Pagtutol sa PUVMP umabot na sa karahasan

ni Atty. Rodge Gutierrez @Mr. 1-Rider | Pebrero 10, 2024

Dumating na ang matagal na nating pinangangambahang posibleng mangyari — ang pagtutol ng ilang transport group sa Public Utility Modernization Program (PUVMP) ng pamahalaan ay tila umabot na sa karahasan.

Ito ay matapos na umalma ang mga kapamilya ng umano’y apat na inarestong mga suspek sa pagsunog sa isang modernized PUV sa Catanauan, Quezon.

Noong isang linggo, bandang Biyernes ng hapon ay napasugod sa Catanauan PNP ang mga kapamilya at kinondena ang tila maling proseso ng pag-aresto at pag-aakusa sa mga ito.

Ayon sa pahayag ng mga suspek at mga kapamilya, bakasyunista lamang umano sila sa Quezon at nasa bayan ng Mulanay para dumalo sa kapistahan doon.

Sa panayam sa kapatid ng isa sa mga inaresto, sinabi nito na ang apat ay mga ‘constant traveler’ at dumadayo sa iba’t ibang lugar para mag-obserba ng mga event at mga traditional festival.

Ayon sa apat, nagtataka umano sila nang bigla na lang silang ikulong matapos ‘imbitahan’ ng mga pulis sa presinto.

Pagdating aniya sa presinto, lumabas mula sa isang van ang limang testigo na driver, konduktor at 3 pasahero ng sinunog na sasakyan at agaran silang itinuro na sila raw ang sumunog sa modernized PUV.

Sa unang inilabas na press release ng PRO 4A, sinasabing inaresto ang apat matapos ang ginawang backtracking at masusing imbestigasyon ng Catanauan police.

Batay pa rin sa report, lumalabas na tila pawang mga “professional” ang mga sinasabing salarin at mga dayo sa lalawigan ng Quezon.

Kabilang sa mga inaresto ang dalawang civil engineer, isang business manager at isang film director.

Dapat na maging seryoso ang imbestigasyon sa insidenteng ito dahil nakatuon ngayon dito ang pansin ng ating mga kababayan na tila maiuugnay ang nangyari sa usapin ng PUV modernization program, at sana ay agad na maresolba ang naturang kaso. 

Napakatagal na rin kasi ng resulta kung ano na ba ang kahihinatnan ng PUVMP ng pamahalaan at kung ano na ang kinalabasan ng mga isinagawang protesta ng mga tutol na transport groups sa nabanggit na sistema.

Matagal nang problema ng gobyerno ang isyu hinggil sa PUV modernization program, na layunin na tanggalin na sa kalsada ang mga lumang passenger jeepney na lubhang phased out na at hindi na ligtas pa sa mga komyuter at kalsada.

Subalit, maigting itong tinututulan ng ilang transport groups kung kaya’t makailang beses din silang nagsagawa ng transport strikes. Gayunman, nanindigan ang Land Transportation Office (LTO) na itutuloy nila ang programang ito pati na rin ang consolidated franchise scheme.

Kamakailan, pinagbigyan ni Pangulong Ferdinand Bongbong Marcos ang kahilingan ng jeepney drivers at operators para sa PUV consolidation.

Magugunitang, inaprubahan ni P-BBM ang rekomendasyon ng DOTr na bigyan ng hanggang Abril 30, 2024, na lumalabas na dalawa at kalahating buwan pa, ang gusto ng transport groups upang ipatupad ang consolidation ng PUV. 

Ang palugit na ito ay pagbibigay ng tsansa sa mga jeepney driver at operators na magpalista matapos na hindi sila nakasali sa deadline na magparehistro at sumama sa PUV consolidation noong Disyembre 2023.

Harinawa ay magkaroon na nga ng pagtatapos sa isyu na ito.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Taas-presyo sa petrolyo awat na, plis lang!

ni Atty. Rodge Gutierrez @Mr. 1-Rider | Pebrero 3, 2024

Hindi na rin talaga mapigilan ang pagtaas ng presyo ng gasoline at diesel products kung saan nagbigay ng advisories ang ilang gasoline companies kamakailan.

