E-bikes at e-trikes, dapat isyuhan na rin ng plaka

ni Atty. Rodge Gutierrez @Mr. 1-Rider | Marso 19, 2024

Isa sa pinakamagandang hakbangin ng Land Transportation Office (LTO) ay ang pagsasagawa ng konsultasyon sa mga stakeholder bago bumuo ng guidelines at regulations para sa mga may-ari ng e-bikes at mga ‘di rehistradong electric vehicles.

Inanunsyo ni LTO Chief Assistant Secretary Vigor Mendoza II na kailangang konsultahin ang nasabing sektor para malaman kung dapat ipatupad ang pagpaparehistro ng e-vehicles o kung dapat bang obligahin ang mga gagamit nito na magkaroon ng driver’s license.

Kinumpirma naman ni Mendoza na ang nasabing konsultasyon ay kaugnay ng utos ni Transportation Secretary Jaime Bautista na kausapin ang stakeholders bago i-finalize ang regulations para sa e-bikes.

Madalas ay pinupuna natin ang mga ahensya ng pamahalaan dahil sa pagkukulang, ngunit sa pagkakataong ito ay bigyan natin ng pagsaludo ang pamunuan ng LTO dahil sa napakaganda nilang hakbanging ito.

Matagal na kasing umiingay ang nakaambang paghihigpit sa e-bike at e-trikes, na pinagbibigyan na ng Department of the Interior and Local Government (DILG) ng sariling ruta at ipagbabawal na sa main road.

Dahil sa napakarami ng e-bikes at e-trikes sa iba’t ibang bahagi ng bansa ay napakaganda ng naging desisyon ng LTO na kausapin muna silang lahat bago magpatupad ng ano pa man.

Sa ganitong paraan, maiiwasan ang hidwaan sa pagitan ng mga kababayan nating ang pamamasada gamit na e-trike lamang ang kanilang pinagkakakitaan.

Malaking problema rin kasi na wala namang driver’s license ang mga nagmamaneho ng e-bikes at e-trikes kaya mahirap silang displinahin dahil sa hindi sila mapapanagot.

Problema rin na naglipana na ang e-bikes at e-trikes na sakaling masangkot sa aksidente ay walang mga rehistro.

Ngunit, ngayong itutuloy na ng LTO ang plano nilang konsultasyon ay inaasahang magiging maayos na ang lahat.

‘Yan ang pinakatamang naisip ng LTO, maiiwasan ang kaguluhan dahil magkakaroon na ng panuntunan at regulasyon na pare-pareho nilang napagkasunduan.

Karaniwang gawang China kasi ang mga e-bikes at e-trikes, at napakagaan at maliliit ang mga bakal lalo na ‘yung e-trikes na sinasakyan ng mahigit sa anim na pasahero, na kung mababangga ay tiyak na durog, kaya dapat na talagang umaksyon ang pamahalaan.

Hindi hamak na matibay ang tricycle sa mga e-trike na ito, at ang tanging lamang ng e-trike ay balanse ang mga gulong at hindi maingay kumpara sa tricycle na sobrang sikip.

Kung ang tricycle ay hinuhuli kapag dumaraan sa main road, bakit ang e-trikes ay hindi lalo na sa Pasay City na sanay na ang mga tao na sumakay sa e-bike na may sidecar at e-trike.

Dapat lang talaga na isyuhan na rin ng plaka ang mga e-trikes at e-bikes dahil kahit sa kahabaan ng EDSA ay may nakikitang e-bikes na nakikipagsabayan sa motorsiklo at hindi nagsusuot ng helmet.

Sana, isama na rin ‘yung mga naka-e-scooter na akala mo ay laruan lamang pero ginagawa nang normal na transportasyon ng ating mga kababayan at karaniwan ay mga bata lamang ang nagmamaneho at nakikipag-agawan pa sa lansangan.

Marami ng motorista ang excited sa pagbabagong ito sa ating mga kalsada – sana maramdaman na ito pagkatapos ng Mahal na Araw.

