Sexual Services sa transport app nasa Cebu City

ni Atty. Rodge Gutierrez @Mr. 1-Rider | Enero 30, 2024

Lubhang nakaaalarma ang natuklasan kamakailan na umentra na ang ilegal na aktibidad gamit ang delivery at transportation app na umano’y ginagawa na ngayong platform para sa sexual services imbes na sila ay maghatid ng mga padala o magsakay ng mga pasaherong nag-book sa kanila.

Ito ang nabunyag at nabatid ng mga otoridad sa Cebu City, kung kaya’t agad na ipinaalam nila sa kumpanya na nag-o-operate ng transportation app na aksyunan ang katiwaliang ito.

Ayon sa pamunuan ng Cebu City Council, nakatanggap sila ng intelligence report noong Oktubre pa ng nakalipas na taon hinggil sa umano’y mayroong mga driver ng Taxsee Philippines Inc., ang kumpanyang nag-o-operate para sa Maxim rides and food delivery, na ginagamit daw bilang platform para sa sexual services.

Nitong Enero 12, 2024, nagpadala ng kasagutan ang Taxsee Philippines Inc., na nilagdaan mismo ng kanilang presidente na si Andres Morales Jr., kung saan siniguro nito na gumawa na sila ng kaukulang aksyon para matigil ang sinasabing ilegal na gawain na lubhang nakasasama sa kanilang imahe. Ang kasagutan ay naisagawa ng kumpanya makaraang sulatan ng city council ng Cebu ang kumpanya noong nakaraang Oktubre.

Binanggit pa ng kumpanya na tinanggal na nila ang specific features sa transportation app partikular na ang “massage and spa” at “bike” options na siyang naging daan upang magkaroon ng umano’y katiwalian.

Sa isang resolusyon, napag-alaman ng council na maraming driver ng Maxim umano ang nakatanggap ng bookings mula sa mga users na humihiling ng sexual services.

Sa nasabing resolution, ang transport app ay mayroon umanong feature na kung saan ay pumapayag ang mga driver at pasahero na mag-usap sa pamamagitan ng phone calls at text messages upang makipag-coordinate sa booking details.

Sa naaprubahan pang resolution, ang illicit bookings na ito ay nakaaalarma na lubhang nagbabanta sa kaligtasan at seguridad ng mga rider na marangal na nagtatrabaho at hindi para makatanggap ng anumang illicit sexual favors.

Gayundin, sinabihan pa ng council ang naturang kumpanya na usisaing mabuti ang nabanggit na kaso upang malaman kung ano talaga ang nangyayari sa transportation app.

Ipinahayag naman ng Maxim na tinanggal na nila ang application noon pang Marso 15, 2023 at Mayo 23, 2023. 

Sinabi ni Morales na ang mga gumagamit sa umano’y hindi tama at bawal na requests makaraan ang kanilang imbestigasyon at beripikasyon, ay kanila nang hinarang o nai-block sa paggamit ng nabanggit na transport app.

Kapag may natanggap umano ang mga delivery rider ng messages na tungkol sa sexual services ay sinabihan na nila ang mga ito na tanggihan ang booking at agad na mag-report sa kanilang opisina upang agad ding maaksyunan.

Idinagdag pa ni Morales na sa oras na matanggap ng kanilang customer service officers ang report, agad nilang tatawagan ang user para maberipika ang detalye ng reklamo at kapag na-verify naman na ang booking ay fraud at hindi para sa delivery services, agad nilang sasabihan ang user at bibigyan ng warning. Kapag umulit pa ito ay maaaring ma-deactivate at ma-delete ang kanilang accounts.

Mabuti naman at naaksyunan ang ganitong tiwaling sistema. Hindi pa natin alam kung mayroon nang ganitong sexual services na nagbo-book sa mga transport app sa kalakhang Maynila at dapat na magsagawa rin ng intelligence operations ang mga otoridad hinggil dito. 

