Paggamit ng vape hindi humahantong sa paninigarilyo, ayon sa pag-aaral

ni Chit Luna @Brand Zone | September 30, 2023

Walang nakitang palatandaan na ang paggamit ng vape at iba pang alternatibong produkto ay humahantong sa paninigarilyo, ayon sa isang pag-aaral ng mga dalubhasa.

Sinabi ni Prof. Peter Hajek ng Wolfson Institute of Population Health sa Queen Mary University of London at isa sa may akda ng pag-aaral, na ang resulta nito ay nagpapakita ng ang pag-access sa e-cigarette at iba pang smoke-free products ay hindi nagtataguyod ng paninigarilyo.

Sinabi ni Prof. Hajek na sa katunayan ay nakikipagkumpitensya ang mga smoke-free products tulad ng e-cigarette at heated tobacco sa sigarilyo.

Ang pag-aaral ay nag-imbestiga kung ang e-cigarette ay nagsisilbing gateway sa paninigarilyo. Nakita nito na sa halip magtulak sa paninigarilyo, ang mga smoke-free products ay nakikipagkumpitensya laban sa sigarilyo at maaaring mapabilis sa pagtigil ng paninigarilyo. Ang pag-aaral ay inilathala ng Public Health Research at pinondohan ng National Institute for Health and Care Research (NIHR).

Tinanggap naman ng mga consumer group at tobacco harm reduction (THR) advocates sa Pilipinas ang resulta ng pag-aaral. Ayon kay Joey Dulay, presidente ng Philippine E-Cigarette Industry Association, ang pag-aaral ay nagpapakita lamang na ang mga vaper ay hindi nagiging smoker sa kalaunan.

“Sa mga kaedad namin, wala akong nakitang vaper na naging smoker. Sa katunayan, kilala ko ang maraming dating naninigarilyo na ngayon ay gumagamit na ng e-cigarette, na less harmful kaysa sa nasusunog na tabako,” dagdag ni Dulay.

Sinabi ni Dr. Lorenzo Mata ng advocacy group na Quit for Good na ito ang dahilan kung bakit mahalagang itaas ang kamalayan ng mga konsyumer sa malaking pagkakaiba ng panganib sa pagitan ng vape at tradisyonal na sigarilyo.

“Kung igigiit ng mga organisasyon tulad ng World Health Organization na ang mga smoke-free products at ang sigarilyo ay may parehong antas ng panganib, maaring bumalik nga sa paninigarilyo ang mga vapers. Subalit maraming mga Filipino vapers, batay sa kanilang karanasan, ay nakakaalam na ang kanilang ginagamit ay 95-porsiyento na mas mabuti kaysa sigarilyo, ayon na di sa mga siyentipikong pag-aaral sa UK at iba pang mga progresibong bansa sa buong mundo,” sabi ni Dr. Mata.

Sinabi ni Dr. Mata na ang resulta ng pag-aaral ay dapat ding magbigay ng mahalagang input sa mga kalahok sa WHO Framework Convention on Tobacco Control's 10th Conference of Parties na gaganapin sa Panama City sa Nobyembre 20-25, 2023.

"Ang pangunahing argumento ng WHO laban sa mga e-cigarette ay ang mga produktong ito ay nagsisilbing gateway sa paninigarilyo.

Ngunit ang natuklasan ng pag-aaral na ito ay salungat dito. Dapat suriin ng mga bansa ang dogmatiko at hindi siyentipikong posisyon ng WHO bago aprubahan ang mga bagong panukala ng pagbabawal sa mga alternatibong may lubhang maliit na panganib na dulot kumpara sa sigarilyo," sabi ni Dr. Mata.

Sinabi rin ng mga consumer group na ang mga panukala ng WHO FCTC sa COP10 ay kontra sa paninindigan ng mga bansa tulad ng United States, United Kingdom, New Zealand, Canada, Japan, South Korea, Sweden at Pilipinas na kumikilala na ngayon sa konsepto ng tobacco harm reduction.

Inihambing ng pag-aaral ang paggamit at pagbebenta ng vape at paninigarilyo sa mga bansa. Inihambing nito ang United Kingdom at United States kung saan pinapayagan ang paggamit ng vape sa Australia, kung saan ipinagbabawal ang pagbebenta ng mga produktong ito.

Natuklasan ng pag-aaral na ang pagbaba ng paninigarilyo sa Australia ay mas mabagal kaysa sa UK at US.

Sinabi ni Prof. Lion Shahab, co-author ng pag-aaral at co-Director ng UCL Tobacco and Alcohol Grupo ng Pananaliksik, na ang komprehensibong pagsusuri na ito ay nagbibigay ng katiyakan na ang paggamit ng e-cigarette ay hindi nag-aambag sa paninigarilyo.

Ang resulta ay nagmumungkahi na ang e-cigarette ay nakakabawas sa pinsalang dulot ng sigarilyo sa mga bansang pinapayagan ito.

Sinabi naman ni Prof. Brian Ferguson, Direktor ng Public Health Research Program (NIHR), na kailangan pa ng mas maraming pananaliksik sa isyung ito.

#vape #vaping

Buhay at gumagalaw pa... Bulate na may 3-pulgada ang haba, nakita sa utak ng tao

ni Jenny Rose Albason @Gulat Ka 'No?! | September 10, 2023

Bulate sa tiyan, oo, pero sa utak at buhay pa, talaga ba?!!

Nagulat ang mga doktor sa Australia sa natuklasang buhay na bulate sa utak ng isang babaeng pasyente.

Simula taong 2021, ginagamot na ng mga doktor ang 64-anyos na babae gamit ang steroid at iba pang gamot para sa pneumonia, pananakit ng tiyan, pagtatae, tuyong ubo, lagnat at pagpapawis tuwing gabi.