Sa expressway ay hindi puwedeng dumaan ang mga maliliit na sasakyan lalo na ang motorsiklo dahil delikado umano — sana naman ay bigyan din ng sukat ang bigat ng e-bike na papayagan sa lansangan dahil sobrang dami ng maliliit kabilang na d’yan ang scooter na walang upuan at nakatayo lamang ang nagmamaneho.

Hindi na kasi ‘yan mapapansin ng mga truck driver kapag tumabi sa kanilang malaking sasakyan -- kapag biglang lumiko ang truck at hindi sila napansin ay tiyak na sa sementeryo sila pupulutin at kasalanan ng kawawang truck driver.

Ang laki na pala talaga ng epekto ng e-bikes at e-trikes, pero may mabuti naman silang epekto sa kalikasan, kaya nga kahit ang mga kotse ay unti-unti nang ginagawang electric.

Huwag naman sanang sasama ang loob ng mga may-ari ng e-bike at e-trike dahil para sa kapakanan n’yo rin ang iniisip ng pamahalaan upang hindi tayo magsisisi sa huli.

Sa LTO, congratulations at good luck para sa tagumpay ng hakbangin n’yong ito!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Motorcycle taxi, epektib na pamalit sa tigil-biyaheng PNR

ni Atty. Rodge Gutierrez @Mr. 1-Rider | Marso 16, 2024

Sa darating na Marso 28 ay pansamantalang matitigil ang operasyon ng mga tren ng Philippine National Railways (PNR) upang bigyang-daan ang pagpapagawa ng North-South Commuter Railway (NSCR) project.

Ito ang anunsyo ng Department of Transportation (DOTr) na inaasahang malaking epekto sa panig ng mga pasahero na sanay sumakay ng tren araw-araw patungo sa kani-kanilang mga trabaho at eskwela.

Paliwanag ng PNR, kailangan umanong suspendihin ang operasyon ang biyahe ng mga tren upang mapabilis ng walong buwan ang NSCR Project at makatipid ng P15.18 bilyon mula sa naturang proyekto.

Higit sa lahat ay binigyang prayoridad umano ng DOTr ang kaligtasan ng mga pasahero habang ginagawa ang NSCR. 

Tiniyak naman ng DOTr at Land Transportation Franchising and Regulatory Board (LTFRB) na mayroon nang mga alternatibong ruta ng bus para sa mga pasaherong apektado sa tigil-biyahe ng PNR.

Ang mga bus na biyaheng Tutuban patungong Alabang at pabalik ay inaasahang magsasakay at magbababa ng pasahero malapit sa kasalukuyang ruta ng PNR.

Inaasahan ng PNR na higit 30,000 pasahero kada araw ang apektado ng pansamantalang pagsasara ng mga biyahe nito sa Metro Manila.

Nangako naman ang DOTr na sakaling matapos ang NSCR project ay mas marami pang pasahero ang makikinabang dito.

Tinawag ng pamahalaan ang NSCR project na magiging “state-of-the-art 147 kilometer rail line” at inaasahan umano na mababawasan ng dalawang oras ang haba ng biyahe mula sa Clark, Pampanga hanggang sa Calamba, Laguna.

Dagdag pa ng DOTr na nasa 800,000 pasahero, kada araw ang inaasahan nilang makakasakay ng tren kapag natapos ang proyekto at mababawasan din ang trapik sa Metro Manila.

Sa mga pagkakataong ito ay tiyak na bidang-bida na naman ang ating mga ‘kagulong’ tulad ng mga motorcycle taxi na palaging maaasahan sa mga ganitong sitwasyon.

Hindi maitatanggi na napakarami na nating kababayan ang suki ng mga motorcycle taxi at tulad noong kasagsagan ng pandemya ay napakalaki ng naging tulong ng ating mga ‘kagulong’.

