DOTr, inutusan na gawing legal ang motorcycle taxi

ni Atty. Rodge Gutierrez @Mr. 1-Rider | Marso 5, 2024

Noong nakaraang linggo ay maraming rider ang naalarma makaraang mabalitang nakipagpulong kay Pangulong Ferdinand Bongbong Marcos, Jr. (P-BBM) ang pamunuan ng Grab Holdings Inc. kasama ang opisyal ng Department of Transportation (DOTr) sa pag- aakalang may ibang agenda na niluluto na posibleng makaapekto sa taxi industry sa bansa.

Para maibsan ang iniisip ng ilan sa mga lumahok sa isinagawang pilot study para sa mga motorcycle taxi sa bansa ay sinikap nating alamin kung ano ang naganap sa naturang pagpupulong.

Inatasan pala ni P-BBM ang DOTr na pag-aralan ang mungkahing gawing legal ang motorcycle taxi sa bansa.

Ito ang naging kabuuan sa ginanap na pakikipagpulong sa Pangulo sa Malacañang ng mga opisyal ng Grab Holdings Inc. sa pangunguna ng chief executive officer nito na si Anthony Tan, kasama ang mga opisyal ng DOTr at pinag-usapan ang mga inisyatiba para sa dagdag na oportunidad sa bansa at kung paano sila makatutulong sa progreso at maresolbahan ang problema sa kalsada.

Inihayag ni Tan ang interes ng kanyang kumpanya na palawakin ang negosyo sa Pilipinas kasama na rito ang paggamit ng electronic vehicles sa Grab services at public transport services, gayundin, ang pagnanais na ibahagi ang best practices nila na ipinapatupad sa ibang mga bansa na talaga namang ang iba rito ay lubhang nakamamangha.

Ayon sa Presidential Communication Office, kabilang sa mga pinag-usapan ang hirit ng Grab na luwagan ang regulasyon sa transport network vehicle service o TNVS.

Nais ng Pangulo na pag-aralan ng DOTr ang posibleng epekto ng kahilingan ng Grab at magsumite ng report at rekomendasyon hinggil dito. Pinag-usapan kung ano ang advantages at disadvantages sa mga iminungkahi ng Grab.

Plano ng Grab Philippines na palawakin ang kanilang operasyon sa 10 lungsod at mga bayan. Sa kasalukuyan ay mayroong tinatayang 40,000 drivers na nakarehistro sa Grab TNVS, 30,000 dito ay bumibiyahe sa Metro Manila, samantalang ang iba rito ay sa mga karatig bayan at lungsod ng Metropolis.

Sakaling aksyunan ng DOTr ang kautusan ni P-BBM ay tiyak na karagdagang trabaho at oportunidad ang naghihintay sa marami nating kababayan at kasunod nito ay magkakaroon na ng mga panuntunan na paiiralin para sa kaligtasan hindi lamang ng mga rider kundi ng mga pasahero.

Hindi na talaga maaawat ang pagdami ng mga rider sa bansa, kaya napapanahon na talaga na isaayos na lamang ang sistema upang tuluy-tuloy na makatulong sa pag-unlad ng bansa ang naglipanang mga rider.

Tanggapin na nating lahat na kailangang-kailangan na ang serbisyo ng motorsiklo sa bansa hindi lamang sa mga pasahero kundi maging ng maraming tanggapan sa bansa para mapabilis ang transaksyon ng mga opisina patungo sa ibang opisina at ang paghatid ng kanilang mga communication at mga dokumento sa pamamagitan ng motorsiklo ay isang progresibong pamamaraan.

Sa bilis ng mga transaksyon sa panahong ito dahil sa tulong ng teknolohiya ay mas makakasabay ang pagbibigay ng serbisyo gamit ang motorsiklo.

Sana lang ay hindi maipit ang mga rider sa iringan at hidwaan ng mga kumpanya ng mga motorcycle taxi para hindi na gumulo pa ang sitwasyon – ang mahalaga ay everybody happy. Sayang ang industriyang ito kung magugulo lamang ng iilan. Mas mabuting sa serbisyo tayo magpagalingan upang makita ng publiko kung sino ang mas dapat tangkilikin at hindi tamang hindi pa nag-uumpisa ay nagbabasagan na ang mga kumpanya ng motorcycle taxi na ito.

Bigyan lahat ng pagkakataon at hayaan nating ang mga pasahero ang mamili kung sino ang nais nilang tangkilikin.