Inanunsyo ng Caltex, Cleanfuel, Jetti, Petro Gazz, PTT, Seaoil, Shell at Unioil na magkakaroon sila ng bigtime price hike simula noong Martes (Pebrero 6, 2024) sa halagang P2.80 bawat litro at P1.30 kada litro naman sa diesel.

Samantala, ang Seaoil at Shell naman ay magkakaroon ng pagtaas sa kerosene sa halagang P0.45 per liter. Inaasahang susunod pa ang pagtaas ng ibang gasoline firms.

Sa panibagong anunsyo na ito ng mga pangunahing players, nasa pang-apat na pag-increase na ito sa loob ng apat na linggong magkakasunod.

Sa datos ng Energy department, simula ng pagpasok ng taong ito, ang itinaas ng presyo ng gasoline ay umabot ng P1.45 per liter at ang diesel naman ay P0.60 per liter, samantalang ang presyo ng kerosene ay tumaas ng P.10, kung saan huling nagtaas ito noong 2023.

Sinasabing ang galaw ng petrolyo sa nagdaang linggo ay ugat ng pagtaas ng presyo ng diesel at gasolina.

Ang lalo pang umigting na tensyon sa Middle East, ang sanhi kung bakit tuluy-tuloy ang pagtaas ng mga fuel sa buong mundo.

Sa pahayag kamakailan ng World Bank, ang pinakahuling tensyon sa Middle East ay nagdulot ng geopolitical risks sa mga pangunahing produkto sa merkado, at one-third naman sa produktong oil trade ang apektado.

At ang posibilidad na tuluy-tuloy na pagtaas ng produkto ay ang patuloy na pagmamatigas ng Saudi Arabia at Russia na kontrolin ang pag-supply ng mga produktong langis sa iba’t ibang bahagi ng mundo.

Nabatid sa datos ng World Bank na ang average global oil price ay bumaba sa US78 per barrel noong nakalipas na Disyembre, mas mababa sa US94 noong Setyembre 2023.

Dagdag pa rito, malaking bahagi ng ekonomiya ng bansa natin ay ang remittances mula sa mga overseas Filipino workers (OFW) at ito ay lubhang naaapektuhan dahil sa paiba-ibang oil prices sa buong mundo.

Sa kabuuan, ang epekto ng pagbabago ng presyo ng mga langis ay mahalaga at nagkakaroon ito ng implikasyon sa iba’t ibang sektor kabilang na rito ang output, inflation at remittances.

Ang krudo ay isang pangunahing component ng gasoline kung kaya’t kapag tumaas ang presyo ng crude oil, natural lamang na tataas din ang presyo ng gasolina. Gayundin, ang Philippine peso ay patuloy na hihina kung ihahambing sa ibang pera ng ibang bansa tulad ng US dollar, na mas mataas ang halaga kumpara sa pera natin, kaya’t malaking halaga ang kinakailangan natin para lamang makabili ng barrel ng langis.

Makabubuting sundin natin ang payo ng Malacañang na magtipid sa kuryente at langis.

Magugunitang kailan lang, ipinag-utos ni Pangulong Ferdinand “Bongbong” Marcos Jr., (P-BBM) ang pagpapatupad ng Energy audit at random energy spot check sa lahat ng tanggapan ng gobyerno, kabilang na ang government-owned and controlled corporations upang masiguro na sumusunod ang mga ito sa kautusan na magtipid sa konsumo ng kuryente at langis.

Ang kautusan na ito ay nilagdaan ng Pangulo sa ilalim ng Administrative Order No. 15 na inisyu naman ni Executive Secretary Lucas Bersamin alinsunod sa Energy Efficiency Act (EEC).  Layunin nito na mabawasan ang buwanang konsumo ng gobyerno sa enerhiya at langis.

Tama naman ang naging direktiba na ito ng ating gobyerno kung saan pati nga mga local government units (LGUs) ay maigting na pinagtitipid sa konsumo ng kuryente at langis.