Naglipana ang mga tiwaling aktibidad at hindi talaga malayong gamiting platform ang transport app ng mga mayroong masasamang gawain katulad ng sexual services.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

‘Nakaw-plaka syndicate’ sa LTO, tinuluyan

ni Atty. Rodge Gutierrez @Mr. 1-Rider | Enero 27, 2024

Bigyan natin nang pagsaludo ang pamunuan ng Land Transportation Office (LTO) dahil sa naresolba na nila ang sindikato ng nakawan ng plate number sa loob mismo ng plate-making plant ng LTO Central Office sa Quezon City.

Nauna rito ay nagpadala ng sulat ang hepe ng LTO sa pamunuan ng Department of the Interior and Local Government (DILG) at Philippine National Police (PNP) upang ipagbigay alam ang nagaganap na nakawan sa kanilang planta.

Dahil sa mabilis na pagkilos ng pinagsanib na puwersa ng DILG at PNP ay agad nasakote ang tatlo sa kaanib ng ‘nakaw-plaka syndicate’ sa LTO at kasalukuyang nakapiit sa detention cell ng Station 10 ng Central Police District (CPD) sa Quezon City at nahaharap sa kasong qualified theft.

Posibleng maresolba na rin ng LTO ang 10.4 milyong backlog ng plate number ng mga motorsiklo dahil sa kayang-kaya na ng planta ng ahensya na gumawa ng 30,000 plaka araw-araw at kung hindi na mananakawan ay posibleng sasapat na ang kanilang produksyon kabilang na ang plate number ng four-wheeled vehicle.

Nabatid na ang mga nasakoteng salarin ay matagal na ring tinatakot ang mga empleyado ng plate-making plant ng ahensya kaya walang nagsusumbong ngunit dahil sa husay ng intelligence ng pamunuan ng LTO ay naamoy nila ang galaw ng sindikato.

Kaugnay nito, nanawagan si DILG Secretary Benhur Abalos sa lahat ng may-ari ng sasakyan na iberipika sa LTO ang kani-kanilang plaka ng sasakyan upang matiyak na lehitimo ito at hindi galing sa nakaw na plaka ang naiisyu sa kanila.

Ang mga nakaw umanong plaka ay hindi nakarehistro sa data base na madaling malaman sa oras na mahuli ang sasakyan dahil tinitingnan umano ng mga operatiba ang QR code ng bawat plaka, habang ang mga nakaw umanong plaka ay walang lamang detalye ang QR code at hindi rehistrado, kaya hanggang maaga ay iberipika ang nakakabit na plaka para makasiguro at hindi mapahamak.

Sa LTO congratulations! Keep up the good work! Sana ay magtuluy-tuloy na ang mabubuting pangyayari sa loob ng ahensyang ito na palagi na lamang nasasangkot sa kontrobersiya. Mabuti at mahusay ang bagong pamunuan ng LTO at kayang-kaya niya ang mga problema at paparating pang problema sa naturang kagawaran na kakambal na yata ng kung anu-anong kontrobersiya.

Magandang simula ito para sa pagpasok ng panibagong taon dahil positibo ang mga kaganapan -- ibig sabihin ay nasa tamang direksyon ang LTO para sa mas ikabubuti pa ng ahensya.

Congrats uli at nabuwag na ang mga pasaway d’yan sa LTO at mabuti ‘yan para malaman ng iba pang tiwaling empleyado ng ahensya na hindi nagbibiro ang kasalukuyang namamahala -- at talagang tutuluyan ang mga tiwali.

Sa pagkakataong ito, bigyan natin ng papuri ang LTO, PNP at DILG sa isinagawa nilang matagumpay na operasyon na naging daan upang mabuwag ang sindikato na nasa loob mismo ng ahensya.

Kung bakit naman kasi pinagsama-sama ng panahon ang lahat ng klase ng tiwali sa ahensyang ito -- pero dahil seryoso ang bagong pamunuan ay tiyak na mauubos din ang mga ‘yan! Hala bira!              

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Hustisya sa rider na nasagasaan, nagkalasug-lasog dahil sa malubak na kalsada

ni Atty. Rodge Gutierrez @Mr. 1-Rider | Enero 25, 2024

Lasug-lasog ang katawan ng isang motorcycle rider matapos masagasaan ng isang tractor head na may trailer, kamakalawa sa may southbound lane ng Mel Lopez Boulevard sa Jacinto Street, Tondo, Maynila.