Ang mahalaga ay payag na ang gobyerno na gawing legal ang motorcycle taxi na matagal na namang pangarap ng ating mga kababayan. Kung paano tayo nagbibigayan sa kalye, sana ganoon din tayo magbigayan sa pagkakataon para lahat ay kumita at mabuhay nang maayos. Ang pagtuunan natin ng pansin sa ngayon mga ‘kagulong’ ay kung paano natin pagbubutihin pa ang maingat na pagmamaneho upang makapaghatid tayo ng magandang serbisyo sa publiko.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Angkas, Joyride at Move It, pasok sa motorcycle taxi pilot study

ni Atty. Rodge Gutierrez @Mr. 1-Rider | Marso 2, 2024

Tatlong kumpanya lamang ang mapalad na pinahintulutan ng Department of Transportation Technical Working Group (DOTr-TWG) na sumali sa Motorcycle Taxi (MC Taxi) Pilot Study.

Ito ang inilahad ng Founder of Lawyers for Commuters Safety and Protection (FLCSP).

Napag-alaman na naglabas si DOTr-TWG Chairperson Teofilo Guadiz ng liham na may petsang February 1, 2024 na nagsasaad na ang Angkas, Joyride at Move It lamang ang nakapasa sa Motorcycle Taxi Pilot Study.

Hindi isinama ng DOTr-TWG ang Grab Philippines dahil sa “backdoor entry” nito sa industriya. Dahil dito, kumabit ang Grab sa Move It sa pag-asang makapasok sa industriya.

Ayon sa FLCSP, dapat pairalin ang desisyon ng DOTr-TWG na tatlong kumpanya lamang ang pahihintulutan sa MC Taxi Pilot Study at hindi dapat payagan ang foreign-owned company na makapasok sa app-based transportation system ng bansa.

Naging kontrobersyal din ang pahayag ng Grab Philippines na makakatanggap ng regulatory approval ang kumpanya na marahil ay resulta ng isinagawa nilang pagbisita kamakailan sa Malacanang ng kanilang mga opisyal at nakaharap si Pangulong Ferdinand “Bongbong” Marcos Jr. (P-BBM) at makausap na rin.

Dahil dito, marami sa industriya ang naalarma, kabilang na ang National Union of Food Delivery Riders, dahil hindi natutupad ang kautusan ng DOTr at nakuha pa umanong ipangalandakan ng Grab ang diumano’y koneksyon nila sa Malacanang at sa tingin ko nga ay naging isyu ang pagpunta ng Grab Philippines officials sa Palasyo.

Napakaganda ng layunin ng pilot study na ito at sana ay huwag maapektuhan ng kung anu-anong kontrobersiya lalo na at hindi naman kumpirmado ang mga nakasisirang tsismis para guluhin ang lahat.

Pagtiwalaan natin ang DOTr dahil sila ang itinalaga para sa bagay na ‘yan at maging ang tanggapan ni P-BBM ay nakakaladkad sa problemang ito na hindi naman sigurado kung may katotohanan o sadyang ipinakakalat lang ng mga matatabil ang dila na may masamang intensyon.

Sa pilot study na ito ay tiyak na may magtatagumpay at may hindi papalarin — sana lang ay tanggapin ng lahat kung anuman ang magiging resulta para sa ikabubuti ng lahat.

Hindi naman sa kapakanan ng mga kumpanya ang inayos dito, kundi para sa kapakanan ng mga rider at mga kababayan nating mabebenepisyuhan ng serbisyong maidudulot nito.

Kaya sa lahat ng mga kumpanyang kalahok o nais lumahok na hindi na naisama ay dapat na kumalma lang at darating din ang tamang panahon na magiging maayos ang lahat.

Dahan-dahan din sa pagbibitaw ng pahayag lalo pa’t may kaharap na media, partikular na sa mga detalyeng pinakakawalan na hindi naman sigurado, baka mamaya, haka-haka lang at kapag lumabas ang mga espekulasyong sinabi at naisulat na ng media ay magmumukha na itong totoo dahil nailathala na, kaya dapat mag-ingat para hindi gumulo ang sitwasyon.

Higit sa lahat ay napakarami ng nagmamasid dito, kaya malabong mangyari ang pangamba ng ilan nating ‘kagulong’. 

Ngayon, sakaling may nalaman kayong hindi karapat-dapat na pangyayari at kumpleto kayo ng ebidensya ay bukas ang pitak kong ito at agad kayong makipag-ugnayan. Hindi tayo magdadalawang-isip na ilantad ang katotohanan — basta totoo lang!

Panahon ito ng pangingilin, iwasan sana natin ang mag-isip ng hindi maganda sa isa’t isa at sana ay maging bahagi ng ating pag-ayuno ang bawat desisyon natin sa buhay ngayong Kuwaresma.

Ayokong magtunog relihiyoso ngunit, ito ang naiisip kong pinakamabuting paalala sa ganitong panahon at hindi tayo dapat nagkakahati-hati dahil lamang sa hindi kumpirmadong intriga —Amen.

Kung sakaling mangyari nga ang espekulasyon ng ilang kalahok sa pilot study na ito ay tiyak na isusulat din natin, kaya huwag kayong bibitaw sa pagsubaybay dahil ihahatid natin sa inyo ang mga pinakahuling pangyayari hinggil dito.   

