga ibinibiyahe ang mga pasyenteng galing o patungo sa emergency room ng mga ospital o paglilipat ng pasyente mula sa pinagmulan patungong pagamutan para agad mabigyan ng karampatang lunas, kaya marapat lang na mabigyang prayoridad ang paspas sa biyaheng ambulansya.

Maraming driver na hindi binibigyang pansin ang humaharabas na ambulansya, kaya dapat ay maunawaan ng lahat ng nagmamaneho na dapat bigyan ng pagkakataong makaungos o maka-over take ang isang ambulansya.

Sa oras na paganahin ng ambulansya ang kanilang sirena ay kailangang batid ito ng bawat driver sa kalye na buhay ang kanilang hinahabol at napakahalaga ng bawat segundong sila ay maaantala dahil posibleng ikasawi ito ng lulan nilang pasyente.

Hanggang sa kasalukuyan ay marami pa rin tayong naririnig na driver na nagtatanong kung bakit ang katagang AMBULANCE na nakasulat sa harap ng mga ambulansya ay pabaligtad na nakalagay.

Tunay na napakarami ring may hawak na driver’s license ang hindi pa rin naiintindihan ang mga traffic sign sa maraming bahagi ng bansa.

Dapat kahit ‘yung mga basic na traffic sign na itinuturo sa mga driving school ay alam din ng mga driver upang maiwasan nila itong labagin sa gitna ng pagmamaneho na karaniwang nangyayari.

Malaking bagay ang kaalaman hinggil sa mga traffic sign para maiwasan din ang pagtatalo sa pagitan ng driver at ng traffic enforcer na may pagkakataong nauuwi pa sa pisikal na sakitan sa panahon ng panghuhuli.

Ang baligtad na pagkakasulat ng katagang AMBULANCE sa harap ng sasakyan ng ambulansya ay hindi pagkakamali, kundi sadya itong isinulat upang kahit nasa likod ng isang sasakyan ang ambulansya ay mababasa nang tama sa salamin ng nasa unahang behikulo na may nakatutok na ambulansya sa kanyang likuran.

Dapat maunawaan ng mga driver na may karampatang multa ang sinumang babalewalain ang ingay ng sirena ng nagmamadaling ambulansya kabilang na rito ang mga sasakyang pamatay ng sunog.

Maraming driver ang naiirita kapag naririnig nila ang sirena ng ambulansya o kaya ay sasakyan ng mga bumbero na karaniwang nagmamadali dahil bahagi lamang ito ng kanilang trabaho na dapat nilang gawin kaya kailangang-kailangan nila ng pang-unawa mula sa kapwa nila nagmamaneho.

Marami sa ating mga driver ay wala namang pormal na edukasyon sa pagmamaneho na isa rin sa malaking rason kung bakit nagsisikip ang daloy ng trapiko dahil sa kakulangan ng disiplina at kaalaman.

Subalit, hindi sapat na dahilan na porke kulang sa pormal na edukasyon sa pagmamaneho ay hindi na marunong magmaneho, mas maayos lang sana kung sapat ang kaalaman ng isang driver at maiiwasan pa ang disgrasya. 

Maraming mahuhusay na tsuper sa lansangan na karaniwan ay tinuruan lang ng kapitbahay magmaneho, kaya kung may pagkakataon din lamang ay makabubuting magbasa-basa kahit mga simpleng traffic sign dahil bukod sa karagdagang kaalaman ay malaking tulong ito sa pagre-renew ng driver’s license.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Donasyong plastic card sa LTO para sa Driver’s License ID, palpak

ni Atty. Rodge Gutierrez @Mr. 1-Rider | Enero 18, 2024

Nangangamote nang husto ang pamunuan ng Land Transportation Office (LTO) kung paano iresolba ang kakapusan ng driver’s license sa bansa na nagsimula ang problema sa supply ng plastic card nang kunin ni Department of Transportation (DOTr) Secretary Jaime Bautista ang responsibilidad sa malakihang kontrata sa LTO, na nauwi sa hidwaan at naging dahilan ng pagbibitiw noon ni dating LTO chief Jose Arturo Tugade, habang mula noon ay hindi pa rin nalulutas ang napakatagal nang problema.

Ang inaalala lang ng marami nating kababayan ay kung paano makapanghuhuli ang mga traffic enforcer kung wala namang huhulihin na magkakasalang driver dahil sa kakulangan nga ng lisensya.

Ayon kay LTO Assistant Secretary Vigor Mendoza II, tatagal na lamang ng dalawang linggo ang supply ng plastic card sa lisensya ng driver. Sa katunayan aniya, wala nang plastic cards ang ibang district offices sa mga mall.

Noong nakaraang Disyembre ay pinaasa tayo ng LTO na tapos na ang problema sa lisensya dahil sa naglabasan na sa media na mayroong 4 milyong donasyon na plastic card mula sa Philippine Society of Medicine for Drivers kaya nakampante na ang marami nating kababayan, ngunit ngayon ay iba na naman ang pahayag ng LTO dahil nananatili pa rin pala ang problema sa kakulangan ng driver’s license. Hindi umano magamit ng LTO ang donasyong 4 milyong plastic card habang wala pang basbas ang Office of the Solicitor General (OSG) sa legalidad ng donasyon.

Kumbaga, as far as card is concerned, wala pa tayong card. ‘Yung donasyon na 4 milyong plastic card, ay hindi pa puwedeng gamitin dahil sa naghihintay pa umano sa final OSG opinion para plantsado ‘yung legalidad, ayon sa pahayag mismo ni LTO Sec. Mendoza.

Natigil ang supply ng plastic card ng driver’s license dahil sa inisyung temporary restraining order (TRO) ng Quezon City Court bunsod ng petisyong inihain ng natalong bidder.

