TRB vs. Palpak na toll barrier sa expressway

ni Atty. Rodge Gutierrez @Mr. 1-Rider | July 6, 2024

Sa wakas ay may kumilos na para sa kapakanan ng mga motorista na madalas ay naaabala sa pagdaan sa expressway makaraang maghain si Sen. Raffy Tulfo ng Resolution No. 1060 para mapaimbestigahan at managot kung sino sa Toll Regulatory Board (TRB) at mga expressway toll operator ang may pagkukulang.

Hindi na nakayanan ng senador ang dagsa ng reklamo kaugnay sa matagal nang problema sa palpak na RFID system na nagiging sanhi ng buhol-buhol na traffic sa mga expressway.

Hanggang ngayon kasi ay maraming RFID tags ang hindi umano nababasa ng mga scanner dahil sa reader malfunction o maling pagkakalagay, na nagiging sanhi para hindi agad umangat ang mga toll barrier kaya matindi ang traffic.

Tinawagan na ni Sen. Tulfo, chairperson ng Senate Committee on Public Services, si TRB Executive Director Alvin Carullo, kung saan iminungkahi niyang sa oras na pumalya ang RFID reader, tatlong sasakyan pa lamang ang nasa pila ay sapilitan ng itaas ang barrier at libre na makadaan ang mga motorista habang inaayos ito.

Hinimok din ng mambabatas ang TRB na simulan nang ipatupad ang barrier-less na sistema sa mga expressway sa bansa.

Tulad ng dapat asahan ay nangako naman si Carullo na isa ito sa kanilang pag-uusapan sa pulong ng TRB para sa agarang aksyon.

Sana lang ay may kahinatnan ang mga pagsisikap na ito ng ilang kasamahan natin sa Senado at hindi makipagmagalingan sa press release ang TRB.

Ang kailangan natin dito ay aksyon at hindi paliwanag lang dahil maraming motorista ang naaapektuhan sa araw-araw na pamumuhay sa tuwing daraan sa mga expressway at hindi naman sila nagkukulang sa pagbabayad.

Sa ibang bansa ay hindi man lamang nagme-menor ang mga sasakyan sa tuwing dumaraan sa mga lugar na may toll barrier. Kumbaga, tuluy-tuloy lang ang biyahe at walang kaso kahit isa na hindi gumana ang kanilang toll barrier.

Hindi tulad sa atin na bumabagal na ang mga sasakyan pagdating sa toll barrier, tapos ay hindi pa kayang basahin ng mabilis ang RFID.

Matagal nang maraming nagrereklamo sa problemang ito, at hanggang ngayon ay nananatiling reklamo pa rin ang lahat — kaya tingnan natin ang pagkukusang ito ni Sen. Tulfo kung paano niya pagagalawin ang TRB at mga expressway toll operator sa bansa.

Isa pang dinaranas ng mga motorista sa pagdaan sa mga expressway ay ang pagbaha sa ilang bahagi nito na nagdudulot din ng pagsisikip sa daloy ng trapiko, at sana naman pagdating sa mga toll barrier ay ayusin nila.

May problema na nga sa antas ng ating edukasyon, kung saan kulelat tayo dahil sa rami ng ating mga mag-aral na hirap magbasa — pagdating ba naman sa toll barrier kulelat pa rin tayo dahil hirap magbasa ng RFID.

Ang mahal-mahal ng bayad sa mga expressway — sana naman ay palitan nila ng mas mabilis bumasa ng RFID sa kanilang mga toll gate at huwag mga puro sirain.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Bebot na rider, target ng agaw-motor gang

ni Atty. Rodge Gutierrez @Mr. 1-Rider | July 4, 2024

Pinag-iingat ng Philippine National Police (PNP) ang mga kababaihang nagmamaneho ng motorsiklo dahil sa mga ulat na may grupo ng mga nang-aagaw ng motor na karaniwang biktima ay mga babaeng rider.

Medyo marahas ang sistema ng agaw-motor gang kaya makabubuting mag-ingat ang mga bebot nating nagmomotorsiklo upang hindi mapahamak.

Hindi pa naman naglalabas ng datos ang PNP kung gaano na karami ang mga nabiktima ng gang na ito ngunit ang isa sa mga insidente ay naganap sa Pagbilao, Quezon noong nakaraang Sabado lamang.

Sugatan ang isang babae nang atakihin ito ng dalawang hinihinalang galamay ng agaw-motor gang at tangayin ang minamaneho niyang motorsiklo.

Ayon sa report ng Pagbilao police, nangyari ang insidente sa Sitio Tatakan sa Brgy.

Kanlurang Malicboy pasado alas-11 nang umaga habang tinatahak ng 36-anyos na biktima ang kahabaan ng Brgy. Ibabang Polo patungong Pagbilao.

Nadaanan ng biktima ang dalawang suspek habang nakaupo ang mga ito sa isang nakaparadang motorsiklo sa gilid ng kalsada.

Pagkakita sa babae, pinaandar ng mga suspek ang kanilang motor at agad na hinabol ang biktima sabay tutok ng backrider ng kanyang baril at pilit na pinahihinto ang biktima.

Dahil sa takot ay nadulas ang biktima sa kurbadang bahagi ng kalsada kaya tuluyang naagaw ng mga suspek ang motor nito. Minaneho naman ito ng backrider at tumakas patungong Lucena City.

Walang takot ang mga salarin kahit na kasagsagan ng tirik ng araw kaya makabubuti na ang mga rider ay magdoble ingat.

Sa mga bebot na rider, magandang umiwas muna sa mga lugar na hindi matao upang hindi maatake ng mga miyembro ng agaw-motor gang.