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Legalisasyon motorcycle taxi, madaliin

ni Atty. Rodge Gutierrez @Mr. 1-Rider | Pebrero 29, 2024

Sa wakas ay bibigyang prayoridad ng Kamara de Representantes ang pagpasa ng panukala kaugnay ng legalisasyon ng motorcycle taxi at ireporma ang kasalukuyang regulasyon ng Transportation Network Vehicle Services (TNVS) sa bansa.

Alinsunod sa direktiba ni Pangulong Ferdinand “Bongbong” R. Marcos Jr. (P-BBM), tiniyak ni Speaker Ferdinand Martin G. Romualdez na bibigyang prayoridad ng Kamara ang pagpasa ng bill patungkol sa motorcycle taxi legalization.

Nauna nang ipinakita ni P-BBM ang pagnanais nito na bigyan ng mas maraming opsyon ang mga komyuter na Pilipino, batay sa kanyang suporta na gawing legal ang operasyon ng motorcycle taxi at paluwagin ang regulasyon sa TNVS.

Ang posisyon ni P-BBM ay kanyang inihayag matapos ang pakikipagpulong nito sa mga opisyal ng Grab Holdings Inc. sa Malacañang kung saan nabigyang-diin ang kahalagahan ng pagkakaroon ng mas maraming paraan ng pagbiyahe at solusyon sa mga problema sa sektor ng transportasyon.

Isang positibong direksyon na mismong si Speaker Romualdez ay nagpapakita ng kagustuhang isulong ang kapakanan ng ating mga kababayan pagdating sa kahalagahan na mapaunlad ang transportasyon sa bansa.

Layunin ng panukala na tugunan ang mga balakid sa legal na pagbiyahe ng mga motorsiklo na ipinagbabawal sa kasalukuyang batas.

Sa ngayon ay nag-o-operate ang mga motorcycle taxi sa Metro Manila at Cebu sa ilalim ng pilot testing lamang na sinimulan noong 2019.

Magandang nakita na rin ng lider ng Kamara na may nakabinbing motorcycle taxi bill na pakikinabangan ng ating mga kababayan na magkaroon ng pagkakakitaan mula sa industriya ng motorcycle taxi.

Mayroong nakabinbin na motorcycle taxi bill sa Kamara, kung saan nakapaloob din ang pagkakaroon ng regulasyon para sa mga App-Driven Transport Network Companies.

Layunin ng regulasyon na matiyak ang kaligtasan ng mga pasahero at maging kabalikat ito sa pagpapaunlad ng bansa. Sa kabuuan, ang pagkakaroon ng maayos at organisadong panuntunan ay nagpapahiwatig na talagang nagiging progresibo na ang ating bansa.

Nagkakaroon na ng liwanag ang ating ipinaglalaban na regulasyon at magiging madali na rin ang proseso sa mga panuntunan ng ating lumolobong sektor.

Ang legalisasyon ng motorcycle taxi ay magiging malaking tulong sa mithiing magkaroon ng pagpipilian ang mga pasahero, drivers at mga negosyo lalo na ang MSMEs.

Ang hakbanging ito ay hindi lamang upang matugunan ang pangangailangan para mas mapabilis ang biyahe ng mga pasahero kundi nag-aambag din ito sa mabilis na pagbangon ng ekonomiya at iba pang pagkakataon sa bansa. Positibo ang ating hakbangin sa Kongreso mga ‘kagulong.’

Nakakataba ng puso mga ‘kagulong’ na ang pagbibigay prayoridad ni Speaker Romualdez sa House Bill 3412 na akda mismo ng 1-Rider Partylist ay tugon ng Kamara sa pagpapaganda ng transportation infrastructure at regulatory environment ng bansa alinsunod sa pagnanais ng Pangulo na makasama sa pag-unlad ng Pilipinas.

Kaugnay nito, nanawagan din si Speaker Romualdez sa aming mga kasamahan sa Kongreso na suportahan ang panukala at iginiit ang positibong epekto nito sa mga komyuter, sektor ng transportasyon, at ekonomiya ng bansa.

Sana ay hindi na magkaroon ng kahit maliit na problema upang maisakatuparan na natin ang matagal ng minimithi ng ating mga ‘kagulong’ na maging legal ang motorcycle taxi sa bansa. Maghawak-hawak tayo ng kamay mga ‘kagulong’ at sabayan natin ng panalangin upang makamit ang matagal na nating pinagsisikapan.

Sabagay, masyado nang matagal ang ating pinaghihintay para maging legal na ang motorcycle taxi sa bansa na kung hindi pa maisasaayos ay inaasahang manganganak pa ng iba’t ibang problema sa mga darating na panahon.

Sa balitang ito ay tiyak na marami sa ating mga ‘kagulong’ ang mataas ang moral dahil nakakita tayo ng bagong pag-asa. Kapakanan lamang ng ating mga kababayan ang ating prayoridad.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.