Panawagan sa White Ribbon March... Lahat ng korup, dapat managot

ni Jeff Tumbado @News | June 29, 2026

Photo: NAGMARTSA ang isang grupo na ito sa kahabaan ng EDSA sa Quezon City, patungo sa EDSA Shrine bilang pakikiisa sa malawakang kilos-protesta na White Ribbon March. (Jeff Tumbado)

Dumalo sa martsa ang mga lider ng Simbahan, civil society groups, progresibong grupo, at iba pang organisasyon na nagpahayag ng kanilang panawagan para managot ang lahat ng kurakot.

Nagsimula ang programa sa pagdaraos ng banal na misa sa EDSA Shrine, bago sila nagmartsa patungo sa People Power Monument, kung saan idinaos ang pangunahing programa ng pagtitipon.

Ayon sa mga organizer, ang White Ribbon March ay isang mapayapa, hindi partidista, at nakabatay sa pananampalatayang pagkilos na layuning ipahayag ang lumalaking pagkabahala ng publiko sa mga usapin ng korupsiyon.

Sinabi ng White Ribbon Movement na layunin ng martsa na pag-isahin ang mga Pilipino mula sa iba't ibang relihiyon at sektor upang hikayatin ang mga otoridad na magsagawa ng patas na imbestigasyon sa korupsiyon, palakasin ang mga mekanismo ng pananagutan sa pamahalaan, at isulong ang mga reporma, kabilang ang mga hakbang laban sa political dynasty.

Iginiit din ng grupo na hindi ito sumusuporta o kumokontra sa anumang partidong pampulitika o kandidato.

Nauna nang nagpahayag ng suporta ang Catholic Bishops' Conference of the Philippines (CBCP) sa pagtitipon at hinikayat ang mga nagnanais na lumahok na gawin ito nang mapayapa at may panalangin.

Nakiisa rin sa martsa ang mga lider mula sa iba't ibang denominasyong Kristiyano, Muslim, at Protestante, na nagsabing ang pagkilos ay isang moral na panawagan para sa katotohanan, katarungan, at responsableng pamamahala.

Nag-deploy naman ang National Capital Region Police Office ng mahigit 9,500 pulis sa iba't ibang bahagi ng Metro 

Sa tantya ng mga otoridad, aabot sa humigit-kumulang 10,000 ang kabuuang bilang ng mga lumahok.

Naging mapayapa ang pagtitipon at wala namang naitalang malaking insidente hanggang sa pagtatapos ng programa.

Barilan sa NLEX, 3 sapul

ni Jeff Tumbado @News | June 28, 2026

Photo: Circulated

Nagkaroon ng engkuwentro sa pagitan ng mga pulis at tatlong hinihinalang sangkot sa serye ng nakawan, sa kahabaan ng North Luzon Expressway (NLEX) nitong Biyernes, na nauwi sa pagkakaaresto sa mga suspek.

Ayon kay Police Regional Office 3 Regional Director Brig. Gen. Jess Mendez, tinutugis ng pulisya ang mga suspek kaugnay sa magkakahiwalay na insidente ng panghoholdap sa mga minimart na naganap noong Lunes at Miyerkules sa Magalang, Pampanga at Victoria, Tarlac.

Dito namataan umano ang mga suspek sa Rosales, Pangasinan bago nagtungo sa Tarlac at Bulacan.

Nagpakalat ang pulisya ng mga operatiba sa iba't ibang toll plaza at exit ng NLEX upang harangin ang kanilang sasakyan.

Sinabi ni Mendez, nang papalapit ang sasakyan ng mga suspek sa barrier ng Bocaue Toll Plaza, dito na pinaputukan ang mga nakapuwestong miyembro ng SWAT, dahilan upang gumanti ng putok ang mga pulis.

Sugatan ang mga suspek matapos ang ilang minutong engkuwentro kung saan agad silang nabigyan ng paunang lunas ng medical team ng NLEX.

Nilinaw din ng opisyal na wala pa silang natatanggap na ulat na may sibilyan o motorista na tinamaan ng ligaw na bala sa kasagsagan ng engkuwentro.

Sa pagkamatay nina Rene at Divine — CIDG... Coach Baldwin, 10 pa, kasuhan sa hazing

ni Jeff Tumbado @News | June 27, 2026

Photo: The Guidin / FIle

Natanggap na ng Department of Justice (DOJ) ang referral o rekomendasyon ng PNP-Criminal Investigation and Detection Group (CIDG) ang pagsasampa ng mga kasong kriminal kaugnay sa pagkamatay nina Rene Baterbonia at Divine Adili.

Ito ang kinumpirma ng DOJ kasabay ng paglalahad sa mga kaso sa ilalim ng Anti-Hazing Act at iba pang posibleng paglabag sa batas kaugnay ng Ateneo drowning incident sa Aurora.

Kabilang sa mga personalidad na posibleng kasuhan ay si resigned Ateneo Men's Basketball Team Head Coach Tab Baldwin at 10 iba pa.

Ayon kay DOJ spox Atty. Polo Martinez, kabilang sa maaaring ikonsiderang kaso ang homicide at reckless imprudence resulting in homicide, depende sa magiging pagsusuri sa mga ebidensyang isinumite.

Sisimulan muna ng DOJ ang initial evaluation upang matukoy kung sapat at kumpleto ang mga dokumento para sa karagdagang proseso.

Kung kulang ang ebidensya, maaari itong ibalik para sa karagdagang case build-up kasama ang CIDG.

Kung sapat naman, isasailalim ito sa preliminary investigation.

Giit ni Martinez na isasagawa nila ang pagsusuri nang mabilis ngunit patas, batay sa ebidensya at umiiral na batas.