Palagi kasi nating minimenos ang mga motorsiklo sa kalsada, ngunit sana ay ma-appreciate naman natin sa pagkakataong ito ang napakalaking serbisyo ng motorsiklo sa publiko.

Ilang tigil-pasada na ba ang nabigong pahirapan ang mga pasahero dahil sa pagsaklolo ng motorsiklo.

Kaya kahit limang taon tayong maaapektuhan ng tigil-operasyon ng PNR ay huwag tayong mag-alala dahil laging nakaalalay sa atin ang mga motorsiklo sa bansa na handang magbigay ng serbisyo sa mga ganitong uri ng pangangailangan.

Hindi biro ang halos isang milyong pasahero na matetengga kung wala ang mga motorcycle taxi.

Sana ay makita na ng marami nating kababayan ang mabuting dulot ng pagdami ng motorsiklo sa bansa dahil hindi lang naman sa atin dumagsa ang motorsiklo kundi maging sa iba’t ibang bansa.

Sa bilis ng takbo ng negosyo at mga bagay-bagay dahil sa teknolohiya ay mahihirapan tayong sumabay sa pagkilos kung wala ang motorsiklo.

Kaya sa mga nagmamaneho ng four-wheeled vehicle o higit pa ay huwag naman nating gipitin ang mga nakamotorsiklo dahil pare-pareho lang tayong may karapatang gumamit ng kalsada — kaya magbigayan sana tayo.

Ang mga delivery na may lulang mainit na pagkain ay kailangang maihatid kaagad sa umorder bago lumamig at tanging motorsiklo lamang ang puwedeng gumawa n’yan ng walang problema.  

Nag-evolve na ang mundo, marami na tayong nakasanayan sa makabagong panahon at kaakibat natin dito ang serbisyo ng motorsiklo kaya huwag tayong mainit sa kanila, lalo na sa ilang ahensya na hindi pantay ang pagtrato sa mga four-wheeled vehicle at motorsiklo pagdating sa check point.

Kapag may krimen ay palaging motorsiklo agad ang inuunang pinapara para inspeksyunin kung may dalang armas, samantalang halos walang mapaglagyan ang motorsiklo. Pero ang mga kotse o van na kahit mahahabang armas na kasya ay hindi naman prayoridad sa pagtugis.

Mahalin natin ang mga nakamotorsiklo sa kalsada dahil tulad ng palagi kung sinasabi ay kaakibat natin sila sa pagsulong ng ekonomiya.

Maayos na pagtrato lang naman ang hiling ng ating mga ‘kagulong’.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Ambulansyang rumaraket na pampasaherong van, sampulan

ni Atty. Rodge Gutierrez @Mr. 1-Rider | Marso 14, 2024

Katapusan na ng mga lehitimong ambulansya na rumaraket bilang pampasaherong van dahil nabuko na ang kanilang ilegal na sistema at tutugisin na sila ng pinagsanib na puwersa ng Land Transportation Office (LTO) at Department of Health (DOH) upang mahuli ang mga kolorum na ambulansya.

Ang hakbang ng LTO ay bunsod ng reklamo na may mga ambulansya umano ang ginagamit na pampasaherong van at dumaraan pa sa EDSA busway para makaiwas sa trapik.

Balak ng kagawaran na mag-isyu ng QR code sa mga lehitimong ambulansya upang madaling maispatan ng mga enforcer kung lehitimo o kolorum ang ambulansya.

Sinabi ni LTO Director for Law Enforcement Service Francis Ray Almora sa isang forum na maraming ambulansya ang lumalabag sa rules and regulations ng ahensya.

Ang ambulansya umano ay dapat na asul lang ang ilaw habang ang pula, puti at asul na ilaw ay para sa mga alagad ng batas. May mga ambulansya na gumagamit umano ng pula, puti at asul na blinker.

Kahit na walang sakay na pasyente, gumagamit pa rin ng blinker ang maraming ambulansya at kapag nasita naman ay ikakatuwiran na susunduin pa lamang ang pasyente.