Namatay noon din ang biktimang si Danilo Malinao, nasa hustong edad, at driver ng Rusi motorcycle na may plate no. 791 QZR at taga-Santa Rosa I, Marilao, Bulacan.

Sa imbestigasyon ng Manila District Traffic Enforcement Unit-Vehicle Traffic Investigation Section (MDTEU-VTIS), naganap ang insidente alas-9 ng umaga sa nabanggit na lugar.

Nabatid na binabagtas ng biktima ang kahabaan ng southbound lane ng Mel Lopez Boulevard at pagsapit sa may panulukan ng Jacinto St. ay nasadlak ang motorsiklo sa isang malalim na lubak dahilan para matumba ito sa sinasakyang motorsiklo.

Dahil sa pagkakatumba ay nawalan ng pagkakataon ang biktima na bumangon kaya inabutan siya ng kasunod niyang tractor head na may trailer at may plate number: RDX 102 / BUA 2248 na minamaneho naman ni Dave Buenaventura, taga-Mulawi, Orani Bataan kaya’t nasagasaan ang biktima na nakatumba sa kalsada na naging sanhi ng agaran nitong kamatayan.

Sasampahan ng kasong reckless imprudence resulting to homicide and damage to property ang suspek sa Manila Prosecutors Office. 

Kung sa ibang bansa naganap ang ganitong aksidente, tiyak na umaapaw ang benepisyong ibibigay sa mga naiwan ng biktima lalo pa at may malaking partisipasyon ang malalim na lubak na naging dahilan ng kanyang kamatayan. Samantalang dito sa ating bansa, wala kang mahihitang benepisyo mula sa gobyerno at posibleng sisihin pa ito sa hindi pag-iingat sa kalsada.

Kung hindi dahil sa naturang lubak ay buhay pa sana ang rider dahil hindi naman siya magugulungan ng napakalaking sasakyan kung hindi siya natumba dahil sa lubak, na kung naging responsable lamang ang mga kontratista ng naturang kalye na lagyan ng tapal o ayusin ang lubak o kahit babala man lamang ay hindi dapat naganap ang aksidente at maagang kamatayan ng nabanggit na rider.

Dahil nangyari na ang kinatatakutang aksidente ay wala na munang sisihan, basta tiyakin lang sana ng kinauukulan na hindi na mauulit ang nangyari sa simpleng kapabayaan lamang.

Hindi natin batid kung ang biktima ay padre de pamilya o kaya ay inaasahan sa pamilya, na bumubuhay ng mga kapatid, na hindi sana nasawi kung naging responsable ang mga nakakasakop sa pinangyarihan ng insidente.

Alam naman nating lahat na lubhang napakadelikado ang magmaneho ng motorsiklo na nadaragdagan pa ng mga ganitong kapabayaan kaya mas lalong tumataas ang bilang ng mga nasasawi dahil sa motorsiklo.

Maraming pagkakataon nang napatunayan na puwedeng mag-ingat sa pagmamaneho ng motorsiklo ngunit kahit anong pag-iingat kung ganito kasama ang kondisyon ng kalsada ay parang lalo nating sinasadyang patayin ang mga rider.

Dapat ay managot sa pangyayaring ito ang mga responsable sa kalsada at dapat na umaksyon dito upang hindi na maulit pa. Sa ibang bansa, awtomatikong sinasagot ng gobyerno ang mga ganitong klaseng aksidente, kahit ‘yung mga nahuhulog na naglalakad lang at biglang napahakbang sa bukas na manhole ay inaako ng pamahalaan.

Maging ang mga opisyal ng barangay ay dapat managot sa kapabayaang ito dahil hindi nila na-monitor ang malalim na lubak na dapat ginawan nila ng paraan upang hindi na daanan pa.

Kung trabaho ito ng Department of Public Works and Highways (DPWH), dapat na kasama sa kanilang binabantayan ang kaligtasan ng mga motorista.

Huwag nating bitawan ang pangyayaring ito, kawawa naman ‘yung biktima.

Tandaan natin na ang teoryang sumemplang ang rider dahil sa malubak na kalsada ay mismong nasa imbestigasyon ng pulisya at hindi natin haka-haka lang.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.