Pagsapit ng 2022, nagpakita rin siya ng mga sintomas ng depresyon at pagiging makakalimutin, kaya nagsagawa ang mga doktor ng isang MRI scan sa kanyang utak, at may nakitang abnormalities na naging dahilan upang magrekomenda ang mga doktor ng operasyon.

Hanggang sa madiskubre ng surgical team ang 3-pulgada at mapulang bulate o Ophidascaris robertsi na karaniwang makikita sa ahas, at hindi sa tao. Posible umanong ito ang unang pagkakataon.

Ang partikular na roundworm na ito ay matatagpuan sa mga carpet python, isang malaking species ng constrictor na endemic sa Australia, Indonesia at Papua New Guinea.

Hindi pa matiyak ng mga doktor kung paano nakapasok ang bulate ng ahas sa katawan ng babae. Wala umano siyang direct contact sa mga ahas, bagama't naninirahan siya malapit sa isang lawa kung saan maraming ahas.

Ayon sa mga eksperto, posibleng ang mga itlog ng bulate ay nasa ilang halaman na nakakain o kilala bilang New Zealand spinach na kinokolekta ng babae para sa pagluluto.

Dahil wala pang taong na-diagnose na may ganitong parasitic infection, kinailangan ng mga doktor na i-adjust ang gamutan ng pasyente sa loob ng ilang buwan upang gamutin ang kanyang mga sintomas.

Ang kauna-unahang impeksyon na ito ay nagpapakita kung paano ang mga sakit na dating matatagpuan lamang sa mga hayop ay mabilis na lumilipat sa mga tao.

Buwan-buwan na lang nahihirapan… Alamin: Mga simpleng paraan para maiwasan ang dysmenorrhea

ni Mabel G. Vieron @Gulat Ka 'No?! | August 21, 2023

Natural na sa kababaihan ang pagkakaroon menstrual cramps buwan-buwan.

Kadalasan, sinasamahan pa ito ng pananakit ng balakang, at iba pang sintomas ng dysmenorrhea gaya ng:

• Pananakit ng ulo

• Pagiging moody

• Pagsusuka

• Diarrhea

• Pananakit ng katawan

• Kawalan ng gana gumawa ng usual activities

• Pagiging emotional

• Pagiging tender ng dibdib

• Bloating o ang pakiramdam na matigas at malaki ang tiyan kumpara sa normal nitong laki.

Walang babaeng hindi nakakaranas ng menstrual pain tuwing may dalaw. Mayroon nga lang iba na hindi gaanong matindi ang sakit na nararanasan kapag may menstruation.

Para hindi gaano tumatagal ang menstrual cramps, maaaring uminom ng gamot sa dysmenorrhea upang maibsan ang pananakit ng puson. Nakakatulong sa pag-inom ng gamot sa sakit ng puson ang pagkakaroon ng ovulation calendar o ang talaan ng mga araw sa iyong menstrual cycle.

Sa ganitong paraan, madaling tukuyin kung anong araw dapat uminom ng gamot bago pa man magsimula ang dysmenorrhea.

Hindi lamang sa pag-inom ng gamot nama-manage ang sakit na dala ng dysmenorrhea tuwing may buwanang dalaw. Narito pa ang ilan sa mga paraan para mas maging maayos ang pakiramdam tuwing may menstruation at makapagpatuloy sa araw-araw na routine sa kabila nito:

1. MAGKAROON NG LOW-FAT DIET. Makakatulong ito na maiwasan ang sobrang sakit na sanhi ng dysmenorrhea. Marami ring benepisyo ang pagsasama ng herbs sa meal plan. Ilan sa mga ito ang ginger, cinnamon, at chamomile. Nakaka-relax ito ng muscles at nakapagbibigay ng relief mula pananakit ng katawan. Maigi rin na idagdag ang mga pagkaing ito para mabawasan ang menstrual pain:

• Mga prutas gaya ng papaya, avocado, o saging;

• Brown rice

• Chicken o fish

• Cucumber

• Dairy products

• Watermelon

• Green leafy vegetables

Inirerekomenda rin ang pag-inom ng maraming tubig para manatiling hydrated dahil sa dami ng fluids na inilalabas ng katawan kapag may regla. Nakakatulong din ito para umayos ang daloy ng dugo sa katawan.

2. MAG-EXERCISE. Hindi lamang tuwing dadating ang buwanang dalaw dapat mag-ehersisyo. Gawin itong normal na bahagi ng iyong lifestyle nang sa gayon, kapag may menstruation, magiging mas magaan ang pakiramdam.

3. GUMAMIT NG WARM COMPRESS. Nakakaginhawa para sa masakit na puson ang paggamit ng warm compress. Nare-relax ang muscles at gumaganda ang daloy ng dugo sa katawan. Puwede rin itong ipatong sa balakang para makadagdag-ginhawa mula sa pananakit ng puson.

4. MAGPAHINGA. Nakakapanghina ang sakit na dala ng dysmenorrhea. Hangga’t maaari, iwasan ang labis na physical at social activities sa tuwing may buwanang dalaw nang sa gayon ay makapahinga ang katawan mula sa nangyayari sa loob nito.

Kung hindi nawawala ang menstrual cramps at sakit na dala nito sa pamamagitan ng mga nabanggit na tips, huwag mag-atubiling kumonsulta sa doktor para matukoy kung ano ang angkop na hakbang na dapat isagawa. Ipagbigay-alam sa healthcare provider ang mga sintomas na nararanasan maging ang mga hakbang na isinagawa para magkaroon ng relief para ma-assess nito kung saan ba nanggagaling ang problema.

Okie?