Base sa paliwanag ni LTO Sec. Mendoza, kailangang suriin muna ng OSG, House Committee on Transportation, at Department of Science and Technology (DOST) ang donasyong plastic card.

Ang plastic card ay kailangang dumaan pa sa pagsisiyasat ng DOST upang masuri ang kapal, timbang at kalidad ng materyales. Kailangan din ang proof of concept, security code at iba pa.

Kahit mabigyan ng go-signal ang paggamit ng 4 milyong donasyong card, kulang pa rin ito para sa 2024 dahil ngayong taon ay 10 hanggang 12 milyong card ang kailangan ng LTO.

Nagsimula ang problema sa supply ng plastic card nang kunin ni DOTr Sec. Bautista ang responsibilidad sa malakihang kontrata sa LTO. Dahil sa hidwaang ito, nagbitiw noon si LTO chief Tugade. 

Ang medyo kuwestiyunable lang sa sitwasyon ay ang mabagal na pagtugon ng pamunuan ng LTO dahil sa Disyembre pa lamang ay kita na ang paparating na problema sa driver’s license, pero parang ngayon lang sila kumikilos samantalang napakatagal na ng puwedeng solusyon sa kanilang tanggapan at ang kailangan lamang ay tamang disposisyon.

Tapos ngayong nagsisimula na ang taon ay saka lamang iaanunsyo na kulang pa rin ang plastic card ng driver’s license kasi may mga dapat pa raw ayusin na sana ay inayos na para maganda rin ang pasok ng taon. 

Hindi natin tinutuligsa ang pamunuan ng LTO, nais lang nating iparating sa kanila ang komento ng ating mga kababayan na umay na umay na sa balitang problema pa rin ang ating driver’s license.

Sa tingin kasi ng maraming kababayan ay simple lang ang problemang ito, ngunit inabot na ng panibagong taon ay hindi pa rin nareresolba, at baka puwedeng repasuhin na ang kakayahan ng mga itinalagang opisyal sa tanggapan ng LTO kung karapat-dapat ba sila sa kani-kanilang posisyon.

Lumilipas kasi ang araw ay dumarami ang problemang kinakaharap ng LTO, at siyempre ang apektado rito ay ang publiko kaya medyo nababahala rin tayo. 

Sana ‘pag gising natin bukas ay may anunsyo na ang LTO na tapos na ang problema sa kakulangan ng driver’s license — ‘yung totoong solusyon hindi ‘yung pang media lang na paaasahin lang tayo. Dapat ‘yung tunay na solusyon.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

15K ‘Kagulong’, kalahok sa kilos-protesta ngayong araw vs. PUVMP

ni Atty. Rodge Gutierrez @Mr. 1-Rider | Enero 16, 2024

Posibleng maaksyunan na ng gobyerno at magkaroon ng pinal na desisyon ang matagal nang isyu hinggil sa planong walisin sa kalsada ang traditional jeepney sa dahilang nagkapit-bisig na ang mga transport group na nagbantang hindi na magsasagawa ng transport strike kundi sabay-sabay na transport protest.

Ito ang inanunsyo ng MANIBELA kung saan sinabi nito na sila ay magsasagawa ng kilos-protesta kaysa sa tigil-pasada sa pag-asa na ipatigil ng pamahalaan ang pagpapatupad ng Public Utility Vehicle Modernization Program (PUVMP).

Kinumpirma ng transport group na MANIBELA noong nakalipas na Sabado na magsasagawa sila ng kilos-protesta ngayong araw mismo, Enero 16, 2024 at hindi na tigil-pasada laban sa franchise consolidation at PUVMP sa pag-asang mapakinggan sila ng pamahalaan at huwag nang maisakatuparan ang planong pagtanggal sa kalsada ng mga traditional jeepney.

Ang isasagawang protesta ay gaganapin simula alas-9 ng umaga mula sa UP Diliman hanggang sa Mendiola, Manila ngayong Martes.

Ipinahayag ng pamunuan ng MANIBELA na tinatayang aabot sa 15,000 jeepney drivers at operators ang kalahok sa kilos-protesta na mariing kumokontra sa PUV modernization program ng pamahalaan.

Ayon pa sa grupo, nais nilang manawagan sa Pangulo na maibalik ang mga binawing prangkisa ng ilan nilang kasamahan, lalo na sa hanay ng mga operator na ang naging hakbang na ito ng gobyerno ay maliwanag na kawalan ng pagkakakitaan sa panig ng mga driver at operator habang kawalan ng masasakyan sa panig naman ng ating mga komyuter.

Ang kilos-protesta na ito ay isinagawa makalipas ang halos isang buwan nang ipatupad ng ilang transport group ang tigil-pasada laban sa PUVMP.

Disyembre 31, 2023, ang itinakdang deadline ng gobyerno para asikasuhin ng mga jeepney operator ang franchise consolidation kung saan ang mga hindi nakapagsumite ng kanilang rehistro ay pinayagan na makabiyahe sa kanilang ruta hanggang Enero 31, 2024 lamang.

Sa aking palagay kagulong, ang problemang ito na hindi pa matapos-tapos ay nagdudulot ng bigat sa pagitan ng gobyerno na naglalayong ang hakbang ay para sa modernisasyon sa kalsada, maging maayos, ligtas ang mga kababayan natin na namamasahe araw-araw. 

Sa planong ito na walisin sa kalsada ang mga traditional jeepney ay hindi “anti-poor” na nauna nang ipinahayag ng ilang transport group, kundi sa pagpapatupad nito, ayon naman sa panig ng gobyerno ay gaganda at magiging maayos pa ang kabuhayan ng ating mga tsuper.

Nais din ng ating gobyerno na maging mabisa, maayos at environment-friendly ang ating mga sasakyan at hindi iyong luma na.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.