Tiyak na ilang araw lamang ay mamamayagpag na ang kasamaang ito kaya makabubuting maghanda, hindi lang ang mga kababaihan kundi ang mga lalaking menor-de-edad na nagmomotorsiklo.

Pinipili kasi ng mga kawatan ‘yung mga bibiktimahin na walang sapat na kakayahan para lumaban.

Maraming kabataang babae na sa gabi ay pagala-gala pa gamit ang kanilang motorsiklo at nagpupunta sa mga kaibigan. Sana ay maisip nilang sila ang target ng mga agaw-motor gang.

Sa kasalukuyan ay wala pang nasasakoteng miyembro ng naturang gang, kaya sakaling may nagbebenta ng mga murang motorsiklo sa inyong lugar ay agad na ipagbigay-alam sa tanggapan ng pulisya.

Kaawa-awa ang babaeng biktima, nawalan na ng motorsiklo ay isinugod pa sa pagamutan dahil sa tinamo nitong sugat sa iba’t ibang bahagi ng katawan sanhi ng insidente.

Dapat ding iwasan ng mga babaeng rider na mag-angkas ng bata dahil mas madali silang agawan ng motor at aalalahanin pa nila ang angkas na bata.

Karaniwang istilo ng agaw-motor gang ay susundan ang biktima at pagsapit sa lugar na walang tao ay tututukan ng patalim o baril para huminto at saka aagawin ang

motorsiklo.

Wala pa namang napaulat na nasawi dahil dito, pero tiyak na hindi magtatagal malalagay na rin sa alanganin ang buhay ng mga magiging biktima. 

Kaya sa mga kababayang rider ay dapat maging alerto — pakiramdaman kung may sumusunod dahil posibleng kayo na ang puntirya ng mga ito.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Dapat palakasin ng LTO ang sistema sa bentahan ng sasakyan

ni Atty. Rodge Gutierrez @Mr. 1-Rider | July 2, 2024

Paulit-ulit na nasasangkot sa kontrobersiya ang maraming may-ari ng sasakyan na nakakaladkad ang kanilang pangalan sa krimen o kaya ay nasasangkot sa iba pang paglabag sa kabila ng katotohanang matagal na nilang naipagbili ang dati nilang sasakyan at ang nakabili na ang dapat managot.

Kaugnay nito, nananawagan tayo sa Land Transportation Office (LTO) na palakasin pa ang sistema hinggil sa bentahan ng mga segunda manong sasakyan upang hindi naman malagay sa alanganin ang mga may-ari na nagbenta lamang ng pinaglumaan nilang sasakyan.

Karaniwang practice na kasi ang ‘open deed of sale’ na palaging nakahanda na sa buy and sell at pipirmahan na lamang ng mga nagbenta ng sasakyan ngunit hindi naman agad ito inire-report ng nakabili sa LTO.

Maraming pagkakataon na nasangkot sa aksidente ang isang sasakyan na ang may kagagawan ay ang bagong nakabili na nito, pero ang dating may-ari pa rin ang hinahabol ng batas.

Dahil dito, ipinanukala ni Sen. Raffy Tulfo sa LTO na obligahin ang lahat ng magre-renew ng kanilang vehicle registration na personal na pumunta sa LTO branch at magsumite ng valid government ID.

Sinabi ni Tulfo na marami na siyang natanggap na sumbong kung saan hirap ang mga otoridad na tukuyin ang gumamit ng sasakyang sangkot sa krimen o aksidente dahil matagal na pa lang naibenta ito pero nakapangalan pa rin sa unang owner.

Binanggit na halimbawa ni Tulfo ang reklamo kaugnay sa Silver Mitsubishi Montero Sport na ginamit sa pambubudol sa isang pasyenteng may cancer kamakailan na hanggang ngayon ay hindi pa rin natutukoy ang driver nito dahil napagpasa-pasahan na ang kotse at ‘open deed of sale’ lamang ang naganap na proseso.

Ayon sa senador, ‘common practice’ na ngayon lalo na sa buy and sell, na bibili ng sasakyan ang isang tao at hindi muna ito nirerehistro dahil ibebenta niya rin ito, habang umiiwas sa karagdagang gastos.

Matagal na ang reklamong ito at napakarami nang kaso ang napabalita na may ganitong kalakaran ngunit hanggang ngayon ay hindi pa rin natutugunan dahil sa kawalan ng maayos na sistema.

Marahil, panahon na para papanagutin ang sinumang bumili ng sasakyan na hindi agad-agad ipinagbibigay-alam sa pamunuan ng LTO na sila na ang nagmamay-ari ng nabiling sasakyan upang agad na maputol ang kaugnayan ng dating may-ari ng behikulo dahil naibenta na.

Karaniwang gumagawa nito ay mga nasa negosyong buy and sell ng sasakyan, at naging talamak na ang sistema na humantong sa iba’t ibang kumplikasyon.

Kaya habang wala ang umiiral na matinong sistema ay makabubuting ang mga nagbebenta na ng sasakyan ang siya na mismong magsumite ng mga dokumento sa LTO upang ipaalam at tuloy ay opisyal nang maputol ang ugnayan sa ipinagbiling behikulo.

Sa ganitong paraan ay maiiwasang makaladkad ang pangalan ng dating may-ari ng sasakyan sakaling masangkot man sa aksidente ang bagong owner nito.

Makabubuti rin na bigyan lamang ng kaukulang araw ang mga may hawak ng ‘open deed of sale’ para isaayos sa takdang panahon, at kapag nasita na hindi pa ito opisyal na naililipat ang pagmamay-ari ay kailangang bigyan ng kaukulang multa upang magkaroon ng pananagutan.

Kung hindi maisasaayos agad ang sistemang ito ay mananatili namang problema na posibleng magdulot pa ng mas malalang sitwasyon sa mga susunod na pagkakataon.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.