Sa nabanggit na utos, dapat na ang mga tanggapan ng gobyerno ay nasa 24°C sa mga aircon units, at kapag walang tao dapat ay naka-off ito. Gayundin, ilagay sa sleeping mode ang ibang kagamitan kapag walang tao sa opisina.

At para makasiguro na sumusunod ang mga ahensya at iba pang government owned na mga kumpanya ay magsasagawa ng regular na pag-a-audit sa konsumo ng kuryente at langis ang mga nakatalagang energy auditor.

Inaasahan natin na tayo ay maging responsable sa pagsunod sa mga direktibang gaya nito upang kahit paano ay magkaroon tayo ng partisipasyon na makatulong sa ating gobyerno. At dapat din na pati mga service vehicles ng ating gobyerno ay hindi ginagamit sa mga personal na lakad kundi sa official travel lamang.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

LTO, nagpasaklolo sa PCG para sa ‘No Registration, No Travel’

ni Atty. Rodge Gutierrez @Mr. 1-Rider | Pebrero 1, 2024

Inaasahang magiging matagumpay ang hakbang na ito ng Philippine Coast Guard (PCG) na tulungan ang operatiba ng Land Transportation Office (LTO) sa kanilang mas istriktong pagpapatupad ng ‘No Registration, No Travel’ policy.

Ito ang kinumpirma ni LTO chief Assistant Secretary Vigor Mendoza II, matapos na makipag-meeting sa mga opisyales ng PCG Investigation and Detection Management Service upang maisapinal ang strategic plan ng kanilang polisiya.

Sa nabanggit na pagpupulong, sinabi ni Mendoza na marami na silang natatanggap na reklamo mula sa transport groups hinggil sa mga driver at operator na hindi rehistrado ang mga sasakyan at malaking tulong ang PCG para masugpo ang problemang ito.

Base sa reklamo ng transport groups, ang mga kolorum na driver at operators ay kumukuha ng halos 30 porsyento ng kanilang kita sa araw-araw kung saan sila na mga nakarehistro ang mga sasakyan.

“Naiintindihan namin ang reklamo at concerns ng mga lehitimong drivers at operators kung kaya’t ito ang nagbunsod sa atin upang lalong palakasin ang ating koordinasyon at kapabilidad sa pakikipagtulungan ng PCG at iba pang ahensya upang sugpuin ang mga kolorum na sasakyan na ito,” pahayag pa ni Mendoza sa isang press release.

Magugunitang, naglabas ng datos ang LTO na nagkumpirmang may 182,458 delingkuwenteng behikulo at hindi rehistrado mula Enero 1 hanggang 23.

Si Mendoza ay nakipagpulong sa PCG upang pag-usapan at maisapinal na ang “No Registration, No Travel” policy strategic plans.  Kumbaga, walang unregistered vehicles ang makakasakay ng barko hangga’t hindi rehistrado ang kanilang mga sasakyan.

Sa nasabing datos, mayroong 48,714 mga motor vehicles, 133,744 naman ay mga motorsiklo. Samantalang naitala naman ang LTO-National Capital Region (NCR) office na may pinakamataas na bilang ng delingkuwenteng mga motor vehicle registrations sa kaparehong buwan na may bilang na 32,370 hindi rehistrado. Sinundan naman ito ng LTO-Region VII na mayroong 22,729; LTO Region III na may 22,133 at LTO-Region IV-A na may 18,428 bilang ng mga hindi rehistradong sasakyan.

Ang mga behikulong ito na halos karamihan ay paso na at hindi na naipaparehistro ng mga may-ari. Ipinaliwanag din ng LTO na mayroon pang 24 milyong motor vehicles na paso na ang rehistro, at karamihan nito ay pawang motorsiklo.  

Matagal na rin naman itong problema at sana nga ay maging positibo ang pagsanib-puwersa ng PCG at LTO. Inaasahan natin na ang joint force na ito ay magiging daan upang maalarma at sumunod ang mga pasaway na may ari ng mga sasakyan.

Sa palagay ko, kapag hindi pa rin lubusang maresolba ang problema nating ito, kinakailangan na nating kalampagin ang lahat ng otoridad upang makipagtulungan na sugpuin at hulihin ang mga delinquent motor vehicle owners.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.