Ipinagtapat mismo ni Department of Transportation Command and Control Operation Center (DOTr-COCC) Chief Charlie Del Rosario, na may mga nahuli na silang ambulansya na ginawang pampasaherong van.

Napag-alaman na may ilang ambulansya umanong nasakote na imbes na medical equipment ang karga ay mga pasahero mula sa kung saan-saang terminal at dinadala sa iba’t ibang bahagi ng Metro Manila.

Mas pinipili na umano ng mga pasahero ang pagsakay sa ambulansya dahil walang trapik at pareho rin ang pamasahe sa mga ordinaryong van.

Mabuti nga at hanggang maaga ay nadiskubre na ang raket na ito ng mga driver ng ambulansya dahil hangga’t hindi ito natitigil ay maraming kababayan natin ang malalagay sa peligro dahil sa walang ambulansyang magamit.

Karamihan sa mga driver na nagmamaneho ng ambulansya ay mga empleyado ng gobyerno, kaya marapat lamang na patawan sila ng karampatang kaparusahan upang hindi na pamarisan.

Kakaiba ang anomalyang ito, marahil ay matagal na itong nangyayari dahil sa alam na ng mga pasahero kung anong ambulansya ang kanilang aabangan para sakyan.

Maraming anomalya ang nauuso dahil gaya-gaya lang, pero ang gawing pampasaherong van ang ambulansya ay kitang-kita kung paano mag-isip ang ilan sa ating mga kababayan pagdating sa kalokohan. 

At kung walang nahuling ambulansya na puno ng sakay na pasahero ay hindi pa ito madidiskubre, na ibig sabihin sumusuweldo na ang driver ng ambulansya ay may karagdagang kita pa sa pamamasada.

Ang masaklap, kapag nasira ang ambulansya ay ang ospital o ang gobyerno pa ang nagbabayad pero iba ang nakikinabang.

Sabagay, panahon na para maghigpit sa mga ambulansya dahil marami na ring insidente na ginagamit sa pagbibiyahe ng illegal drugs tulad ng nasakote sa lalawigan ng Rizal na milyun-milyong piso ang nasabat na droga at minamaneho pa ng government official.

May mga ambulansya rin na ginagamit sa pagnanakaw ng motorcycle na binubuhat kahit naka-lock pa ang motorsiklo at isinasakay lang sa ambulansya para mabilis na makatakas.

Pero sa tingin ko ay pinakamalala na itong gawing pampasaherong van ang isang ambulansya at hindi natin alam kung gaano na katagal ang istilong ito — mabuti at nadiskubre na.

Sa mga kababayan nating pasahero, sana naman ay huwag na nating tangkilikin ang mga namamasadang ambulansya dahil kinukunsinte lang natin ang kanilang kalokohan.

Isa-isantabi na muna natin ang pansariling kapakanan na mas mabilis ang biyahe ng ambulansya kumpara sa jeepney at van dahil kapalit nito ay ang serbisyong dapat para sa nagmamadaling maysakit na maisalba ang buhay.

Dumarami na ang mga kaso na kinasasangkutan ng ambulansya, marahil ay panahon na para baguhin ang hitsura ng ambulansya — baka puwedeng gawing transparent o kita ang loob mula sa labas para hindi na maabuso sa kalokohan.

Kaya good luck sa LTO at DOH! Sana ay makahuli agad kayo ng mga pasaway na ambulansya para masampahan agad ng kaso o kaya ay maalisan ng lisensya ang driver.

Ibang klase talaga, ambulansya, ginagawang pamasada — only in the Philippines! Hindi ko alam kung matatawa ako o maiinis.

Sa mga manufacturer, baka puwede kayong maglabas ng bagong disenyo ng ambulansya na kitang-kita ang loob para maibsan na rin ang masamang tingin sa ambulansya na minsan ay lehitimo naman ang pagmamadali pero iba ang iniisip ng ilan sa ating kababayan.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.